Duteronomi 1 - Nobonob Baibel

Yawe Nug Israel ag Horep uun ahaglagnunab aum

¹ Buk imu amu Israel danab ah ag laih Jodan lenu kaɗag uɗitteppanu, appa atu onig Araba, appa daaegeg, Moses ag amelagppa nai mattiom ippunigtte. Ag haen tutu dayaknu aab Araba appa, Sup guguittak kalan daappig. Paran amu ag heqolag laih dayeye, Topel, Laban, Haserot, Disahap ele amu heqolag laih daappig.

² Danab ag hanhan oinna, qauko Horep uun, qauko Seir qe-eɗidna gonana, Kades Barnea gotteb ele amu, ag deɗ 11 gokkulagnu elele ⌊amge Israel danab ag Yawe oɗe tappaeg ne, haen elabnab atu taɗakppa oippig amunu⌋

³ Israel ag qauko Sinainu ahan, maɗ 40 uue, kalam 11ppa, deɗ digmakppa ag Jodan le laih kaɗag uɗitteppanu daaegeg, Moses nug digma, keeke imu oh ag amelagppa mattie dooppig. Keeke oh Yawe nug amelagppa akkununab amegppa aum amu, nug ag amelagppa mattiom.

⁴ Nai imu amu, nug Amo dilag king Sihon, Basan dilag king Og, ⌊amu ahilti daup ele⌋ aqattowa, nug nai imu mattiom. Sihon nug Hesbon appa dayaya, Amo danab ah gumattette, Og nug Astarot dayaya, Basan danab ah gumattom. Moses nug Edrei appa Og he nauhom.

⁵ Israel ag Moap wanppa, Jodan lenu kaɗag uɗitteppanu daaegeg, Moses nug nai mattiom. Nug ɗo nainu digma inam mattiom.

⁶ Ig Horep qaukoppa daautut, Yawe, ihinig Kayak, Nug ig amenigppa aum. “Ag qauko imuppa elele daappig.

⁷ Ag ahan, haen tutu dayaknu aab kalak uun gokkulagnu haen doum. Ag ahan, Amo dilag wan qauko qauko ele, amu atu laala, atu amu guguittak daattebppa ele gona, ⌊appan danab ah lamatteg⌋! Amuam laa ag atu onig Araba daatteb, amu laa ag qaukoppa daatteb, amu laa ag qauko qaban uɗitteppanu daatteb, qauko amu diigppa qauko nakok daatteb, laa ag amuppa daatteb, laa ag Negeb daatteb, laa ag uɗem okkai yu guguittakppa, appa daatteb. Ag Kanan danab dilag wan amu oh, Lebanon wan ele, ag appanu ukka ukka, Yupretis leppa batak ukkeg!

⁸ Da wan imu oh ag madattem!” Yawe Nug anam aum. Wan amu ohnu amu, Yawe Nug ag mamelkad aɗi, amuam Abraham, Aisak, Jakop ele, amu ag buɗulkadppa ele madakkunu nuhig nai ɠagattag qetta aum amunu, ag amuppa nona, aon dayeg!

Moses nug ikki danab Israel dilag huu okkai amuppan otiattom

⁹ Haen amuppa da ag amelagppa ami. “Da dakka, da ag mawatten gumadkkulnu elele iitta.

¹⁰ Yawe, ahilag Kayak, Nug he, ag appatna, ag ebqak huanak, kuɗumnab, ag hoɗoppai habppa daatteb bia daatteb!

¹¹ Amu Yawe, ag mamelkad aɗi dilag Kayak amu, Nug heeb, ag tausen huanaknab appatkkulagnu, ele Nug ag itadkkunu, Nug hekkunu nai anan qakkom bia amu, da Nug anam hekkunu ool daatte!

¹² Amge da dakka, da ahilag naittuɗ mak, uug laala ele amu, da attem hein dakka bappaidkkul?

¹³ ⌊Da elele iitta amunu,⌋ ag danab laala Israel dilag huu okkai anen anenppanu, ag doyak dabmak ena ele, ag danab keeke diignu doyak tutukku ele, ag danab ag ahilagnu ena elele dootteb amu, ag ag epeɗiadppeg, da ag ahilkad ikki danab daaglagnu otiadkkul.” Da anam ami.

¹⁴ Da anam ai, ag dahil maittaknu ena anidppig

¹⁵ amunu, da ag Israel da ahilkad huu okkai anen anen oolagppan ikki danab ag epeɗiadppig ele, ag am danab doyak dabmak ena ele, danab ag Israel, ag ahilagnu ena elele dooppig amu, da danab amu ag Israel danab ah ameg laala 1,000, ameg laala 100, ameg laala 50, amu ameg laala 10 dilag okkai danab daan gumadkkulagnu, ag ahilkad huu okkaippan ehanittak anuqak danab ele daaglagnu otiadmi.

