Daniel 11 - Nobonob Baibel

¹ Ele amu, da Midia danab Darius, nug king beum, maɗ nug king beumppa amu, da Maikel ehanidkkulnu, nug eheɗ laa aomanu, da nug dimugppa hibaitte daami.” Danab da anidmi, nug da amelppa anam aum.

Laa Daniel anttom, nug nug amegppa nai mattiom

² Amu laa Daniel anttom amu, nug nai tuɗitta aum. “Da geha madikkulnu hettem am nai genab. King ewam baula Persia wanppa bekkulag. Ag bena malappeg, laa ele ag dimulagppa bekku. Nug am enub huanaknab ele. Nug enub huanak ele amunu, nug enub amuppanu ɠagattagppa heeb, nuhig ehanittak oh ag Grik wan eɗidkkulagnu dabmekkulag.

³ Amge Grik wanppa king ɠagattagnab ele aha ba, king dayaya, nug ɠagattagnab anam dayaya, nug aɗi hekkunu dabmekku amu nug hekku.

⁴ Amge nug aha, king ɠagattag anam dayeb ukkeb mauheb, wan oh nug gumakku ele amu obatak dayeb, laala ag gumaglag. Wan amu maha laa am wan yau uɗitteppanu daakku, maha laa am wan Yawalti uɗitteppanu daakku, maha laa am wan kaɗag uɗitteppanu daakku, amu laa am wan qaban uɗitteppanu daakku. Danab waɗele ag wan waɗele amu gumaglag amu, ag laa king daya mauhom ele, ag nug bekkod iitta. Ag danab laa. Amu wan anen anen ag ɠagattagnab, king naɗi ii mauhom haenppa, wan laippu ɠagattagnab dayom, amubia ii daama. Aɗinu? Wan laippu amu obatak waɗele beeb, okkai waɗele laa ag gumaglag.

⁵ Danab waɗele laa ag wan waɗele dilag king bena daanna, wan laih yau uɗitteppanu king nug ɠagattagnab bekku. Nug anam bekku, amge nuhig daup gumak danab okkai laa nug wagainab ma ba, king aben awa, nug wan amunu king daakku. Nug king dayaya, nug wan amu dilag okkai ɠagattagnab ele ba daakku.

⁶ Anam dayeb, maɗ laala ukkebeb, wan yau uɗitteppanu daatte, amu wan yawalti uɗitteppanu daatte, wan aɗit amunu king aɗit aa layam bataya, nai qakkaglah. Amu wan yawalti uɗitteppanu king nug wan yau uɗitteppanu king aɗeg aweb, nug wau daakku. Anam, amge ⌊layam batak nai amu hepeɗ nauheb,⌋ wan yawalti uɗitteppanu king wau nug ele ɠagattag ii daama. Anam amu laa heeb, wan yawalti uɗitteppanu king nug, nug wau, wan yau uɗitteppanu king aɗeg amu, aria aa bekkalah, amu laa ah amu omala uɗiom ele, ag oh mauhkkulag.

⁷ Amu dimppa amu, ah mauhkku ele, nug tiig laippu, nug wan yau uɗitteppanu daatte, wan amuam Isip wan amu, nug wan amu dilag okkai ba daakku. Nug king ba dayaya, nug aha ukka, wan yawalti uɗitteppanu daatte, nug amu dilag king ele ban hekkulahnu gokku. Nug aha ukka ban ha, nug wan amunu aab aɗ ɠagattagnab ele, king aguppa daatte amu, nug amu ooppa ukka, nug wan amu eɗidkku.

⁸ Nug anam ha, nug ahilkad kayak dottolkad gol, silwa eleppa hak amu, nug amu akka, nug ahilkad en, gol, silwappa hak ele akka, keeke amu oh diia, Isip gokku. Nug anam ha mala, maɗ nakok kuɗum nug wan yawalti uɗitteppanu daatte, nug amu dilag king baneb ele ii goma.

⁹ Nug anam hekku, amge haen amu dimugppa, wan yawalti uɗitteppanu daatte, amu dilag king nug aha, wan yau uɗitteppanu daatte, nug amu dilag king ele ban hekkulahnu wan amuppa uɗikku, amge king amu nug wagai meeb, king wan yawalti uɗitteppanu nug eɗua, nuhig wanppa gokku.

