Daniel 4 - Nobonob Baibel

King Nebukatnesar nug tul niiak ebqak aɗitnu pas laa yom

¹ Da Nebukatnesar, da pas imu danab ah, ag huu anen anennu, ag wanppan wan anen anennu, ag nai ohppanu amu, da ahilagnu pas imu mei gotte. Ag maɗoɗ okkainab ele daaglagnu ool daatte.

² Da Kayak Attannab Laa Oh Eɗattak, Nug nuhignu dabmettaknu kobol danab haknu elele iitta, amu uɗat ɠagattagnab ele, Nug dahilnu heum amu appi dooglagnu gamag ahak doottem.

³ Nug uɗat naɗi, Nug heumnu at daatte, Nug amu hette. Ao, Nug uɗat ɠagattagnab ele hette. Nuhig ɗo maɗoɗ am hanhan alet daatte. Ao, nuhig gumak am menuattak huu laippu bia, ahilagppa daye ukke, laa beeg, ahilagppa ele daatte.

⁴ Da, Nebukatnesar, da dahil lag enanagnabppa dayeye, oolppa maɗoɗ doyeye, keeke elelenab ele daami.

⁵ Da anam dayeye, deɗ laa da tul niie, da baɗami. Da niiak abenppa tul niien, tulegleg anidmi amu, tuleglegppa keeke digdig anadmi ag heeg, da eheɗ nau baɗami.

⁶ Da eheɗ nau baɗami amunu, da laa ag Babilon dilag doyak danab oh ag da gumiɗna uɗin, tul amunu meu appeg dookkulnu onilagppa eppeg uɗiglagnu haknunab nai ag mattami.

⁷ Da anam hei, baɗ mak danab, emaɗ danab, doyak danab, eman danab ele ag da gumiɗna uɗippig, amge da tul niien aɗi anidmi ai doon, ag tul niiak amunu meu appeg dookkulnu elele iitta.

⁸ Ag elele iitta, dimppa Daniel nug gumiɗa uɗie, da tul niie, aɗi anidmi amu, da nug amegppa ai doyom. Nug onig laa am Beltesasar. Laa nug dahil kayak onig amu awa, oela qettom. Aria, kayak ouɗi am nuhigppa daatteb.

⁹ Daniel nug da gumiɗa uɗie, da nug amegppa ami. “Beltesasar, na doyak danab oh ikki amu, kayak ouɗi nahip-ppa daatteb am da doottem. Aɗi keeke lokkumak daatte, o lokkumaknab daatte, o lokkumak attemnab daatte amu, na keeke amu heppe, miag atiak daakkunu elele. Da tul niien, keeke uug ele anidmi amunu, da tul niiak amu appi doon, na amunu meu appe doyei!

¹⁰ Da niieye tul niien, tuleglegppa keeke digdig anadmi am iikku. Da tul niie, da neekki ukke, da noolppa wan gamagppa ad laa anidmi. Ad amuam elabnab.

¹¹ Ad anam daye ukke, okkai maama, ɠagattag ele ma teete, ikki ta, hab aɗom. Wanppan danab ah oh, ag wan atu adeppa adeppa daatteb amu, ag anidkkulagnu elele.

¹² Ad amu uɗukkud am enanag. Meu ele huanak; danab ah ohnab lakkulagnu elele. Doɗ wanppa oitteb ele ag ad amu waappa, nuhig logoppa ena daappig. Ai hagagaɗna oitteb ele, ag ebekkudppa teɗ mena daappig. Wanppan doɗ oh, danab ah oh ele ag ad amuppanu ee aon lappig.

¹³ Da abenppa niieye, tuleglegppa keeke digdig anidmi, amu andette, da neekki ukke, da noolppa nai awa ukkak danab laa, nug Kayaknu oppiaawak ele, nug hab attannu neum anidmi.

¹⁴ Laa amu nug baag okkaippa ewa aum. ‘Ag uɗin, ad imu oppeg qiiaɗ! Ebekkud oh otaɗadna, uɗukkud matagna akkan, meu ele agappeg, laih laih ukkeg! Doɗ ad amu waappanu oolna goppeg, ebekkudppanu, ai ele ag ukkeg!

¹⁵ Ag ad amu oppeg qiikku, amge ad diig, diɗi ele uuppeg, ag anam wanppa gikkiɗah ooppa dayeg! Ag ⌊ad diig amu ɠagattag daakkunu,⌋ ag aen, bras ele aon, anen anenppa ring hena heppeg, ad diig talilippeg, ag qakkeg! ⌊Ad diig amuam danab laa ippunadtte.⌋ Aria, nug anam dayebeb, baito habppanu naana qeebeb, nug doɗ oolagppa, atuppa dayaɗ!

¹⁶ Heppeg, danab amunu dabmak danab bia aib dayom; doɗ bia dayaɗ! Nug amubia dayeb ukkeb, maɗ eblaih aɗit ele ukkeb, nug eɗua ena dayaɗ!

