Duteronomi 19 - Nobonob Baibel

Laa ii doyaya qe mauhomnu ehanittak aab okkai

¹ Yawe, ahilag Kayak, Nug geha danab ah oh, wan Nug ag madatteppa daatteb amu heeb nauhkkulag. Nug ag ehanatta heeb, ag lamadna malona amu, ag danab amu dilag aab, laulkad ele diiglag.

² Anam hena amu, ag wan amuppa, Yawe, ahilag Kayak, Nug ag wan amu aon, ahilag daakkunu madatte amu, amuppa, ⌊ag ii doyaya laa qe mauhomnu ehanittak⌋ aab okkai ewam epeɗiadkkulagoitte.

³ Wan Yawe, ahilag Kayak, Nug ag aulag daakkunu madatte amu, ag wan amu oppatppeg, maha ewam daappeg, aab okkai amunu laippu laippu wan maha amuppa daaglag. Laa nug layag ii doyaya qe mauhom, nug oola, aab amuppa ukka, ena daakkunu, ag aab ewam amuppa ukkaknu amu, ag ib hatteg!

⁴ Am aun laa nug ii doyaya laa qe mauhom, nug haen matu nuhignu, nau ninig ele laa ii doyom ele amu, nug bau daakkunu, nug oola, aab amuppa ukka, nug appa bau daakku.

⁵ Amu antte, oo maittak kobol am, laa nug mudippan layag laa ele aa atu dubuppa goya, ad laa oyaya, laa nug hebeb ette ele amu, hebeb aeg oqaɗppan hiɗa ukka, layag ob mauhkkutai. Ib anamppa amu, nug ii doyaya heum amunu, nug ii doyaya laa qe mauhom ehanittak aab okkai amuppa ena daakkunu appa oola gokku.

⁶ Amu ii doyaya laa qe mauhomnu ehanittak aab okkai am uma, miag ii daakku dayeb, diig amunu, laa nug qe mauhak danab nob ma qeeb mauhkkunu daatte ele, nug oo nauhak nau doyaya, nug laa tatam danab ii doyaya qe mauhom ele lamitta ukka ukka, ibppa antta, qeeb mauhkkunu elele. Laa nug tatam laa qe mauhom, amge ii doyaya heum, nug nuhignu nau ninig ele matu ii doyom amunu, nug ii mauhlo, amge ib amuppa mauhkku.

⁷ Diig amunu da ag aab okkai ewam, ii doyaya laa qe mauhom ele ehanittaknu aab epeɗiglagnunab attem.

^8-9 Am ag haknunab anak da ag gemu madattem imu, amuam ag hanhan Yawe, ahilag Kayak, ag nuhignu oolag mauheb, nuhig ib aakkuib dim lamidkkulag amu, ag amu hekkulagoitte. Aɗinu? Ag amu hekkulag dayeb amu, Nug tuɗidib wan mattebeb ukkeb, Nug wan oh madakkunu aum madakku. Nug ag mamelkad aɗi amelagppa amu hekkununab nuhig nai ɠagattag qetta aum. Amu anam ba maleb amu, ag ii doyaya qe mauhomnu ehanittak aab okkai ewam laa ele epeɗiglagoitte.

¹⁰ Yawe, ahilag Kayak, Nug ag wan, ag aulag daakkunu madatte, amuppa danab ah ag beɗulagppa aab iitta ele, ag mauhmananu, danab qe mauhaknu aab ag beɗulagppa ii daamanu, ag aab ewam laa ele epeɗiadkkulag.

¹¹ Amge laa nug layagnu nau ninig ele doya, nug dabma meitta dayaya, nug layag ⌊doyaya⌋ qeeb mauheb, nug oola, laa ii doyaya qe mauhomnu ehanittak aab okkai amuppa ukkeb,

¹² danab amu heum, nug appagppan ikki danab ag hena, qe mauhak danab amu ii doyaya, laa qe mauhom ehanittak aab amuppanu aon, laa nug qe mauhak danab nob ma, qeeb mauhkkunu daatte amu, ag nug eppegppa meppeg ukkeb, qeeb mauhkku.

¹³ Ag aib qe mauhak danab amu, nuhignu oolag doyom! Ag danab qe mauhaknu aab ele, nug ag oolagppa daamanu heppeg, aib dayom! Oiyak ahilag ena bekkunu amu, ag anam heig!

Nai doya mala, hettoɗia, epeɗia, elele mettak daakkunu nai

¹⁴ Amu Yawe, ahilag Kayak, Nug wan ahilag daakkunu ag madatte amu, ag amuppa nona, ag aibnab mudippan lailkad dilag wan aoglagnu tom ag alalkad meppig mautadppig.

¹⁵ Ag aibnab danab laippuib, laa nug aɗi eheɗ heehe anttomnu mattiak heeb doona, ag nuhig naippaib eheɗ heumtai ele, danab amu eheɗ heum ana ɠagattag qedappig! Aɗi heehe anttomnu mattiak danab aɗit o ewam ag danab laa eheɗ heum appeg amu, nai amunu am genab doyeg! Laippuib ab amu, ag genab bia aib dooppig.

¹⁶ Am laa kaliak hekkunu dabma mala, nug hettoɗiak abenppa laa aɗi heehe anttomnu mattiak danab daya aha, danab auntai laa nug eheɗ heum akku dayeb, ⌊amge epeɗiak danab nug nug hambubutte bia anidkku dayeb⌋ amu,

¹⁷ aria, danab amu, laa nug nuhignu, “Nug eheɗ amu heum,” aum ele amu, aa oh, mana mettak danab, amu hettoɗiak danab ele, ag oh haen amuppa uɗat amu henan daatteb amu, aa ag noolagppa, Yawe noobppa ele daapeɗ, hettoɗiak hekkulagoitte.

¹⁸ Ag pehettan hettoɗiglagoitte. Ag danab nug layag eheɗ he anttomnu aum ele nug hambuppuom anidkkulag dayeb amu,

¹⁹ danab hambuppuom ele nug laa nug eheɗ helo amunu, bu aokkunu daalo amu, nug bu amu aokku. Kobol nau ag oolagppa daamanu heppeg, aib dayom!

²⁰ Danab ah laa ag amunu doona, ag baɗan, baula hak nau amubia ii hemana.

²¹ Danab laa nug eheɗ laa heeb, ag nuhignu oo gai-iitta doyak doon, oo mettan, bu ii mettamnanu aib dabmeppig! Nug laa qeum dayeb, ag nug qeppeg mauhaɗ! Laa nug laanu ameg heeb nauhkku dayeb, ag nug ameg heppeg nauhaɗ! O nug laanu aeg heeb qiikku amu, ag nug aeg heppeg qiiaɗ! Nug laa eppeg guittak mettom dayeb, ag nug eppeg guittak metteg! Nug laa baeg guittak mettom dayeb, ag nug baeg guittak metteg!