Duteronomi 17 - Nobonob Baibel

¹ Ag makau okkai ebehi ele, o sipsip oɗe mak ele, o makau okkai ebehi ele, o sipsip ag beɗulagppa eheɗ ele, ag amu aon main, Yawe, ahilag Kayak, Nug aib medappig. Nug anamnu amu, Nug ooppa uuaknab dootte amunu, ag anam aib heppig.

² Am ag oolagppa danabte, o ahte laa, nug Yawe, ahilag Kayak, Nug ag aab umu madakkunu hette ele, danab o ah amu nug Yawe, ahilag Kayak, nug nuhig neekkakppa, nuhig nug tituana nai qakkak nai tippala, eheɗ ha,

³ nug kayak hambuppuak laala noolagppa dup noa binalag mekku dayeb, o nug aam, kalam, o hoɗoppai lomppan dilagnu dup noa binag mak kobol hekku dayeb, da ag kobol amu hemananunab aib ami daatte amu,

⁴ am laa ag nug amu heum appeg dooglag dayeb, ag nug anam heumte, o iittate, ag amu hettoɗin autnanab aweg! Am nug genab, ooppa uuaknab doyaknu kobol amu laa, Israel oolagppa heum dayeb amu,

⁵ ag danabte, o ahte anam eheɗ heum ele amu aon, aab amunu aɗ odppa wana, nug menppa makkuɗppeg mauhkkuoitte.

⁶ Amge laa aɗi heehe anttomnu mattiak danab laippuib nug aha, “Umu nug eheɗ inam heum,” ab, eheɗ hak amuam ag danab am hette ele qeppeg mauhkkunu daatte amu, ag danab laippuib nug aha anam akku dayeb, ag aib qeppeg mauhom. Laa aɗi heehe anttomnu mattiak danab aɗit, o ewam ag anam laippu akkulag dayeb amu, ag danab amu qeppeg mauhkku.

⁷ Laa ele amu, aɗi heehe anttomnu mattiak danab aɗit o ewam, ag tatam men ena makkuɗppeg, dimppa danab ah oh ag ele makkuɗkkulag. Ag kobol nau ag oolagppa daamanu heppeg, aib dayom!

Epeɗiak uug elenu nai

⁸ Amu hettoɗiakppa nai laa aheb, babaittaknu uug ele, ag aabppa hekkulagnu elele iitta dooglag dayeb amu, ag aon, aben Yawe, ahilag Kayak, Nug epeɗikku, ag amuppa ukkeg! Nai amuam laa nug layag qeum, o makkuɗe, guittak awom, o nai laa babaittaknu uug ele.

⁹ Ag nai amu akkan, appa gona, mana mettak danab, ag ele Lewi buɗub amu, ag ag, amu epeɗiak danab haen amuppa daatte, ag nug, mana mettak danab ele oh nai amunu oɗ madappeg, ag nai amu anidna, epeɗin elele mettaglag.

¹⁰ Amu aben Yawe Nug epeɗikku ele, amuppa nai attem beeb, mana mettak danab, epeɗiak danab ele ag amunu aɗi appeg, ag hanhan anamnab dim lamidkkulagoitte. Am ag appig, amubianab haknu daakku.

¹¹ Ag ɗo uug amunu aɗi ippunadtte anidna malana, aun eheɗ heum, eheɗ ii heum ele anidna, laa eheɗ heum nug aɗi bu aokku ele anidna appeg amu, ag anam haknu appig, amubianab ag hekkulagoitte. Ag aib dabmak laa aon baolippig.

¹² Ag aun laa nug enaen ma, nug epeɗiak danab, o mana mettak danab ag Yawe, ahilag Kayak, ag Nug noobppa nuhig ɗo maɗoɗnu uɗat hetteb ele amu, nug amu dilagnu ag am keeke hamunab dookku amu, ag nug qeppeg mauhkkuoitte. Kobol nau ag Israel, ag oolagppa daamanu, ag heppeg, aib dayom!

¹³ Ag anam heppeg, laa oh ag amu anidna, ag baɗan, enaen mak anam am ii hemana.

Kingnu nai

¹⁴ Ag Yawe, ahilag Kayak, Nug ag wan madatte amu, haen ag amuppa nona, aon daanna amu, ag digmena inam dabmekkulagtai. “Ig am wan laala talilikkak king ele daatteb, amubia ig king ele daalom.” Ag anam dabmekkulagtai.

¹⁵ Am anam daakku dayeb amu, Yawe, ahilag Kayak, Nug ahilag king otieb, abenppa mekkulagnu dabmetteg! Israel ted laa mekkulagoitte. Ag wan laihnu danab aib meppig.

¹⁶ Am king nug nukka nuhig hos kuɗum ele daakkunu ii hema. Nug danab nuhikkud maatteb, Isip gona, hos daden ii mekkulagoitte. Aɗinu? Yawe Nug ag amelagppa aum. “Ag eɗun, Isip ii gokkulagoitte.”

¹⁷ King nug ah kuɗum wauud daaglagnu diieb amu, ag nug Yawe toppan geɗidkkulag amunu, king nug ah kuɗum, nuhig ah daaglagnu ii diikkuoitte. Nug en naɗi, silwa, o gol keeke, nug amu ii aɗa daakkuoitte.

¹⁸ Haen danab nug king bette amu, nug inam hekku. Nug ɗo digdig imu buk itoɗiak laa mana mettak danab, ag Lewi buɗub amu, buk amu ag eppelagppa daatte, nug buk amu awa, buk itoɗiak nuhigppa yaaladkku. Mana mettak danab amu ag ele am Lewi buɗub.

¹⁹ Nug ɗo digdig ya awom, amu nuhigppa dayebeb, nug hanhan ebqekkuoitte. Nug Yawe, nuhig Kayak, nug nuhignu ebehi oh bodoetta le mekkunu, nug ɗo oh ɗo nai imuppa daatte doya dim lamidkkunu amu, nug anam hekku.

²⁰ Laa ele amu, nug laikkud laa dilagnu, “Da ag eɗadttem, da am enanag,” doomnanu, nug ɗo laippu laa ii dim lamidmanu, nug anam hekku. Anam heeb, nug am, nug buɗub ele ag Israel haen elabnab gumadkkulag.