¹⁷ Danab ah ag Kayak Attannab Laa Oh Eɗattak Nug wanppanu ɗo maɗoɗ oh gumadtte dooglagnu, ag auntai laa nug ɗo maɗoɗ laa dilag okkai daakkunu amu, Kayak Nugib he, danab laa, danab onig eletai, o danab onig iittanab eletai, nug huu dilag okkai daatte dooglagnu amu, amu miag atitte. Nai awa ukkak danab ag nai imu mattieg, laa dootteb. Ao, laa ag Kayaknu oppiaawak ele daatteb, ag keeke imu bekkunu nai imu atteb,’ awa eum.

¹⁸ Da Daniel amegppa anam mattie, da tuɗitten, nug amegppa ami. Da, Nebukatnesar, da tul niien, keeke anam anadmi. Doyak danab laa ag dahil ɗo maɗoɗppa daatteb, ag tul niiak amunu meu appeg dookkulnu elele iitta amunu, O Beltesasar, na amunu meu appe doyei! Da doottem, kayak ouɗi nahip-ppa daatteb amunu, na elele,” awe ami.

Daniel nug kingnu tul niiak meu mehuqom

¹⁹ King Nebukatnesar nug Daniel, onig laa Beltesasar, nug amegppa anam a, Daniel nug dabmak huan awe, nuhig dabmak he, nug eheɗ baɗe, king nug amu antta, Daniel amegppa aum. “Beltesasar, tul niiak dahil amunu, meu ele aib heeb baɗame,” awa aum. Nug anam a, Daniel nug eɗua, nob ma aum. “O dahil naɗi, tul niiak amuam nahip kekeɗ dilag ippuniglo am ena. Ge! Tul niiak amunu meu am laa ag na eheɗ heidkkulagnu hetteb dilag daalo am ena.

²⁰ Na tul niin, na ad laa, ad amuam okkai, ɠagattag ele ba, ikki am hab aɗe, wan atu ohppan danab ah ag ad amu anidkkulagnu elele daappig anidme.

²¹ Ad amu uɗukkud am enanag, meu ele am huanak oum. Doɗ, am danab ah ele ag nuhig meu aon lappig. Doɗ wanppa oitteb, ag ad amu waappa ena daaegeg, ai hagagaɗna oitteb ele, ag ad ebekkudppa teɗ mena daappig.

²² O king, na amu anidme amu, ad okkai ena amu, am naib ippunigtte. Na king bena, onin okkai ba male, na ɠagattag ele daattem. Na onin okkainab meeme ukke, gemu ad ba hab aɗe, danab ah oh anidkkulagnu elele daappig bia, wan atu ohppanu danab ah ag nahipnu dootteb. Nahip gumak am ukke ukke, wan umanab daattebppa batatte.

²³ O king, na nai awa ukkak laa, nug Kayaknu oppiaawak ele, na nug hab attannu na, nai mattiom tulppa anidme. Laa amu nug aum. ‘Ag ad amu oppeg qiieb, heppeg nauhaɗ! Ag amu hekkulag, amge ag ad diig am uuppeg, wanppa, gikkiɗah ooppa dayebeb, ag ⌊ad diig amu ɠagattag daakkunu,⌋ ag aen, bras ele aon, anen anenppa ring hena heppeg, ad diig talilippeg, ag qakkeg! Ad diɗi am wan ooppa uuppeg dayaɗ! ⌊Amu ad diig amunu danab laa ippunadtte.⌋ Aria nug anam dayebeb, baito habppanu naana, qeebeb, nug doɗ bia dayebeb ukkeb, maɗ eblaih aɗit ele ukkeb, nug eɗua ena dayaɗ!’ Laa amu nug anam mattiom.

²⁴ O king, tul niime amu, nuhig meu am iikku, amu Kayak Attannab Laa Oh Eɗattak, Nug uug laa dahil naɗi, nuhigppa bekkunu ɗo meum amu, am iikku.

²⁵ Na ⌊dabmak nahip eɗua, kaaka dayeb,⌋ laa ag lamidppeg, na goppe, doɗ dakkuɗ ele daaglag. Daanna, na makau gikkiɗah latteb bia gikkiɗah lakkut. Baito habppanu na, na nidakku. Maɗ eblaih aɗit ele na anam daappe ukkeb, na Kayak Attannab Laa Oh Eɗattak Nug wannu ɗo maɗoɗ oh gumadtte, Nug aun ahilag okkai daakkunu oo he, king abenabppa mette doon, dabmak amu tutukku doon elele aɗan oikkut, dimppa na eɗun ena daakkut.

²⁶ Ad diig, diɗi ele uuppeg daakkunu haknunab anak amu, amuam qinob, na Kayak Nug hab attan daya, wanppa keeke oh gumatte doon, dabmak amu tutukku doon elele aɗan oikkut, Kayak Nug heeb, laa ag heppeg, na king gemu daattem bia eɗun daakkut ippunidtte.

