Daniel 10 - Nobonob Baibel

Daniel nug le Taigris daugppa dayaya, tulegleg laa anttom

¹ Amu Persia dilag king Sairus nug king abenab awa nuhig king dayaknu maɗ ewamppa Kayak he, Daniel, onig laa Beltesasar, nug dimppa aɗi bekkunu nai laa doyom. Nai amuam ban naɗi daakkunu nai, am nai amuam genabib. Daniel nai amu tuleglegppa awe, Kayak he, nug tuleglegppa nai amunu diignu doyak tutukku aɗom.

² Amu da, Daniel, da tulegleg amu ii anidmi, haen amuppa da mettid ewam uug okkainab doyeye, mahiak hei, mettid ewam amu batakppa da tulegleg amu anidmi.

³ Mettid ewam amuppa da ee miti enanag ele laa ii lami. Da doɗ teppu, wain ele nakok iinab lami. Da le laye dimppa goɗen beɗulppa ele ii laidmi. Da anamib daai ukke, mettid ewam amu male, da eɗuen, ee oh lainne, beɗul ele atognomi.

⁴ Aria, da anam daye male, kalam anuqak, deɗ 24ppa, da le okkainab, Taigris, da le amu daugppa dayeye,

⁵ da amel humen, neekki ukke, danab laa da noolppa dayom anidmi. Nug lamen linenppa hak takka, matagiɗ gol enanagppa hak imuagppa takkom.

⁶ Nug beɗu am men krisolait bia. Nug iɗu am amemɗiag awak bia, ameg am hul ewak okkai bia. Nug eppeg baeg ele am bras amemɗiag aotte bia, amu nug baag am danab ah ameg naɗi nai maditteb, oqotti amubia dayom.

⁷ Da, Daniel, da dakka tulegleg amu anidmi, laa da ele daamut, ag ii anidppig, amge baɗak eheɗ nau ahilagppa be, ag oolna, lokkumna daappig.

⁸ Ag oolna gona, lokkumna daappig amunu, da dakka dayeye, da tulegleg ɠagattag amu anidmi. Da anittitti, da beɗul gai-iitta me, da iɗul hakkab eppe, da aɗi hekkulnu elele iitta daami.

⁹ Da anam daaiyi, danab da anidmi nug digma nai mattieye, da nuhig nai doyeye, da mauhak bia nein qein, iɗul wanppa mei dayom.

¹⁰ Da anam wanppa mauhak bia niiiyi, eppeg laa da aɗaila he, da eppel, bael ele hahaɗeɗe, gatel qaun o, eppel ele wan aɗeɗe, da anam daami.

¹¹ Da anam daaiyi, ⌊danab da anidmi⌋ nug aum. “Daniel, Kayak nahipnu ooppa enanag dootte, amu na nai da na amenppa akkulnu hettem amu, na nai amu dabmettan autna awe! Laa he, da na gumitten uɗikkulnu uɗimi amunu, na hippaidna daye!” awa aum. Nug anam a, da hippaidmi, amge da hahaɗeɗe daami.

¹² Nug anam mattie, da hibaitten daai, nug tuɗitta aum. “Daniel, na aib baɗame. Aɗinu? Na digmena, diignu doyak tutukku aokkutnu henana, na nakka na nahip Kayak noobppa na onin qee neum, deɗ amuppanab Kayak Nug nahip unuqittak doya he, da ehanidkkulnu uɗikkulnu hemi,

¹³ amge Persia dilag okkai nug dahil ib oo nekkunu ha dayeye, da uɗikkulnu heiyi, deɗ 21 ukkom. Persia dilag king nug dahil ib oo nekkunu anam heehe, deɗ 21 ukkom amunu, engel okkai onig Maikel nug da ehaniɗkkunu uɗiom.

¹⁴ Nug ehaniɗkkunu uɗiom amunu, da dimppa nahipad danab ah dilagppa aɗi bekkunu meu appi dookkutnu uɗimi. Aɗinu? Tulegleg imuam dimppanu keeke,” awa aum.

¹⁵ Nug anam awa aawo, da dup noin, gatel qaun o, da nai laa madikkulnu elele iitta daami.

¹⁶ Da anam daaiyi, laa beɗu danab bia nug da ottil nakokib aɗe, da oɗelppa digmein nai mattimi. Da laa da noolppa daye, nug amegppa ami. “O naɗi dahil, da tulegleg imu anittitti, tulegleg he, da beɗulppa guittak dooi, beɗul gai-iitta ma aut auta awom.

¹⁷ Da am nahip maɗi nid. Na dahil okkai. Da attem heppi, na ele nai mattignih. Dahil ɠagattag iitta meum. Da noolppa hik aokkulnu uug doottem,” awe ami.

¹⁸ Da anam ai, laa nug beɗu danab bia dayom amu, nug baula nakokib aɗaila, ɠagattag meɗom.

¹⁹ Nug ɠagattag meɗe, ⌊danab da anidmi amu,⌋ nug aum. “O danab, na aib baɗame. Kayak Nug nahipnu ooppa enanag dootte. Na maɗoɗ, ɠagattag ele daye! Ge, na ɠagattag daye!” Nug nai anam da amelppa aawo, da ɠagattag awe, da ami. “O naɗi, na ɠagattag da meɗame amunu, na appe doyei!” awe ami.

²⁰ Da anam ami amunu, nug aum. “Na da nahipnu uɗiminu diig doottemte? Haen elab iitta amu, da eɗuen goppi, Persia dilag okkai ele ban hekkunih. Amu da goppi, Grik dilag okkai nug uɗikku.

²¹ Nug uɗikku, amge tatam da nai buk laa onig Nai Genabnu Buk, nai buk amuppa daatte am appi dookkut. Da amu hekkul amge tatam na imu dookkut. Persia dilag okkai, Grik dilag okkai ele, danab aɗit amu aa da ele ban hettem; laa ehaniɗlob, amge laa anam ii hetteb. Iitta. Nahip ehanittak okkai Maikel, nug nukka ehaniɗtte.