Duteronomi 13 - Nobonob Baibel

Keeke dottolag hattana, nau aomnanu dabmettak nai

¹ Geha propet laatai, o danab nug butti aɗi keeke laa bekkunu daatte tulppa anidtte amu, nug Kayak dabmettaknu kobol danab haknu elele iitta, o uɗat ɠagattagnab laa bekkunu ab dooglagtai.

² Nug anam ab dooppeg, amu keeke amu genab bekku dayeb, danab amu nug amu dimppa aha, kayak hambuppuak ag anukka ii doyegeg uɗie, gemu ele ii dootteb, nug amunu, “Doppeg, ig ahat, aabaab laa dilag kayak noolagppa dup nota binalag mekkunig,” akku dayeb amu,

³ ag aib nuhig nai dooppig. Aɗinu? Yawe, ahilag Kayak, Nug ahilagnu ma anttak, ag nuhignu meulag ohppa, oolag ohppa ele oolag mauhttete, o iittate, Nug amu anidkkunu hette.

⁴ Ag Yawe, ahilag Kayak, ag Nug dim lamidnana, ag Nug aakkuib, ag nuhignu ebehilag oh bodoetta le maɗ! Ag nuhig haknunab anak nai dim lamidnan, Nug waappa daan Nug oɗe dim lamidnana, ag Nug guguittaknab dayeg!

⁵ Propet hambuppuak, o danab nug tul niitte, amge tul amu Yawenu ii uɗitte, danab amu nug ag Yawe, ahilag Kayak, nug ag Nug dimettaglagnu hette ele, ag nug qeppeg mauhkkuoitte. Aɗinu? Nug ag Yawenu nai tabappeg neeb oiglagnu aum. Yawe, ahilag Kayak, Nug ag Isipnu diia, omalatte uɗippig. Ao, Nug ag Isip appa begbeg maɗi nid daaegeg, Nug nuhig ɠagattag okkaippa ag amunu qagaiettakppanu eɗua uhuqak heum. Danab hambuppuak amu hette ele, nug ag ib laa, ib Yawe Nug ag dim ii lamidmananu haknunab aum amu, nug amuppa gokkulagnu hette. Kobol nau ag oolagppa daamanu, ag heppeg, aib dayom!

⁶ Na awante, amapte, bekkatte, aɗente, waatte, o na layapnabte, nug lokkumakppa na gumitta uɗia, na amenppa, “Doppe goɗa, kayak laa noolagppa dup noɗa binalag meɗu,” awa akkutai. Amuam kayak ag, amu ag mamelkad aɗi ele ii doyadppig.

⁷ Kayak amuam danab ag wan amuppa talilidna daaglag, laa ag guguittak daaglag, laa uma daaglag, am amu dilag kayak.

⁸ Amu laa nug uɗia, anam akku dayeb, na aib nuhig dabmak dim lamidna anam heme. Na aib oɗe doome. Am nuhignu oo gai-iitta doya oo metta ehanittak kobol ele aib heme. Nuhig guppiɗ aib daame. Nug mauhmanu aib ehanidme.

⁹ Na heppe mauhkkuoitte! Na aakku nug mauhkkunu digmena geɗittak hena, men eppe ukkeb, aria danab laa oh ag tuɗidna henan malaglagoitte.

¹⁰ Yawe, ahilag Kayak, Nug ag Israel, Isipnu diia, omalatte uɗippig. Ao, ag Israel, ag wan laappa begbeg maɗi nid maɗi ah ele daaegeg, Yawe Nug amuppanu diiom. Amu danab eheɗ amu hekku amu, nug ag Israel danab ah laa, nug ag Yawe, nuhigppanu matakkatta diikkunu hekku amunu, ag menppa makkuɗppeg mauhaɗ!

¹¹ Ag anam heppeg, Israel oh ag anam heppig doona, ag baɗan, auntai laa ag oolagppa kobol nau amu baula ii hema.

^12-13 Wan umu, Yawe, ahilag Kayak, Nug ag wan amu madakkunu hette amu, ag wan amu aon daanna, deɗ laa ag ahilkad aab laappanu danab laala, ag ag oolagppa daan, nau hetteb ele amu, ag lailkad aab amuppanu ag kayak hambuppuak, ag ii doyadtteb elenu amelagppa, “Doppeg, ig kayak laa noolagppa dup nota binag metu!” appeg, aab amuppan danab ag danab amu oɗelag doon dim lamidppeg, danab nau amu hetteb ele, ag aakku aab amuppan danab ah ag Yawe uuidna, ib eheɗppa oiglagnu aakku heppeg anam oiglagtai.

¹⁴ Anam beeb, ag amunu dooglag dayeb amu, ag hettoɗiak okkai, elelenab hekkulagoitte. Ag hettoɗiak anam henan, danab amu ag genab kobol amu, Kayak Nug kobol amunu ooppa uuaknab dootte ele, ag kobol amu ag oolagppa heppig anidkkulag dayeb,

¹⁵ amu ag ahilkad qep elabppa, aab amu aqaknu ban heppeg, aab amuppan danab, ah, nid, doɗ ele oh ag Yawenuib nuhig pelemppa dayeg!

¹⁶ Anam hena, ag danab amu dilag keeke oh akkan, aab gamagppa haɗap okkaippa mena main, ag aab nakok amu oh maippeg, ewa iitta maɗ! Amuam ag manaknu ofa, Yawe, ahilag Kayak, ag Nug medatteb, am amubia daakku. Aria, aab nakok amu nug nauhak anam aakku alet daakku. Ag aab amu aib eɗun bappaidppig.

¹⁷ Amu Yawe Nug tuɗitta, ag Israel laa, Nug ahilagnu oo nauhak huanak ii doomanu, Nug ahilagnu oo gai-iitta doya, oo metta, ehanatta heeb, ag danab ah kuɗum, Nug ag mamelkad aɗi amelagppa anam hekkunu nuhig nai ɠagattag qetta aum bia heeb bekkunu, ag aab nakok amu ooppan keeke laa aibnab ahilagnu aoppig. Keeke amu oh am Yawenuib nuhig pelemppa daatte.

¹⁸ Ag Yawe, ahilag Kayak, ag Nug oɗe doon, ag nuhig haknunab anak da gemu attem am dim lamidnana, ag Nug oo hette, ag kobol tutukku amu dim lamidkkulag dayeb amu, diig amunu Yawe Nug ahilagnu oo gai-iitta doya oo metta ehanatta heeb, ag danab ah kuɗum daaglag.