Daniel 3 - Nobonob Baibel

King Nebukatnesar nug dottog golppa heum

¹ Amu dimppa am Nebukatnesar nug he, danab ag dottog laa, dottog amu elab nuhig am 27 mita, emaitak nuhig am 3 mita, ag dottog amu okkai naɗi heppig. Ag hena, ag uɗem naɗi onig Dura, Babilon prowinsppa dayom, ag appa qabappig.

² Nebukatnesar nug anam he, ag dottog amu hena malaeg, Nebukatnesar nug nuhikkud ehanittak danab digdig onilag eum; laa ag gumak danab anuqaknab daappig, laa ag aab gumak danab, laa ag gawana, laa ag king dabmak mettak danab daappig, laa ag wan amunu men doɗo gumappig, laa ag epeɗiak danab daappig, am laa ag kingnu ehanittak anuqak danab digdig danab daappig, amu nug ag oh prowins anen anennu uɗin, dottog amu qeapiglagnu nug nai me, ahilagppa ukkom.

³ Nug anam nai me ukke doon, Nebukatnesarnu ehanittak danab digdig, laa ag gumak danab anuqaknab daappig, laa ag aab gumak danab, laa am gawana, laa ag king dabmak mettak danab daappig, laa ag wan amunu men doɗo gumappig, laa ag epeɗiak danab daappig, am laa ag kingnu ehanittak anuqak danab laala oh ele, danab amu oh ag uɗin, ag dottog King Nebukatnesar qappom qeapiglagnu, ag dottog amu noobppa daappig.

⁴ Ag anam daaegeg, nai ab dooglagnu danab laa aha, baag okkaippa inam a dooppig. “O danab ah, ag huu anen anennu, ag wanppan wan anen anennu, ag nai ohppanu, ag uɗin daatteb ele amu, king nug ag aɗi hekkulagnunab aum amu ag doyeg!

⁵ Ag anam daappeg, laa ag trampet, dumuttum, gita diig laa, laia, harp, iwalaknu keeke laa, amu musik haknu keeke laa oh ele heppeg ag doon, ag dottog golppa hak King Nebukatnesar qappom noobppa dup nona binag meig!

⁶ Laa nug dottog amu noobppa dup noa binag ii mekku dayeb amu, laa ag nug pahanab aon, aab ewak huanaknab eotteppa buɗippeg gokku,” awa aum.

⁷ Danab amu anam a, danab appa daappig, ag dooppig amunu, haen laa ag trampet, dumuttum, gita diig laa, laia, harp, amu musik haknu keeke laa oh heegeg, danab ah, ag huu anen anennu, ag wanppan wan anen anennu, ag nai ohppanu, ag appa daappig amu, ag dottog golppa hak, King Nebukatnesar qappom, ag dottog amu noobppa dup nona binag meppig. ⌊Amge Satrak, Mesak, Abetnego ele ag dottog amu noobppa dup nona binag ii meppig.⌋

⁸ Anam daye, Babilon dilag doyak danab laala ag Juda danab uug mattaglagnu ib aakku anidppig.

⁹ Ag amu anidna, ag ahan, King Nebukatnesar toppa gona, ag appig. “O king, na hanhan bau daakkutnu oonig daatte.

¹⁰ O king, na ɗo laa meme amu, amuppa na laa ag trampet, dumuttum, gita diig laa, laia, harp, iwalaknu keeke laa, amu musik haknu keeke laa oh ele heppeg, danab oh ag dottog golppa hak noobppa dup nona binag mekkulagnu ame.

¹¹ Na amu hena, na laa nug dottog amu noobppa dup noa binag ii mekku amu, laa ag nug aon, aab naɗi huanak eotteppa buɗippeg gokkunu ele ame.