¹⁰ Nug eɗua ukkeb, dimppa nug bekkod ag ahan, ag daup huanaknab qagmaadna, ag ahan, le ui wa ukka, laa heeb iitta mekkunu elele iitta bia gona, ag wan yau uɗitteppanu daatte dilag aab aɗ ɠagattagnab daatte batak gona tekkulag.

¹¹ Ag gona wana teppeg, wan yau uɗitteppanu daatte, amu dilag king nug amu antta, oppoɗi beeb, ameg kokoɗ eppeb, nug aha, wan yawalti uɗitteppanu dilag king ele ban hepeɗ, nug eɗitteb, king amu, nuhikkud daup huanak ele ag nug eppegppa daaglag.

¹² Ag nug eppegppa anam daappeg, wan yau uɗitteppanu king nug dada danab ba dayaya heeb, ⌊nuhikkud daup ag⌋ danab tausen gane aqaglag, amge nug ele na qekku.

¹³ Aɗinu? Wan yawalti uɗitteppanu king nug eɗua, daup huanaknab, tatam qagmaattom eɗittak, qagmaadkku. Nug amu heeb, maɗ maɗ ukkebeb, haen ena antta, nuhikkud daup huanaknab, ag ahilkad bannu keeke ele elelenab, Isip ele ban hekkulagnu uɗiglag.

¹⁴ Wan yawalti uɗitteppanu king nug anam uɗikku, haen amuppa laa kuɗum ele ag ahan, wan yau uɗitteppanu daatte, ag amu dilag king heppeg nauhkkunu hekkulag. Amu Daniel, nahipad huu laala, ag ban haknu oolag gamag ahatte, ag ele tuleglegppa anidme bia Isip nai dim lamidkkulagnu uuna, ahilag nai tabappeg nekkunu hekkulag, amge ahilag oo hak am gogppa ii tema.

¹⁵ Wan yawalti uɗitteppanu daatte, amu dilag king nug uɗia, nug wan yau uɗitteppanu aab okkai laa ele ban hekkulah. Nug nuhikkud daup ele ag aab talilidna daanna, aɗ letaglagnu ag wan buun gokkaɗppeg taata, aabnu aɗ eleleppa tekku. Wan am aabnu aɗ eleleppa teeb, ag aab aɗ ɠagattagnab ele amu aoglag. Ag aoppeg, wan yau uɗitteppanu daup ag daup laa amu noolagppa daan, ban hekkulagnu elele iitta. Ge, ahilkad daup enanagnab, ag daup laa amu ele ban henana, eɗadkkulagnu elele iitta.

¹⁶ Wan yawalti uɗitteppanu daatte, amu dilag king nug ɠagattagnab amunu nug ooppa aɗi hekkunu oo daatte amu, nug aakku hekku. Laa nug nuhig ib oo nekkunu elele iitta. Nug wan enanag, am Israel wan amu, nug amuppa hibaitta daakku. Nug wan amu heeb nauhkkunu ɠagattag elele.

¹⁷ Amu nug inam dabmekku. ‘Da dahilad daup ohnab, ban haknu keeke ohnab awen ele, da uɗie ukken, da heppi, wan yau uɗitteppanu dilag king nug da ele nai qakkagnih,’ dabmekku. Nug anam dabma, nug wagai ma, wan yau uɗitteppanu dilag king abenab aokkunu uɗia, aɗeg laa wan yau uɗitteppanu king, nug wau daakkunu medakku. Nug amu hekku, amge ii ehanidma.

¹⁸ Kobol amu ii ehanidkku amunu, nug wan digdig yu ihippa daatteb ele ban ha diiadkku, amge nuhig daup gumak danab okkai laa nug heeb, yawalti uɗitteppanu kingnu dada naunab hak kobol amu, kobol amuam iitta mekku. Ge! Kobol amuam eɗuak, nuhigppa bekku.

¹⁹ Nuhig daup gumak okkai laa nug anam heeb, king nug eɗua, nug wanebppa aab aɗ ɠagattagnab laala eleppa ukka dayaya, king nug na qeeb, laa baula nug ii anidma.

