Duteronomi 12 - Nobonob Baibel

Yawe noobppa dup noa binag mak kobol haknu aben epeɗiak daatte

¹ Yawe, ag mamelkad aɗi dilag Kayak, Nug wan ag madatte, ag wan amu aon, amuppa daanna, ɗo iɗu iɗu ag dim lamidkkulagnu daatteb am iikku. Ag wan amuppa daanna amu, ag dim lamittaknu ii uuglagoitte.

² Ag danab wan anen anen amuppa daatteb ele lamadna aona, ag ahilkad kayak noolagppa dup noa binag mak aben ele oh loppaɗppeg nauheg! Amuam ag ahilkad kayak noolagppa dup noa binag mak kobol hekkulagnu keeke qauko okkaippa, amu naunauppa ele hadappig; ad okkai eppelkad bahia ukkak ele oh waalkadppa ele keeke hadappig amu, ag amu oh loppaɗatteg!

³ Ag ahilkad qaɗab loppaɗadppeg neppeg, men gappi oh aoɗadppeg nauheg! Ag kayak hambuppuak Aserah dabmekkulagnu biidod amu maippeg ewebeb, kayak hambuppuak dottolkad amu otaɗadppeg neig! Ag keeke amu oh heppeg iitta meig! Laa nug kayak hambuppuak amu onilkad dabmemanu, ag keeke amu ohnab heppeg iitta meig!

⁴ Am ag aib Yawe, ahilag Kayak, ag Nug noobppa dup nona binag mena, danab appanu ag ahilag kayak noolagppa dup nona binalag metteb bia heppig.

⁵ Iitta! Ag Yawe, ahilag Kayak, ag Nug gumidna gona, Nug noobppa dup nona binag mekkulagnu, Nug Israel ooppa aben adekku, Israel dilag huu okkai attenppa, Nug onig aguppa daakkunu, ag amuppa Nug noobppa dup nona binag mekkulagnu tituankku, ag amuppa gona heig! Ag mauhnoak aben laalappa ii hemana.

⁶ Am Yawe Nug aben laa ag Nug noobppa dup nona binag mekkulagnu ippuanatteb amu, ag manaknu ofa, mana mettak laala, keeke obatak eblaih tanig ele ooppanu obatak laippu Kayak mettak, keeke Kayak hamu ɗo mettak, nai genab ana qakkaknu ofa, amu laippu dayaknu ofa, makau, amu sipsip ele nalkad ⌊dawai⌋ tatamnu ele oh, ag aben amuppa Yawenu akkan wakkulag.

⁷ Aben amuppa ag, amu ag baelkadppa ele, ag Yawe, ahilag Kayak, ag Nug noobppa hobul naɗi hekkulag. Ag hobul henana, ag Yawe, ahilag Kayak, ag ahilag uɗat heegeg, Nug itittak ena mattom, amunu ag ee, keeke elelenab ele daan oittebnu dabmena, ag gamag ahak okkainab dooglag.

⁸ Gemu ig anen anen ig aɗi am tutukku anidta hettem, amge dimppa amu, anam ii daama.

⁹ Gemu ag anam hettebnu diig am, ag aben Yawe, ahilag Kayak, Nug ag madatte, ag amuppa ii wappig. Ag amuppa nona, ag appa gemu hetteb bia ii hemana. Wan amuam hik awak aben; ag aulag.

¹⁰ Ag haen elab iitta, Jodan le mataɗna wana, ag wan Yawe, ahilag Kayak, Nug ag madatte, ag amuppa daaglag. Wan amuam ag aulag daakkunu ag madatte. Yawe Nug ag ehanatteb, ahilkad kekeɗ eɗadna, ag appa aben aon, baɗak iittappa daanna amu,

¹¹ ag keeke oh da ag haknunab attem amu, ag amu oh akkan, Yawe, ahilag Kayak, Nug onig aguppa daakkunu aben epeɗikku ele, ag amuppa wakkulagoitte. Keeke amuam inam: manaknu ofa, mana mettak laala ele, keeke obatak eblaih tanig ele ooppanu obatak laippu Kayak mettak, Kayak hamu ɗo mettak, aria aɗi keeke ena ena ag nai genab ana qakkaknu ofa hekkulagnu appig ele.