¹² Na anam ame amge, O king, Juda danab laala, na ag Babilon prowins dilag okkai danab daaglagnu tituanadna, uɗat amu mattame, ag am Satrak, Mesak, Abetnego ele, danab amu ag nahip nai dab-ii-metteb. Ag nahipad kayak noolagppa dup nona binalag ii metteb; ag dottog golppa hak, na qappame amu, ag dottog amu ele noobppa dup nona binag ii metteb,” aon appig.

¹³ Ag Nebukatnesar amegppa anam aeg, Nebukatnesar nug oppoɗi huan be, ameg kokoɗ eppe, nug laa ag Satrak, Mesak, Abetnego ele omaladna dokkulagnunab a, laa ag, ag omaladna uɗippig.

¹⁴ Ag omaladna uɗieg, Nebukatnesar nug nid ewam amu amelagppa aum. “Satrak, Mesak, Abetnego, laa ag ahilagnu ag am dahil kayak noolagppa dup nona binalag ii metteb, ag dottog golppa hak da qappami amu, ag dottog amu noobppa ele dup nona binag ii metteb aeg doomi. Ag atteb am genabte o genab iittate?

¹⁵ Am genab iitta daatte dayeb amu, haen elab iitta ag laa trampet, dumuttum, gita diig laa, laia, harp, iwalaknu keeke laa, amu musik haknu keeke laa oh ele baula heppeg doon, ag dottog da hemi ele noobppa dup nona binag mekkulagnu dabmak elele aon, hekkulagnu babaittak daatteb dayeb am ena. Ag am hekkulag. Amge ag dottog amu noobppa dup nona binag mekkulagnu ii dabmetteb dayeb amu, laa pahanab ag aɗualadna, aab naɗi huan eotteppa buɗiadppeg tekkulag. Anam heppeg, kayak aun nug ag ehanatta, da eppelppanu eɗua diikku?” awa aum.

¹⁶ King Nebukatnesar nug Satrak, Mesak, Abetnego ele amelagppa anam a, ag nob mena appig. “O Nebukatnesar, keeke beum imunu amu, ig na eɗun, ena anigkkutnu nai qinonob, nai ittag ele ii mattimta.

¹⁷ Na heppe, laa ag buɗigppeg, aab ewak naɗippa tekkunig dayeb amu, Kayak, ig Nug waappa daatta nuhig maɗi nid daattem, Nug ehanikkeb, ena daagnignu elele. Nug elele amunu, ⌊Nug amu hekkunu ena anidkku dayeb,⌋ O king, Nug ehanikkeb, ig na eppenppa ii daamta.

¹⁸ ⌊Ihinig Kayak Nug amu hekkunu elele⌋ amge, O king, Nug amu ii hekku dayeb, amuam ihinig dabmak heeb, ii eɗuma. Ig na imu dookkutnu oonig daatte. Ig nahipad kayak noolagppa dup nota binalag ii memata; dottog golppa hak, na qappame amu, ig amu ele noobppa dup nota binag ii memata,” aon appig.

¹⁹ Satrak, Mesak, Abetnego ele ag anam aeg, Nebukatnesar nug oppoɗi be ameg kokoɗ eppe, nug nuhig dabmak nid ewam dilagnu am eɗua, nug danab uɗat amu gumappig ele ag heppeg, aab ewak huan ewom ele amu, aab amuam huanak naunab nau heppeg eokkununab aum.

²⁰ Nug anam ana, nug daup nuhikkud ebehilag okkainab ele ag Satrak, Mesak, Abetnego ele aɗualadna, muɗippa qakkaladna, buɗiadppeg, aab amuppa nokkulagnu ag haknunab amelagppa aum.

²¹ King nug aum amunu, daup amu ag nid ewam amu, ag ahilkad lamen elab, trausis, ikkilagppan lamen, lamen laala ele takkaladppig ele anam daaegeg, daup amu ag aɗaladna, muɗippa hippaladna, buɗiatteg, aab huanak naunab nau ewomppa teppig.

²² King nug daup ag amu hekkulagnunab ɠagattag ana tappaɗatte, daup ag Satrak, Mesak, Abetnego ele aab aɗu ewak naunab nau ele, amuppa buɗiatteg teppig. Amu daup ag buɗiatteg teppig amu, ag anam heegeg, aab gakkaɗak he, daup ag mauhppig.

