Daniel 7 - Nobonob Baibel

Daniel nug tul niia, doɗ nau waɗele anattom

¹ ⌊Amge amu oh ii nak haenppa,⌋ Babilon dilag king Belsasar nug king abenab awa, maɗ laa ii ukkom, nuhig king dayaknu maɗ tatamnu amu, Daniel nug tul niiom. Nug niiak abenppa niiaya, tul niia, tuleglegppa keeke digdig anttom. Nug tul anam niia, aɗi aɗi anttom amu, nug amunu nai ikki ikki am yom.

² Nug inam yom. “Da, Daniel, da tuqan tulegleg laa antten, tulegleg amuppa da neekki ukke, ulah waɗele, am yau, yawalti, qaban, kaɗag ele, ag oh uɗin iwalegeg, yu naɗi koɗkoɗ eheɗ qeum.

³ Ulah anam he, yu koɗkoɗ qeeqe, doɗ dakkuɗ okkai waɗele, ag oh iɗulag piɗe piɗe, ag yuppan beppig.

⁴ Doɗ ebqak tatamnu am laion bia, amge nug haug ele. Haug amu ai igel, nug haug amubia aakku. Da neekki ukke anittitti, laa uɗia, haug amu hiɗalata awa he, doɗ amu nug hibaitta, danab hibaitta daatte bia dayom. Keeke laa amu, nug doɗ amu danabnu dabmak nug mettom.

⁵ Doɗ ebqak aɗit am bea iɗu bia. Doɗ amuam bea bia, amge gukka laih am nakok attan daye, laih am nakok honap dayom. Doɗ amu oɗeppa am doɗ laan qetti ebehi ewam dayeye, aegppa emala dayom. Doɗ amu anam daye, laa nug, ‘Ahan, teppu am huan lappe, oot dittiaɗ!’ ” awa aum.

⁶ Aria, amu dimppa da neekki ukke, doɗ ebqak ewam anidmi. Doɗ amuam lepad bia, amge doɗ amu gomeppa haug waɗele, ai haug bia daaeg, doɗ amu ikki am waɗele. Anam amu, laa nug doɗ amu wan gumattaknu ehah nug mettom.

⁷ Da tuqan tuleglegppa amu anttoya, tulegleg amuppa da neekki ukke, da noolppa doɗ ebqak waɗele anidmi. Doɗ amu nug iɗu am naunab. Laa anidkku amu, nug baɗak eheɗ nau awa, naunab aokku. Doɗ amu nug am ɠagattag okkainab ele. Nug aeg am okkai, aenppa hak. Nug doɗ laa awa, oɗoɗe, ebehi oh qiialatte, toppua ukke, teppu laala ii laum ele amu, nug baegppa eheɗ tappa oɗoɗom. Doɗ imuam doɗ laa oh bia iitta. Nug am laanab, nug qeqeɗi eblaih laih ele.

⁸ Da neekki ukke, qeqeɗi amu anatten, qeqeɗi amunu dabmein daaiyi, qeqeɗi nakok laa ele qeqeɗi laa oolagppa aakku beum. Baaba, qeqeɗi ewam laa duttunatte, bena gona ii daappig. Qeqeɗi dim beum amu, nug am ameg ele, ameg amuam danab ameg bia. Nug ele oɗe ele, amu nug nukka nug oɗeppa binag mak nai okkainab mattiom.

⁹ Qeqeɗi nakok, dim beum am anam heehe, da neekki ukke, da laa ag kingnu sia enanag kuɗum abenlagppa maatteg daaeg anadmi. Ag maatteg daaegeg, Kayak Hanhan Daatte Nug sia king nuhigppa heɗep na dayom. Lamen nuhig am hakkabnab, sno bia. Nug ikki uɗug am hakkab, sipsip uɗig bia. Sia king nuhig am aab ewak bia dayom. Amu sia king nuhig am ele wil ele, amu wil amu oh am danab aab ile, huana diditte, amubia ag oh huan ewegeg anidmi.

¹⁰ Le noa gotte, amubia Nug dayomppa aab aɗu le bia, noa ukkom. Engel tausen gane ag Nug ehanidna daaegeg, milion gane ag Nug noobppa daappig. Nug he, laa ag hettoɗiakppa epeɗiak danab daaglagnu daappig ele, ag heɗep nena daaegeg, ⌊ag epeɗiak uɗat hekkulagnu⌋ laa buk kolattom. ⌊Buk amuppa danab ah ag attem attem wanppa daanna heppignu nai am daatte.⌋

¹¹ Laa buk amu kolatte, qeqeɗi nug nukka binag humak nai okkai mattiaya dayom amunu, da baula neekki ukke, aɗi bekku anidkkulnu daami. Da anam, neekki ukke daaiyi, laa nug doɗ ebqak waɗele amu qe mauhe, beɗu he nauhe, buɗie, aab naɗi eheɗ ewom, amuppa teum.

¹² Doɗ ewam laanu amu, Kayak Nug gumaknu ehah ahilag matu aɗatta awe, hamu daappig, amge Nug ele he, ag nakokib tuɗidna, bau daappig.

¹³ Da tuqan tulegleg anidmi, amuppa da neekki ukke, da noolppa laa nug danab bekka bia, nug lombig hab waappa daatteb, nug amuppa dayaya uɗieye anidmi. Nug ukka, Kayak Hanhan Daatte guguitta ukke, laa ag omaleg, Nug gumittanab ukkom.

