Daniel 12 - Nobonob Baibel

Gog tak haennu nai

¹ Amu haen amuppa Maikel, nug engel naɗi, nug na, Daniel, nug nahipad danab ah ehanadtte amu, nug aha uɗikku. Haen nug aha uɗikku, haen amuppa uug naunab daakku. Uug amubia deɗ laa wanppa ii neum. Uug amu bekku, amge nahipad danab ah oh, onilag bukppa yaak daatte ele, ag oh ehanittak aon, ena daaglag.

² Kuɗumnab, ebqaknu iitta huanaknab moɗppa niitteb ele, ag eɗun ahaglag. Laa ag bauklel hanhannu aoglag; laa ag uɗa nak nau, laa noolagppa keeke hamunab doyak ele hanhannu aoglag.

³ Laa ag doyak dabmak ena ele ag hab attan amahaltte, ag amubia amahalkkulag. Ge! Laa ag heeg, danab ah kuɗum ag kobol genab tutukku dim lamidtteb ele, ag hoɗoppai amahaltte bia amahalkkulag. Ge, laa ag heeg, danab ah kuɗum ag kobol tutukku dim lamidtteb ele, ag hoɗoppai amahaltteb bia hanhan amahalkkulag.

⁴ Amge Daniel, keeke na anidme, buk itoɗiakppa yaak niitte am paha meu ii oma. Haen elab ukkeb, meu okku amunu, na nai amu qettoɗmanu aɗi hekkutnu daatte amu, na pehettak babaitte! Kuɗum ag doyak tuɗidna aoglagnu ag laih wana, eɗun laih dona, ahan laih gokkulag, ⌊amge doyak amu buk imuppa iikku daatte⌋,” awa aum.

⁵ Laa da amelppa anam mattia male, da, Daniel, da neekki ukke, aɗit laa anatmi. Laa nug le daug da daamippa daye, laa am le daug laih dayom.

⁶ Laa ⌊nug da amelppa nai tuleglegppa mattiom,⌋ nug lamen linenppa hak takkom ele, nug le attan dayeye, laa le daugppa dayom amu, nug danab amu oɗ mettom. “Keeke kobolnab tulelegppa anttom ele amu, keeke amuam meu okku; amu haen gane laa ele ukkeb, meu okku?” awa oɗ mettom.

⁷ Laa nug danab lamen linenppa hak takka, le attan dayom anam oɗ mette, nug eppeg naɗiap, naneh ele hume, habppa te, nug Kayak, Nug hanhan daatte, nug Nug onig awa, nuhig nai ɠagattag qetta, nug nai laa a doomi. Nai nug aum am inam. “Haen maha ewam, haen maha laanu maha ele ukkeb, keeke amu oh ba malakku. Danab ah ag Kayaknu oppiaawak ele ag akka ahilagppa ɠagattag laa iitta ele daappeg, haen amuppa keeke amu oh meu okku,” awa aum.

⁸ Nug anam aum, amge da, Daniel, da nug aum amu, da amunu diignu doyak tutukku ii aɗen, da nug oɗ mettami. “Aakku, amge O naɗi, imunu gogppa tak am attem?” awe oɗ mettami.

⁹ Da anam oɗ mettai, nug da amelppa aum. “Daniel, na maɗoɗ ele daye! Aɗinu? Nai imu qettoɗmanu babaittak aakku daatte. Am anam dayebeb ukkeb, gog tak haenppa nai imuam daakku.

¹⁰ Laa kuɗum Kayak Nug uug bekkulagppa heeb, ag oppiaawak, dubuttid iitta, ahilagppa eheɗ nakok laa ii daama, ag anam daaglag. Ag enanag anam daaglag, amge nau hak danab ag tuɗidna, nau hekkulag. Nau hak danab ag ⌊nai amunu meu, Kayaknu hak ele⌋ diignu doyak tutukku ii aomna, amge danab ah doyak dabmak ena ele, ag diignu doyak tutukku aoglag.

¹¹ King laa nug aha, nug heeb, Israel danab ah ag deɗ oh doɗ mana, Kayak mettaknu mana mettak hekkulagnu elele iitta daappeg, nug keeke naunab laa, keeke amuam heeb nauhak bekkunu keeke, nug amu Kayaknu mettid lag, amuppa qabakku, haen nug amu hekku, haen amuppanu ukkeb ukkeb, deɗ 1,290 ukkeb, batakku.

¹² Laa ag ɠagattag daappeg ukkeb ukkeb, deɗ 1,335 anidkkulag amu, ahilagnu am ena. Ag itittak ena aakku aoglag.

¹³ Amu Daniel, nahipnu, na wanppa daanna, na maɗoɗ ele daye! Na wanppa oinna, wanppa dayak nahip iitta meeb, na hik aon daappe ukkeb, gog tak haenppa na eɗun hippaidna, aug ena Kayak medakkunu tituanom daatte amu, na aokkut,” awa aum.