Duteronomi 11 - Nobonob Baibel

Ag Yawenu oolag mauhebeb, ag Nug oɗe dim lamidkkulagnu nai

¹ Ag Yawe, ahilag Kayak, ag nuhignu oolag mauhehe, ag nuhig haknunab anak, nuhig ɗo ele oh hanhan dim lamidkkulagoitte.

² Ag imu doyeg! Da gemu nid ahilkad amelagppa nai ii madittem. Yawe, ahilag Kayak, Nug ag gemu daatteb imu, Nug ag toliatta, bu mattom amu, ahilkad nid ag amu ii anidna dooppig. Ag gemu daatteb, ag Yawe, Nug am dagom onig ɠagattag ele daatte anidna, ag nuhig ɠagattag, Nug ebehi okkai ele amu, ag amu ele anidppig. Ahilkad nid ag ii anidppig.

³ Yawe Nug nuhignu dabmettaknu kobol danab haknu elele iitta, kobol iɗu iɗunu ele Isip appa, ahilag king Paro, nuhikkud danab ele dilagppa, amu nuhig wanppa ele heum amu, ahilkad nid ag amu ii anidppig.

⁴ Isip dilag ban danab ag, ag Israel lamadna uɗiegeg, Yawe Nug he, Isip ag, ahilkad hos ele Le Kokoɗppa yu lana mauhppig, am ahilkad bannu karis ele nauhppig, amge nid ahilkad ag amu ii anidppig. Yawe amu he, Isip nug baula ɠagattag ele ii daatte.

⁵ Yawe Nug ag Israel, Nug ag atu taɗakppa attemnab atognoattette, ippa uɗippig,

⁶ amu haen Yawe he, Israel oolagppanab Datan, Abiram ele, aa Ruben buɗubppan danab Eliap bekoɗ, aa wan oɗe matule amu, aa, aa baeltippa ele, ahilti peh, amu keeke ahilti oh ele ooppa nopiɗ, ag Israel, ag ahilkad nid ag amu oh ii anidppig.

⁷ Ahilkad nid ag amu oh ii anidppig, amge ag danab ah tatamnu, ag Yawenu hak ɠagattag okkai, ebehi ele amu, ag amelagppanab aakku anidppig amunu, da ag amelagppa attem.

Oɗe dim lamittak itittak ena awaknu nai

⁸ Ag keeke oh Yawe Nug heewo anidppig amunu, ag haknunab anak nai gemu da ag madattem imu, ag tutukkunab dim lamitteg! Ag amu hekkulagnu diig am, wan ag Jodan le mataɗana, nona aoppeg, ahilag daakkunu daatteb amu, ag nai amu oh dim lamidkkulag dayeb, ag amu hekkulagnu ɠagattag elele.

⁹ Diig laa am, ag oɗe dim lamidkkulag dayeb amu, ag wan, Yawe Nug ag mamelkad aɗi, amu ag buɗulkad madakkununab nuhig nai ɠagattag qetta aum amu, ag wan amuppa haen elab daaglag. Wan amuam wan enanag, wan ittag ele, amuppa ee meu huan otte!

¹⁰ Wan ag nona aoppeg, ahilagnu dayeb daaglag ele amu, Isip wan ag appanu uɗippig ele, am wan amubia iittanab. Isip appa amu, ag ee tumu eppona, ag le gokkunu ippu ooɗna, wan buueg ukke, ag dad nakok aben qaɗaiettakppa eppona, le medatteb bia, ag appa ahilkad dad okkai le mettak uɗat okkai hedappig.

¹¹ Wan ag Jodan le mataɗna aon daaglagnu hetteb ele amu, wan amuam wan qauko, oolnu noak ele, amu appa gu okkai neene, wan aotte.

¹² Wan amu Yawe, ahilag Kayak, Nug atognotte ele. Nug deɗ deɗ ohppa dabmedette dayeye, maɗ digmakppa ukkeb, maɗ batakppa batak.

¹³ Ag haknunab anak nai, gemu da ag madattem imu oh tutukku dim lamidnana, ag Yawe, ahilag Kayak, ag meulag ohppa, oolag ohppa ele nuhignu oolag mauheb, ag Nug waappa daan Nug oɗe dim lamidkkulag dayeb amu,

¹⁴ Nug geha gu hanebppa heeb neeb, ag ee aeg, wain bau, olip goɗen ele aoglag.

¹⁵ Nug geha heeb, gikkiɗah ena ambak ele ahilag makau lakkulagnu beeb, amu ag Israel, ag ee kuɗum labeppeg, oolag aɗakku.

¹⁶ Amge ag dabmak eheɗ aomnanu dabmeig! Ag amu hekkulag dayeb amu, ag Yawe dimettaglag; ag kayak hambuppuak waappa daan, ag noolagppa dup nona binalag mekkulag.

