Duteronomi 14 - Nobonob Baibel

Danab ah dilag ɗo nai digdig

¹ Ag am Yawe, ahilag Kayak, ag nuhikkud danab ah daatteb. Am laa nug mauheb amu, ag beɗulag aib otaɗna, o ikkilag uɗug laa hetteb bia laih laih aib hoippig.

² Aɗinu? Ag Israel, ag am danab ah, Yawe, ahilag Kayak, Nug ahilagnu, nuhignu tituanak daatteb anadtte. Wanppan danab ah oh oolagppa, Yawe, ahilag Kayak, Nug ag danab ah nuhignab daaglagnu tituanattom. Ag am keeke enanagnab laa bia nuhignu daatteb.

³ Ag ee laa, Yawe Nug amunu ooppa uuaknab dootte amu, ag amu ii lakkulagoitte.

⁴ Doɗ ag lakkulag ele amu iikku: makau okkai ebehi ele, sipsip, meeme,

⁵ dia, gasel, dia diig laa, beɗu nakok, meeme dakkuɗ, ibes, antelop amu qaukoppan sipsip ele.

⁶ Ag doɗ eppeg baeg di ele gamagppa obatak ele, amu ee eɗua kele be, eɗua latte ele, doɗ amu ag lakkulagnu elele,

⁷ amge doɗ laa, keeke aɗit amu oh iitta, nug eppeg baeg di am obatak ele, amge nug ee lawowa, eɗua kele be, eɗua lanak kobolppa ii latte, o nug ee lawowa, eɗua kele be, eɗua lanak kobolppa latte, amge nug eppeg baeg di am obatak iitta amu, ag lakkulagnu elele iitta. Amunu ag doɗ kamel, hea, o rok badsa, ag amu aib lappig. Aɗinu ag amu ii lamana? Ag ee eɗun kelaeg be, eɗun latteb ele, amge ag eppelkad baelkad di gamagppa obatak iitta. Ag Israel, ahilagnu amu, doɗ amu ag ii lanaknu epeɗiak daatteb.

⁸ Bo ele ag ii lanaknu epeɗiak daatteb amunu ag bo aib lappig. Aɗinu? Bo ag eppelkad baelkad di gamagppa obatak ele, amge ag ee lawona, eɗua kele be, eɗua lanak kobolppa ii latteb. Doɗ amu ag ii lamananu epeɗiak daatte. Ag ii lamana, o iitta ag mauhak gaɗalkad ii lauɗadmana.

⁹ Doɗ ag leppa daatteb ele amu, doɗ amu ag gonelkad, guhilakkad ele, ag amu oh lakkulagnu elele.

¹⁰ Doɗ ag leppa daatteb ele, ag gonelkad, guhilkad iitta ele, ag doɗ amu ii lamana. Ag Israel, ahilagnu amu, doɗ amu ag ii lanaknu epeɗiak daatteb.

¹¹ Ag ai lanaknu epeɗiak daatte amu lakkulagnu elele.

¹² Ai imu amu, ag lakkulagnu elele iitta: ai igel, kaub, kaub hinqakib,

¹³ kait kokoɗ, kait hinqak, palkon digdig,

¹⁴ alɗal digdig,

¹⁵ hipunai qeqeɗi ele, hipunai gayak baag eheɗ ele, kanai, kihkih digdig,

¹⁶ hipunai nakok, hipunai okkai, hipunai hakkab,

¹⁷ atu taɗakppan hipunai, ospe, kormoran,

¹⁸ stok, qaɗ digdig, hupoe, meɗeb ele. Ag ai amu oh aib lappig.

¹⁹ Am wanppan doɗ naunau ag hagagaɗna oinna, huanaknab happutak daatteb ele, doɗ amu ag ii lanaknu epeɗiak daatte. Ag keeke amu ii lamana.

