Daniel 9 - Nobonob Baibel

Daniel nug Israel dilagnu unuqittom

¹ Ekserksis bekka Darius, nug Midia ted, nug laa heeg, Babilon dilag king aben awa ta daye, maɗ nug ta dayom,

² maɗ amuppanab da, Daniel, da Yawenu nai propet yaappig ebqein, da Yawe Nug Jeremaia ippunitte, nug yom bia, Jerusalem am maɗ 70 nauhak dayeb, haen amu maleb, ag bappaidppeg daakkunu doomi.

³ Da amu doomi amunu, da Naɗi Kayak dabmein, da ee ohnu kud mein dayeye, da lamen heɗiag ele takken, da uhuɗppa dayeye, da Naɗi Kayak oo doyak ele unuqidmi.

⁴ Da Yawe, Nug dahil Kayak, da Nug amegppa ig Israel, ig ihinig hipunin miagib mattien, da Nug inam unuqidmi. “O Naɗi, na Kayak ɠagattag ele. Ig danab ah ig nahipnu ebehinig oh bodoetta le mekkunu daattem. Na danab ah ag nahipnu oolag mauhtte, ag nahip ɗo ele dim lamittegeg, na hee, na danab ah amu ele ag nug oo mauhaknab doyaknu nug tituana nai qakkak hetteb amu, na nug tituana nai qakkak amu ii okkulttem.

⁵ Na anam hettem, amge ig, Israel, ig hipunin hemut. Ig kobol kaliak hemut. Ig nau hetata, ig nahip nai tappaut ne, ig nahip ɗo, nahip haknunab anak ele dimettamut.

⁶ Amu nahipad maɗi nid, ag propet, na maatte uɗin, na oninppa nahip nai madippig amu, ag nahip nai ihinkad king, ihinkad danab okkai, ig mamenkad aɗi, amu Israel wanppan danab ah oh ele amelagppa appig, amge ig nai amu doognignu uumut. Ig ii dabmemut.

⁷ O Naɗi, keeke oh na hettem am genab tutukkuib, amge ig Juda danab ah, ig Jerusalem danab ah, ig Israel danab ah oh amu, ig eheɗ hemut amunu, gemu ig uɗa nak naunab doottem. Ig na ippunigmenu oo metta ii uuak kobol ii dim lamidmut amunu, na he, ig wan atu piɗe piɗe matatuta gota daattem. Ig laa ig miag daattem, ig laa ig umanab daattem, amge ig oh am uɗa nak nau doottem.

⁸ O Yawe, ig, ihinkad king, ihinkad danab okkai, amu ig mamenkad aɗi oh ele, ig nahip-ppa hipunin hemut amunu, ig uɗa nak naunab doot oittem.

^9-10 Ig na dimettat, nahip nai tappaut neum. Ig na, Yawe, na ihinig Kayak, ig na oɗen ii dim lamidmut. Ig nahip ɗo, na nahip propet, ag nahip maɗi nid amu, na ag oɗelagppa ɗo amu ig mekkaeg, ig amu dabmetata, ii dim lamidmut, amge O Naɗi, na ihinig Kayak, na danab dilagnu oot gai-iitta doon oot mattan ehanadttem. Na danab ah dilag hipunin uhuqna madattem.

¹¹ Ig Israel danab ah oh, ig na dimettat, ig na dim lamidkkunignu uut, ig nahip ɗo tippalmut. Moses, nug na Kayak, nahip maɗi nid amu, nug danab ah ag nahip ɗo ii dim lamidkkulag dayeb, ag eheɗ laa awaknu anak waappa daaglagnu aum. Amu nug na danab ah ag nahip ɗo ii dim lamidkkulag dayeb, na uug madakkutnu nahip nai ɠagattag qettan mattime ele yom. Moses nug anam yom amu, na yaak amubia na he, ig bu qak nai ippunigtte bia aomut. Ig hipunin nahip-ppa hemut amunu, ig bu anam aomut.