¹² Am ag Yawe, ahilag Kayak, ag Nug noobppa gamag ahak hekkulag. Ag, amu ag bekkalkad, aɗelkad, ahilkad maɗi nid maɗi ah ele, aria Lewi buɗub ag appalkadppa daatteb ele, ag oh oo gamag ahak hekkulag. Lewi buɗub ag ahilag wan laa ag aulag daakkunu ii mattak amunu, ag amu dilagnu ele dabmetteg!

¹³ Am ag mauhnoak aben laalappa, manaknu ofa manadmananu dabmena autna aweg!

¹⁴ Am ag mana mettak hekkulagnu amu, ag aben Yawe, Nug ahilag huu okkai laa ooppa aben Nug epeɗikku ele, ag amuppaib hekkulagnu daatte. Aben amuppa ag manaknu ofa henana, ag keeke oh haknunab anak da attem amu hekkulagoitte.

¹⁵ Amge ag aab naunau attenppa doɗ teppu awaknu doɗ baalag otaɗadppeg mauhppeg tuqaglagnu am nai iitta. Ag gemu gasel, amu dia eleppa hetteb bianab hekkulag. Yawe, ahilag Kayak, Nug ag doɗ lanaknu gane madatte amu, ag am oh lakkulagnu elele. Kayak ele ouqa dayaknu elele, o ouqa dayaknu elele iitta, me ag aakku lakkulag.

¹⁶ Ii lanaknu daatte amu tiig aakkuib. Ag tiig amu le bia gokkaɗppeg wanppa ukkaɗ!

¹⁷ Amge ag mana mettak haknu keeke laa ele amu laulkadppa ii lakkulagoitte. Amuam, ag ee aeg, wain bau, olip goɗen bau ele obatak eblaih tanig ele ooppanu obatak laippu am Kayak mettak, aria makau ⌊dawai⌋ tatamnu, sipsip ⌊dawai⌋ tatamnu, meeme ⌊dawai⌋ tatamnu ele, amu nai genab ana qakkaknu ofa, ɗo hamu mettaknu ofa, amu keeke ag Kayak ɗo hamu mettaglagnu dabmetteb ele amu, ag amu oh ag laulkadppa ii lakkulagoitte.

¹⁸ Iitta! Ag keeke amu oh Yawe, ahilag Kayak, Nug aben epeɗia madakku ele, ag amuppa daanna lakkulagoitte. Ag aben amuppa, ag nid ahilkad, maɗi nid ahilkad, maɗi ah ahilkad, amu Lewi buɗub danab ag appalkadppa daatteb, ag ag ele daanna lakkulagoitte. Ag Yawe, ahilag Kayak, ag Nug noobppa lanana, gamag ahak doyeg! Yawe Nug ag ehanatte, ag ahilag uɗat heppig, ag amu dabmettanna gamag ahak doyeg!

¹⁹ Am ag ahilag wanppa daanna, ag Lewi buɗub dilag daulag atimanu, ag dabmena autna aweg!

²⁰ Am haen Yawe, ahilag Kayak, Nug nai aum bia ha, wan tom heeb otaleb amu, ag doɗ teppunu baalag tataɗkku amunu, ag inam akkulagtai. “Da doɗ teppu laa lalombia doottem.” Anam dayeb amu, ag teppu labeppeg, oolag didikku am nai iitta. Am elele.