²⁰ Amge doɗ haulkad ele amubia laippu laippu, ag lanaknu epeɗiak daatte, ag ɗo amu waappa ii daatteb, ag amu lakkulag elele.

²¹ Doɗ ag akka mauhtteb amu, ag aib lappig. Ag doɗ amu wan laihnu danab, ag uɗin, ahilkad aab adekkuppa, ag oolagppa daatteb madappeg lakkulag, o ag heppeg, wan laihnu danab ag daden mekkulagnu elele. Ag akka amu aib lappignu diig am, Yawe, ahilag Kayak, Nug ahilagnu, nuhignu tituanak daatteb anadtteb. Ag meeme nag, anignu huhppa aib badippig.

Keeke obatak eblaih laih ele ooppan, obatak laippu mettaknu

²² Am ag ahilag keh keeke, obatak eblaih tanig ele ooppanu obatak laippu amu otippeg dayaɗ! Keeke obatak eblaih tanig ele amu ee awak maɗ laippu amuppan ag anam hekkulag.

²³ Ag keeke obatak eblaih tanig ele ooppanu obatak laippu amu Yawe, ahilag Kayak, Nug ag aben Nug onig aguppa daakkunu epeɗikku amu, ag obatak amu aon, appa gona, amuppa ag Nug noobppa daanna lakkulag. Keeke obatak amuam: ee aeg, wain bau, olip goɗen, doɗ sipsip, meeme, makau ele nalkad ⌊dawai⌋ tatamnu, keeke amu oh. Ag Yawe, ahilag Kayak, ag hanhan nuhignu ebehilag oh bodoetta le mekkunu ippunittak aoglagnu amu, ag keeke obatak 10 ooppan, obatak laippu aon gona, anam hekkulag.

²⁴ Amu aben Yawe, ahilag Kayak, Nug onig aguppa daakkunu epeɗikku amu, aben amuam ag appalkad guguittak iitai daakku. Ele amu Yawe, ahilag Kayak, Nug ag itatteb, ag keekenu meu huanak aoglagtai. Anam bekku dayeb, diig amunu ag keeke amunu obatak laippu mawadna, appa gokkulagnu uma daye, ag keeke amu mawadna gokkulagnu elele iitta daatte dayeb,

²⁵ ag aɗi keeke, keh keekete, doɗ keekete, amu ag dadennu meppeg, daden meppeg, men doɗo aona, ag men doɗo amu aɗan, aon gona, Yawe, ahilag Kayak, aben Nug epeɗikku, ag amuppa gokkulag.

²⁶ Am ag gona tena, Yawe noobppa daanna, ag aɗi ee, am makautai, sipsiptai, wain o le laa amubiatai, o keeke laala lanaknu daatte, amutai lakkulagnu oolag heeb amu, ag men doɗo amuppa daden meig! Ag anam hena, ag Yawe, ahilag Kayak, ag Nug noobppa daanna, ag hobul naɗi hena, ag baelkadppa ele gamag ahak daan hekkulag.

²⁷ Ag amu henana, ag Lewi buɗubppan mana mettak danab iitta, amu dilagnu amu, ag aib ahilagnu daulag atiom. Aɗinu? Ag am ahilag wan laa, ag aulag daakkunu ii mattak.

²⁸ Hanhan maɗ ewam uuebeb, ag keeke obatak eblaih tanig ele ooppanu obatak laippu amu, ag akkan wana, appalag diigppa, aab amuppan bakkalen lakka mekkulag.

²⁹ Amu Lewi buɗub, ag aulag wan iitta ele, ag oolagppa daatteb, aria danab ag wan laihnu danab daatteb, nid ag mamelkad mauhppig daatteb, amu ah qab ag appalkadppa daatteb, ag ele oh uɗin daan, ag lappeg, oolag aɗakkunu, ag ee amu bakkalen lakka mekkulag. Ag anam heppeg, Yawe, ahilag Kayak, Nug ag aɗi hekkulag am itidkku.