¹⁶ Haen amuppa da ahilag epeɗiak danab amelagppa ami. “Laa nug laa naippa yaakku dayeb, ag nai doya mala hettoɗia epeɗia elele mettak uɗat tutukkunab hekkulagoitte. Ag epeɗia hak eleleppa Israel dilagppa hekkulagoitte; ag Israel danab ah dilagppa, ag wan laihnu danab dilagppa ele anamib hekkulagoitte.

¹⁷ Ag keeke laanu nai doon malan, hettoɗin, epeɗiak henana, ag danab nug onig okkai ele, diig amunu ag nuhignu ena aib heppig. Iitta! Ag nai doya mala hettoɗia epeɗia elele mettak eleleppa danab ah onilag iitta, amu danab onilag okkai ele, amu oh dilagppa heig! Ag oh inamib dabmatteg! Kayak Nug aun eheɗ heum, aun eheɗ ii heum amu dootte, amu haen ag nai doon malan, hettoɗin, epeɗin elele metteb amu, Kayak Nug ehanatteb, ag uɗat amu hekkulag amunu, ag laa ag ahilagnu attem hattaglagnu aib baɗappig. Uug atten laa babaittaknu elele iitta amu ag aon doppeg, da ehanatte bappaidkkul.” Da anam ami.

¹⁸ Am haen amuppa da ag attem hekkulagnu, da amu oh ag amelagppa mattimi.

Lokkumakppa atu italak danab ag wan tabappig

¹⁹ Yawe, ihinig Kayak, Nug ig anam hekkunignunab amenigppa a, ig Horep qauko uut, ahat yawaita, atu ag aakku anidppig ele amu, atu taɗak okkainab amuppa oit oit gomut. Danab nug atu taɗak amunu baɗak dookkunu elele. Ig atu taɗak amu oppat-ta gota, Amo dilag wanppa, laih qauko qauko eleppa tekkunignu teta, ig Kades Barnea temut.

²⁰ Ig teta, da ag amelagppa ami. “Ag gemu amu, ag Amo dilag wanppa laih qauko qauko ele, Yawe, ihinig Kayak, Nug ig wan amu megakkunu hette ele amu, ag aakku anidtteb.

²¹ Yawe, ahilag Kayak, Nug aakku ag noolagppa meumde, ag antteg! Ag gona, Yawe, ag mamelkad aɗi dilag Kayak, Nug aum bia ahilagnu aweg! Ag aib baɗappig! Ag oolagppa gai-iitta aib dooppig!” ami.

²² Amge ag gumiɗna uɗin, ag noob mena appig. “Tatam ig lokkumakppa atu italak danab, ag wan amu ihinignu pehettan italna anidkkulagnu maadpput gokkulag. Ag ig ib elele adekkute, amu aab atten atten daatteb amu doyak mekkaglag,” aon appig.

²³ Ag anam appig amu, da dabmein, ena bia anidmi amunu, da lokkumakppa atu italak danab 12, Israel dilag huu okkai anen anenppanu otiadmi.

²⁴ Da otiatti, ag wan maha qauko qauko ele, ag appa tena, letan nona, Eskolnu oolnu noakppa, appa nona, ag wan amu tabappig.

²⁵ Ag wan amuppan ee laala aon, akkan eɗun uɗin, wan Yawe, ihinig Kayak, wan Nug ig megakkunu hette ele am genab enanag anidppig amu, ag amu ig amenigppa appig.

Israel ag Yawe uun dimedappig

²⁶ Amge ag Yawe, ahilag Kayak, ag nuhig haknunab anak dimettan, tappaeg ne, ag wan amuppa ukkaknu uuppig.

²⁷ Ag peh ahilkadppa daan, naittuɗ mena appig. “Yawe Nug ihinignu nau ninig ele dootte amunu, Amo danab ag ig iqaglagnu, Nug ig Isipnu awikka, omaikka ippa uɗiom.

²⁸ Ig attem heta, wan amu ooppa nota aognig? Ihinkad lokkumakppa atu italak danab ag nai aeg, ig oonigppa gai-iitta doottem. Ag atteb, ‘Danab wan amuppan ag am elab, ag ahilag ɠagattag amu ig eɗikkak. Aab okkai ahilkad am okkai okkai, aab amunu aɗ amu attannab tak. Appa danab okkai okkainab daatteb. Danab okkai okkai amu ag am Anak buɗubppan!’ ” Ag anam aakku appig.

