Daniel 5 - Nobonob Baibel

Eppeg laa gililppa nai yom

¹ ⌊Nebukatnesar mauhe ukke, dimppa⌋ Babilon dilag king onig Belsasar nug danab okkai nuhikkud 1,000 dilag hobul naɗi he daan, ee laegeg, Belsasar nug ag ele wain lappig.

² Belsasar wain lanan dayaya, nug laa ag kap golppa hak, silwappa hak ele, nug mameg Nebukatnesar Kayaknu mettid lag Jerusalem appanu akka uɗiom ele amu, ag amu akkan uɗiglagnu maatte goppig. King nug, nuhikkud danab okkai, nug wauud, nug wauud amge wauudnab iitta ele, ag oh amuppa wain lakkulagnu nug laa ag gona, kap amu akkan uɗiglagnu maatte goppig.

³ Nug maatte gona, Jerusalem appanu Kayaknu mettid lagppan kap golppa hak, silwappa hak ele akkan uɗippig amu, ag kap amu akkan uɗieg, king, nuhikkud danab okkai, nug wauud, nug wauud amge wauudnab iitta ele, ag oh kap amuppa le lappig.

⁴ Ag wain lanana, ag ahilkad kayak gol, silwa, bras, aen, ad, menppa dottolkad hak ele, ag amu binalag meppig.

⁵ Ag amu henan daaegeg, pahanab kingnu lag enanagnab simen gilil aɗak, amuppa lam maknu balal guguittak, appa danab eppeg tula ba, eppeg amu gilil amuppa nai yom. Eppeg nai amu yeeye, king nug anttom.

⁶ King nug amu antta, nug eheɗ baɗe, iɗu hakkab eppe, baeg eheɗ hahaɗe, gateg laih ona laih qeeqe, gateg laih uɗia, laih qeeqe, baeg laih laih oh gai-iitta meum.

⁷ King nug beɗu anam he, king nug emaɗ danab, doyak danab, eman danab ele ag uɗiglagnu onilagppa baag okkaippa e doeg, king nug aum. “Aun nug nai eppeg laa ba yom umu ebqa, nuhig meu ele ab dookkul amu, da lamen perpel ele metten, baagppan sen golppa hak ele metten, da heppi, nug Babilon gabman ooppa okkainab, da, laippu laa ele, nug i waantippaib daakku. Laa oh ag nug waappa daaglag,” awa aum.

⁸ Kingnu doyak danab amu oh ag king dayomppa doppig, amge ag oolagppan laa nug nai amu ebqa, nuhig meu ele ab, king dookkunu laa elele iitta.

⁹ Doyak danab ag amu hekkulagnu elele iitta amunu, King Belsasar eheɗ nau baɗe, iɗu hakkabnab eppe, nuhikkud danab okkai ag dabmak huanak aoppig.

¹⁰ Ag anam daaegeg, kuin kaino nug king, nuhikkud danab okkai ele ag nai mattiegeg doya, nug ag ee lappigppa uɗia, king amegppa aum. “O king, na hanhan bau daakkutnu ool daatte. Na aib doon ottainna baɗame! Na iɗun ele aib hakkab eppom!

¹¹ Nahip ɗo maɗoɗppa danab laa daatte, kayak ouɗi nuhigppa daatteb. Na mamen nug king dayeye, laa ag danab amu nug dabmak meu unuqagnu ele, nug dabmak pehettak ele, nug doyak dabmak ena ele amu, laa ag nug amubia daye anidppig. Nug kayak daatteb bia daye anidppig. Am Nebukatnesar, nug na mamen, nug king, nug danab amu nug am Babilon dilag baɗ mak danab, emaɗ danab, doyak danab, eman danab ele dilag okkai daakkunu tituana, nug aben amuppa meum.

¹² Danab amuam onig Daniel, amge king nug onig ataɗa, Beltesasar aum. Da danab amu, nuhignu ami, amubia nug dabmak pehettak ele, nug doyak ele, nug diignu doyak tutukku ele. Amge amuib iitta. Iitta. Nug laa tul niiom amu, nug tul niiak amunu meu mehuqkkunu elele. Nug nai meunabnu diig, nai meu uug elenu diig ele, nug nai amu oh diig mehuqeb, laa dookkunu elele. Amunu na Daniel onigppa eppe uɗiowa, nug nai eppeg laa yom umu, nug nai amunu meu mehuqeb dookkut,” awa aum.

¹³ Kuin kaino nug anam a, Belsasar doya he, laa ag Daniel omaleg, king toppa uɗie, king amegppa aum. “Da mamel nug danab ah laa Juda wanppan diia uɗie, ag ippa Babilon diia ukka, laih me dayak danab ah daatteb amu, na am amunu laate? Na Danielte?

¹⁴ Laa kayak ouɗilag nahip-ppa dayeye, na dabmak meu unuqagnu ele, na dabmak pehettak ele, na doyak dabmak ena okkainab ele a doomi.

¹⁵ Amu Babilon dilag doyak danab, baɗ mak danab ele da ag eppeg laa tula ba, gililppa nai yom, ag nai amu ebqena, meu appeg dookkulnu da hei, laa omaladna doeg, dahilppa uɗippig, amge ag am elele iitta.

