Daniel 2 - Nobonob Baibel

Nebukatnesar nug tul niiom

¹ Aria Nebukatnesar king abenab awe, maɗ laippu uue, maɗ aɗit ooppa Nebukatnesar nug tul niiom. Nug tul niia, aha, dabmak huanaknab awa, eɗua niikkunu elele iitta.

² King Nebukatnesar nug niikkunu elele iitta daye, nug baɗ mak danab digdig, emaɗ danab, doyak danab ele ag nug aɗi tul niiakppa anttom, ag amu appeg dookkunu onilagppa eum. Nug ag onilagppa e, ag uɗin, nug noobppa daappig.

³ Ag anam nug noobppa daaegeg, nug ag amelagppa aum. “Da tul niimi amunu, da dabmak huanak aottem. Ag tul niiak amunu meu appeg dookkulnu hettem,” awa aum.

⁴ King nug ag amelagppa anam a, doyak danab amu ag Aram dilag naippa nob mena appig. “O king, na hanhan bau daakkutnu oonig daatte! Na ig, nahipad maɗi nid, na ig amenigppa na tul niin, aɗi anidme appe doot, ig amunu meu mehuqpput dookkut,” aon appig.

⁵ Doyak danab amu ag king amegppa anam aeg, nug aum. “Da dabmak imu awen aɗai, dabmak amuam ɠagattag eppom daatte. Ag da tul niien, aɗi anidmi ii ippuniɗna, tul niiak amu aɗi ippunigtte ele ii appeg, da heppi, daup ag aɗualadna, qep-ppa ag beɗulkad tuqadppeg, huppu huppu neeb, daup ag heppeg, ag laulkad am kinipan ameg okkai hume tak, anamib daaglag.

⁶ Amge ag da tul niien, aɗi keeke anidmi, tul amunu meu ele ippuniɗkkulag dayeb amu, da ag keeke ena ena okkai, binalag okkai ele ag madakkul amunu, ag da tul niien anidmi, tul amunu meu ele appeg doyei!” awa aum.

⁷ King anam a, danab amu ag baula appig. “O naɗi, na tul niin, aɗi anidme am na ig, nahip maɗi nid, na ig amenigppa appe, ig tul niiak amunu meu mehuqpput dookkut,” aon appig.

⁸ Ag anam aeg, king nug nob matta aum. “Ag da aɗi hekkulnu dabmak awen aɗai, dabmak amuam ɠagattag eppom daatte dootteb amunu, ag heppeg, haen ukkebeb, ⌊da dabmak laa aokkulnu⌋ hetteb doottem.

⁹ Ag da tul niien, aɗi anidmi ii ippuniɗkkulag dayeb amu, ib laippu ahilagnu daatte. ⌊Ag da amibia mauhkkulag.⌋ Ag anen anen oh, ag hambuppuak nai da amelppa madippeg, da ena dookkulnu, ag ahilag dabmak bappaidna malappig. Amge iitta, ag da tul niien, aɗi anidmi appeg doyen, amuppa da ag tul niiak amunu meu ele genab mehuqppeg dookkulnu elele daatteb dookkul,” awa aum.

¹⁰ King nug ag amelagppa anam a, danab amu ag king amegppa nob mena appig. “Wanppan danab laa nug na attem bia hekkunu elele iitta. Ig am nahipad baɗ mak danab, emaɗ danab, doyak danab ele daattem, amge na ig tul niiak nahip eɗut, na tul niin aɗi anidme apput dookkutnu attem am king laa, nuhig ɠagattag am attem bia dayeye, nug nuhig danab, ig bia, nug ag na attem bia hekkulagnu ii aum.

¹¹ O king, na ig hekkunignu attem am uug naunab ele, ig amu hekkunignu elele iitta. Danab laa nug king atte bia hekkunu iitta, kayak agib amu hekkulagnu elele, amge kayak ag danab oolagppa oinna ii daatteb,” aon appig.

¹² Babilon dilag doyak danab amu ag anam aeg, Nebukatnesar nug oo huanak nauhe, oppoɗi be ameg ele kokoɗ eppom. Nug anam doya, nug nuhikkud daup ag Babilon dilag doyak danab oh aqappeg mauhkkulagnunab aum

¹³ Anam daye, Nebukatnesar nug doyak danab ag mauhkkulagnu ɗo me, ⌊daup amu hekkulag ele dilagppa⌋ ukkom. Nug nai me ukke, laa ag Daniel, nug laikkud ele diin aqaglagnu mattialadppig.

