Aposel 7 - Nobonob Baibel

Stiven ikki danab dilag qagmakppa nai mattiom

¹ Anam anidna amu mana mettak ikki danab nug Stiven amegppa aum. “Nai appig umu, amuppa yaaidppig amu, nai amuam genabte?” awa aum.

² A amu, Stiven nug mehuqa amelagppa aum. “O da lailad, da mamelad ele ag doyeg! Anukka ig alanig Abraham nug Mesopotemia dayaya, nug Haran ii ukkom, haen amuppa Kayak, nug binag amahlak oppiaawak ele, nug Abraham gumitta noa, amegppa aum.

³ ‘Na ahan, wan nahip imu uuna, na laipad ele uuadna, wan laa da na ippunidkkul amu, na amuppa ukke!’ awa aum.

⁴ Kayak aum amu Abraham nug Kaldia wan uua, aha ukka, Haran dayom. Appa dayeye, dimppa mameg mauhe amu Kayak Nug he, aha Kanan wan, gemu ag daatteb ele imu, iguppa uɗiom.

⁵ Amu Kayak Nug wan imuppa laih nakok laa Abraham eppegppanab daakkunu ii mettom, amge Kayak Nug dimppa wan imu Abraham, amu nug buɗub ele madakkunu nai qakka aum. Amu haen Abraham nug nid iitta oiyeye, Kayak Nug nai amu amegppa qakka aum.

⁶ Amu Kayak Nug inam nug amegppa aum. ‘Na buɗunad ag geha danab buɗub laa dilag wanppa aab diig danab iitta maɗ 400 daaglag. Ag anam daabppeg, wan amuppan danab ag heppeg, na buɗunad ag ahilag begbeg maɗi nid daaglag; amu ag ele ag eheɗ hattaglag,’ awa aum.

⁷ Nug anam ana am Kayak Nug tuɗitta ele aum. ‘Wan amuppanu danab ag heppeg, na buɗunad ag begbeg maɗi nid maɗi ah ele anam daaglag, amge da wan amuppan danab bu madappi, na buɗunad ag wan amu uun, ag uɗin, wan imuppa geha ag da noolppa dup nona binal mekkulag.’ Kayak Nug anam awa aum.

⁸ Kayak Nug anam aum dimppa, Nug nug tituana nai qakkak ha, ɗo laa Abraham metta, Abraham amu nug buɗub ele ag oh gaɗalag otaɗadkkulagnu aum. Kayak aum amunu dimppa Abraham nug bekka Aisak menua, deɗ eblaih ewamppa gaɗa otaɗom. Aria, Aisak nug Jakop menua, gaɗa otaɗe, Jakop nug dimppa bekkod 12 menuatta, gaɗalag otaɗom.

⁹ Aria, ig alankad ag Josepnu, ihinigppa anam daalon dabmak aɗan daan, ag nug aon, danab laa mattaeg, men doɗo mattanna, ag aon, Isip goppig. Ag nug aon ukkaeg, appa nug laanu begbeg maɗi nid dayom, amge Kayak Nug Josep dabmedette,

¹⁰ Josep nug uug digdigppa dayeye, Kayak Nug amu ohppa ehanitte qagaiettakppa ii dayom. Amuam Kayak Nug doyak dabmak ena ele Josep mette, Paro, Isip dilag king, nug Josepnu oo daye, awa me Isip dilag gabman anuqak dayaya, king laugppanu keeke oh gumama, nug kingib waappa dayom.

¹¹ Anam dayeye, dimppa Isip wan ohppa, amu Kanan wan ohppa ele enug haen be, ag uug okkai anidna amu, ig mamelkad aɗi ag ee laa aon lakkulagnu iitta,

¹² amge laa ag aeg, Jakop nug, ‘Isip appa ee daatte’ doyom. Aria nug he, alai aɗi ag ee daden mekkulagnu Isip goppig.

¹³ Amu dimppa ag eɗun ukkaeg, Josep nug awakkud amag ele noolagppa nukka miag, ‘Da am Josep,’ aum. Nug anam he amu, haen amuppa Paro nug ag am Josep awakkud amag ele doyom.

