Daniel 1 - Nobonob Baibel

Daniel nug laikkud ele dilag nai

¹ Juda dilag king Jehoiakim nug king abenab awe, maɗ aɗit uue, maɗ ewam ooppa Babilon dilag king Nebukatnesar nug nuhikkud daup ele ag uɗin, Jerusalem talilidna, ban henan daappig.

² Nebukatnesar, nuhikkud daup ele ag anam heeg, Naɗi Nug he, ag Juda dilag king Jehoiakim aoeg, nug Nebukatnesar eppegppa daye, Nebukatnesar nug Kayaknu mettid lagppan keeke laala ele diiom. Keeke amu nug awa ukka, nuhig kayaknu mettid lag Babilon wanppa daatte, amuppa, en maknu oo, nug appa meum. ⌊Nug keeke awa Babilon ukka, Nug Jehoiakim, Juda laala ele diia, ag Babilon wanppa diia ukka laih me dayak danab ah daaglagnu ukkom.⌋

³ Nebukatnesar nug anam ha, dimppa nug nuhikkud ehanittak anuqak danab dilag ikki danab onig Aspenas uɗat laa metta, Aspenas nug Israel danab bau Nebukatnesar aɗa diia, Babilon wanppa ukke, nug eppegppa daappig oolagppanu laib laib, laala ag am king tiilagppanu, laala ag am danab okkai tiilagppanu amu, nug ag amu laa tituanadkkununab aum.

⁴ Am Nebukatnesar nug Aspenas Israel laa tituanadkkunu ana, nug Israel ag am inam elenu aum. Ag nid danab bau. Ag beɗulagppa eheɗ laa iitta. Ag iɗulag tuqak ele. Ag nid danab sul hena, keeke digdignu doyak aoglagnu uug iitta ele. Ag sul nakok okkai aon malappig ele. Ag keekenu diignu doyak tutukku paha aɗaglagnu uug iitta ele. Dimppa ag king ehanidkkulagnu elele. Aria Aspenas nug anam tituanattowa, nug Babilon dilag nai, ahilag kaya yaak daatteb ele ippunadkkunu nug amegppa aum.

⁵ King Nebukatnesar nug Aspenas amegppa anam ana mala, Aspenas nug tituanatta maleb, nid tituanadkku amu, ag laa am ag kingnu ee lanak balalppa haen oh ahilag ee, wain ele aon madappeg lakkulagnu ele aum. Nid amu ag maɗ ewam sulppa daan, dimppa ag kingnu ikki danab daaglag.

⁶ Nebukatnesar nug anam a, Aspenas nug aakku tituanattom. Amu nug tituanattom oolagppanu waɗele ag am Juda nid; ag onilag am Daniel, Hanania, Misael am Asaria ele.

⁷ Ag onilag Hibru naippa anam daatte amge Nebukatnesarnu ikki danab dilag okkai nug amu uua, nug ag Babilon onilag awa ataɗattom. Nug Daniel onig laa Beltesasar ataɗa, Hanania onig am Satrak ataɗa, Misael onig amu Mesak ataɗa, Asaria onig am Abetnego ataɗom.

⁸ Amu king nug nid danab amu dilag ee, wain ele ag mattaglagnu aum, amge ⌊ee, le ele amuam Kayak Nug ag Israel ag ee, le ele aɗi aɗi lakkulagnu ɗo ag mattom, amu ee le ele amuam ɗo atte bia iitta⌋ amunu, Daniel nug kingnu ee, wain ele amu lanana heeb, Kayaknu neekkakppa ooppa dubuttid tak ele daamanu dabmak awa aɗe, dabmak amuam ɠagattag eppa dayom. Daniel nuhig dabmak anam daye, nug ee, wain ele amu lab, nug Kayaknu neekkakppa dubuttid tak ele daamanu, nug kingnu ikki danab dilag okkai am ee amu, wain amu ele ii lamanu oɗ mettom.