¹² Na Moses oɗeppa ig, ihinkad danab okkai ele ig hipunin hekkunig dayeb, ig bu okkainab aognig ame amu, na he, nai amu meu o, ig nauhta autta aomut. Uug naunab Jerusalem beum amu, deɗ laa wan atu ohppa uug amubia aab o wan laappa ii beum. Iitta. Jerusalem bu okkainab awom.

¹³ Moses ɗoppa yom bianab uug naunab amu oh ihinigppa beum, amge ig na ihinignu oot gai-iitta doon oot mekkan ehanigkkutnu ig ihinig hipunin ii dimettat, ig na Yawe, na ihinig Kayak, ig nahip doyak diig genabib ii dabmetat dim lamidmut.

¹⁴ Ig amu hemut amunu na, Yawe, na heppe, uug naunab ihinigppa bekkunu ii uume. Aɗinu? Na, na am Yawe, ihinig Kayak, na am tutukkuib daattem. Na aɗi hettem, amu ele am genab tutukkuib. Ig na oɗen ii dim lamidmut, ⌊amunu na tutukku henana, bu mekkame⌋.

¹⁵ Amunu, O Naɗi, ihinig Kayak, na nahipad danab ah Isipnu nahip kobol ɠagattagppa omalatte, Isip uun ukkaeg, amuppa na onin okkai awe, gemu ⌊nai imu yaak haenppa⌋ ele, na onin okkai daatte, amu ig na noomppa ig hipunin hemut; ge ig nau hemut am na amenppa attem.

¹⁶ O Naɗi, na genab tutukkuib hanhan hettem amunu, na amubia gemu ele henana, na Jerusalemnu danab ah, ⌊Juda danab ah oh ele⌋ dilagnu oot nauhom daatte, na amu dilagnu oppoɗi bak doottem amu, na amu uukkutnu oɗ medattem. Jerusalem am nahip aab, am aab amu am qauko nahipnu tituanak daatte, am amuppa daatte. Ig nahipad danab ah, ig, amu ig mamenkad aɗi ele ig hipunin heut, na bu eheɗ mekkame amunu, danab ah wan atu ig taliligna daatteb ele, ag ig, aab Jerusalem ele, ag ihinignu, ‘Keeke hamunab,’ dootteb.

¹⁷ Amunu, O Naɗi, ihinig Kayak, na nahip maɗi nidnu unuqittak imu dookkutnu ool daatte. O Naɗi, na oninnu anuqak doon, na heppe, nahip mettid lag gemu hele-ettak daatte babaittak daakkunu oɗ medattem.

¹⁸ O Kayak dahil, na daut human, dahil unuqittak dookkutnu oɗ medattem. O Kayak, na neegppe ukkeb, aab okkai na onin amuppa daatte amu, na aab amu nauhakib daatte anidkkutnu oɗ medattem. Ig genab tutukku hak danab ah amunu, ig oɗmak imu ii hettem. Iitta. Ig danab ah tutukku iitta, amge na danab ah dilagnu oot gai-iitta doon, oot mattan ehanadttem amunu, ig oɗmak hettem.

¹⁹ O Naɗi, na dahil unuqittaknu dookkutnu oɗ medattem. O Naɗi, na ihinig hipunin uhuqna megakkutnu oɗ medattem. O Naɗi, na dahil unuqittak doon, ehanigkkutnu oɗ medattem. O Kayak dahil, laa ag na oninnu anuqak dooglagnu, na paha ehanigkkutnu oɗ medattem. Aɗinu? Na onin am aab okkai nahip-ppa, amu danab ah nahipad eleppa daatte.” Da anam unuqidmi.

Haen maha 70nu nai

²⁰ Da, Daniel, da Kayak anam unuqitten, da dahil hipunin, dahilad danab ah, Israel, da ahilag hipunin ele Kayak amegppa miagib mattien ainne, da Yawe, Nug dahil Kayak, Nug heeb, nuhig qauko nuhignu tituanak daatte am eɗua ena daakkun unuqittitti,

²¹ haen amuppanab Gabriel, nug pahanab hagagaɗa, gumiɗa uɗiom. Nug da laa anukka tuleglegppa anidmi, nugib aakku. Nug mana mettak danab hanhan tueb meeme, doɗ laa manan, Kayak medatteb, nug tueb haen amuppa dahilppa uɗiom.

