Duteronomi 10 - Nobonob Baibel

Men maha baula hak

¹ ⌊Da qaukoppa eɗue tekkulnu daami,⌋ haen amuppa Yawe Nug da amelppa aum. “Na men maha aɗit tatamnu, amubianab otaɗna bappaidna, kunup laa amu ooppa inataknu adppa hena, na eɗun qaukoppa gumiɗna be!

² Na beppe amu, da nai tatam yaak, na aoɗatme ele, da amuib amuppa eɗue yen otaɗppi, men maha amu kunup adppa hak amu ooppa inakkut,” awa aum.

³ Yawe Nug anam da amelppa aum amunu, da akasia adppa kunup hein, men maha aɗit, tatam daapiɗ bia otaɗe, amu da men maha amu eppelppa mawaten, qauko temi.

⁴ Aakku Yawe Nug baula, nug tituana nai qakkaknu nai amuppa yom. Nug tituanak nai amuam Yawenu ɗo 10. Nug ya mala, da meɗom. Nai yaak amu ag qauko diigppa qagmen daaegeg, Yawe Nug qaukoppa aab dittiak ooppa dayaya, nai mattieye dooppig ele, amuib yom.

⁵ Amu ha male, da nein, tituanak nai yaak men maha aɗitppa daatte amu, da Tituanak Nainu Kunup ooppa inami. Yawe Nug anam haknunab aum bianab da Tituanak Nainu Kunup amu hemi. Men maha aɗit amu aa kunup ooppa aakku daattep.

⁶ Aakku Israel danab ah ag Jakan buɗub dilag le moɗppanu ahan, Mosera goppig. Am Aron nug Mosera appa mauhe, appa boumppig. Nug bekka Eleasar nug mameg abenabppa mana mettak ikki danab dayom.

⁷ Appanu ag ahan Gudgoda goppig, appanu amu ag Jotbata, wan amuam lenag naunau kuɗum ele, appa goppig.

⁸ Haen amuppa Yawe Nug Israel dilag huu okkai Lewi, ag Yawenu Tituanak Nainu Kunup kontrak inak ele maoglagnu otiattom. Nug ag nuhig ɗo maɗoɗnu uɗat Nug noobppa hekkulagnu, amu Nug onigppa danab ah itadkkulagnu ele otiattom. Uɗat amuam ahilag, ina hetteb.

⁹ Diig amunu Israel dilag huu okkai oolagppa, Lewi buɗub ag wan laa ag aulag daakkunu ii mattak. Yawe, ahilag Kayak, Nug anam haknu aum bia, Nug nukka am ag aulag bia daatte.

¹⁰ ⌊Amu matu anak, amubia,⌋ da qaukoppa Yawe noobppa deɗ 40, tuqan 40 ele, haen tatam daami bia daami. Yawe Nug dahil unuqittaknu oo elele doya, Nug heeb, ag padal mekkulagnu uua, Nug he, ag ii padal meppig.

¹¹ Amu Yawe Nug da amelppa aum. “Danab ah imu ag wan da ag mamelkad aɗi madakkulnu dahil nai ɠagattag qette ami amu, ag amuppa nona aoppeg, ahilag dayeb daaglagnu, na anuqna gona omaladppe ukkeg!” awa aum.

Oo mauhak doyaknu, amu oɗe dim lamittaknu ele anak

¹² Gemu amu, ag Israel, ahilagnu amu, Yawe, ahilag Kayak, Nug ag aɗi hekkulagnu atte? Nug ag imu hekkulagnu atte. Nug ag nuhignu ebehilag oh bodoetta le meeb, nuhig nai dim lamidnana, nuhignu oo mauhak doonna, ag Nug waappa daan Nug oɗe dim lamittak kobol ag meulag ohppa, oolag ohppa ele hekkulag.

¹³ Ag amu henana, ag Yawenu nai haknunab anak, amu ɗo laa oh ele, gemu da ag madattem imu, ag amu dim lamidkkulag. Ag nuhig haknunab anak, nuhig ɗo ele dim lamidkkulag amu, ag ehanittak ena aoglag.

¹⁴ Antteg! Hab, hab waappa, hab attan ukke ukke, adekku batatte, aria wan, am wanppan keeke oh ele amu, amu oh am Yawe, ahilag Kayak, nuhigib daatteb.

¹⁵ Amge Yawe Nug ag mamelkad aɗi dabmadatta, ahilagnu oo mauhehe, Nug ag buɗulkad daatteb ag otiattom. Gemu aakku anidttem, Nug ag mamelkad aɗi buɗulkad ag daatteb imu, ag epeɗiattom. Nug huu laa nuhikkud daaglagnu ii epeɗiattom.

¹⁶ Amunu ag Yawe dim lamidkkulagnunab dabmak aona henana, ag aib oɗe ii dim lamidmananu dabmak ahilag ɠagattag eppak dayom.

¹⁷ Aɗinu? Yawe, ahilag Kayak, Nug am kayak laa oh eɗadtte, Nug am naɗi laa oh dilag Naɗi daatte. Nug am Kayak naɗinab, ɠagattag okkai ele. Nug am danab Nug antta, ebehi oh bodoetta le maknu Kayak daatte. Nug danab ah ohnab kobol eleleppaib epeɗiadtte. Nug lokkumakppa eheɗ haknu ehanittak ii aoma.

¹⁸ Nug nai doya mala hettoɗia epeɗia elele mettak kobol dim lamittatta, nid ag mamelkad mauhppig, amu ah qab ele dilag nai epeɗiadtte. Nug wan laihnu danab ah ele, Nug amu dilagnu oo mauhak doya, ee madatta, lamen ele madatte.

¹⁹ Ag Israel, ag anukka Isip wanppa, ag wan laihnu danab ah daadppig amunu, ag ele wan laihnu danab dilagnu oolag mauhaɗ!

²⁰ Am ag ebehilag oh bodoetta le mak, Yawe, ahilag Kayak, nuhignu doon, ag Nug noobppa dup nona binag mak kobol nuhignu hena, nuhignab daaglagoitte. Ag ahilag nai ɠagattag qettaglagnu, ag Nug onigppa aakkuib amu hekkulagoitte.

²¹ Nug am ahilag Kayak, Nug ahilag binag mak aokkunu elelenab daatte. Nug aakkuib he, hak ɠagattag, danab hekkunu elele iitta, danab ah anidna, ebehilag oh bodoetta le mette ele amu, Nug aakkuib amu he, ag anidppig.

²² Ag mamelkad aɗi, ag anukka Isip noppig amu, ag danab 70 aakkuib. Amge gemu amu, Yawe, ahilag Kayak, Nug he, ag kuɗumnab, hab waappa hoɗoppai daatteb bia appatna daatteb.