²⁰ Nug anam na qeeb, laa nug abenabppa king daakkunu ta, nug takis awak danab laa nug danab ah eppelagppanu takis aokkunu meeb gokku. King nug dayak nuhig enanag daakkunu, king laa dayom bia daakkunu anam hekku. Nug anam hekku, amge haen elab iitta, maɗ laippu keeketai, laa amu nug mauhkku, amge nug banppa dayebeb laa ii qeeb mauhma, o laa nug oo aeg bak doyaya, laa qeeb ii mauhma.

²¹ Wan yawalti uɗitteppanu king amu nug anam mauheb, laa nug abenabppa ta king daakku. Nuhignu amu, danab kuɗum ag, ‘Nug am keeke hamu, binag iitta’ dooglag. Nug am king tiigppan iitta. Nug aha, wan yawalti uɗitteppanu daatte dilag king daakkunu, nug wan amuppan danab ah ag maɗoɗ daappeppeg, hambuppuak kobolppa haaha, king abenppa ta, king daakku

²² Nug king ba dayaya, nug wan laappan daup huanak ele ban hekku amu, nug ag eɗatta, heeb nauhkkulag. Nug amu ha, nug Israel danab ah, Kayak he, ag Nug ele nug tituanna nai qagappig amu, nug ahilag okkai am ele heeb nauhkku.

²³ Nug wan laalappan okkai ele nug tituanna, nai qakkaglag. Nug amu haaha, hambuppuak kobolppa ha, nug ɠagattag awa daakku. Nug nuhikkud danab ah am kuɗumnab iitta, amge nug ib amuppa ɠagattag ele daakku.

²⁴ Amu wan laala prowins bia daatteb, appa enub huanak dayeye, appan danab ah ag baɗak laa ele ii dootteb, wan yawalti uɗitteppanu king nug amu antta, nug aheb, ag ele ban hekkulag. Nug aha, anam ha, nug mamekkudnab, amu mamekkud aɗi laa ele hekkulagnu heppig, amge elele iitta daappig amu, nug amu ha, wan amu aokku. Nug awa, nug enub okkai amu awa, laa nug dim lamidtteb ele madakku. Nug aab aɗ ɠagattagnab laala ele nug eɗatta aokkunu dabmekku, amge nug haen tutuib amu hekku.

²⁵ Nug daup huanak qagmaatta, nug amu hekkunu dabmak awawa, ooppa ɠagattag doya, nug wan yau uɗitteppanu king baneb uɗikku. Nug uɗieb, wan yau uɗitteppanu daatte dilag king nug daup huanak, ɠagattagnab ele qagmaatta, king laa amu ele ban hekkulahnu uɗieb, daup amu oh ag ban hekkulag. Anam daakku, amge laa kuɗum ag wan yau uɗitteppanu daatte dilag king hambuppuidna, heppeg nauhkkunu hekkulag amunu, king amu nug ɠagattag ii daama.

²⁶ Laa ag kingnu balalppa ee latteb amu, ag heppeg nauhkkunu hekkulag. Wan yawalti uɗitteppanu daatte dilag daup ag ban hena, wan yau uɗitteppanu daatte dilag daup eɗadna, huanaknab aqappeg mauhkkulag.

²⁷ Amu beeb, king aɗit amu, laa wan yawalti uɗitteppanu dilag king, laa wan yau uɗitteppanu dilag king amu, king aɗit amu aa oolahppa dabmak eheɗ ele balalppa daayya, aa nug hambubuittak heyaya, nai mattiglah. Aa anam hekkulah, amge aa aɗi aɗi hekkulahnu dabmeyaya, nug bubuittak heya, nai mattiglah amu, nai amuam meu ii oma. Aɗinu? Gog tak haen am haen adekkuppa bekkunu tituanak daatte, haen amuppa aakku bekkuoitte. Nug hambuppuak nai ahilah am heeb, haen amu ii baolima.

