Daniel 8 - Nobonob Baibel

Daniel nug sipsip dawai, meeme dawai ele tuleglegppa anatom

¹ Amu King Belsasar nug king abenab awa, nuhig king dayaknu maɗ ewamppa da, Daniel, da tulegleg laa anidmi. Tulegleg tatam anidmi, amuam laa, imuam laa.

² Tulegleg imuppa amu, da dakka, da Babilon wanppa aab okkai Susa ooppa aben aɗ ɠagattagnab ele, Elam prowinsppa daatte, da appa dayeye anidmi. Da appa dayeye, tuleglegppa da lenag onig Ulai, da lenag amu daugppa daami.

³ Da anam dayeye, da amel humen, neekki ukke, da noolppa sipsip dawai, qeqeɗi aɗit ele, nug ele lenag amu daugppa dayeye anidmi. Qeqeɗi aɗit oh am elab, amge laa am elabnab. Qeqeɗi elabnab amuam dim beum. Qeqeɗi tutu tatam be, elab am dim beum.

⁴ Da neekkitten daaiyi, sipsip dawai amu nug doɗ aɗi aɗi qaban uɗitteppa, yau uɗitteppa, yawalti uɗitteppanu ele daappig amu, nug appa ag ele ban hekkulagnu qaietta ukkom. Doɗ laa nug sipsip dawai amu eɗidkkunu elele iitta. Laa nug doɗ atten laa sipsip ele ban hepiɗ ehanitteb, sipsip nug aa ii eɗatmanu am laa iitta. Sipsip dawai nug aɗi hekkunu dabmeum amu, hakib heum. Nug anam he ukke, nug onig, ɠagattag okkainab ele dayom.

⁵ Da amu antten, dabmein daaiyi, meeme dawai laa, nug qeqeɗi ɠagattag ameg aɗit gamalahppa dayom ele qaban uɗitteppanu uɗieye anidmi. Nug uɗiomppanu wan am oh obata, huan eheɗnab uɗiom, baeg am wan ii tappom.

⁶ Meeme dawai amu nug sipsip dawai qeqeɗi aɗit ele, da nug lenag daugppa anidmi amu, nug nug gumitta uɗia, nug oppoɗi huan be, nug sipsip dawai ele ban hekkulahnu qaietta, huana uɗiom.

⁷ Nug qaietta ukka, sipsip dawai qekkunu huana ha, nug he, sipsip dawai qeqeɗi aɗit oh aakku qiipiɗ. Qeqeɗi qiieh, sipsip dawai nug ɠagattag daakkunu, aɗi laa hekkunu am elele iitta. Nug gai-iitta anam dayeye, meeme dawai duttune, sipsip dawai na qe, meeme dawai nug baegppa tappa oɗoɗe nauhom. Amu laa nug sipsip dawai ehanitteb, ena daakkunu elele iitta.

⁸ Meeme dawai nug anam he, sipsip dawai nug nauha daye, meeme dawai nug onig, ɠagattag okkai ele awa oiyom. Nug anam oiyom, amge nug ɠagattag, onig ele okkainab maama, gogppa te, laa he, qeqeɗi amu qiiom. Qeqeɗi amu qiie, aben qeqeɗi dayomppa amu qeqeɗi waɗele aakku beppig. Qeqeɗi amu ag elab mena, tutukku qappak ii daappig. Iitta. Ag kalin laih laih gona daappig. Laa kalia yawalti uɗitteppanu daye, laa kalia kaɗag uɗitteppanu daye, laa kalia yau uɗitteppanu daye, laa kalia qaban uɗitteppanu dayom.

⁹ Aria qeqeɗi laappa amu qeqeɗi nakok laa beum. Digmakppa qeqeɗi amuam gai-iitta dayom, amge nuhig ɠagattag okkai maama, qeqeɗi amu yau uɗitteppa, kaɗag uɗitteppanu, wan enanag, Israel wan, wan amu ele ya aokkunu elab ukkom.

¹⁰ Qeqeɗi amuam elabnab ma, hab attan ta, hoɗoppai laala yaalatte, nena qena wanppa daaegeg, hab daup laala ele he nena qeeg, nug amu oh baegppa tappalatte nauhppig.

¹¹ Qeqeɗi tatam nakok dayom amu, qeqeɗi amu nug nukka nug ha, nug Kayak, hab daup oh gumadtte, nug Nug bia daakkunu wagai ma haaha, nug laa ag deɗ oh doɗ manan, Kayak medatteb ele, nug he, ag mana mettak amu ii heegeg, nug he, Kayaknu mettid lag am keeke hamu bia dayom.

¹² Nug tappe nak huanaknab heehe, Kayak Nug nuhig ib oo ii ne, Kayaknu danab ah oppiaawak ele, amu Kayaknu mana mettak deɗ oh hetteb ele, amu oh nug eppegppa dayom. Qeqeɗi amu nug aɗi hekkunu heum ele, keeke amu nug dabmeum bia aakkuib beum. Amu be, nug he, nai genab aakku wanppa na qeum.

¹³ Aria, da Daniel, da tuleglegppa amu antten, da laa Kayaknu oppiaawak ele daatte, nug nai mattieye, laa, nug ele Kayaknu oppiaawak ele, nug nug amegppa nai laa aum am, da ahilah nai doomi. Nug oɗ metta inam aum. “Tulegleg danab imu anidtte ele, nug tuleglegppa keeke digdig anidtte. Amu keeke amu oh ba malakku; amu haen gane laa ele ukkeb, keeke amu oh ba malakku? Tuleglegppa nug inam anidtte. Qeqeɗi amu nug heeb, deɗ oh Kayaknu mana mettak ii hemana, nug tappe nak nau heeb, nauhak okkainab daakku, nug heeb, Kayaknu mettid lag am nug eppegppa dayaya, keeke hamu bia daakku, amu nug Kayaknu daup eɗatta, heeb nauhkkulag,” awa aum.

