Aposel 8 - Nobonob Baibel

Saul Kristen tamaniak eheɗ hattom

^1-2 Stiven menppa makkuɗeg mauhehe, Saul nug amunu oo ena dayom. Amu genab tutukku hak danab laala ag nug gaɗa aon gona boumna, mahiak okkai heppig. Aria, haen amuppa Juda dilag okkai ag ahan digmena, Kristen tamaniak Jerusalem dayom amu heeg nauha auta awom amunu, Kristen ag ahan, matatun gona, Judanu wan atu, Samarianu wan atu eleppa daappig. Kristen ag ahan goppig, amge totol danab 12 ag Jerusalem ii uuppig; ag daappig.

³ Amu Saul nug aha, Kristen tamaniak heeb iitta mekkunu uug madatta, nug ukka lag lag oiyaya, Kristen danab amu ah ele diia ukka, maniguittakppa inattom.

Pilip nug Samaria ukka Jesusnu nai mehuqom

⁴ Anam heehe, Kristen ag matatun aab laalappa gona daanna, ag Nai Ena mehuqppig.

⁵ Amu Kristen ag anam heegeg, danab laa onig Pilip nug aab okkai laa onig Samaria, appa noa, appa nug Kristusnu nai mehuqom.

⁶ Nug Kristusnu nai mehuqeqe, danab ah kuɗumnab ag nai amu doonna, Kayak ehanitte, nug Kayak dabmettaknu kobol danab haknu elele iitta amu ele hattette anidna, Pilip nai mehuqom amu ag daulag human dooppig.

⁷ Appan danab ah laa ag ouɗi nau ele daappig amu, ouɗi nau kuɗum ag huan enana, ag uuadna ukkaegeg, danab kuɗum eppelag, baelag ele mauhak, amu ebehilag kaliak ele ag eɗun ena daappig.

⁸ Amunu aab okkai amuppanu danab ah ag anam anidna, ag maɗoɗppan gamag ahak huana ahak dooppig.

Onig awak danab onig Saimon, nuhig kaya

⁹ Ag oolag anam doyeg amu, danab laa aab okkai amuppa dayom, nug onig Saimon. Anukka nug am onig awak kobol heehe, Samaria danab ah oh ag nuhignu dabmak kuɗum aoegeg, nug nukka binag ma, “Da am danab okkai,” attom.

¹⁰ Nug anam aawo, danab ah laa onilag ele, laala onilag iitta ele, ag oh Saimonnu nai dooglagnu daulag human appig. “Ig ɠagattag laa, ɠagattag amunu amu ig, ‘Ɠagattag okkai,’ aot attem; ɠagattag amu Kayaknu uɗitte ele amu, danab umu nug ɠagattag amu aakku awom,” aon appig.

¹¹ Ag anam ana, nuhig nai amu dim lamidkkulagnu am hik aqom. Aɗinu? Haen elabnab nug nukka nuhig baɗ mak kobolppa, nug kobol laala he anidnana, ag dabmak kuɗum aoppig.

¹² Amge Pilip nug Jesus Kristusnu amu Kayaknu ɗo maɗoɗnu Nai Ena mehuqe, ag doonna, haen amuppa danab ah ele ag oolagppa genab doyeg layattom.

¹³ Ag layattak aoegeg, Saimon ele ooppa genab doya, layattak awe, Pilip ele daaya, Pilip nug Kayak dabmettaknu kobol danab haknu elele iitta digdig okkai hatte antta, nug ottaia dabmak kuɗum awom.

¹⁴ Pilip anam he, totol danab 12 Jerusalem daappig ag Samaria danab ah Kayak nai doon, oolagppa genab dooppig doyona, ag heeg, Pita, Jon ele noya anadpiɗ.

¹⁵ Aa gumadya tewoya, ag Kayak Ouɗi aoglagnu unuqidpiɗ.

¹⁶ Aɗinu? Kayak Ouɗi Nug ahilagppa ii neum. Ag Naɗi Jesus onigppaib layattak aoppig.

¹⁷ Amunu aa unuqittoya, aa eppelah qaɗelagppa meeh, ag aakku Kayak Ouɗi aoppig.

¹⁸ Amu haen Saimon nug Pita, Jon ele aa eppelah danab ah qaɗelagppa meeheh, ag Kayak Ouɗi aoegeg anata amu, Nug men doɗo awa doa, ahilah ɠagattag amu daden mekkunu amelahppa inam aum.

¹⁹ “Danab aɗit, aa uɗat hettep ele, ɠagattag amu da meɗeɗ! Anam dayeb amu, da ele danab laa qaɗeppa eppel meppi, nug Kayak Ouɗi aokku,” awa aum.

²⁰ Saimon nug aum, amge Pita nug amegppa aum. “Na Kayak Nug keeke ihinig daakkunu hamu megatte men doɗoppa aokkutnu hettem. Men doɗo nahip amu na ele oh padal memayanu na dabme!

²¹ Na uɗat imu, ig hettem ele amu, na amu ooppa daakkutnu elele iittanab. Aɗinu? Kayak anidtte; na oot am tutukku iitta.