¹⁷ ⌊Ag amu hekkulag dayeb amu,⌋ Yawe Nug ahilagnu oo nauhak okkainab dookku. Nug heeb, gu ii nema. Ag ee meu laa iinab aomna. Anam heeb, ag laippun wan amuppa, Yawe Nug ag madatte amu, ag amuppa mauhkkulag.

¹⁸ Anam amunu, ag nai dahil imu aɗan autnanab aweg! Ag eɗun dabmekkulagnu, ag eppelkadppa at dayaknu qakkaladppeg daaglag. Ag hanhan anidkkulagnu, ag uɗalkadppa qata-aqadkkulag.

¹⁹ Ag nid ahilkad ippuanatteg! Ag laulkadppa daanna, adeppa adeppa gonana, niiglag henana, niion eɗun ahatteb, haen amu ohppa ag mattiak hebeppeg dooglag.

²⁰ Ag laulkad odnu ad ukku aɗit laih laih daattep, amu aɗ odppa ele yaappeg daaglag.

²¹ Ag Yawenu ɗo ag amelagppa daakkunu anam heppeg, gemu hab, wanppanu attan daatte amu, hab amu anam dayeb ukkeb ukkeb, haen adekku batakku amu, haen gamag amu ohppa ag, ahilkad nid ele ag wan amu, Yawe Nug ag mamelkad aɗi madakkunu nai ɠagattag qetta aum amu, ag wan amuppa haen amu oh daaglagnu, ɗo imu oh dim lamitteg!

²² Aɗinu ag Yawenu haknunab anak oh da gemu ag madattem dim lamidkkulag? Ag amu hekkulag dayeb, amuam ag Yawe, ahilag Kayak, ag nuhignu oolag mauheb, guguittak daanna, Nug ag aɗi hekkulagnu aum amu hekkulag amu,

²³ Yawe Nug geha wan laala Kanan wan imuppa daatteb, amuppan danab ah, ahilag ɠagattag am ag Israel, ahilag eɗittak amu, Nug ag lamatta heeb, ag Israel ag ag ahilkad wanppanu lamadna aoglag.

²⁴ Am ag wan atten attenppa oiglag amu, wan amu ahilag daakku. Ahilag tom wannu amu, am atu taɗak yau uɗitteppanu appa digma, yawalti uɗitteppanu wana ukka, Lebanon wakku. Amu wan tom kaɗag uɗitteppanu daatte am Yupretis le, amuppa digma, qaban uɗitteppanu ukka ukka, Mediterenia yuppa wakku.

²⁵ Ag Nug oɗe dim lamidkkulag dayeb amu, ahilkad kekeɗ ag ag ii eɗadmana; kekeɗ ag geha oolna gokkulag. Ele amu Yawe, ahilag Kayak, Nug ahilkad kekeɗ dilagppa heeb, kekeɗ ag ahilagnu baɗak eheɗ nau dooglag. Nug amu hekkunu nai anan qakkom, amu aakku hekkunab. Nug ag wan madatte, ag wan amuppa adeppa adeppa oiglag amu, Nug amuppa anamnab aakku hekku.

²⁶ Gemu amu, da ag itittak ena aoglagte, iitta ag itittak nau aoglagte, da amu ag dabmak aoglagnu aakku attem.

²⁷ Ag nai haknunab anak gemu da ag madattem imu dim lamidkkulag dayeb amu, Yawe, ahilag Kayak, Nug ag itittak ena madakku.

²⁸ Amu ag nai haknunab anak Yawe, ahilag Kayak, Nug toppanu uɗitte amu, ag nai amu dim ii lamidna, ag kayak hambuppuak, ag kayak amu gemu ii doyadtteb, ag kayak amu noolagppa dup nona binalag mekkulag dayeb amu, Yawe Nug itittak nau madakku.

²⁹ Aria, haen Yawe, ahilag Kayak, Nug ag wan amu aon daaglagnu omalatteb, wan amu ooppa wakkulag dimppa amu, ag nai imu dabmekkulagnu, danab laa ag qauko Gerisim igippa daanna, ag Kayak dim lamidna, itittak ena aoglagnu nai eppeg dooglag. Dooppeg, laa ag qauko Ebal igippa daanna, ag Kayak dim ii lamidna, itittak nau aoglagnu nai ekkulagoitte.

³⁰ Ag dootteb, qauko aɗit amu, aa Jodan lenu qaban uɗitteppanu daattep. Kanan buɗub laa, atu Araba, aguppa daatteb, ahilag wanppa daattep. Am Gilgal guguittak, More ad ok gukkuattak, appa daattep.

³¹ Ag wan umu, Yawe, ahilag Kayak, Nug ag wan amu madatte amu, ag wan amu aon daaglagnu Jodan le imu mataɗna wana nokkulagnu hetteb. Amu haen ag wan amu aon, appa daaglag amu,

³² ag ɗo iɗu iɗu oh gemu da ag madattem imu oh tutukku dim lamidkkulagoitte.