Daniel 6 - Nobonob Baibel

Ag heeg, Daniel nug moɗ okkai, laion daattebppa dayom

¹ Amu Darius nug ɗo maɗoɗ gumom ele amu, nug wan amu obate, maha 120, prowins bia neeg, nug maha laippu anen anenppa danab okkai maatte daappig.

² Nug ag anam maatte daaeg, nug danab ewam, ag amu oh dilag okkai daaglagnu ele tituanatta, maatte daappig. Ewam oolagppan laa am Daniel. Danab ewam amu, ag danab okkai 120 laa ag eheɗ laa heppeg, king uug doomanu neekkadnana gumadppig.

³ Ewam amu ag laa anam gumadna daaegeg, Yawenu Ouɗi Daniel ehanittette, ewam amu oolagppa Daniel nug enanagnab he, King Darius nug antta, nug Daniel nug ɗo maɗoɗ oh nug gumom ele ⌊king waappa⌋ gumadkkunu maittak awom.

⁴ King nug anam maittak awe, danab okkainab aɗit laa, danab okkai 120 laa ele ag Daniel gumak uɗat nuhig haaha, eheɗ laa heeb anidna, king amegppa akkulagnu dabmeppig, amge ag meidna daaegeg, nug eheɗ laa ii heum amunu, ag nuhig eheɗ hak laa king amegppa akkulagnu laa iitta. Daniel nug nuhig uɗat elelenab haaha, kobol eheɗ laa nukka ehanidkkunu aɗi laa ii heum amunu, danab laa amu ag nuhigppa eheɗ laa anidkkulagnu elele iitta.

⁵ Danab amu ag anam beɗu mak daanna, Daniel uɗatppa eheɗ laa ii heum anidna, ag akka akka appig. “Ig Daniel uɗat heebeb, aɗi eheɗ laa anidta, king amegppa akkunignu am ii anidmata. Ib laippu aakkuib daatte. Amuam nug nuhig Kayaknu ɗo pehettak dim lamidtte amunu, ig nug amuppa eheɗ laa heeb anidkkunigtai,” aon appig.

⁶ Danab okkainab aɗit, danab okkai 120 laa ele ag anam anana, ag oh ahan, king toppa gona, ag king amegppa appig. “O King Darius, na hanhan bau daakkutnu oonig daatte.

⁷ Ig nahipad ehanittak anuqak danab, aabnu gumak danab, gumak anuqaknab danab, dabmak mettak danab, amu gawana ele, ig oh dabmak laippu aot, dabmetata daattem. Amu ihinig dabmak am inam. O king, na ɗo laa danab ah oh dim lamidkkulagnu bappaidna meppe, danab ah oh ag nai amu dooppeg, nai amu ɠagattag daakkunu oonig daatte. Laa nug nai amu tippalmanu ɗo ele mekkut. Ɗo na bappaidna meppe, ɠagattag daakkunu oonig daatte am inam. Danab o ah aun laa nug kayak laa, o danab laa aɗi keekenu ii unuqidma; dayeb ukkeb, deɗ 30 uueb, danab ah ag eɗun, ahilkad kayak, ag lailkad ele keekenu gemu unuqadtteb bia tuɗidna hekkulag. Ag ahilkad kayak, ag lailkad deɗ 30 amu ii unuqidmana, amge laippuib ag unuqidkkulagnu elele; amuam na aakkuib. Aria, na ɗo amu mekkut dayeb amu, laa nug tippala, kayak laa, o danab laa unuqidkku dayeb, daup ag nug moɗ naɗi, laion daattebppa buɗippeg nokku.

⁸ Amunu O king, ⌊na ihinig dabmak imu ena anidttem dayeb⌋ na appe, laa nug ɗo amu yeeb, na onin amuppa yaappe, nai amu baɗ! Amu ɗo amu anam beeb, Midia danab, Persia danab ele dilag ɗo atte, amubia laa nug ɗo amu baolikkunu elele iitta; aakku daatte,” aon appig.

⁹ Ag anam appig, ⌊Darius nug ena doyom⌋ amunu, nug he, laa nai amu ye, nug onig amuppa yom.

¹⁰ Danab okkai amu ag anam heeg, king nug ɗo amu he ye, onig me, haen Daniel nug ɗo amunu doya amu, nug aha, lakka ukka, nug oo attan laa gililppa ulah ibuppa, danab nug appa dayaya, neekkeb laih Jerusalem daatteppa gokkunu elele, nug gililppa ulah ippu amuppa gateg qaun o, nug Kayak amegppa, “Ena hen mekkame,” anana, Kayak unuqittom. Nug deɗ ohppa haen ewam Kayak anam unuqittom. Nug kingnu ɗo nai amu ii babaittom haenppa heum bia tuɗitta heum.

¹¹ Amu danab okkai laa amu ag oh ahan, ameg laippu daan wana, Daniel nug Kayak unuqittatta, ehanittak medakkunu oɗ mettom anidppig.

¹² Ag anam nug anidppig amunu, ag eɗun, king toppa gona, ɗo nug he ye, onig meumnu nug amegppa appig. “O king, na ɗo laa, danab ah oh ag nai amu dim lamidkkulagnu inam iite bappaidme. Danab o ah auntai laa nug kayak laa, o danab laa aɗi keeke laanu ii unuqidma; ukkeb deɗ 30 uueb, danab ah ag eɗun, ahilkad kayak, ag lailkad ele keekenu gemu unuqadtteb bia tuɗidna hekkulag. Ag ahilkad kayak, ag lailkad ele, ag deɗ 30 amu ii unuqidmana, amge laippu ag nug unuqidkkulagnu elele; amuam na aakkuib. Amu danab laa nug kayak laa, o danab laa unuqidkku dayeb amu, nahipad daup ag buɗippeg, moɗ okkai laion daattebppa nokku. Na nai amu iite bappaidme?” Ag anam aeg, king nug nob ma, ag amelagppa aum. “Am genab, ɗo amu da aakku bappaidmi daatte. Midia danab, Persia danab ele dilag ɗo atte, amubia laa nug ɗo amu baolikkunu elele iitta; aakku daatte,” awa aum.