²⁷ Anam aakku amunu, O king, da ulum nai laa medappi, na nai amu aon dim lamidkkutnu oɗ medattem. Na hipunin baula aib heme, amu na aɗi hettem amu, na hanhan kobol genab tutukkuib he! Ao, na eheɗ laa aib heme, amu na danab ah, ag laa eppelagppa daaeg, eheɗ hadatteb ele, na amu dilagnu oo gai-iitta doya, oo metta, ehanattak kobol he! Na amu hekkut dayeb amu, Kayak Nug ehanitteb, na tuɗidna, maɗoɗ ele daakkuttai.” Daniel nug King Nebukatnesar amegppa anam aum.

King Nebukatnesar nug keeke laanu tul niiom ele, keeke am aakku beum

²⁸ Amu King Nebukatnesar nug uug laa nuhigppa bekkunu anttom amu, keeke amu oh nuhigppa aakku beum. Am inam.

²⁹ Nebukatnesar nug tul niie ukke, kalam 12 uue, deɗ laappa king nug Babilon appa, nuhig lag enanagnab koɗokko uɗem mettakppa oiyaya,

³⁰ nug aum. “Da ɠagattag okkainab ele. Da ɠagattag amuppa hei, ag aab naɗi imu, Babilon, da iguppa daakkulnu iite buuppig. Danab ah ag da king, da dagom onil ɠagattag ele aniɗkkulagnu amu, da dahil ɠagattag naɗinab amuppa hei, ag aab imu iite heppig?” awa aum.

³¹ Nebukatnesar nug anam mattia dayeye, haen amuppanab baag laa hab attannu na, inam aum. “King Nebukatnesar, laa nug na king daakkutnu ehah aakku aɗitta awom. Ɗo nahipnu aakku anam daatte.

³² Laa ag lamidppeg, na danab ah ii daattebppa, appa doɗ dakkuɗ ele daaglag. Daan, na makau gikkiɗah latteb bia gikkiɗah lakkut. Maɗ eblaih aɗit ele na anam daappe ukkeb, na Kayak Attannab Laa Oh Eɗattak Nug wanppanu ɗo maɗoɗ oh gumadtte, Nug aun ahilag okkai daakkunu oo he, king abenabppa mette doon, dabmak amu tutukku doon elele aɗan oikkut, dimppa am na eɗun ena daakkut,” awa aum.

³³ Baag hab attannu anam na, Nebukatnesarnu aum amu, pahanab meu oum. Laa ag Nebukatnesar lamitteg ukka, danab ah ii daattebppa dayaya, nug makau gikkiɗah latteb bia laum. Baito habppanu na, nug laittom. Nug ikki uɗug elabnab ma, ai igel bitu bia daye, baeg di, eppeg di ele elab mena, ai baeg di bia daappig.

³⁴ Kobol amu oh Nebukatnesar, nuhigppa be, dimppa Nebukatnesar nug aum. “Haen anam daakkulnu dayom am iitta me, da, Nebukatnesar, da amel humen, neekki, hab attan te, ⌊Kayak dabmei, Nug he,⌋ dahil dabmak eɗua, danab dilag dabmak, kaaka iitta aakku dayom. Kayak anam he, dahilppa anam be, da Kayak Attannab Laa Oh Eɗattak binag memi. Da binag onig okkai ele Laa hanhan daatte mettami. Aɗinu? Nuhig ɗo maɗoɗ am hanhan alet daatte. Ao, nuhig wan atu gumak am anamib alet, ii tuqa awak daatte.

³⁵ Danab ah wanppa daatteb ag Nug bia iitta. Ag Nug ele ouaqattak daalob, am danab ah ag ii daalob bia daalob. Nug habppan ɠagattag oh, wanppan danab ah ele gumattette, ag Nug waappa daatteb, Nug ag aɗi hekkulagnu dabmette amu, Nug he, ag hetteb. Kayak Nug aɗi hekkunu dabmette amu, laa nug heeb, ii hemanu elele iitta. Laa aitta, Nug amegppa, ‘Aɗinu na anam heme?’ akkunu elelete? Iitta!

³⁶ Kayak he, dahil dabmak eɗua, danab dilag dabmak, kaaka iitta, baula aakku dayom, haen amu dimppa Babilon eɗua, binag amahlak oppiaawak ele daakkunu, Nug he, da binal am ɠagattag okkai naɗi dahil ele eɗuya, dahilppa daapiɗ. Laa tatam ulum meɗappig, Babilon dilag okkai ele ag eɗun uɗin, da eɗuen ahilag king daakkulnu aeg, da sia kingppa eɗuen tein dayeye, da anukka binal okkai ele daami, amge dimppa da binal okkainab ele daami.

³⁷ Am gemu amu, da Nebukatnesar, da hab attannu King, Kayak, Nug aɗi hette amu, Nug tutukkuib haaha, Nug nai doya mala hettoɗia epeɗia elele mettak kobol ele dim lamitta hette amunu, da Nug binag okkai, onig okkai ele medattem. Laa ag dada danab daan oitteb ele, Nug heeb, ag onilag iitta daaglagnu elele.” Nebukatnesar nug anam aum.