²⁹ Amge da ag amelagppa ami. “Ag baɗak eheɗ nau aib dooppig! Ag aib baɗappig!

³⁰ Yawe, ahilag Kayak, Nug ag noolagppa anuqa gotte, Nug ahilagnu Isip appa ban heehe, ag anidppig bia hekku.

³¹ Am anamib Yawe, ahilag Kayak, Nug nid mameg nuhig nid atognotte bia, Yawe Nug atu taɗakppa ag tuɗid ele mawatta atognoattatta, diiatta, aben imuppa uɗiom ag anidppig bia hekku.” Da ag amelagppa anam ami.

³² Da Nug ahilagnu anamnab heum ami, amge ag amu doon, ag doonna, Yawe, ahilag Kayak, ag nuhignu oolagppa genab doyak uuppig.

³³ Nugib ag haen tutu dayaknu aab adeppa adeppa kalaglagnu ippunadkkunu ag noolag awa ukkom. Nugib ag ib adeppa adeppa ippuanatteb gokkulagnu, Nug tuqan aab aɗuppa, amu amunppa lombigppa ele ag noolag awa ukkom.

³⁴ Am ag naittuɗ meegeg, Yawe Nug oo nauhak doyom amunu, Nug aɗi haknu nuhig nai ɠagattag qetta, Nug inam aum.

³⁵ “Ag aun aɗi ag naittuɗ meppig ele, ag menuattak huu laippu bia, ag nau hetteb ele amu, ag oolagppa laippu laa nug geha wan ena da ag mamelkad aɗi madakkulnunab nai ɠagattag qetten ami ele amu, nug am bau dayaya, ii anidma.

³⁶ Jepune bekka Kalep nug aakkuib wan amuppa nokku. Nug wan amuppa nokkunu diig am, nug da, Yawe, nug da tutukkunab dim lamiɗom. Da geha nug, am nug buɗuppan ele, wan haen nug lokkumakppa itala oiyom ele, da wan amu laa ag madakkul,” awa aum.

³⁷ ⌊Dahilnu amu,⌋ Yawe Nug ag beɗulagppa ha, dahilnu ele oo nauhe, ⌊haen amuppa⌋ da amelppa aum. “Na wan amuppa ii nomana!

³⁸ Amge nahip qekkaɗak, Nan bekka Josua, nug nokku. Nug geha Israel danab ah anuqa, omalatteb, wan amuam ahilagnu, ag aulag daakkunu nokkulag amunu, na nug wan amuppa nokkunu nug oo ɠagattag qette!

³⁹ Nug wan amuppa nokku, aria ag ahilkad nidnu, ‘Wan amuppan danab ag ihinkad nid, nid amu ag am danabnab, ahnab ele ii beppig, ag aɗi hak am ena, aɗi hak am nau, ag amu tutukku ii dootteb ele amu, ag ag aɗualadppeg, ag eppelagppa daaglag,’ appig amu, nid amu ag ele nokkulag. Da wan amu nid amu madakkul. Ag geha wan amu aona, amuppa daaglag.

⁴⁰ Amge ag gemu daatteb amu, ag eɗun aon, atu taɗakppa gona, Le Kokoɗppa ukkaknu ib aon ukkeg!” awa aum.

⁴¹ Yawe Nug anam a, ag appig. “Ig Yawe noobppa hipunin hemut, amge gemu ig gota, Yawe, ihinig Kayak, Nug ig amenigppa aum bia, ig wan amuppa nota, wannu ban hekkunig,” appig. Ag anam anana, ag danab ag oh, ag wan qauko qauko eleppa tena, ban hekkulagnu uug ii doon, ag ahilkad ban hak keeke akkana, ag ban gokkulagnu bappaidppig.

⁴² Amge Yawe da amelppa aum, “Da ag ele ii gomata amunu, ag aib banelag gona, ban heppig. Ag anam hekkulag dayeb amu, kekeɗ geha ag eɗadkkulag,” awa aum.

⁴³ Yawe Nug da amelppa anam aum amunu, da ag amelagppa ami, amge ag doyak uuppig. Ag uuna, ag Yawenu nai haknunab anak amu tappaeg ne, ag hibguitta hena, ban hekkulagnu wan qauko qauko eleppa teppig.

⁴⁴ Amge Amo danab appa daappig ag ahan, uppuh huanaknab ahan ban hetteb bia, ag banelag dona lamadppig. Ag ahan, ag lamadna aqadnana, Seir wanppa tena gona, Horma appa wana uuadppig.

⁴⁵ Anam daye, ag Israel ag gona, Yawe noobppa gaappig, amge Nug doyak uuom.

⁴⁶ Amu ig Israel, ig Kades appa haen nakok elab daamut.