¹⁴ Danab onig Ariok, nug am daup king gumappig dilag okkai. Amu haen Ariok nug Babilon dilag doyak danab aqeb mauhkkulagnu ukka, Daniel gumitta te amu, Daniel nug doyak dabmak ena ele, nai bodoettakppa nug amegppa nai mattiom.

¹⁵ Amu nug inam kingnu okkai amu oɗ mettom. “King nug ɗo uug naunab ele meum amu, na amunu diig appe dookkulnu elelete?” awa oɗ mettom. Nug anam oɗ mette, Ariok nug aakku keeke amu ohnu diig Daniel amegppa a doyom.

¹⁶ Ariok nug amunu diig anam mattia male, Daniel nug aha, king toppa ukka, nug kingnu tul niiak doya, tul amun diig ab dookkunu, king nug haen nakok laa medakkunu oɗ mettom.

¹⁷ Daniel nug anam king oɗ mette, king “Yo,” a, Daniel nug eɗua, lakka ukka, nug laikkud Hanania, Misael am Asaria ele amelagppa uug amunu mehuqe dooppig.

¹⁸ Daniel nug ag amelagppa mattia mala, nug daup ag nug, nug laikkud ewam, Babilon dilag doyak danab laa oh ele aqamnanu, Daniel nug laikkud ewam ag Kayak, hab attan daatte, ag Nug oo doyakppa unuqidppeg, Nug ahilagnu oo gai-iitta doya oo matta ehanatta, Nug Daniel kingnu tul niiak ippunidkkunu aum.

¹⁹ Daniel amelagppa anam mattia male, tuqan Kayak he, Daniel nug kingnu tul niiak amu tuleglegppa anttom. Nug antta aha, nug Kayak, hab attan daatte, nug Nug binag meum.

²⁰ Nug binag maama, nug aum. “Ig hanhan Kayak binag metu! Doyak dabmak ena elenu diig, ɠagattagnu diig ele am Nugib.

²¹ Kayak Nug wanppa aɗi keeke bekkulag, aria haen adekkuppa bekkulag ele gumatte. Nug he, danab laa king abenabppa tette. Nug he, danab amu king abenabppa ii daatte. Nug he, danab doyak dabmak ena ele nug doyak dabmak ena amu tuɗid ele aotte. Nug he, danab diignu doyak tutukku ele, nug diignu doyak tutukku tuɗid ele daatte.

²² Nug keeke unuqagnab daatte, keeke lokkumak daatte, Nug keeke amu he, miag atitte. Nug aɗi keeke gatatuppa daatte am dootte. Nuhig dayak abenppa amu, appa ele amahlak Nug ele daattep.

²³ O Kayak, na da mamelad aɗi dilag Kayak, da na amenppa, ‘Ena heme,’ ainne, da na binan humattem. Na da doyak dabmak ena ele meɗan, na ɠagattag ele meɗame. Ig na keeke laanu oɗ mettaut, na da ippuniɗme. Na hee, ig kingnu tul niiak attem dayom amu, ig aakku amu doomut,” awa aum.

Daniel nug kingnu tul niiak, nuhig meu ele mehuqom

²⁴ Daniel anam ana, nug aha, nug Ariok, king nug Babilon dilag doyak danab aqeb mauhkkulagnu tituanattom amu, Daniel nug Ariok toppa ta, amegppa aum. “Na Babilon dilag doyak danab aib aqappe mauhppig. Na omaiɗna, king toppa goppe, da tul nuhig, tul amunu meu ele mehuqppi dookku,” awa aum.

²⁵ Daniel anam a, Ariok nug pahanab Daniel omala, king toppa ukka, nug king amegppa aum. “Da danab laa iikku mattien anidmi. Nug Juda danab ippa Babilon wanppa diia ukka, laih me dayak danab daatteb laa aakku. O king, nug na tul aɗi niime, tul amunu meu ele ab dookkutnu elele,” awa aum.

²⁶ Ariok nug king amegppa anam a, king eɗua, Daniel, onig laa Beltesasar, nug nug oɗ mettom. “Na da aɗi tul niimi, tul amunu meu ele appe dookkulnu elelete?” awa oɗ mettom.