¹⁴ Laa nug anam oɗ mette, laa nug aum. “Kobol amu digmeppeg ukkeb ukkeb, buttua 2,300, am tueb ele 2,300 teeb, aakku malaglag. Malappeg, mana mettak danab ag heppeg, Kayaknu mettid lag eɗua, nuhignu tituana mettak daakku,” awa aum.

Engel Gabriel nug tulegleg amunu meu he, miag atiom

¹⁵ Da Daniel, da tulegleg amu andette, da tulegleg amunu diignu doyak tutukku aɗakkulnu dabmein daaiyi, laa nug beɗu am danab beɗu bia, nug da noolppa tula ba, da noolppa hibaitta dayom.

¹⁶ Nug tula ba, hibaitta daye, baag laa, Ulai le daugppa appa aum. “Gabriel, na danab imu nug tulegleg anidtte amu, na tulegleg amunu meu mehuqppe doyaɗ!” awa aum.

¹⁷ Baag anam a, Gabriel nug da gukkuiɗa uɗie, da baɗak eheɗ nau doyen, da wanppa nein qemi. Da nein qein daaiyi, nug da amelppa aum. “Danab bekka, na imu doye! Tulegleg na anidttem imu, tulegleg imuam gog tak haennu keeke.

¹⁸ Da wanppa niiiyi, nug nai mattieye, da mauhak bia daaiyi, da iɗul wan yom. Da anam daai, nug aɗaila ehaniɗe, da hibaitten daami.

¹⁹ Da hibaitten daaiyi, nug da amelppa aum. ‘Tulegleg na anidme ele am gog tak haennu keeke ippunigtte amunu, da qinob, Kayak oppoɗi beeb, bu mettak haenppa aɗi aɗi bekkunu daatte am appi dookkut.

²⁰ Sipsip dawai qeqeɗi aɗit ele na anidme amu, sipsip amuam Midia, Persia ele dilah ɗo maɗoɗ epponaknu keeke daatte.

²¹ Meeme dawai uɗig elab ele, nug Grik danabnu ɗo maɗoɗnu epponak keeke daatte. Qeqeɗi okkai, meeme ameg laih laih gamalahppa daatte, qeqeɗi amuam Grik wannu king ebqak tatamnu epponaknu keeke daatte.

²² Qeqeɗi amu qiie, qeqeɗi waɗele amu beppig am, qeqeɗi amu ag ɗo maɗoɗ waɗele, ɗo maɗoɗ tatamnu abenabppa dimppa bekkulagnu epponaknu keeke daatteb. Ɗo maɗoɗ waɗele ag bekkulag, amge ag ɠagattagnab, king tatam ɠagattagnab dayom, ag amubia, ii daamna.

²³ Amu ɗo maɗoɗ waɗele amu ag anam daappeg ukkeb, haen danab ag tappe nak naunab nau henan oippeg, haen amuppa king laa nug ahakku. Nug danab nau, neekkak nuhig am ɠagattag. Nug nukka ena, okkai daakkunu hambuppuak kobol digdig hak danab.

²⁴ Nug ɠagattag okkainab ele ba daakku, amge ɠagattag amu oh nuhig hakppaib ii bema. ⌊Iitta. Laa nug ehanitteb, ɠagattag okkainab ele daakku.⌋ King amu nug heeb, keeke kuɗumnab laa nauhakib daakku. Nug aɗi aɗi hekkunu heeb, am anamib bekku. Nug danab okkai ɠagattag ele eheɗ hatta, Kayaknu danab ah, ag Kayaknu oppiaawak ele daatteb, nug ag eheɗ hatteb, ag nauhkkulag.

²⁵ Nug hambuppuak kobolppa keeke haknu doya auta autanab awa, kobol amuppa nug nuhig uɗat haaha, laa kuɗum ag amu ii dabmetteb ele eɗadkku. Nug nukka, nuhignu, “Da am danab enanag, laa oh eɗattak,” dabmaama oikku. Laa ag akka, ag ahilagnu, “Ig maɗoɗ ele iikku daattem,” abeppeg, nug heeb nauhkkulag. Nug Kayak, Nug laa oh eɗadtte amu, nug Nug ele ban hekkulahnu hekku. Nug keeke okkai amu oh hekku, amge laa, danab iitta, laa nug heeb nauhkku.

²⁶ Kayak he, na tulegleg anidme, tulegleg amuppa na buttua ganenu, tueb ganenu nai doome amu, tulegleg amuam genabib. Am genab, amge keeke na anidme am paha meu ii oma. Haen elab ukkeb meu okku amunu, na tulegleg amu yaan, na nai amu qettoɗmanu aɗi hekkutnu daatte amu, na pehettan babaitte!’ ” awa aum.

²⁷ Da, Daniel, da amu antten malen, da beɗul gai-iitta me, da deɗ nakok kuɗum oɗe mein daami. Da oɗe mein daai ukke, eɗue ahen, kingnu uɗat tuɗitten hemi. Da tulegleg anidmi amu, da amunu dabmak huananab aomi. Laa nug tulegleg amunu diignu doyak tutukku aɗakkunu elele iitta.