²⁸ King aɗit aa nai anam mattiya, wan yawalti uɗitteppanu dilag king nug aha, eɗua, nuhig wanppa gokku. Nug ban haaha, en kuɗum awom amu, nug amu ele awa gokku, amge nug ugakka, nug, nug tituanna nai qakkak nai oppiaawak ele, Kayak he, Nug Israel ele ag amu heppig amu, nug nai amu qeeb neeb, danab ah amu dim lamidtteb ele eheɗ hadakkunu dabmak awa, ɠagattag aɗakku. Nug anam dabmaama, nug eheɗ hatta, nug aha, nuhig wanppa gokku.

²⁹ Nug eɗua, nuhig wanppa ukkeb, Kayak haen tituanomppa nug eɗua, nuhikkud daup ele ahan, wan yau uɗitteppanu daatte banelag uɗiglag. Nug baula ban anam hekku, amge banppa tatam beum bia ii bema. Iitta.

³⁰ Haen inamppa bannu uub yu ihippan wan laala qaban uɗitteppanu daatteb, ag appanu uɗin, Isip ehanidna, wan yawalti uɗitteppanu dilag king ele ban hekkulagnu daaglag amunu, wan yawalti uɗitteppanu king nug ban amu hekkun ooppa ɠagattag ii dooma. Nug anam dookku amunu, nug wan yau uɗitteppanu daatte, nug wan amunu king, nuhikkud daup ele ban hekkulagnu oo huana daakku, amge nug ban hak uub uɗippeg antta, elele iitta doya, ban amu hak uukku, amge nug oo hette ele hekkunu elele iitta amunu, nug oppoɗi huan beeb, ameg kokoɗ eppeb, nug eɗua ukka, nug, nug tituanna nai qakkaknu nai oppiaawak ele, Kayak he, Nug Israel ele ag amu heppig amu, nug nai amu qeeb nekkunu haaha, danab ah amu dim lamidtteb ele eheɗ nau hadakku. Laa ag oolagppanu ag Kayak dim lamidkkulagnu nai qakkak oppiaawak ele uun, ii dim lamidkkulagnu akkulag amu, nug ahilagnu ena doya eheɗ ii hattama, amge laa ag amu ii heppeg amu, nug ag genab eheɗ hadakku.

³¹ King amu nug heeb, nuhikkud daup ag heppeg, Kayaknu mettid lag am Kayaknu neekkakppa dubuttid tak ele daakku. Kingnu daup ag Israel deɗ oh doɗ manan, Kayak medatteb, ag amu baula hemananu appeg, ii hemana. Ag keeke naunab laa, keeke amuam heeb nauhak bekkunu keeke, ag keeke amu Kayaknu mettid lag, amuppa qabappeg daakku.

³² King nug Israel oolagppan laala, ag Kayak ele nug tituanna nai qagappig, ag nai amu ii dim lamidtteb ele, nug ag amelagppa oo eeɗaknu ittag nai madikku, amge laa ag Kayak genab dootteb ele amu, ag king amu ele laippu ii daan, nug ele kekeɗ mettaglag.

³³ Israel oolagppa laa ag doyak dabmak ena ele, ag laa kuɗum ippunittak ena mattaglag. King amu, nug laikkud ele ag amu dilagnu eheɗ doon, qep elabppa aqaglag, o ag aab ewakppa buɗiadppeg teppeg, aab ewadkku, o ag ahilkad keeke yab aoglag, o ag diin, maniguittakppa inadkkulag. Ag amu deɗ gane, o kalam gane, o maɗ gane anam hekkulag, amge danab doyak dabmak ena ele ag laa kuɗum ippunittak ena mattaglag.

³⁴ Danab doyak dabmak ena ele ag anam daappeg, laa eheɗ anam hadappeppeg, ag ehanittak nakok aoglag. Ag ehanittak aoppeg, laa kuɗum ag, ‘Ig ag ele laippu daagnig,’ akkulag, amge ag hambuppunna anam akkulag.

³⁵ Haen amuppa danab doyak dabmak ena ele laala, ag oppiaawak, dubuttid iitta, ag eheɗ hak laa iitta ele daaglagnu, uug anam ahilagppa bekku. Uug amu beeb ukkeb, haen gogppa tekku. Aɗinu? Kayak Nug haen gog tekkunu tituanom amu, haen amuppa am gogppa tekku. Ii baolima.