²² Nug uɗia, dabmak meɗaɗa, da amelppa aum. “Daniel, da doyak dabmak ele, diignu doyak tutukku ele medakkulnu uɗimi.

²³ Kayak Nug nahipnu ooppa enanag dootte amunu, na digmena unuqidme, haen amuppanab da uɗien, unuqittak nahip nai nob medakkulnu doomi. Amunu na tulegleg anidme, nuhig meu dabmenan, nuhig diignu ele tutukku doye!

²⁴ Kayak Nug nahipad danab ah Israel, ag daanna anidkkulagnu, nahip aab okkai Kayaknu tituanak daatte, Jerusalem, amu tonakkunu, Nug haen maha 70 ba gokkunu ɗo laa aakku meum. Haen maha 70 amu bekkunu diig anen anen am inam: Haen maha amuppa Kayak Nug heeb, danab ah ag nai tappe nak kobol uuglag. Nug heeb, ag tuɗidna hipunin ii hemana. Nug eheɗ haknu nob nau nuhig ehanittak okkaippa iitta mekkunu heeb elele medakku. Nug heeb, kobol genab tutukku hanhannu bekku. Nug heeb, nuhikkud danab ag tulegleg genabppa aɗi aɗi keeke anidppig, propet ag dimppa bekkunu nai madippig ele amu, keeke amu oh meu okku. Amu Nug heeb, aben laa tituanaknab daakku.

²⁵ Daniel, na keeke doon, diignu doyak tutukku aɗe! King laa nug Juda, Israel ele ag gona, Jerusalem eɗun bappaidkkulagnu ɗo laa meeb, haen amuppa digmeeb ukkeb, laa king daakkunu goɗen gokkaɗakppa tituanak ele, nug nuhig gumak abenppa tekku amu, amuam haen maha 7, amu haen maha 62 laa ele; oh am 69 aakku. Ag Jerusalem eɗun bappaidnana, ag aab ooppan ib hena, ag aab dimittim daug daug ohppa, kekeɗ ag talilidna, aab ooppa gomananu le moɗ ele buuglag. Ag haen uug eleppa aab okkai amu eɗun bappaidnana, amu hekkulag; uug haenppa ii helob bia, amge ag anam hekkulag.

²⁶ Amge haen maha 62 amu dimugppa ⌊huu laa⌋ ag heppeg, laa king daakkunu goɗen gokkaɗakppa tituanak ele, nug king ii daama, nuhig ehanittak laa ele ii daama. Wan laappan okkai, dimppa aha amu, nug nuhikkud daup ele ag uɗin, Jerusalem, Kayaknu mettid lag ele heppeg nauhkku. Ag le ui uɗia keeke he nauhtte, amubia ag Jerusalem, Kayaknu mettid lag ele heppeg nauhkkulah. Aria, amu dimppa ukkeb ukkeb, gog tak haen batak amu, ban hak, keeke heeb nauhak ele daakku.

²⁷ Wan laappan okkai amu nug danab ah kuɗum, wan atu kuɗumppanu ele nug tituana nai qakkak hekkulag. Amu haen maha amu gamagppa okkai amu nug heeb, Israel danab ah ag mana mettak, ofa ele iɗu iɗu Kayak mettaglagnu elele iitta daaglag. Okkai amu nug anam ha, nug heeb, ag keeke naunab laa, keeke amuam heeb nauhak bekkunu keeke, ag keeke amu Kayaknu mettid lagppa qabappeg daakku. Nug heeb, ag appa qabappeg, keeke amuam anam dayeb ukkeb ukkeb, Kayak ib attenppa danab okkai amu nauhkkunu ɗo laa meum amu, ib amuppa danab okkai amu nug nauhkku.” Gabriel, nug da, Daniel, da amelppa anam aum.