²¹ Aria, aben Yawe, ahilag Kayak, Nug onig aguppa daakkunu epeɗia matteb, ag appalag guguittak ii daakkutai. Anam dayeb amu, ag makaute, o sipsipte laa, Yawe mattom amu, ag amu laa baag otaɗppeg mauheb tuqaglag dayeb, ag da haknunab anak ami amu dim lamidna, ag doɗ amu baag otaɗna, ag laulkadppa daanna lappeg, oolag didikkunu elele.

²² Aun laa, nug Kayak ele ouqa dayaknu elele, o elele iitta amu, nug teppu amu lakkunu elele. Ag gasel, amu dia eleppa hetteb, anamnab hekkulag.

²³ Amge bauklel am tiigppa daatte amunu, ag aib tiig lappig. Ag teppu tiig ele ii lakkulagoitte.

²⁴ Ag aib tiig lappig. Iitta! Ag tiig am le bia wanppa gokkaɗkkulagoitte.

²⁵ Am keeke oh ahilagnu, ahilkad nid naunau dilagnu ele, ena gokkunu amu, ag aib tiig lappig. Ag amu hekkulag dayeb amu, keeke oh ahilagppa ena gokkunu diig am, ag Yawe, Nug nuhig neekkakppa aɗi am tutukku, ag amubianab hekkulag.

²⁶ Yawe Nug aben tituana ab, ag amuppa ag keeke Kayaknu tituanna medappig, ag ahilag nai genab ana qakkaknu ofa ele, ag amu oh aon, appa wakkulag.

²⁷ Ag manaknu ofa hena, ag Yawe, ahilag Kayak, ag nuhig qaɗabppa teppu, tiig ele oh manan mettaglagoitte. Aria, mana mettak hak laa amu, ag amunu tiig am, Yawe, ahilag Kayak, nuhig qaɗab daugppa gokkaɗkkulag, amge teppu amunu ag lakkulagnu elele.

²⁸ Amu ahilagppa, ahilkad nid dilagppa ele ena, elele ba daakkunu amu, ag haknunab anak amu tutukku dabmettan dim lamitteg! Ag anam hekkulag dayeb amu, keeke oh ahilagppa ena gokku. Am ena gokkunu diig am, ag Yawe, ahilag Kayak, ag Nug nuhig neekkakppa aɗi am ena, aɗi am tutukku amu, ag amubianab hekkulag.

²⁹ Ag Kanan wanppa nona, appan danab ah lamadkkulagnu aakku daatteb. Amu Yawe, ahilag Kayak, Nug geha appan wan anen anennu danab appa ana daatteb, Nug heeb, ag danab ɠagattag iitta daan nauhkkulag. Amge ag lamadna malan, ag ahilag wanppa daappeg,

³⁰ danab amu ag ag Israel noolagppa padal mena autna aoppeg amu, ag Israel, ag aib inam appig. “Wan imunu danab ah ag attemtainab ahilkad kayak dilagnu dup noa binag mak kobol heppig? Ig ag heppig bia hekkunig.” Ag anam aib appig. Ag uhui amuppa aib noppig.

³¹ Danab ag gemu Kanan wanppa daatteb ele, ag dup nona binag mak kobol ahilkad kayak hambuppuak dilagnu hetteb amu, ag Yawe, ahilag Kayak, kobol ag hetteb ele amubia aibnab Nug noobppa dup nona binag meppig! Aɗinu? Yawe Nug Kanan danab, Nug ahilag kobol amunu nau ninig ele dootte. Ag kayak hambuppuak ahilkad noolagppa dup noa binag mak kobol henana, ag kobol digdig, Yawe Nug kobol amunu ooppa uuaknab dootte, ag amu hetteb. Kobol nau ag hetteb ele amu, amu oolagppan laa naunab daatte, amuam ag bekkalkad aɗelkad ele manadna, ahilkad kayak hambuppuak madatteb.

³² Ag haknunab anak da attem imu oh tutukku dabmettan dim lamitteg! Ag nakok laa aib tuɗidppig, maha laa ele aib otaɗppeg neum.