Duteronomi 20 - Nobonob Baibel

Banppa nai laala dim lamittaknu

¹ Haen ag ahilkad kekeɗ banelag gona, kekeɗ ag hos, bannu karis ele anadnana, ag ban danab, ahilag ebqak am ag eɗattak ele anadnana, ag aib baɗappig. Aɗinu? Yawe, ahilag Kayak, Nug ag Isipnu diia uɗiom ele, Nug ag ele daaglag!

² Ag banelag gokkulagnu daabppeg amu, mana mettak danab nug uɗia, ban daup daulag batakku.

³ Nug akku. “O Israel danab ah, ag daulag human doyeg! Ag gemu kekeɗ banelag gotteb. Ag aib baɗappig! Oolagppa gai-iitta aib dooppig. Ag ban henana, ag baɗak eheɗ nau dooppeg, ahilag dabmak eɗatteb, hamu laih laih aib oolppig.

⁴ Ag ii baɗamnanu diig am, Yawe, ahilag Kayak, Nug ag ele daatteb! Nug ag kekeɗ aqaglagnu ag ehanatta, ban heeb, ag kekeɗ eɗadkkulag!” awa akku.

⁵ Mana mettak danab nug ban danab amelagppa nai mattia maleb amu, ban daup ikki ag ban danab amelagppa akkulag “Aun laa na lag laa heme, amge na ii qeapime? Ii qeapime dayeb, banppa ag na nidappeg mauhppe, laa ag na laut qeapimnanu, na eɗun aabppa gokkut!

⁶ Aun laa grep dad heme, amge na meu laa ii aon lame? Laa ii lame dayeb, na banppa mauhppe, laa ag lamananu, na eɗun aabppa gokkut!

⁷ Aun laa na ah aokkutnu daattem, amge na ii aome? Na ii aome dayeb, na banppa mauhppe, laa nahip ah aomanu, na gona ah aokkut!” aon akkulag.

⁸ Ban daup ikki ag anam awona, ag tuɗidna, inam ele akkulag. “Aun laa na baɗak, o na ban haknu elele ii doottem? Na anam bia doottem dayeb amu, na laa amu ippunidppe, nug ele anam doya, nug baɗa, ban ii hemanu na aabppa ukke!” Ag amu ele akkulag.

⁹ Am ban daup ikki ag anam ahilkad daup oɗ mattak hena malona amu, ag daup huu anen anen, ag amu dilag anuqak danab otiglagnu onilag diiglag.

¹⁰ Haen ag aab okkai laa aqaknu banelag gona, ban haknu tekkulag henana, tatam amu, ag aab amuppan danab ah ag inam inam heppeg, ag ii aqadmana, ag ag ele maɗoɗ daaglag, ag nai amu meppeg ukkaɗ!

¹¹ Am danab amu ag, ag ahilag nainu elele doona, aabnu od matulppeg, amu danab ah oh ooppa daatteb, ag, ag aɗi atteb am henana, ag ag waalagppa daan, ahilkad maɗi nid maɗi ah ele daaglag.

¹² Amge ag nai amu aoglagnu uun, ban haknu bappaidkkulag dayeb amu, ag aab amu oo mettan aqaglagnu maadna daaglagoitte,

¹³ Yawe, ahilag Kayak, Nug aab amu awa, ag eppelagppa mekku. Nug anam meeb, ag danab aab amuppanu ohnab aqaglag!

¹⁴ Amge ag ah, nid naunau, doɗ, amu keeke laala ele amu, ag amu ahilagnu aɗualadkkulag. Yawe, ahilag Kayak, Nug kekeɗ dilag keeke ag eppelagppa meum ele amu, ag amu aɗan, uɗatab mettaglagnu elele.

¹⁵ Amge ag anam hekkulagnu anak imuam aab okkai laih uma daatteb dilagppaib hekkulag; wan miag daatteb, aab amuppa ag anam aib heppig.

¹⁶ Iitta. Wan Yawe, ahilag Kayak, Nug ag aulag daakkunu madatte, amuppan aab okkai amu, ag appa laa uuppeg, bau aib dayom.

¹⁷ Am ag Hit danab, Amo, Kanan, Peres, Hiwi, Jebus danab ele, Yawe ahilag Kayak, Nug ag haknunab anak ag amelagppa aum bia, ag heppeg, danab amu ag Yawenuib nuhig pelemppa daaglagoitte.

¹⁸ Ag amu hekkulag amu, danab ah wan amuppanu ag kayak hambuppuak noolagppa dup nona binalag menana, ag kobol digdig laa, Yawe Nug kobol amunu ooppa uuaknab dootte ele, ag kobol amu hetteb amu, wan amuppan danab ah ag kobol amu ippunadkkulagnu ib iitta daan, ii ippunadmana. Ag danab ah amu ag ahilag kobolppa amu hebeppeg anadkkulag dayeblob amu, ag eɗun, Yawe, ahilag Kayak, ag nuhigppa hipunin hekkulag.

¹⁹ Haen ag aab okkai laa ele nug qenan, oo mattan aqaglagnu daappeppeg ukka, eɗidkkulagnu haen elabnab gokku dayeb amu, ag ad meu lakkulagnu elele, ag ad amu aib heppeg nauhppig. Ag aib oadppig. Aɗinu? Ad ag am kekeɗ iitta, amu ele ban haknu ii daatteb.

²⁰ Amge ag ad laala ag dootteb, am ee iitta, ag amu oadkkulag. Ag amu diin, aab okkai amu talilittak, ban haknu keeke hattana, ban hebeppeg ukkeb, eɗitteg!