¹⁴ Amu dimppa amu, Josep nug mameg Jakop, Jakop baekkudppa ele oh, danab ah amu ebqak ahilag amu 75, ag nug gumidna gokkulagnu aum.

¹⁵ Aria Jakop nug noa, Isip dayeye, amu dimppa nug amu nug bekkod ele ag oh mauhadppig.

¹⁶ Ag mauhatteg, gaɗalag amu ag eɗun akkan gona, Sekem matmatppa boumadppig. Anukka Abraham nug silwa men doɗoppa wan amu Hamor buɗub, danab amu ag eppelagppanu awom.

¹⁷ Amu Kayak Nug anukka nai Abraham amegppa keeke laa hekkunu nai qakka aum amu, haen amu aakku bekkunu miag doodo, Israel ag appatnana, Isip wanppa kuɗumnab daappig.

¹⁸ Israel ag anam kuɗumnab appateg, Isip dilag king laa beum. King amu nug Josepnu kaya nakok laa ii doyom.

¹⁹ Nug amu ii doya, nug ihinkad danab anukkanu ag nug, amu Isip ele uɗat nauppa ehanadkkulagnu he heppig. Ele amu, nug laa guittak mettaknu uug laa ii doyak kobol dim lamitta, kobol nau digdig ahilagppa haaha, nug kobol naunab laa ha, nug Israel ag ahilkad nid yuɗ mauhkkulagnu buɗiadppeg gona, dimittim daan mauhkkulagnu ɗo meum.

²⁰ Ag uug nau amuppa daanna, haen amuppa Moses anig nug menuom. Nug Kayak noobppa nid ena daye, nug anig mameg ele aa kalam ewam anam lakka lokkumeh dayom.

²¹ Anam lokkumeh daye, dimppa nug nakok okkai me, anig nug ⌊uub nakok ita ooppa ina, awa leppa⌋ me dimittim dayeye, Paro aɗeg nug antta awa, nuhig nid bia gumom.

²² Anam he, Moses nug okkai ma amu, Isip dilag doyak oh doya malowa, nug danab, nuhig nai mattiak amu nuhig uɗat ele am ɠagattag, anam dayom.

²³ Dimppa Moses nug maɗ nuhig 40 dayeye amu, nug laikkud Israel ag attem bia daappig anidkkunu dabmak awa, aha oiyaya,

²⁴ Isip ted laa aha, Israel laa eheɗ hedette antta, nug Israel ted amu ehanitta, Isip ted heum amu Moses nug nob ma, Isip ted amu makkuɗe mauhom.

²⁵ Am nuhig dabmak am inam dayom. ‘Da hemippa, da lailad ag da aniɗna ag, “Kayak heeb, Moses nug geha ig ehanikkeb, ig baula nau ii daamta,” aon akkulag.’ Nug dabmak amu awom, amge Israel ag dabmak anam ii aoppig.

²⁶ Aria, wagɗe deɗ amuppa Moses nug eɗua oiyaya amu, Israel danab aɗit laa aa nug qeeheh anata, aa uuya oolah laippu daaglahnu amelahppa inam aum. ‘Aa diig laippuppan, amu aɗinu aa anam nug guittak mettaya hettep?’ awa aum.

²⁷ Moses nug uuglahnu aum, amge danab aha layagppa eheɗ heum ele amu, nug aha, Mosesnu nai otaɗa aum. ‘Aun na ig gumignana, ihinig uug bappaidkkutnu meittom?

²⁸ Na tumai Isip ted makkuɗe mauhom bia da oiɗppe mauhkkulnu hettemte?’ awa aum.

²⁹ Nug nai amu a amu, Moses aakku oola ukka, Midian dilag wanppa, nug appa wan laihnu danab dayaya, dimppa ah awa, nid danab aɗit menuatom.

³⁰ Appa dayeye, maɗ 40 ukke, atu taɗakppa qauko Sainai guguittak engel nug tula, Moses toppa beum, amge Nug miag ii beum. Iitta. Nug aab ewak bia, ad nakok laa eppeg ooppa dayaya, tula beum.