¹³ King nug anam a, ag nug amegppa appig. “Aakku amge, O king, Daniel, nug Judanu diia ukka laih me dayak danab daatteb oolagppan laa, nug nahipnu dab-ii-mette, ɗo na bappaidna he, laa ye, na onin meme amu, nug amu ele dab-ii-mette. Nug deɗ oh nuhig Kayak haen ewam unuqidtte,” aon appig.

¹⁴ Ag anam aeg, king doya, ooppa uug naunab doyom. Doya, nug Daniel ehanitteb, ena daakkunu dabmak ɠagattag awa, wagainab ma heehe, uudoum.

¹⁵ Nug anam he, uudo, danab okkai amu ag ameg laippu daan, ag eɗun king toppa gona, nug amegppa appig. “O king, na doottem, Midia danab, Persia danab ele dilag ɗoppa ɗo laa king nug he, laa ye, king onig amuppa yaatte amu, laa nug heeb, baolikkunu elele iitta; aakku daatte,” aon appig.

¹⁶ Ag anam aeg, ɗo anam dayom amunu, king nug haknunab nai anana, ag Daniel aon uɗieg, king Daniel amegppa aum. “Nahip Kayak, na Nug hanhan Nug waappa daan, nuhig maɗi nid daattem amu, Nug heeb, na ena daakkutnu ool daatte,” awa aum. Nug anam awa a, ag nug moɗ naɗi laion daattebppa buɗieg noum.

¹⁷ Ag buɗieg no, ag men okkai aon uɗin, amuppa moɗ ameg tonaeg daye, laa nug men amu awa, moɗ ameg kola, Daniel ehanitteb, ena daamanu, king nug nuhig doyaknu at ringppa daatteppa, nuhikkud danab okkai dilag at ele menppa meeg, anam dayom.

¹⁸ Anam daye, king nug eɗua, nuhig lag enanagnabppa ukka, nug tuqan amu ee laa ii laum. Nug danab, o ah ag ahi keeke edappeg, ena dookkunu ele uuom. Nug niikkun elele iitta.

¹⁹ King nug anam daye ukke, atu gait gikkieye, amahlak nakoknab daye, king aha, paha ukka, moɗ naɗi laion daattebppa ukkom.

²⁰ King nug ukka, moɗ naɗi laion daatteb guguittak ukka, nug baag oo doyak eleppa Daniel onigppa ewa aum. “O Daniel, na Kayak bau daatte elenu maɗi nid, nahip Kayak, na hanhan Nug waappa daan, nuhig maɗi nid daattem, Nug ehanitte, na qagaiettakppa ii daanna, laion eheɗ laa ii heidmananu elele daamete, o iittate?” ewa oɗ mettom.

²¹ King ewa anam a, Daniel nug nob ma aum. “O king, na hanhan bau daakkutnu ool daatte.

²² Dahil Kayak Nug da eheɗ laa Nug noobppa ii hemi aniɗa, O king, da nahipnu ele eheɗ laa ii hemi ele anttom amunu, Nug he, nuhig engel laa uɗia he, laion ag oɗelag aahekkulagnu elele iitta daan, ag da laiɗkkulagnu elele iitta. Ag da guittak laa ii meɗappig,” awa aum.

²³ Daniel anam a, king doya, nug gamag ahak huananab doya, ag Daniel humappeg bekkunu haknunab aum. Nug a, ag Daniel humaeg be, nug nuhig Kayaknu ooppa genab doyom amunu, ag nug beɗuppa eheɗ o guittak laa ii anidppig.

²⁴ Ag amu anidna, king haknunab a, daup ag danab ag Daniel beɗuppa nai genab iitta yaappig ele, ag danab amu, ahilkad ah, ahilkad nid ele diin dona, moɗ naɗi laion daattebppa buɗiatteg noegeg, ag moɗ batakppa ii noegeg, laion aelkadppa, eppelkadppa ele kattiɗadna heeg, huppu huppu neppig.

²⁵ Aria, amu dimppa King Darius nug nai laa huu ohppan danab ah, ɗo maɗoɗ ohppan danab ah, nai ohppan danab ah dilag ele inam yom. “Ag enanag, maɗoɗ ele daaglagnu ool daatte.

²⁶ Da ɗo imu iikku mei gotte. Danab ah ohnab ag da wan atu gumattem amu, wan amunu aben ohppa, ag ohnab ag Danielnu Kayaknu ebehilag oh bodoetta le maɗ! Danielnu Kayak Nug bau daatte. Ao, Nug hanhan daatte. Nuhig ɗo maɗoɗnu amu, laa nug heeb ii nauhma. Ge, nuhig wan atu gumak am alet, ii tuqa awak daatte.

²⁷ Nug danab ehanatte, ag qagaiettakppa ii daatteb. Nug ehanatte, ag padal ii metteb, Nug habppa, wanppa ele uɗat naɗi, Nug heumnu at daatte amu uɗat ɠagattagnab ele hette. Nug Daniel ehanitte, qagaiettakkppa ii dayeye, laion ag nuhignu eheɗ laa ii heppig,” awa yom.

²⁸ Amu Daniel nug Darius king dayom haenppa, Sairus, Persia danab, nug king dayom haenppa ele, Daniel nug maɗoɗ ena eleib dayom.