Duteronomi 21 - Nobonob Baibel

Duug wak danab laa aun heum ii dootte ele amu, duug wak amunu uhuqa mettak

¹ Amu wan Yawe, ahilag Kayak, Nug ag aoglagnu madatte amu, amuppa laa nug danab laa duug o, gaɗa am piɗe, danab ii daappigppa, dad okkai laappa keeke, amuppa niieb anidna, aun heum ii dooglag dayeb amu, ag inam iikku hekkulagoitte.

² Ahilkad ikki danab, amu epeɗiak danab ele ag ahan gona, aab atten amu gaɗa guguittak daatte melemel mekkulagoitte.

³ Anam hena, aab atten am gaɗa amuppanu miag daatte doon amu, ag inam hekkulag. Ag heppeg, aab amuppan ikki danab ag makau balat, makau mameg nug uɗat laa ii mettom, nug makau amu keeke eeɗkkunu doɗnu duugppan tuqai duugppa ele ii qakkom amu, ag amu laa anidna epeɗiglagoitte.

⁴ Ag epeɗin aon, wan oolnu noakppa, aben auntai laa wan ii buuom ele, o keeke laa ii eppak eleppa gokkulagoitte. Aben amuppa amu lenag laa ii qaɗaiedatte ele, amuppa ukkak ele. Oolnu noak amuppa amu, ag makau balat amu duug qiiglagoitte.

⁵ Mana mettak danab, ag Lewi buɗub daatteb amu, ag ele appa gokkulag. Aɗinu? Yawe, ahilag Kayak, Nug ag nuhig ɗo maɗoɗnu uɗat Nug onigppa hekkulagnu, ag Nug onigppa danab ah itadkkulagnu, ag am haen nai beeb, aun nug genab atte, o aun nug eheɗ heum, o nug qak daye aun eheɗ heum, ag amu hettoɗin akkulagnu otiattom.

⁶ Ikki danab ag aab laa gaɗa guguittak daatte appanu, ag makau balat nag duug oolnu noakppa qiippig ele, ag gaɗa amu guguittak daan, ag eppelkad gaɗa amu nakok attan ihaglagoitte.

⁷ Ag anam hena, ag, “Ig danab imu ii qemut, ig ele ii anitutut heppig,” akkulagoitte.

⁸ Ag anam anana, ag tuɗidna akkulag. “O Yawe, laa qe mauhak iikku daatte amu, ⌊auntai heum ig ii doottem. Ig doolom amu, ig qepput mauhlo, amge ig ii doottem amunu,⌋ ig eheɗ haknu nob nau doɗ tiigppa iitta mekkunu hepput elele medakkunu, doɗ imu qemut. Ig nahipad danab ah, ig Israel, na ig ehanittak okkai nahip-ppa qagaiettakppanu eɗua uhuqak dayaknu heme ele amu, ig na ig hettem imu elele beum anidkkutnu oɗ medattem. Na ig danab ah nahipad, ig eheɗ heta, danab beɗuppa aab iitta duug omut ii amananu oɗ medattem,” aon akkulag. Ag anam hekkulag dayeb amu, eheɗ haknu nob nau doɗ tiigppa iitta meeb elele medakkunu hak am elele mekku.

⁹ Ag amu hekkulag amu, ib amuppa laa beɗuppa aab iittanu qe mauhaknu aab, am ahilagppa ii daama. Aɗinu? Ag Yawenu neekkakppa kobol tutukku aakku hekkulag.

Banppa ah aɗe, nug ele ewau matulak awaknu nai

¹⁰ Haen ag ahilkad kekeɗ banelag gona, ban hebeppeg, Yawe, ahilag Kayak, Nug ag eppelagppa meeb, ag laa aɗaladppeg, ag eppelagppa daaglag dayeb amu,

¹¹ ag aɗalatteg, ag eppelagppa daatteb ele oolagppa ah laa enanag, iɗu tuqak ele anidna, na nuhignu ena doon, na nug nahip ah daakkunu aokkutnu hekkuttai.

