Duteronomi 22 - Nobonob Baibel

¹ Am na mudippan layap laanu makau okkai ebehi ele, o sipsip laa oola oiyebeb anidna amu, na aib eheɗ hena uuidppe ukkom. Iitta! Na aɗan aon gona, mameg medakkut!

² Amu doɗ amu mameg nug na guguittak ii daatte dayeb, o doɗ amu mameg, na nug ii doottem dayeb amu, na aɗan, lakka gona guman daappe, mameg nug mattia oiyeb anidna, amu medakkut.

³ Anamib, mudippan layap laa, nuhig donki, lamen, o keeke laa ele layap nug he qettoɗom dayeb, na anidkkut amu, na aib eheɗ hena ii atognome.

⁴ Na mudippan layap laa, nug nuhig donki o makau okkai ebehi ele ibppa na qa niieb anidna amu, na aib eheɗ hena, layap uuidme. Na gona, layap ehanidppe, doɗ eɗua ahaɗ!

⁵ Ah ag danab dilag lamen ii takkaglagoitte, danab ag ah dilag lamen ii takkaglagoitte. Aɗinu? Yawe, ahilag Kayak, Nug danab ah anam hettebnu ooppa uuaknab dootte.

⁶ Am na ai teɗ laa wanppa, o ad laa attan, ooppa nag ele, o oppa elete dayeye, anig nug teɗuppa dayeb anidna, na aib anig, nag ele diime.

⁷ Am na nahip-ppa ena ba daakkunu, nahip bau dayak haen elab daakkunu amu, na nag aokkut, amge anig am uuppe ukkaɗ!

⁸ Amu haen na lag bau henana, na at, lag koɗokko uɗem ukkak taliliattak hekkutoitte. Anam hak dayeb, laa nug na qa mauhkku dayeb amu, amuam na, na baenadppa ele, am ag beɗulagppa iitta. Ag amunu oolagppa aab iitta daaglag.

⁹ Am na keeke laan aeg aon, grep dad ooppa aib eppaladme. Na anam hekkut dayeb amu, na grep meu, keeke laa eppame elenu meu amu, meu amu oh am Kayaknu daakku.

¹⁰ Na aib wan buuaknu halu, makau okkai ebehi ele, donki ele doɗnu duugppan tuqai duultippa qakkalatppe, eeɗya wan buupiɗ.

¹¹ Na aib lamen wul, linen eleppa agatak amu takkaladme.

¹² Na muɗi tutu kuɗum qagmak amu lamen qaɗeppan uttug waɗele ohppa mena koitkkutoitte.

Ah gappai heum, o ii heum doyaknu nai

¹³ Danab laa nug ah laa aweb, nug ele niioya, nug nuhignu dabmak baolia, ah amu ele daaglahnu oo ii hekku dayeb,

¹⁴ nug hambuppua ana, nug inam akku. “Da doottem, ah imu nug danab laa ele oipiɗ dayeye aomi. Da nug awen, nug danab laa ele ii oipiɗ bia ii anidmi,” awa akku. Amu nai amuppa amu nug ah amu onig heeb nauhkku.

¹⁵ Danab amu nug anam hekku dayeb amu, ah mameg, anig ele aa ah amunu niiaknu lamen, tiig nakok laittak ele aoya, ikki danab dilag qagmak aben aab amu odppa daatte, aa appa aab amunu ikki danab dilagppa gokkulahoitte.

¹⁶ Aa goya, mameg nug ikki danab amelagppa inam akkuoitte. “Da aɗel imu danab imu nug wau daakkunu mettami, amge gemu nug uuitta hette.

¹⁷ Nug da aɗel imunu, ‘Nug am ah danab laa ele oipiɗ dayeye da aomi,’ anan, amuppa amu nug da aɗel onig he nauhom. Amge nug am ah danab laa ele ii oipiɗ elenu nai genab daakkunu at am iikku,” awa akku. Anam dayeb, mameg, anig ele aa lamen amu ikki danab ippunadkkulah.

¹⁸ Aakku ikki danab ag danab amu aɗan, bu mettaglagoitte.

¹⁹ Ag ele heppeg, nug 1 kilogram silwa, eheɗ heum noob daden ma madakku. Amunu diig am, nug Israel ah makkun laa nug beɗu nauhak ele aum, amge nug anam iitta. Nug ag silwa doɗo amu matteb, ag am ah mameg mettaglag. Ah amu nug danab amu wau daakkuib. Nug ah amu iinab uuidma; haen amuppa, dimppa ele.

²⁰ Amge danab amunu nai am genab daakku dayeb, ah mameg, anig ele aa ah nug ah beɗu bau amu epponkkulahnu elele iitta daaglah dayeb amu,

²¹ kobol anamppa, ikki danab ag ah amu aon gona, mameg laug odppa meppeg, danab ah aab amuppan ag nug menppa oppeg mauhkkuoitte. Aɗinu? Ah amu nug kobol nau, uɗa nak guittak ele Israel ooppa heum. Nug mameg laugppa dayaya, danab laa ele niipiɗ. Kobol nau ag oolagppa daamanu, ag heppeg, aib dayom!

²² Danab nug danab laa wau ele gappai aopeɗ, ag anatkkulag dayeb amu, danab amu, ah amu ele oh aa mauhkkulahoitte. Kobol nau ag oolagppa daamanu, ag heppeg, aib dayom!

²³ Danab laa nug aab laa ooppa oiyaya, nug ah makkun laa antta, ah amu nug danab laa aokkun baeg aɗappig ele daatte, danab nug antte, aa gappai aoglah dayeb amu,

²⁴ ag danab amu, ah amu ele oh diiatna gona, aab amunu aɗ od oɗeppa maatona, ag menppa makkuɗatppeg mauhkkulahoitte. Ah nug ehanittaknu ii eum amunu, ag nuhignu anam hekkulag. Danab nug mauhkku diig am, nug danab laa wau beɗuppa eheɗ heum. Kobol nau ag oolagppa daamanu, ag heppeg, aib dayom!

²⁵ Amge danab nug ah laa danab laa baeg aɗak ele atu laih antta, nug aɗa, wagai ma, nug ele gappai aopiɗ dayeb amu, danab amu aakkuib nug mauhkku.

²⁶ Ag ah bau amu, nuhigppa aib eheɗ heppig; nug aɗitai eheɗ laa mauhkkunu ii heum. Aɗinu? Uug amuam laa nug ⌊lokkumakppa⌋ layag guittak medakkunu baneb ukka makkuɗe mauhtte bia aakku. ⌊Laa heum, nukka bu aokku.⌋

²⁷ Amu ah nug aɗitai eheɗ laa mauhkunu ii heumnu diig am, danab nug ah ele atu laih gappai aoglahnu he, ah nug gayaya eum, amge auntai laa ehanitteb, eheɗ laa nuhigppa ii bemanu am iitta.

²⁸ Danab laa nug ah bau laa danab laa baeg ii aɗak ele aɗa, wagai meeb, gappai aoglah dayeb, laa ag anatkkulag dayeb amu,

²⁹ danab amu nug 600 gram silwa, ah mameg medakku. Nug anam hewowa, nug ah amu aokkuoitte. Amunu diig am, nug aɗa, wagai me, ah amu ele aa gappai aopiɗ, ah amu nug baula ah makkun ii daatte. Nug ah amu awowa, nug uuitteb gokkunu elele iitta; gemu, dimppa ele.

³⁰ Danab nug mameg wau ele gappai ii aomya. Nug anam hekku amu, nug mameg hunu qelo bia hekku. Nug amu ii hema.