¹⁴ Nug gumitta ukke, amu Kayak Hanhan Daatte Nug king daakkunu ehah, binag amahlak oppiaawak ele, ɠagattag okkai, wanppan ɠagattag laa oh eɗattak ele mettom. Danab ah wanppan huu ohppanu, danab ah ɗo maɗoɗ ohppan, amu danab ah nai piɗe piɗe ohppanu ele ag Nug noobppa dup nona Nug binag meppig. Nug hanhan king daakku, laa tuqa ii aoma. Laa ele ɗo maɗoɗ nuhig heeb ii nauhma; gemu, am butti aɗi ele.

Daniel nug tuleglegppa aɗi aɗi anttomnu meu

¹⁵ Da, Daniel, da anam tuleglegppa keeke digdig anadmi, da amunu da oolppa uug nau doyen, da amunu dabmak huanaknab ele aomi.

¹⁶ Da dabmak huanak anam awen, da laa appa hibaitta dayom ele gumitten ukken, da nug keeke amu ohnu meu tutukku mehuqeb dookkulnu oɗ mettami; aakku nug keeke amu ohnu meu mehuqe doomi. Nug aum.

¹⁷ “Doɗ waɗele am wan imuppan ɗo maɗoɗ waɗele, ag bena, anen anen wan okkainab gumaglag ippunigtteb.

¹⁸ Ɗo maɗoɗ waɗele amu ag bena, anam daaglag, amge Kayak Attannab Laa Oh Eɗattak Nug heeb, ɗo maɗoɗ amu oh am nuhig danab ah oppiaawak ele dilag daakku. Am anamib dayebeb ukkeb ukkeb, anamib daakku. Laa nug ɗo maɗoɗ amu eppelagppanu aɗatta ii aoma.”

¹⁹ Am Nug da amelppa amunu ana male, da doɗ ebqak waɗelenu oɗ mettami. Doɗ amuam laa bia iitta. Iitta. Nug am laanab dayom. Danab nug doɗ amu antta, eheɗ nau baɗakku. Doɗ amu aeg am aen, nug baeg di am bras. Doɗ amu nug doɗ laa aɗa oɗoɗe, ebehi oh qiialatte, awa toppua ukkom, amu teppu laih nug ii toppua ukkom ele amu, nug baegppa eheɗ tappa oɗoɗom.

²⁰ Da doɗ amu qeqeɗinu ele dookkulnu ool dayom. Doɗ amuam igippa qeqeɗi eblaih laih ele, amu qeqeɗi am oolagppa qeqeɗi laa ele beum. Qeqeɗi dim beum amu, nug he, qeqeɗi ewam laa ag nug noobppa nena qeppig. Qeqeɗi amuam dim beum, amge nug okkai ma, anttakppa am nug qeqeɗi laa oh eɗattak dayom. Qeqeɗi amu nug ameg ele, nug ele oɗe ele; nug oɗeppa amu nukka nuhignu binag mak nai okkainab mattiom.

²¹ Da tuleglegppa neekki ukke daaiyi, qeqeɗi amu nug Kayaknu danab ah oppiaawak ele, nug ag ele ban henana, nug ag eɗattette anidmi.

²² Nug anam eɗattette ukke, Kayak Hanhan Daatte, Nug Kayak Attannab Laa Oh Eɗattak, Nug uɗia, nuhikkud danab ah oppiaawak ele ag qeqeɗi amu eɗidkkulagnu a, haen ag ahilag gumaknu uɗat aon, wan gumaglagnu be, ag gumak uɗat amu digmeppig.

²³ Da ool anam daye, oɗ mettai, laa da amunu oɗ mettai, nug meu inam mehuqe doomi. “Doɗ ebqak waɗele amu, doɗ amuam ɗo maɗoɗ laa wan atu gumaglag ippunigtte. Ɗo maɗoɗ amunu danab ah ag am laanab hekkulag. Ag ɗo maɗoɗ laala ahaglag bia ii daamna. Ag am wan atu ohnab aoppeg, ag eppelagppa daappeg, tappaladnana, oɗoɗadkkulag.

²⁴ Qeqeɗi eblaih laih ele ag am ɗo maɗoɗ laa amu wan atu gumakku amu, ag am ɗo maɗoɗ amunu danab ah dilag king. Am king amu oh ahan malappeppeg, king laippu laa nug ele ahakku. Nug laa daappig bia ii daama. Iitta! Nug am laa daakku. Nug heeb, king ewam ag nug waappa daaglag.

²⁵ King amu nug Kayak Attannab Laa Oh Eɗattaknu nai nau anana, nug Kayaknu danab ah oppiaawak ele uug nau madatta, nug heeb, ɗo laala Kayak meum, keeke laala ele Kayak meum daatte baolikkunu hekku. Nug anam heebeb, Kayak Nug ib oo ii nekku amunu, king amu nug Kayaknu danab ah oppiaawak ele maɗ ewam maha ele eɗadkku.

²⁶ Amge haen amu iitta meeb, laa epeɗiak amu hekkulagnu daatteb ag hettoɗiaknu balalppa daanna, ag king amunu ɠagattag oh aɗidna aon, ag heppeg, nug nauha autanab awa, padal mekku. Nug padal meeb, anamib hanhan daakku.

²⁷ Anam beeb, Kayak Nug king daakkunu ehah, ɠagattag, aria onig, ɠagattag ele wan atu oh hab waappa wanppa daatteb, wan atu amu ohppanu aɗitta awa, nuhikkud danab ah oppiaawak ele madakku. Danab amu ag am Kayak Attannab Laa Oh Eɗattaknu danab. Kayak Nug, nuhig wan atu oh gumattak am iitta ii mema. Hanhan daakku. Wan atu ohnu danab okkai, ag Nug noobppa dup nona binag mena, oɗe dim lamidkkulag,” awa aum.

²⁸ Da Daniel, da anam aakku antten doomi, amu da dabmak huanak aomi. Da iɗul am hakkab eppom, amge da laa amegppa amunu laa ii mattimi.