⁹ Amu Kayak Nug matu he, danab okkai amu nug Danielnu oo ena daye, nug Danielnu oo ele doyom,

¹⁰ amge Daniel ee amu ii lamanu oɗ mette, nug Daniel amegppa aum. “King, dahil naɗi, nug nahip ee, le ele na lakkutnu nuhig balalppanu tituane medatteb amunu, da nug baɗidttem. Na ee amu ii lakkut dayeb, king nid bau na bia laa, nug ag beɗulag antta, nug na beɗun am ag beɗulag bia iitta anidkku dayeb, na beɗunppa king nug heeb, laa ag da baal otaɗkkulag,” awa aum.

¹¹ Amu kingnu ikki danab dilag okkai nug Daniel amegppa anam a, danab okkai amu nug matu danab laa nug Daniel, Hanania, Misael am Asaria gumadkkunu tituane, gumattatta dayom amu, Daniel nug danab amu amegppa aum.

¹² “Gadon, na gemu digmeppe ukkeb, deɗ eblaih laih eleppa batak na ihinignu ma anttak laa hekkutnu oɗ medattem. Ma anttak amuppa amu, na ig nahip maɗi nid waɗele, na ig keh digdig, le oug ele aakkuib megappe lakkunig.

¹³ Ig deɗ eblaih laih eleppa ee amuib lakkunig. Aria, deɗ eblaih laih ele amu maleb, na ig beɗunig italna anidna, nid bau laa ag king dilag ee latteb ele, na ag beɗulag ele italna anidkkut. Na anam italna anidna, na aɗi anidkkut amu, na amu dabmena, aɗi ɗo na ig nahipad maɗi nid waɗele, na ig megakkut dayeb amu, na megakkut,” awa aum.

¹⁴ Daniel nug gumak danab amegppa anam a, nug ag ma anttak anam hekkulagnu aum.

¹⁵ Nug anam a, deɗ eblaih laih ele uue, nug Daniel laikkud ele italatta anatta, nid bau laa ag kingnu ee lappig ele, nug ag ele italatta anatta, Daniel laikkud ele ag beɗulag am enanag, nid bau laa oh eɗattak daaegeg anttom.

¹⁶ Nug anam anttom amunu, gumak danab amu nug kingnu ee enanag, wain ele, king ag amu lakkulagnu aum amu, nug ee amu ag ii mattom. Iitta. Nug keh digdig, ⌊le oug ele⌋ aakkuib ag matte lappig.

¹⁷ Ag ee amuib laeg, Kayak Nug nid bau waɗele amu doyak ena ele matta, Nug ag kaya digdignu diignu doyak tutukku, am dabmak unuqagnu diignu doyak tutukku ele ag mattom. Nug amu matta, Nug he, Daniel nug tul niiak digdig, tulegleg digdig ele anattaknu diig doya, mehuqkkunu ehah ele mettom.

¹⁸ Anam daaeg, maɗ ewam uue, haen king nug ag sul ahilag malan gona, ag king gumidna wana daappeg, nug ag oɗ mattebeb, nob mettaglagnu aum, haen amu be, kingnu ikki danab dilag okkai nug nid bau ag sulppa daappig amu, nug ag omalatta, Nebukatnesar toppa ukke, ag nug gumidna goppig.

¹⁹ Danab okkai amu nug ag diia ukka, Nebukatnesar noobppa maatte, king nug ag ele nai madippig, amge Daniel, Hanania, Misael, Asaria ele ag laa oh eɗadppig amunu, king nug he, ag nuhig ikki danab daappig.

²⁰ Ag kingnu ikki danab daaeg, king nug aɗi doyak dabmak ena elenu keeke, o diignu doyak tutukkunu keeke, nug amunu oɗ mattom amu, ahilag oɗmak nob amunu am ena, elelenab. Wan amuppan baɗ mak danab digdig, ag ele oɗmak amunu nob king medappig, amge ahilag nob, amunu meu am huppu nakokib awom. Daniel laikkud ele dilag nob am meu okkainab king ippunittom. Kingnu ɗo maɗoɗ ohppan danab amu, ag oh anamib.

²¹ Amu Daniel nug kingnu ikki danab daye ukke, king laala beeg ukke, Sairus king abenab awa daya, maɗ nug amu digmeumppa Daniel nug uɗat amu uuom.