King laa nug nukka onig humatte

³⁶ Wan yawalti uɗitteppanu daatte, wan amunu king nug aɗi hekkunu oo hette amu, nug aakku hekku. Nug nukka haaha, nug kayak oh eɗattak dabmekku. Nug Kayak, kayak laa oh eɗattak daatte amu, nug nuhignu nai nau, laa nug nai amubia deɗ laa ii mattiom amu, nug nai amu nuhignu madikku. Kayak Nug danab ah hipunin heppeg, oppoɗi bak doya, bu madakkunu haen tituanom, haen amu iitta ii meebeb, king amu nug aɗi hekkunu dabmekku am hekku. Laa nug ib oo ii nema. Aɗinu? Kayak Nug danab ah ag eheɗ heegeg, bu atten aoglagnu dabmak awe ɠagattag eppom daatte amu, ag amu haenppa aoglagoitte.

³⁷ King amu nug mamekkud aɗi dilag kayak dab-ii-mema. Nug ah ag kayak laanu oolag mauhtte ele, nug laa amu dab-ii-mema. Ge! King amu nug kayak laalanu ii dabmema. Aɗinu? Nug nukka, nug kayak laa oh, Kayak genab ele eɗattak daatte dabmekku.

³⁸ Nug kayak laa oh, Kayak genab ele ii dabmema, amge nug kayak laippuib binag mekku; amuam kayak laa aab aɗ ɠagattagnab ele ehanadtte atteb, kayak hambuppuak amu nug binag mekku. Nug mamekkud aɗi ag kayak amu ii dooppig. Nug kayak amu binag maama, gol, silwa, men daden nob okkainab ele, amu laa, nuhig daakkunu keeke, daden nob okkainab ele, am nug medakku.

³⁹ Nug kayak hambuppuak amu, nug nuhig ehanittakppa aab aɗ ɠagattagnab ele, laa oh eɗattak eɗadkku. Nug laa oh ag nuhignu, nug am ahilag okkai daatte miag maditteb amu, nug ag binalag madakku. Nug heeb, ag wan laalappan danab ah dilag gumak danab daaglag. Nug laa ag nuhignu, nug okkai daatte miag maditteb wan madakku.

⁴⁰ Amu gog tak haenppa amu, wan yau uɗitteppanu daatte, appan dilag king nug wan yawalti uɗitteppanu daatte, appanu dilag king ele ban hekkun ahakku. Wan yau uɗitteppanu king nug anam aheb, wan yawalti uɗitteppanu dilag king nug doya, nug oppoɗi beeb, nug heeb, nuhikkud daup ag bannu karis attan daan, ban hetteb, nuhikkud daup ag hos attan daan, ban hetteb, nuhikkud bannu uub kuɗum huanak ele ahappeg, ag king laa amu ele ban hekkulagnu huan gokkulag. Wan yawalti uɗitteppanu king nug wan kuɗumnab obatata, ag ele ban haaha, le ui wa gotte bia gokku.

⁴¹ Nug amu haaha, nug wan enanag, Israel wan, nug wan amuppa ele wab, wan amu ele ban hekkulah. Nug heeb, wan kuɗum nena qena, nug eppegppa daaglag, amge Edom wan, Moap wan, Amon dilag okkai ele ag nug eppegppa ii daamna.

⁴² Wan yawalti uɗitteppanu daatte, appan dilag king nug wan kuɗum eɗatteb, nug eppegppa daaglag. Isip ele nug eppegppa daakku.

⁴³ Nug Isip eɗatta, nug Isipnu gol, silwa, en okkai laa oh ele aokku. Nug heeb, Libia danab ah, Nubia danab ah ele ag nug waappa daaglag.

⁴⁴ Nug anam wan amu ohppa ban haaha dayebeb, nai laa kaɗag uɗitteppanu, yawalti uɗitteppanu ele uɗieb doya, nug ottaikku. Nug nai amu doya, nug oppoɗi eheɗ beeb, ameg kokoɗ eppeb, nug aha, kuɗumnab hatteb iitta mekkulagnu gokku.

⁴⁵ Nug ugakka, nug nuhig peh lag enanag yu, qauko Kayaknu tituanak daatte, amu ele gamalahppa qappadkku. Nug anam hekku, amge nug na qa, iitta mekku. Laa nug ii ehanidma.