Duteronomi 16 - Nobonob Baibel

Pasowa Hobulnu, amu Bret Yis Iitta Lanaknu Hobul Nakok elenu nai

¹ Amu kalam Abibppa, Yawe, ahilag Kayak, Nug tuqanppa ag Isipnu diia, omalatte uɗippig amunu, ag Israel danab ah, ag kalam amu dabmena, ag kalam amuppa Yawe binag mekkulagnu Pasowanu Hobul gamag ahak ele hekkulagoitte.

² Ag Yawe, ahilag Kayak, ag Nug binag mekkulagnu Pasowa Hobulnu doɗ laala mana, Nug mettaglagnu amu, ag makaute, o sipsipte, o meemete, ag amuppa mana mettak amu hekkulag. Am ag mana mettak amu hekkulagnu amu, ag aben Yawe, Nug onig appa daakkunu aben epeɗikku, ag amuppa hekkulagoitte.

³ Ag teppu amuppanu lanana amu, ag bret yis ele aib lappig. Deɗ eblaih aɗit ele oh amu, ag bret yis iitta lakkulag. ⌊Yawe Nug ag ehanatte,⌋ ag bret amubia lanana, ag Isip pahanab uuppig amunu, ag amubia bret amu lakkulag. Ag hanhan Isipnu ahan uɗin bau daatteb dabmekkulagnu, ag hanhan Isip appa guittak aonna daappig ele dabmekkulagnu amu, ag bret amu lakkulag.

⁴ Am Israel wan ohppa, deɗ eblaih aɗit ele amu oh, ag laulkadppa yis laa ii daakkuoitte. Aria, ag Pasowanu ee lappeg, sipsip amunu teppu big laa dayeb amu, big amu dayeb ukkeb, aib wagkkaɗom!

⁵ Ag aab naunau, Yawe, ahilag Kayak, Nug ag madakkun hette amu, ag amuppa Pasowa Hobulnu sipsip ii lakkulagoitte.

⁶ Yawe, ahilag Kayak, Nug aben Nug onig aguppa daakkunu epeɗikku, amuppa ag Pasowanu sipsip amu aqappeg mauhkkulagoitte. Ag appa, haen aam nokkunu heehe, ag Isip uuppig, kalam deɗ amuppanab, ag aqappeg mauhkkulagoitte.

⁷ Ag sipsip amu aben Yawe, ahilag Kayak, Nug epeɗikku, ag amuppa main lakkulag. Ag anam hewona, buttua amu, ag eɗun gona ahilkad pehppa daaglag.

⁸ Ag deɗ eblaih laippu ele amuppa ag bret yis iitta lakkulag. Aria deɗ eblaih aɗitppa amu, danab ah ag Yawe, ahilag Kayak, ag Nug noobppa qagmekkulag; amu auntai laa deɗ amuppa uɗat laa iinab hekkuoitte.

Ee Tatam Oɗue Digma Awaknu Hobul dayak haen

⁹ Ag digmena wit, bali keeke meu aonna, ag mettid anen anen ebqeppeg, mettid eblaih aɗit ele ukkeb,

¹⁰ ag Ee Tatam Oɗue Digma Awaknu Hobul haen dabmena, gamag ahak ele hobul amunu kobol dim lamidna hekkulag. Ag amu hekkulagnu diig am, ag Yawe, ahilag Kayak, ag Nug onig okkai mettaglag. Ag Yawe attem attem itattom amu, ag amu neegna anidna, ag ɗo hamu mettaknu ofa Nug metteg!

¹¹ Haen amuppa ag Yawe, ahilag Kayak, ag Nug aben Nug onig aguppa daakkunu epeɗikku amu, amuppa ag Nug noobppa gamag ahak ele Ee Tatam Oɗue Digma Awaknu hobul hekkulag. Ag, amu ag baelkadppa ele, ahilkad maɗi nid maɗi ah ele, Lewi buɗub aab naunau ooppa ag ele oh daatteb, wan laihnu danab, ag oolagppa daatteb, nid ag mamelkad mauhppig, ah qab, ag oolagppa daatteb oh ele, ag hobul amu gamag ahak ele hekkulag.

