Duteronomi 18 - Nobonob Baibel

Mana mettak laala, mana mettak danab, amu Lewi buɗubppan mana mettak danab iitta, ag hekkulag

¹ Mana mettak danab, ag ele Lewi buɗub, amu Lewi buɗub laa oh ele, ag Israel dilag huu okkai laala, ag wan ahilagnab, ag aulag daakkunu aotteb bia ii aotteb; ag aulag wan laa iitta, ag amu dabmetteg! Ag amu anam iitta amunu, ag mana mettak maha laa, ag Yawe mettaknu aab aɗunu ofa hadatteb ele amu, ag amuppanu aoglag. Keeke amuam ag aulag bia daakku.

² Ag Israel laa oh oolagppa wan laa, ag aulag daakkunu, laa ii aɗamna. Yawe Nug ag amelagppa hekkununab nai anan qakkom bia, nuhig atognoattak, amuam ag aulag daatte.

³ Danab ag mana mettak aon dotteb, amuam makau dawai laate, o sipsip laate amu, ag aɗi doɗ aon uɗitteb ele, mana mettak amunu maha laala am mana mettak danab, ag ahilagnu aɗaglag; maha amuam gukka naɗiap, akkabɗu, amu doɗ amu oo ele.

⁴ Ag ee tatam oɗuttenu, keeke laala tatamnu ele amu, ag mana mettak danab ahilag daakkunu mattaglag. Amuam ee aeg, wain bau, olip goɗen bau, amu sipsip tatamnu uɗig otaɗak ele.

⁵ Ag amu hekkulagnu diig am, Yawe, ahilag Kayak, Nug Israel dilag huu okkai laa oh oolagppan Lewi buɗub ag hanhan, Yawenu ɗo maɗoɗnu uɗat Nug onigppa hekkulagnu tituanattom.

⁶ Lewi buɗub laa nug amunu oo heeb, nug aab Israel ooppa daatteb, nug amuppanu aha, Yawe aben epeɗikkuppa ukka, aguppa daakku. Nug amu hekku am nai iitta.

⁷ Nug appa, Yawe, nuhig Kayak, nug Nug onigppa Yawenu ɗo maɗoɗnu uɗat hekkunu elele. Nug laikkud, Lewi buɗub laala ag appa, Yawe onigppa uɗat henan daan, Nug noobppa uɗat hetteb bia hekkunu elele.

⁸ Am Israel danab ah ag mana mettak hekkulagnu doɗ keeke aon dona, mana mettak heppig, am maha attem am mana mettak danab aoglagnu daatte, nug amu lakkunu elele. Amu nug anig mameg aɗi, ag men doɗo keeke meppeg, nuhigppa uɗikku dayeb amu, amu ele nuhig daakku.

Kayaknu oppiaawak ele dayaknu nai

⁹ Amu ag wan, Yawe, ahilag Kayak, Nug madakkunu hette amu, haen ag amuppa nona daanna, ag ooppa uuaknab doyak kobol, danab ah appa daatteb ele gemu hetteb amu, ag hemananu dabmena autnanab aweg!

¹⁰ Ag bekkalkad, o aɗelkad diin, kayak hambuppuak dilagnu aib mana mettak heppig. Am ag eman hak, o onig awak, o ouɗi nau qalaknu keeke doyaknu hak, o emaɗ hak,

¹¹ o eheɗ laa awaknu anak waappa dayaknu nai, ag amu oh aibnab heppig. Laa nug mauhak ele gamag danab, o mauhak ele mattiak danab aib dayom.

¹² Yawe Nug laa ag anam hetteb ele, Nug ahilagnu ooppa uuaknab dootte. Am wan ag aoglagnu hetteb, appan danab ag anam hetteb amunu, Yawe, ahilag Kayak, Nug heeb, ag Israel ag danab amu lamadkkulag.

¹³ Ag Yawe, ahilag Kayak, ag nuhig neekkakppa danab oolagppa kaliak laa iitta daaglagoitte.

¹⁴ Danab ah ag wan ag nona lamadna, ahilag wan aoglagnu hetteb eleppa daatteb amu, danab amu ag onig awak danab, eman hak danab ele, ag amu dilag ehanattaknu oɗ madatteb, amge Yawe, ahilag Kayak, Nug ag amu hemananu aib aum daatte.

Propet laa Moses bia

¹⁵ Yawe, ahilag Kayak, Nug ag ehanadkkunu geha ahilagppanu propet danab laa da bia nug epeɗikku amunu, ag propet amu nug aɗi nai ag amelagppa mattieb amu, ag nug oɗe doyeg!

¹⁶ Yawe Nug laa da bia heeb ahakku. Aɗinu? Ag amu, haen ag Horep qaukoppa qagmena daappig, ag Yawe, ahilag Kayak, ag Nug amunu oɗ medappig. Ag amu, ag mauhmananu, ag ⌊laa nug Yawe oɗe doya madakkunu,⌋ ag Yawe, ahilag Kayak, ag Nug baag baula ii doomnanu, ag aab dittiak naɗi ele baula ii anidmananu appig.

¹⁷ Ag anam aeg, aria, Yawe da amelppa aum. “Moses, danab ag nai appig amu, ag ena appig,

¹⁸ amunu da nai ag amelagppa akkulnu amu, da geha danab laa ag oolagppanu na bia epeɗidkkul. Da geha dahil nai propet amu medappi, nug ag amelagppa nai oh da nug madakkununab appi amu, nug tutukku ab dooglag.

¹⁹ Am inam daakku. Nai dahil danab amu oɗeppanu uɗitte amu, aun laa nug nai amu doyaknu uukku amu, da nug bu medakkul.

²⁰ Amge propet laa nug aɗi nai laa da nug madikkunu ii ami, amge nug dahilppanu nai awom bia ha, da onilppa mattieb amu, ag nug qeppeg mauhaɗ! Amu ag propet laala ele, ag kayak hambuppuak onilagppa nai madippeg amu, ag ele aqappeg mauheg!” awa aum.

²¹ Amu ag akka ag inam dabmekkulagtai. “Ig nai amu Yawe toppan uɗittetai, o iittatai amu, ig attem doopput onig maidkku?” Ag oɗmak amu hekkulagtai.

²² Am propet nug Yawe onigppa nai mehuqeb, nai amu meu ii bekku dayeb, nai amuam Yawe Nug ii mettom. Propet amu nug nukka nuhig dabmakppa mattiom. Ag nuhignu aib baɗappig.