²⁷ King anam oɗ mette, Daniel nug aum. “O king, doyak danab laa, o emaɗ danab laa, o baɗ mak danab laa, o eman danab laa nug king atte bia hekkunu elele iitta,

²⁸ amge Kayak, hab attan daatte, Nug keeke uug ele he, miag atitte. Nug anam hette amunu, Nug na, King Nebukatnesar, Nug na dimppa aɗi bekku aakku ippunittom. Na niiak abenppa tul niinna, tuleglegppa keeke digdig anidme am iikku.

²⁹ O king, na niiak abenppa niinna, na dimppa aɗi bekkun daattenu dabmeeme amu, laa Nug dimppanu keeke he, miag atitte ele, Nug dimppa aɗi bekkun daatte am ippunittom.

³⁰ Dahilnu amu, Kayak Nug da doyak dabmak ena ele, laa oh eɗattak aniɗa, tul niiak nahip, meu nuhig ele ii ippuniɗom. Iitta. Dahil doyak dabmak ena ele laa oh ii eɗadtte. Amge, O king, Kayak Nug tul niiak amu meu dookkutnu, na dimppa aɗi bekkunu dabmeme ele amu, na amu ele dookkutnu, Kayak Nug tul niiak nahip, amunu meu ele da ippuniɗom.

³¹ O king, na tul niin, na neekke ukke, na noomppa danab dottog naɗinab dayeye anidme. Dottog amuam okkai naɗi, amemɗi awak ele. Danab nug amu andatta, nug ebehi oh bodoetta le mekku.

³² Dottog amu ikki am gol ena dubuttid iitta eleppa hak. Momo, eppeg ele am silwa. Imuagppan ukka gateg batak am bras.

³³ Gategppan ukka baeg baagppa batak am aenppa hak, aria baeg wan tabatte ele am aen, waa haknu wan aab aɗuppa ewak ele, am amu ele qataqak dayom.

³⁴ Na neegnana, laa Nug men laa qaukoppanu okkula awom, amge laa amu heum am danab laa iitta, na amu anidme. Laa Nug men amu okkula awe, dimppa men amu ukka, dottog amunu baeg wan tabatte, baeg amuam aen, wan ele qataqak, amu men baeg wan tabatte ye, baeg amu aakku nauha autanab awom.

³⁵ Men baeg wan tabatte ye, baeg amu nauha autanab awewe, men he, aen, wan, bras, silwa, gol ele huppu nakok nakok, uug iittanab ne, ulah iwale ukke, huppu nakok laa appa ii dayom. Danab nug ee aeg mumuɗaknu haenppa he, ulah ee aeg dappunkkeg iwale gotte, amubia dottog amuppa heum. Men dottog baeg anam ye, kobol anam dottogppa beum, amge men amu okkai maama, wan atu oh tona malom.

³⁶ Na tul niime amu, gemu da tul amunu meu appi dookkut.

³⁷ O king, na am wanppan king laa oh eɗattak daattem. Kayak, hab attan daatte, Nug na king daakkutnu tituanitta, Nug ɠagattag, ebehi okkai, binag amahlak oppiaawak ele na metta,

³⁸ Nug danab, ah, doɗ wanppa oitteb, ai hab waappa hagagaɗna oitteb ele na eppenppa meum. Danab, doɗ, ai ele ag adeppa adeppa daatteb amu, Kayak Nug he, na ahilag okkai daattem. Dottog ikki golppa hak am na ippunigtte.

³⁹ Na dimunppa ɗo maɗoɗ laa am aha, wan atu gumadkku, amge amunu ɠagattag am na, nahip ɗo maɗoɗ ele, ahilah ɠagattag bia ii daamna. Iitta. ⌊Dottog laih silwappa hak am ɗo maɗoɗ amu ippunigtte.⌋ Aria ɗo maɗoɗ amu dimugppa amu ɗo maɗoɗ laa aha, wan atu gumadkku. Amuam dottog laih brasppa hak bia.

⁴⁰ Aria, amu dimugppa ɗo maɗoɗ laa aha, wan atu gumadkku. Ɗo maɗoɗ amuam dottog laih aenppa hak, am amubia daakku. Aen am ɠagattagnab, keeke laa oh he nauhtte; am ɗo maɗoɗ amunu danab ag amubia daan hekkulag. Aen keeke laa oh he nauhtte, amubia ɗo maɗoɗ amun danab ag wanppan wan laa oh heppeg nauhkkulag.

