Duteronomi 2 - Nobonob Baibel

Israel yawaina oippignu dabmettaknu nai

¹ Aakku ig Yawe Nug ib ippuniɗom bia, eɗut aot, atu taɗakppa, Le Kokoɗnu ukkakppa gomut. Amu ig Seir wanppa laih qauko qauko daattebppa amu, ig haen elab aben amu talilita, aiɗta yawaidta oimut.

² Ig oit oit ukke, aakku Yawe Nug da amelppa aum.

³ “Ag wan qauko qauko ele imuppa elele oippig; ag eɗun, yawalti uɗitteppanu ukkeg!

⁴ Amge na danab ah haknunab nai imu appe doyeg! ‘Ag geha ag Edom dilag wan oppatna gokkulag. Esau buɗub, ag Edom, onig laa Seir, appa daatteb. Edom ag, ag Israel ele, ag nakok tiig laippu daatteb. Ag gobeppeg amu, Edom ag geha ahilagnu baɗaglag, amge ag dabmeig!

⁵ Seir wanppa, laih qauko qauko ele, amu da amu Esau buɗub, ahilag keeke daakkunu da ag mattami amunu, da wan ahilag maha nakok laa, da ag Israel, da ag iinab madapa. Amu diig amunu ele, ag Israel, ag Edom ahilagppa ban nakok laa aib heppig.

⁶ Am ag eete, iitta lete laa aoglag amu, ag daden mena aoglagnu daatte,’ ” awa aum.

⁷ Amu aɗinu ⌊Yawe Nug ag ee, le ele daden mekkulagnu aum⌋? Yawe, ahilag Kayak, Nug ag aɗi aɗi eppelagppa heppig ele amu, Nug uɗat amu oh itattom. Nug ag atu taɗak naɗi amuppa gonana, keeke ohnu heegeg, Nug ag atognoattom. Maɗ 40 imu ooppa, Yawe, ahilag Kayak, Nug ag ele daanna, aɗi keeke ag amu aon, bau daaglagnu doyom amu, Nug amu elele matte, ag keeke laanu ii tutu meppig.

⁸ Yawe Nug anam aum amunu, ig gotata, Esau buɗub, Seir daatteb, ig lainkad amu, ig ag qe-eɗadmut. Ig qe-eɗadta, ig ib Elat amu Esiongeber ele, aab aɗit amuppanu uɗiaknu ib, ib amu onig am Arabanu ib, ig ib amu uut, ib laa atu taɗakppa ukka, Moap wanppa gotte ele amu, ig ib amu aot gomut.

⁹ Ig ukkautut amu, Yawe da amelppa aum. “Da Moap danab ah, ag Lot alakkud amu, da ag Moap wan ahilag daakkunu da ag mattami amunu, da wan ahilag maha nakok laa, da ag Israel, da ag ii madapa. Amu diig amunu ele ag Israel, ag Moap, ahilagppa ban nakok laa aib heppig,” awa aum. Amu Moses nug danab ah amelagppa anam aum.

¹⁰ ⌊Moap wanppanu amu,⌋ danab okkai okkainab, Em atteb amu, ag appa daadppig. Ag am kuɗumnab, ɠagattag ele. Ag am danab elab elab Anak danab bia. Anak ag ele danab okkai okkai.

¹¹ Danab ah ag Em, Anak danab ele dilagnu amu, laa ag, Repaim danab adappig, amge Moap ag ahilagnu Em danab adappig.

¹² Anukkanab, Hor danab ag tatam Seir appa daattappig, amge Esau buɗub, ag danab amu lamadppig. Ag amu hena, hattaeg nauheg, ag wan ahilagppa daappig. Seir danab amu ag, ag Israel ag Kanan hattaeg nauheg, ahilag wanppa daappig bia, danab amu hattaeg nauheg, ag ahilag wanppa daappig. Yawe Nug Kanan wan amu Israel ahilag daakkunu mattom.

¹³ Aakku Moses tuɗitta aum. “Ig Seretnu oolnu noakppa, Moap dilag tomppa, yau uɗitteppanu waut, amu Yawe Nug ig oolnu noak amu oppat-ta gokkunignu aum amunu, ig anam aakku hemut.

¹⁴ Anukka ig Kades Barneanu ahat ukkaut, maɗ 38 uue, ig anam Seretnu oolnu noak oppat-ta gomut. Am Yawe Nug anam daakkunu nuhig nai ɠagattag qetta aum bia, danab ag Kades Barnea tatam appa daanna, ban haknu ɠagattag elele amu, ag maɗ 38 amu ooppa ohnab mauhadppig.

¹⁵ Yawe Nug ena daaglagnu ib oo neene ukke, ag ohnab mauhppig.

¹⁶ Amu ban danab amu ohnab ag mauhna malaeg,

¹⁷ amu Yawe Nug da amelppa aum.

¹⁸ ‘Gemu amu, ag Ar appa Moap wan uun, tom oppatna wana gona,

¹⁹ Amon wan ooppa nokkulag. Amon danab ah, ag ⌊ele⌋ Lot alakkud amu, da ag wan ahilag, wan amu ahilag keeke daakkunu da ag mattami amunu, da wan ahilag maha nakok laa, da ag Israel, da ag ii madapa. Amu diig amunu ag Israel, ag Amon, ahilagppa ban nakok laa aib heppig,’ ” awa aum. ⌊Moses nug nai amu Israel danab ah amelagppa anam aum.⌋

²⁰ Danab ah laa ag wan amunu ele am Repaim dilag adappig. Repaim danab ag anukka aguppa daadppig. Amon ag ahilagnu Samsum danab adappig.