¹² Ag anukka Isip appa begbeg maɗi nid daappig dabmettanna, aakku ag ɗo imu oh tutukku dim lamitteg!

Pehppa Dayaknu Hobul

¹³ Ee aeg awak haen iitta mette haenppa amu, ag ee aeg aon malana, ag leppu grep meuppa ele aon malona, ag Pehppa Dayaknu Hobul dabmena, gamag ahak ele hekkulag. Ag gamag ahak amu deɗ eblaih aɗit oh hekkulagoitte.

¹⁴ Ag hobul henana, ag gamag ahak ele hekkulag. Ag baelkadppa, maɗi nid maɗi ah ele, Lewi buɗub, wan laihnu danab, aria nid ag mamelkad mauhppig, amu ah qab ele, ag appalkadppa daatteb ele, ag oh gamag ahak dooglag.

¹⁵ Yawe, ahilag Kayak, Nug ag ee kuɗum matta, ahilag uɗat ele itidkku amunu, ag deɗ eblaih aɗit ele amu oh aben Nug epeɗikku, amuppa ag Yawe, ahilag Kayak, ag Nug binag mekkulagnu, ag hobul amu gamag ahak ele hekkulag. Nug anam itattebeb, ag gamag ahak okkai dooglag.

¹⁶ Maɗ anen anenppa haen ewam ag Israel danab oh, ag Yawe, ahilag Kayak, ag aben Nug epeɗikkuppa Nug noobppa dup nona binag mekkulagnu, ag Nug amegppa uɗieg! Ag amu hobul gamag ahak ele ewamppa hekkulagoitte. Hobul dayak ewam amuam Bret Yis Iitta Lanaknu Hobul Nakok, Ee Tatam Oɗue Digma Awaknu Hobul, amu Pehppa Dayaknu Hobul ele. Ag Yawe, ahilag Kayak, ag Nug aben epeɗikku, amuppa haen anen anen amu ohppa Nug noobppa miag atiglag, ag ɗo hamu mettak Yawenu aon wakkulagoitte. Ag hamu aib goppig.

¹⁷ Anen anen ag Yawe, ahilag Kayak, ag Nug ag itatta, keeke mattom amu, ag amu dabmena, ɗo hamu mettak anam biappa Nug mettaglagnu dabmekkulagoitte.

Danab ah epeɗiattaknu

¹⁸ Yawe, ahilag Kayak, Nug aab oh madakkun hette amu, ag amuppanu epeɗiak danab, amu okkai danab ele otiatteg! Ag Israel dilag huu okkai anen anen, ag anam heig! Ag otiadppeg, geha ag danab ah dilagppa epeɗiak, Israel wan ohppa nai doya mala hettoɗia epeɗia elele mettak kobol dim lamidnana hekkulag.

¹⁹ Epeɗiak danab ag heppeg, nai doya mala hettoɗia epeɗia elele mettak kobol am kaliak aib dayom. Ag hettoɗiakppa laanu hamu ena hettana, laanu hamu, eheɗ aib heppig. Ag lokkumakppa eheɗ haknu ehanittak aib aoppig. Aɗinu? Kobol anam, amuam he, danab doyak dabmak ena ele dilag dabmak he kaboliattette, genab tutukku hak danab dilag nai ele he kaliak daatte.

²⁰ Am ag wan laa, Yawe, ahilag Kayak, Nug ag wan amu madatte ele, ag wan amu aoglagnu, ag appa bau daaglagnu amu, epeɗiak danab ag nai doya mala hettoɗia epeɗia elele mettak kobol tutukku heig! Ag aib kaliak laa heppig.

Kayak hambuppuak noolagppa dup nona binalag mak kobolnu nai

²¹ Ag kayak hambuppuak Aserah dabmekkulagnu biidod laa aon, ag Yawe, ahilag Kayak, ag aib nuhig qaɗab heqoppa qabappig.

²² Ag men gappi laa aib qabappig. Yawe, ahilag Kayak, Nug keeke amu ohnu nau ninig ele dootte amunu, ag aib anam heppig.