³¹ Moses nug aab ewak amu antta, nug oo ii maitte, dabmak kuɗum awa, nug pehetta anidkkunu gumitta waawo, Naɗi Nug aum.

³² ‘Da am na mamenad aɗi dilag Kayak. Da Abrahamnu, Aisaknu, Jakopnu ele Kayak,’ awa aum. Awa a, Moses nug ottaiya baɗa, Kayak anidmanu ii neekkom.

³³ Anam daye, Naɗi Nug amegppa aum. ‘Wan na hippaidna daattemppa, amuam dahilnu tituanak daatte amunu, na baen gaɗa meme ele amu, na uɗe!

³⁴ Da Isip danab, ag dahilad danab Isip daatteb ele amu, ahilagppa kobol eheɗ huanak heegeg anatte, danab dahilad dilag aiqakkak ele doottem amunu, da ag ehanattena, ahilag uug amu autkkulnu nemi. Amu na ahe! Da na eɗun Isip gokkutnu meitti gottem,’ awa aum.

³⁵ Moses nugib aakku, anukka ag nug guhuɗidna, ‘Aun na ig gumignana, ihinig uug bappaidkkutnu meittom?’ aon appig, danab amuib aakku Kayak awa he, nug Israel dilag gumak danab, qagaiettakppanu eɗua uhuqak danab daakkunu ukkom. Kayak he, engel nug ad nakokppa, aab ewak ooppa ba, Moses anam hekkunu aum.

³⁶ Amu Moses nug danab amu ag Isip wanppanu gokkunu omalattatta, nug Kayak dabmettaknu kobol danab haknu elele iitta digdig heum. Nug omalatta ugakka, nug Isip wanppa, Le Kokoɗppa amu atu taɗakppa ele, appa maɗ 40 batak anamib heum.

³⁷ Amu Moses nugib aakku, nug nai imu Israel amelagppa aum. ‘Kayak Nug geha ahilagppanu danab laa da bia nug propet daakkunu epeɗia meeb, ahilagppa gokku,’ awa aum.

³⁸ Moses nug dimppa Israel ele oh ag atu taɗakppa, Sainai qaukoppa qagmena amu, nug engel, ig mamelkad aɗi ele dilag gamag danab dayeye, engel nug Kayak nai bau dayaknu amu mette, nug awa, ag mattom.

³⁹ Amge ig mamelkad ag Moses oɗe dim lamidkkulagnu uuppig. Ag nug guhuɗidnana, ag eɗun Isip gokkulagnu amu oolag guattom.

⁴⁰ Ag anam henana, ag Aron amegppa appig. ‘Ig danab amu, Moses, danab amu nug ig Isip wanppanu aikka ippa uɗiom ele amu, ig nuhigppa aɗi laa beum amu, ig ii doottem amunu, na ahan, kayak laa, geha nug ibppa anuqa ugakka, omaikka gokkunu hena mekke!’ aon appig.

⁴¹ Aria ag anam ana, haen amuppa ag makau gaiɗ dottog laa hena, ag doɗ main kayak hambuppuak amu mettanna, ag eppelagppa keeke heppig ele, ag amunu gamalag ahe, nuhig hobul okkai heppig.

⁴² Ag anam heeg, Kayak Nug heqo matta, ‘Ag eheɗ hekkulagnu oolag dayeb amu uuadpput heig!’ awa aum, amu ag aam, kalam, hoɗoppai ele noolagppa dup nona binalag menana, propet naippa, nai daatte bia heppig. Nai amuam inam. ‘O Israel danab ah, ag atu taɗakppa maɗ 40 oinna, ag ⌊oolag genab meɗan, da ool hette bia⌋ ofa iɗu iɗu meɗappigte. Iitta!

⁴³ Ag kayak hambuppuak Molek, nuhig sel lag, am kayak hambuppuak Repannu hoɗoppai ele aon oippig. Ag keeke amu dottolah hena, aa nooltippa dup nona binalah meppig. Ag anam heppig amunu, geha da ag diien maadppi gona, laih Babilon eɗittak uppa diia ukka laih me dayak danab daaglag,’ awa aum.