⁴¹ Amu, O king, na anidme bia, dottog amu baeg wan tabatte, baeg doɗo ele am wan aab aɗuppa ewom, aen ele qataqak dayom, amubia ɗo maɗoɗ amuam laippu ii daamna. Amge na anidme bia, baeg wan tabatte am wan aab aɗuppa ewom, aen ele qataqak daatte amu, aen am amuppa daatte. Aen aakku daatte, aen am ɠagattagnab amunu, ɗo maɗoɗ amu wan atu gumadkku, am ele ɠagattag ele, amge ɗo maɗoɗ amunu ɠagattag am nakok okkai ele aakkuib. Aɗinu? Ag ahilag ɠagattag am wan aab aɗuppa ewom, aen ele qataqak bia. Am aen nuhig ɠagattag aakkuib iitta.

⁴² Baeg doɗo dottog ⌊ele⌋ am wan aab aɗuppa ewom, aen ele qataqak daappig, amubia, ɗo maɗoɗ wan atu gumadkku amu, am aen bia ɠagattag daakku, amge wan aab aɗuppa ewak ele paha aoɗtte, am amubia ele daakku.

⁴³ Amu danab nug wan aab aɗuppa ewom ele awa, aen ele qataqe, laippu qataqak ii daattep, amubia ɗo maɗoɗ wan atu gumadkku, ɗo maɗoɗ amunu danab ah ag laippu bia daaglag, amge ag tuɗidna, anamib laippu ii daamna; ag piɗe piɗe daaglag. Wan aab aɗuppa ewom, aen ele qataqettep bia ag hekkulag.

⁴⁴ Baeg wan tabatte, wan aab aɗuppa ewom, aen ele qataqak am king laala ag laippu daaglagnu hekkulag, amge laippunab ii daamna ippunigtte, haen ag amu henan daappeg, haen amuppa Kayak hab attan daatte, Nug ɗo maɗoɗ laa daakkunu heeb, ɗo maɗoɗ amuam hanhan daakku. Ɗo maɗoɗ laa wan atu gumaglagnu ahan, ɗo maɗoɗ amu eɗidna ii aomna. Ɗo maɗoɗ amuam ɗo maɗoɗ oh heeb, iitta mekkulag, amge ɗo maɗoɗ amuam hanhan daakku.

⁴⁵ O king, na men, laa Nug qaukoppanu okkula awom, amge laa amu heum am danab iitta, na tulelegppa anidme, na men amu dottognu aen, bras, wan aab aɗuppa ewom ele, silwa, gol ele he, huppu nakok nakok neum ele anidme amu, tulegleg amunu meu am aakku. Kayak, Nug onig, ɠagattag ele, Nug dimppa aɗi bekku am aakku na ippunittom. Tul niiak amuam keeke genab ippunigtte, meu da na amenppa ami ele am genab; na amu ootppa genab dookkutnu elele.” Daniel nug King Nebukatnesar amegppa anam aum.

Nebukatnesar nug he, Daniel nug danab okkainab beum

⁴⁶ Daniel nug tul niiak amunu Nebukatnesar amegppa a, Nebukatnesar nug Daniel binag okkai medakkunu nug noobppa gateg qaun o, gomela iɗu wanppa meum. Nug binag okkai Daniel metta, laa ag nug doɗ laa manan mettaknu, kalu danab ile muttuɗig enanag bette ele aon ilan, Daniel mettaglagnunab mattia aum.

⁴⁷ Nebukatnesar nug anam ha mala, nug Daniel amegppa aum. “Genabnab genab, nahip Kayak Nug kayak laa oh eɗattak daatte; Nug king laa oh dilag okkai daatte; Nug dimppa aɗi bekkunu daatte danab ippunadtte. Aɗinu ⌊ig amu doognignu elele⌋? Nug he, keeke lokkumak dayom imu amu, na he, miag atiom,” awa aum.

⁴⁸ Nebukatnesar nug anam awowa, nug he, Daniel nug danab okkainab abenabppa te, king nug keeke ena ena kuɗum Daniel mettom. Nug he, Danab okkainab abenabppa teum amu, aben amuam nug prowins onig Babilon, nug prowins amunu danab ah dilag okkai daya gumattatta, nug Babilon wannu danab doyak ele oh ele gumattom.

⁴⁹ King anam he, Daniel nug danab okkai daya, nug king oɗ mette, king he, Satrak, Mesak, Abetnego ag ele Babilon prowinsnu danab okkai daappig, amge Daniel nug king uɗat hettom abenppa dayaya, uɗat hettom.