²¹ Repaim danab ag am kuɗumnab, ɠagattag ele. Elab ahilag amu Anak danab bia, amge Yawe Nug he, Amon danab ag ag lamadna, hattaeg nauheg, Amon ag wan ahilag aon daappig.

²² Yawe Nug Esau buɗub ag Seir daatteb amu, Nug ag ehanattom bia Amon danab ehanattom. Nug he, Esau ag Hor danab lamadna hattaeg nauhppig amunu, Esau buɗub ag ahilag wan aon daappig. Ag wan amu aon daaeg uɗie, gemu ⌊nai imu yaak haenppa⌋ ele daatteb.

²³ Kobol amubianab laa amu, Kapto danab, ag Krit appanu, ag Awim danab Gasanu aab naunauppa daappig amu, ag ag hattaeg nauheg, ag appa daappig.

Israel ag Sihon, Hesbon dilag king eɗidppig

²⁴ Amu Yawe Nug tuɗitta aum. “Ahappeg! Gemu ag Arnonnu oolnu noak oppatna ukkeg! Iikkude antteg! Da ag ehanatte heppi, ag Amo dilag king Sihon, Hesbon daatte eɗidppeg, da nuhig wan ag madakkul. Ag banelag gona, nug qekkulagnu ban hena, digmen wan aweg!

²⁵ Gemu digmak da heppi, wan ohppan danab ag digmena, baɗak eheɗ nau ele ahilagnu dooglag. Ag aɗi hettebnu doona amu, ag naunab doon, ag baɗak okkai dooglag,” awa aum.

²⁶ Aria atu taɗak Kedemot appanu amu, da nai awa ukkak danab laa maatti, Hesbon dilag king Sihon toppa, nug ele maɗoɗ dayaknu nai aon goppig. Nai amuppa da ami.

²⁷ “Uuigppe, ig nahip wan oppat-ta gokkunig. Ig ib manib gotata, ib man ukkakppa dad laih laih, ig amu ooppa ii gomata.

²⁸ Ig ee, le ele aot lakkunignu amu, ig daden meta lakkunig. Ig nahip wanppa nota wata gokkunignu na, ‘Elele, ukkeg!’ appe gokkunignu aakkunuib oɗ mettem.

²⁹ Esau buɗub, Seir datteb ag uuikkeg, ahilag wanppa nota wata uɗimut. Moap, Ar daatteb, ag ele anam heppig. Uuigppe, ig nota gota, Jodan mataɗta wata, Yawe, ihinig Kayak, Nug wan megakkunu hette, ig amuppa notu!” Da nai amu nug dookkunu mei ukkom.

³⁰ Da nai amu mei ukke doyom, amge Hesbon dilag king Sihon nug ig anam hekkunignu uuom. Aɗinu? Yawe, ahilag Kayak, Nug ag ehanatteb, ag Sihon eɗidkkulagnu, Nug he, Sihonnu dabmak aakku ɠagattag eppe, hibguitta heum. Sihon nug ag wan nuhig oppatna gokkulagnu uuom me, ag gemu dootteb bia, Yawe Nug ag ehanatte, ag nug eɗidppig.

³¹ Sihon nug ag uuatteb, nuhig wanppa nona wana gokkulagnu uue amu, Yawe Nug da amelppa aum. “Antte! Da Sihon, nuhig wan ele ag eppelagppa mekkulnu digmein hettem. Ag aguppa daaglagnu ag digmena aweg!” awa aum.

³² Yawe Nug da amelppa anam a, dimppa Sihon nug nuhig daup ele, Jahas appa ig ele ban hekkunignu uɗippig,

³³ amge Yawe, ihinig Kayak, Nug nug awa, ig eppenigppa me, ig nug, nug bekkod, am nuhig ban daup oh ele hattaut nauhppig.

³⁴ Ig nuhig aab oh aota heut, aab amu, danab, ah, nid naunau ohnab ele ag Yawenuib nuhig pelemppa daappig. Danab, o ah, o nid laa anam ii daakkunu ii dayom.

³⁵ Ig doɗ oh ihinignu aot, keeke laala aab eɗadmut eleppan ele akkamut.

³⁶ Yawe, ihinig Kayak, Nug ehanikke, ig aab onig Aroer aomut. Aab amu nug Arnonnu oolnu noak amu daugppa dayom. Nug ig ehanikke, ig aab nakok oolnu noak amu gamagppanab dayom, ig amu ele aomut. Yawe Nug ig ehanikke, ig aben oh aout ukke, Gileat batom. Aab amu ohppa ig eɗikkaknu laa iitta.

³⁷ Anam, amge ig Amon danab Jabok le daugppa daappig, amu aab qauko nakokppa daappig amu, ig amu dilagnu ag awaidta daamut. Yawe, ihinig Kayak, Nug ig ag ele ban hematanu aum amu, ig anamnab ag ele ban hak ii hemut.