⁴⁴ Aria, ig mamelkad aɗi anukka ag atu taɗakppa daappig amu, haen amuppa ag mettid haknu peh lag men maha aɗit ɗo nai yaak niitte ele appa daattep amu, ag peh lag amu ele aon oippig. Ag mettid haknu peh lag heppig amu, ag hekkulagnu dottog Kayak Moses ippunittom amu, ag amubia heppig.

⁴⁵ Dimppa Josua nug ig mamelkad aɗi ag diie, Kanan wan imuppa uɗieg, Kayak Nug danab wan imuppa daappig ele amu lamattette, haen amuppa mettid haknu peh lag amu ag maon oippig. Aria, peh lag amu ippa dayeye ukke, dimppa Dawitnu haen batak.

⁴⁶ Amu Kayak, Nug Dawitnu enanag doye, Dawit nug Kayak, Nug am Israel dilag Kayak, nug Nug laug hekkunu unuqittom.

⁴⁷ Amge nug ii heum. Iitta. Nug bekka Solomon nug amu heum.

⁴⁸ Amge Kayak Attannab Laa Oh Eɗattak, Nug lag danab hetteb amuppa ii daatte. Amu propet laa nug nai amunu mattiom am inam.

⁴⁹ ‘Naɗi Nug inam atte. Sia king dahil am hab aabppa dayeye, wan am da bael maknu balal nakok daatte. Anam daatte amunu, ag lag attemnab laa dahil heppeg daakkul? Ag aben laa da aguppa hik awe daakkulnu hekkulagnu elelete? Iitta.

⁵⁰ Da keeke amu oh hattami.’ Kayak Nug anam aum.

⁵¹ Aria, Israel ag am tappe nak danab, ag oolag, daulag ele am ituak, iitta aɗi danab bia amunu, ag mamelkad aɗi heppig amubia, ag hanhan Kayak Ouɗi dimedatteb.

⁵² Amu propet aun laa dayom, ag mamelkad aɗi ag nug eheɗ iite hedappig? Laa iitta. Anukka propet ag Genab Tutukku Hak Danab uɗikkunu nai amu mehuqegeg, ag mamelkad aɗi ag ag aqatteg mauhppig. Aria, Genab Tutukku Hak Danab Nug uɗie, ag gemu daatteb amu, ag Nug aon, kekeɗ eppelagppa mena heeg, Nug mauhom.

⁵³ Kayaknu ɗo nai amu engel ag madappig, amge ag amu dim ii lamidtteb.” Stiven anam aum.

Ag Stiven menppa makkuɗppig

⁵⁴ Am Stiven nug nai amu aum amu, ag oolag ye, guatte oolag nauhe, oppoɗilag huan be, amelag kokoɗ eppe, Stivennu aelkad emalna daappig.

⁵⁵ Ag anam heppig, amge Kayak Ouɗi am Stiven ooppa ambe, nug tutukku hab aabppa neekka, Kayaknu binag amahlak oppiaawak ele hab aabppa antta, Jesus Nug Kayak eppeg naɗiap-ppa hibaitta dayeye anttom.

⁵⁶ Antta, Stiven nug aum. “Antteg! Da hab aab obate, Danab Bekkalag Nug Kayak eppeg naɗiap-ppa hibaitta dayeye anidttem,” awa aum.

⁵⁷ Nug anam a, ag doona, ag huanaknab enana, daulag itun, ag oh ahan qaiqaɗ wana, Stiven aɗappig.

⁵⁸ Ag aɗan, aon aab okkai amu dimittim eeɗna gona, ag digmena, menppa nug makkuɗppig. Tatam danab ag nug beɗuppa nai yaappig ele amu, ag ahilag ulahnu lamen uɗan, nid bau laa gumakkunu medappig. Nid amu onig Saul.

⁵⁹ Ag men aon, Stiven makkuɗegeg, Stiven nug unuqitta aum. “Naɗi Jesus, da ouɗil na eppenppa aokkutnu oɗ medattem,” awa aum.

⁶⁰ Nug unuqitta anam awowa, nug gateg qaun o, nug huana ewa aum. “Naɗi na ahilag hipunin imunu nob ii mattamna oɗ medattem.” Stiven nug anam ewowa, nug mauhom.