Duteronomi 15 - Nobonob Baibel

Hippalakppanu uhuqaknu maɗ

¹ Maɗ eblaih laippu ele ukkeb, maɗ eblaih aɗit ele iitta mekkunu heebeb amu, ag anen anen ag men doɗo Israel danab laa lon medappig, ag men doɗo amu eɗun mattaglagnu daatteb amu, ag lon amu hamu obippeg, iitta maɗ!

² Ag inam iikku hekkulag. Danab ag lon Israel laala dilagppa heppig amu, ag lon heppig amu otaɗkkulagoitte. Ag laa lon madappig amu, ag laa lon aoppig, ag ag eɗun nob mekkulagnu ii amana. Aɗinu? Haen amuppa ag laa nug ag amu ii hak haenppa amelagppa a doon malappig doon, ag aakku Yawe ag hekkulagnu aum bia haen doum daatte doon, ag anamib hekkulag.

³ Ɗo imuam danab ag Israel dilagppa lon heppig ele, ahilagnuib daatte. Wan laihnu danab amu, ag am lon eɗun, noob mekkulag.

^4-5 Amge ag geha Yawe, ahilag Kayak, ag Nug oɗe tutukkunab dim lamidnana, ag nuhig haknunab anak nai gemu da ag madattem imu oh tutukku dim lamidkkulag dayeb amu, Yawe, ahilag Kayak, Nug wan ag aoppeg, ag aulag daakkunu madatte, amuppa Nug ag huana itadkku amunu, ahilagppa daɗek laa ii daama.

⁶ Yawe, ahilag Kayak, Nug nai anan qakkom bia ag itittak ena madakku amunu, ag geha wanppan wan anen anen oh dilag danab ah lon mattaglag, amge ag am ahilagppanu ii aomna! Ag geha wanppan wan anen anen oh gumadkkulag, amge appan danab, ag ahan, ag Israel, ag ag ii gumadmana.

⁷ Amge qinob ag wan aon malan, daɗek danab ah laa aab, Yawe, ahilag Kayak, wan madatte, amuppa daaglag dayeb amu, ag akka ahilagnuib dabmena, daɗek amu ii ehanidmananu aib dabmeppig.

⁸ Iitta. Ag keeke mettaknu oolag qak iitta ele, ag aɗi keeke aoglagnu genab daatteb amu, ag lon men matteg!

⁹ Am ag dabmen autna aweg! Am ag dabmak nau aon aɗan, akka akka ahilagnu inam aib appig. “Nakok laa ele amu maɗ eblaih aɗit ele, amuam lonnu hippalakppanu uhuqaknu maɗ amu, maɗ amu digmekkunu daatte, am da men doɗo dahil eɗuen aokkulnu elele iittatai.” Dabmak amuam ena iitta. Ag amubia dabmena, ag daɗek keeke laa ii mattaglag am eheɗ. Danab amu amu, ag am ag lailkad, am ag ii ehanadkkulag dayeb amu, ag eheɗ heppignu Yawe oɗ mettaglagnu elele daatte. Ag anam heppeg, Kayak Nug ag eheɗ heppig akku.

¹⁰ Ag oolag qak iitta, hamu elelenab mattaglag. Aɗinu? Ag amu hekkulag dayeb amu, Yawe, ahilag Kayak, Nug ag aɗi hekkulag, Nug amu ohppa ag itadkku.

¹¹ Wan ag aoglag amu, amuppa haen oh laa ag oolagppa am daɗek daaglag. Diig amunu da haknunab anak nai ag Israel laala, ag daɗek daatteb amu ag ehanadkkulagnu attem.

Hibru maɗi nid, o uɗat ah uhuqattaknu

¹² Am Israel danabte, o ahte laa, nug nukka nahip maɗi nid, o maɗi ah daakkunu heeb, na daden mekkut dayeb, nug maɗ eblaih laippu ele uɗat heeb ukkeb, maɗ eblaih aɗitppa na maɗi nidte, o maɗi ahte amu heppe, nug uhuqak awaɗ!