²² Am na kobol nau nahip amunu oot eɗueb, na Naɗi ⌊Nug nahip hipunin uhuqa medakkunu⌋ unuqitte! Na anam hekkut amu, Nug dabmak nau nahip dabmakppa beum uhuqa medakku.

²³ Aɗinu na anam hekkut? Da anidttem, na hipunin laa, amuam laan keekenu ameg qe oo elele ii daya aut autanab awak, na hipunin amuppa nena qee, amu hipunin na hipalitta aut auta aotte,” awa aum.

²⁴ Pita anam awa a, Saimon nug inam aum. “Aa apiɗ dahilppa bemanu amu, aa Naɗi da ehaniɗkkunu unuqidkkulahnu oɗ matattem,” awa aum.

²⁵ Amu Pita, Jon ele aa danab ah amelagppa Naɗinu nai mehuqeh doyeg, aria dimppa aa eɗuya Jerusalem gopiɗ. Aa ibppa goyaya, Samarianu aab kuɗumppa aa Nai Ena mehuqpiɗ.

Pilip Itiopia danab amegppa nai mehuqom

²⁶ Aria Naɗinu engel laa nug Pilip amegppa aum. “Na ahan, laih yau uɗitteppanu gona, ib laa Jerusalemnu Gasa ukkakppa daatte amu appa ukke! Ib amuam atu taɗakppanu ib,” awa aum.

²⁷ A amu, aria Pilip nug aha ukkom. Amu ibppa nug Itiopia danab laa uɗa teum. Danab amu nug am Itiopia dilag Kwin Kandasi, nuhig ehanittak anuqak danab okkai laa. Nug am danab hipab qak ele. Nug Kandasinu men doɗo oh gumttom. Danab amu nug Kayak noobppa dup noa binag mekkunu Jerusalem ukkom.

²⁸ Amu deɗ Pilip ukkom, deɗ amuppa Itiopia danab nug eɗua ugakka, nuhig karisppa dayaya, nug propet Aisaianu yaak ebqaaqa ukkom.

²⁹ Nug amu ebqaaqa ugekke, Kayak Ouɗi Nug Pilip amegppa aum. “Na karis umu gukkuidna ukke!” awa aum.

³⁰ Aria, Pilip nug qaietta gumitta wana, danab amu nug propet Aisaianu yaak ebqeeqe doya, oɗ metta aum. “Na nai ebqettem ele amu, na diig nuhignu oot maidttete, o iitta?” awa aum.

³¹ Am danab amu nug aum. “Danab laa da dookkulnu ii ippuniɗebeb amu, da attem hein dooppi ool maidkku?” awa aum. Awa ana, nug Pilip amegppa aum. “Na beppe, da ele daaɗu!” awa aum.

³² Amu nug Kayak nai laih laa ebqeum amu iikku. “Danab nug sipsip qekkunu omala, qaaknu abenppa ugekke, sipsip ii gaatte amu, amubia nug eheɗ ag nuhigppa heppignu nai laa ii mattiom. Ao, danab nug sipsip nag uɗig otaɗeɗe, sipsip nug ii gaatte, amubia ag nuhignu nau heppignu oɗe qamuta, toetta dayom.

³³ Ag Nug onig qeeg ne dayeye, nuhig hettoɗiak elele ii heppig, amu laa nug nug buɗubnu akkunu elele iitta. Aɗinu? Ag nug qeeg mauhom.” Nug Kayak naippanu yaak amu ebqeum.

³⁴ Aria, ehanittak anuqak danab amu nug Pilip oɗ mettom. “Gadon. Propet nug nai imu danab aunnunab aum? Nug nukka nuhignute aum o iitta danab laanute aum?” Nug anam oɗ mettom.

³⁵ Oɗ mette aria Pilip nug danab amu amegppa Kayak nai, nug ebqeum, amuppa digma, Kayak nai laala ele awa, Jesusnu Nai Ena mehuqom.

³⁶ Aa anam heyaya goya goya, le laa anidya, danab amu nug Pilip amegppa aum. “Antte! Le iikku. Aɗi keeke laa da layattak ii aopanu da qakkiɗtte?” awa aum.

³⁷ ((Aria Pilip nug aum. “Na oot ohppa genab doottem dayeb amu na aokkutnu elele,” awa aum. Awa a, danab amu nug oɗeppa awa aum. “Da Jesus Kristus Nug am Kayak Bekka da oolppa genab doottem,” awa aum.))

³⁸ Aria, Kandasinu ehanittak anuqak danab nug a, karis lamittak danab nug karis aɗe dayeye, aakku Pilip, danab amu ele, aa le amuppa noya, Pilip nug danab amu layattak mettom.

³⁹ Nug laaitte, aa leppanu teeh amu, pahanab Kayak Ouɗi Nug Pilip awa ukke, ehanittak anuqak danab nug baula ii anttom, amge nug maɗoɗppan gamag ahak doyeye, appagppa ukkom.

⁴⁰ Anam ukkom amge Pilip nug Asdot appa tula ba, aab laala ohppa ukka oiyaya, nug Nai Ena mehuqom. Nug anam haaha ukka Sisaria waum.