¹⁶ Ag elele iitta, amge na tul niiaknu meu mehuqkkutnu, na keeke uug elenu diig ele mehuqkkutnu elele aeg doottem. Amu na nai eppeg laa gililppa yom amu ebqena, nuhig meu ele appe dookkul dayeb amu, da lamen perpel metten, baagppan sen golppa hak ele metten, da heppi, na Babilon gabman ooppa okkainab, da, laippu laa ele, i waantippaib daakkut. Laa oh ag na waatppa daaglag,” awa aum.

¹⁷ King nug Daniel amegppa anam a, Daniel nug nob ma aum. “O king, na keeke ena ena meɗakkutnu attem am da aokkulnu ool ii daatte. Na keeke amu nahipnu aɗakkut, o laa medakkutnu ool daatte. Amge da nai eppeg gililppa yom daatte umu, da ebqein, meu ele appi dookkut.

¹⁸ O king, Kayak Attannab Laa Oh Eɗadtte amu, Nug na mamen Nebukatnesar king abenab metta, ɠagattag, binag amahlak oppiaawak ele, aria ɠagattag okkai naɗi ele nug mettom.

¹⁹ Kayak Nug king abenab attannab nug mettom amunu, wan atu ohppan danab ah, nai ohppan danab ah ele ag na mamen baɗidna, hahaɗppig. King nug laa mauhkkulagnu oo heum amu, nug he mauhppig. Laa nug ag bau daaglagnu oo heum amu, nug he, ag bau daappig. Laa nug ag okkai daaglagnu oo heum amu, nug he, ag okkai daappig. Laa ag onilag iitta daaglagnu oo heum amu, nug he, ag onilag iitta daappig.

²⁰ Amge na mamen nug nukka, nug onig huma, beɗuppa tak danab ba, nug dada danab ele ba dayaya, nug kobol ena hemanu dabmak nuhig ɠagattag eppom amunu, Yawe he, nug king ii daya, binag amahlak oppiaawak ele nuhig ele iitta meum.

²¹ Nuhig dabmak eɗua, doɗ dilag bia daye, laa ag lamitteg ukke, nug danab ah ii daattebppa donki dakkuɗ ele daanna, nug makau gikkiɗah latteb bia gikkiɗah laum. Baito habppanu na, nug laittom. Nug anam daye ukke, nug Kayak Attannab Laa Oh Eɗattak Nug wanppan ɗo maɗoɗ oh gumadtte, Nug aun nug ahilag okkai daakkunu oo hette, nug king abenab medatte, nug dabmak amu tutukku doya, elele aɗa oiye, uug aguppa batom.

²² O Belsasar, na Nebukatnesar buɗub, na nuhigppa anam beum doome, amge na nakka, na onin ii qee neum, gemu ele ii hettem.

²³ Na amu helom, amge na ii heme, gemu ele ii hettem. Iitta. Na Naɗi, hab attan daatte, na Nug ele mehqak hekkulahnu hettem. Na he, laa ag nuhig mettid lagppan kap akkan uɗieg, na, nahipad okkai, na waatad, am na waatad amge waatadnab iitta ele ag amuppa wain lanana, ag kayak dottolkad golppa, silwappa, brasppa, aenppa, adppa, menppa hak ele binalag meppig. Kayak dottolkad amu ag keeke laa amelagppa anidkkulagnu iitta, ag daulagppa keeke laa dooglagnu iitta, ag dabmakppa keeke laanu diignu doyak tutukku aoglagnu elele iitta. Na amu heme, amge na Kayak, Nug nahip bau dayak, nahip oiyak ele Nug eppegppa aɗatte amu, na Nug binag ii meme.

²⁴ Na amu heme amunu, Nug eppeg laa nai amu yaakkunu he uɗia yom.

²⁵ Nai eppeg yom am inam. Mene, mene, tekel, parsin ele.

²⁶ Nai amunu nai onig anen anennu meu am iikku. Menenu meu am, ebqak. Kayak Nug na Babilon gumakkutnu haen ebqa male, iitta meum.

²⁷ Tekelnu meu am, skelppa uug gane doyak. Danab nug keeke skelppa ma, uug elele iitta anidtte, amubia Kayak Nug nahipnu elele ii dootte.

²⁸ Peresnu meu am, obatak. Kayak Nug heeb, nahip ɗo maɗoɗ, na ele gamalahppa obatak dayeb, na okkai ii daappe, Midia danab, Persia danab ele ag aon gumaglag,” awa aum.

²⁹ Daniel nug Belsasar amegppa anam a, Belsasar nug haknunab a, ag lamen perpel aon, nug aɗuitteg no, ag sen golppa hak ele aon, baagppa palitteg, Belsasar nug Daniel Babilonnu gabman ooppa danab okkainab, gabmannu okkai aɗit aakkuib waantippa daakkunu a, Daniel nug Babilonnu gabman ooppa okkainab aakku dayom. Belsasar, laippu laa ele aa aya, Daniel waappa ii daapiɗ. Laa oh ag nug waappa daappig.

³⁰ Anam, amge tuqan amuppanab Midia, Persia ele dilag daup ag aab naɗi Babilon amu aon, ag Babilon dilag king Belsasar qeeg mauhom.

³¹ Ag Belsasar qeeg mauhe, Midia danab okkai onig Darius, nug maɗ nuhig 62 ele, nug digma, Babilon dilag gumak danab dayom.