¹³ Na maɗi nid nahip laa, nug nahip uɗat hette ele amu, na heppe, uhuqak aokkunu amu, na nug aib eppeg hamu uuidppe ukkom.

¹⁴ Na nug keeke hamu, noob eɗua awaknu iitta naɗi medakkut. Na nug sipsip, meeme, amu ee aeg, wain ele medakkut. Yawe, nahip Kayak, Nug ititta, keeke mettom amu, na amuppanu itidna, keeke mette!

¹⁵ Am ag anukka Isip wanppa begbeg maɗi nid daaegeg, Yawe, ahilag Kayak, Nug ag ehanatta, nuhig ɠagattag okkaippa amunu qagaiettakppanu eɗua uhuqak heum amu, ag appa baula begbeg maɗi nid ii daatteb, ag amu daulagppa doaɗ! Diig amunu gemu da ag haknunab anak imu madattem.

¹⁶ Amu nahip maɗi nid laa nug inam ha akkutai. “Da na ii uuidpa,” awa akku. Aɗinu? Nug na, na baenadppanu ele, ahilagnu oo mauhe, ag oolagppa daakkunu am enaib daatte.

¹⁷ Anamppa amu, na tutui qaɗib ele aon ⌊heppe, laut od guguittak dayebeb⌋, daug bamippa aɗappe ukka, od aɗeb, na tutuippa atulna, eɗun awe! Anam heppe, nug nahip maɗi nidib dayeb ukkeb, nuhig mauhak batakku.

¹⁸ Ag heppeg, ahilkad maɗi nid, o maɗi ah ag uhuqak aon, gona hamu oiglag amu, haen amuppa ag uug aib dooppig. Kobol amuam kobol nau aib dabmeppig. Aɗinu? Umu nug maɗ eblaih laippu ele nahipnu uɗat okkainab heum. Na laa nug uɗat amu men doɗo awaknu hekkunu amegppa appe helo amu, nug am uɗat nakokib helo. Imu nug uɗat okkai heum. Amu na anam hekkut dayeb amu, Yawe, nahip Kayak, Nug ag aɗi hekkulag am itidkku.

Doɗ ⌊dawai⌋ tatamnu mana mettak hak

¹⁹ Ag doɗ sipsip, meeme, makau dawai tatamnu, ahilag aɗppanu Yawe, ahilag Kayak, ag nuhig daaglagnu tituankkulagoitte. Ag makau okkai ebehi ele ⌊dawai⌋ tatamnu ahilag dadppa uɗat hekkulagnu aib heppig; sipsip, meeme ⌊dawai⌋ ele tatamnu uɗig ele aib otaɗppig.

²⁰ Iitta. Ag baelkadppa ele, ag doɗ amu Yawe, ahilag Kayak, ag Nug noobppa, maɗ anen anen oh aben Nug epeɗikku, ag amuppa daanna lakkulagoitte.

²¹ Amge doɗ tatam amu, ag beɗulagppa eheɗ laa daakku dayeb, amuam baeg nau autaut oiyakte, ameg gaɗuakte, o iitta ag beɗulagppa eheɗ laa ele dayeb amu, diig amunu ag Yawe, ahilag Kayak, ag nuhignu aib mana mettak heppig.

²² Iitta. Ag keeke amu ag baelkadppa ele aabppa lakkulag. Auntai nug Kayak ele ouqa dayaknu elele daatte, o auntai Kayak ele ouqa dayaknu elele iitta daatte amu, ag oh lakkulag. Amuam danab laa mauhnoak ag lakkulag. Aun laa nug lakkunu, amu gasel, o dia latteb bia lakkulag.

²³ Amge ag tiig amu aib lappig. Tiig am, ag le bia wanppa gokkaɗppeg ukkaɗ!