²³ Daup ag nid ewam buɗiatteg, aab eheɗ gakkaɗomppa teegeg, daup mauhegeg, nid ewam ag hippalattak ɠagattag ele aab ewa huanaknab gakkaɗomppa tena noppig.

²⁴ Daup ag nid ewam aab huanaknab gakkaɗomppa buɗiatteg teeg, King Nebukatnesar nug anam andatta, nug eheɗ ottaia, pahanab balalppanu aha, hibaitta dayaya, nug nuhikkud ulum mettak danab oɗ mattom. “Daup ag danab ewam aakkuib qakkaladna buɗiatteg, aab aɗuppa iite teppig,” awa oɗ mattom. Nug anam oɗ matte, ag appig. “O king, ewam aakkuib, laa iitta,” aon appig.

²⁵ Ag anam aeg, Nebukatnesar nug aum. “Amge antteg! Da danab waɗele qakkalattak iitta, aab aɗuppa oitteb, ag guittak laa ii aotteb anadttem. Ewam ag am danab anadttem, amge waɗele nug am kayak bekkalag laa bia anidttem,” awa aum.

²⁶ Nebukatnesar nug anam awowa, aab ilappig ele, lag oo am laippu, gilil men o wanppa hak keeke, ag oo amuppa aab ilappig, Nebukatnesar nug oo amunu od guguittak ukka, nug ewa aum. “Satrak, Mesak, Abetnego ele, ag Kayak Attannab Laa Oh Eɗattak waappa daanna nuhig maɗi nid daatteb ele, ag dimittim, dahilppa uɗieg!” awa eum. Nug anam e amu, ag dimittim uɗippig.

²⁷ Ag dimittim uɗieg, kingnu ehanittak danab digdig, laa ag gumak danab anuqak, laa ag aabnu gumak danab, la ag gawana, laa ag king dabmak mettak danab ele, ag wana, nid ewam amu happutadna daan, ag neekkeg ukke, beɗulagppa guittak laa ii daye anidna, ikkilag uɗug nakok laa ii ewom, lamen elab ele nakok laa ii ewom anidna, beɗulagppa aab kahug uɗig nakok laa ele ii dooppig.

²⁸ Anam daye, Nebukatnesar nug aum. “Ig Satrak, Mesak, Abetnego dilag Kayak binag metu! Nug he, nuhig engel laa uɗia he, nuhikkud maɗi nid ag eheɗ laa ii aoppig. Ag ahilag Kayaknu oolagppa genab doon, da ag eheɗ hekkulagnunab ami amu, ag nai amu ii dim lamidppig. Ag ahilag Kayak, ag Nug noobppa dup nona, Nugib binag mekkulagnu hena, ag kayak laa noobppa dup nona binag mekkulagnu uun autna aona, amu ii hemananu ag mauhkkulagnu dayeb am nai iitta doon, dabmak amuib dim lamidppig.

²⁹ Ahilag Kayak anam ehanatte, ena daatteb amunu, da ɗo imu iikku mettem. Danab auntai, nug huu attenppanu, o nug ɗo maɗoɗ adekkuppanu, o nuhig nai am aɗi nai, keeke amu oh am keeke hamu, amge danab auntai laa nug Satrak, Mesak, Abetnego ele dilag Kayaknu nai eheɗ laa akku dayeb amu, laa ag danab amu beɗu tuqappeg, huppu naunau neeb, ag nug laug ele loppaɗppeg, kinipan ameg okkai hume tak anamib daakku. Kayak laa nug imubia danab ehanitteb, padal ii memananu laa iitta amunu, da ɗo anam mettem,” awa aum.

³⁰ Aria, amu dimppa amu king nug he, Satrak, Mesak, amu Abetnego ele, ag Babilon prowins ooppa danab okkainab daappig.