¹² Kobol amu anam beeb amu, na ah amu aon aabppa, na lautppa gokkut. Aon goppe, nug ikki uɗug ohnab otaɗeb ukkeb, eppeg di ele otaɗadkkuoitte.

¹³ Nug amu ha, nug lamen beɗuppan oh baolikkuoitte. Anam ha, nug na lautppa kalam laippu oh dayaya, nug mameg anig ele dilah mahikkuoitte. Amu dimppa na nuhig danab daakkutnu, nug na waat daakkunu aokkut.

¹⁴ Amge na nug awona, na nug uuidkutnu oot heeb amu, nug na waat dayom, nug ah makkun iitta amunu, na nug aib meppe, laa daden mekkulagnu maidme, o na aib nug am begbeg maɗi ah nahip daakkunu hettame. Iitta. Na uuidppe, adeppa gokkunu oo hette ele ukkaɗ!

Nid ⌊danab⌋ tatamnu, ag aug keeke aoglagnu daatte

¹⁵ Danab laa nug ah aɗit diiata, Nug laanu oo mauhkku, amge laanu nug oo mauhaknab ii dookku dayeb, ah aɗit oh aa nid danab menuglahtai, amge ah laa, danab nuhignu oo mauhaknab ii dootte amu, nug tatam nid danab menukkutai.

¹⁶ Anam dayeb amu, haen danab amu nug aug keeke obata, bekoɗ matakku amu, nug bekka gehanu, nug wau nuhignu oo huananab mauhtte ele bekka amu, nug aug keeke amu kuɗum ii mettama!

¹⁷ Kobol daatte am inam; mameg nug aug kuɗum nid ⌊danab⌋ tatamnu medakkuoitte. Nug nid ⌊danab⌋ tatamnu keeke aɗit aɗit batak medatta, bekka gehanu amu laippu laippu anam medakkuoitte. Nid danab tatamnu am danab oh dilag nid danab tatamnu bia, nug mamegnu ɠagattag ippunigtte, amu kobolppa nug aɗi aokkunu daatte, amu nuhigppa daatte. Amu genab, mameg nug bekka aug keeke kuɗum medatte ele amu, nug nug anignu oo huana ii mauhtte me, nug am nid danab tatamnu daatte amunu, nug aug anam aokku.

Nai tappe nak nid danab dilag ɗo

¹⁸ Am danab laa nug bekka nug oɗe dim lamidmanu dabmak nuhig ɠagattag eppe ii dim lamidtte, nug nai tappe nak danab daya, nug mameg, o anig tolidya, bu metteheh, aa oɗelah ii dim lamidtte dayeb amu,

¹⁹ mameg, anig ele aa bekkalah aɗaya aoya, ikki danab dilag qagmak aben ahilah aab odppa daatte, aa amuppa ikki danab gumadya wakkulahoitte.

²⁰ Aa waya, aa ikki danab amelagppa inam akkulahoitte. “I bekkanih imu nug oɗe dim lamidmanu dabmak nuhig ɠagattag eppe, nug tappe nak nid daya, nug ii oɗenih doyak uutte. Nug hanhan ee huana lanana, le nau laawo, kaaka qette,” aoya akkulah.

²¹ Aa anam apeɗ, danab oh aab amuppanu, ag menppa makkuɗppeg mauhkkuoitte. Kobol nau ag oolagppa daamanu, ag heppeg, aib dayom! Israel danab ah oh ag amu doona, ag baɗaglag.

Dim lamittaknu nai digdig

²² Am laa nug eheɗ hak naunab laa, mauhak ibppa hekku dayeb amu, ag nug qeppeg mauheb, nug gaɗa ad attan aihppeg,

²³ nug gaɗa amu ad attan aihak dayeb ukkeb, ii wakkaɗkkuoitte. Ag nug gaɗa aihppig, deɗ amuppaib boumkkulagoitte. Ag amu haknu diig am, danab beɗu adppa aihak daatte amu, nug Kayaknu itittak nau waappa daatte. Amu ag wan, Yawe, ahilag Kayak, Nug ag aulag daakkunu madatte amu, ag kobol Kayak amunu ooppa uuaknab dootte ele, ag amu heppeg, wan amuppa dubuttid aib teum.