Aposel 6 - Nobonob Baibel

Kristen tamaniak ag danab eblaih aɗit ele otiadppignu nai

¹ Ag Jesus Kristusnu Nai Ena mehuqegeg, haen amuppa danab kuɗum Jesusnu oolagppa genab doyegeg, tamaniak amu tuɗittegeg okkai meum. Anam beebe, tamaniak danab ah oolagppa ameg laa ag Grik nai madittappig, ag ahan ameg laa Hibru nai madittappig, ag ag ele aeg ona aeg do amelagppa appig. “Ag deɗ oh uɗat imu tippaltteb. Ag ah qab ahilkad, ag ee iitta ele, ag ee madatteb, amge ag ihinkad ah qab daatteb amu, ag ii ehanadtteb,” aon appig.

² Anam daye, totol danab 12 ag aeg, danab Jesusnu oolagppa genab dooppig ele ag oh uɗin qagmeeg, amelagppa appig. “Ig ee paniak uɗat hekkunignu Kayak nai mattiak uɗat uugnig am ena iitta. Ig anam hekkunig amu, am Kayak noobppa ena iitta

³ amunu, O lainkad, ig inam hekkunig. Ag oh oolagppanu ag danab eblaih aɗit laa, danab ah ag danab amunu ena elele dootteb, ag Kayak Ouɗi aoppig, ag doyak dabmak ena ele amu, ag danab eblaih aɗit amubia anatteg! Danab amu ig uɗat amu madapput, ag hekkulag.

⁴ Amge ig totol danab amu, ig hanhan unuqidtata, Kayak nai danab ah ippunadkkunig,” aon appig.

⁵ Ag anam aeg, danab ah oh ag nai amunu ena doon, ag danab otiadppig. Ag otiadppig ele amu, ag onilag am Stiven, nug ooppa genab doyak nuhig am ɠagattag, Kayak Ouɗi nug ooppa ambak ele. Aria, laa am Pilip, laa am Prokorus, laa Nikanor, laa am Timon, laa Pemenas, amu laa am Nikolas. Nikolas ⌊nug iitta aɗi laa,⌋ nug Antiok ted. Amu nug ⌊tatam⌋ eɗua, Juda dilag mettid dim lamittom, ⌊amge gemu nug Kristen beum daatte⌋.

⁶ Ag danab amu otiadna heeg, totol danab 12 noolagppa hibaitteg, ag eppelag qaɗelagppa mena, ahilagnu unuqidppig.

⁷ Aria, Kristen tamaniak ag anam hena, ⌊totol danab aɗi⌋ ag Kayak nai mehuqegeg, danab ah kuɗum ag oolagppa genab dooppig. Jerusalem appa danab kuɗum ag oolagppa genab doona, Kristen tamaniak ooppa ukkaeg, nuhig ebqak okkainab meeme, mana mettak danab kuɗum ele oolag eɗuom.

Stiven aɗappig

⁸ Amu Kayaknu ehanittak okkai hamu megatte, nuhig ɠagattag ele Stiven ooppa ambe, nug Kayak dabmettaknu kobol danab haknu elele iitta hatta, nug kobol danab haknu elele iitta laala ele danab ah oolagppa heum,

⁹ amge danab laala ag Stiven ele oolag laippu iitta, ag heeg, ag nug ele nai aeg ona aeg doum. Danab amu ag Juda dilag nai doyak lakka, ag lag amunu, Danab Begbeg Maɗi Nid Iitta atteb ele amu, ag lag amuppa godappig. Danab amu ag am Sairini, Aleksandria, Silisia, Asia elenu uɗiak.

¹⁰ Am Kayak Ouɗi Nug doyak dabmak ena ele Stiven metta he, ag nuhig nai eɗidna, tabappeg nokkunu elele iitta.

¹¹ Ag anam anidppig amunu, ag kobol hambuppuakppa hena, danab laala eeɗatteg ahan appig. “Ig Stiven nug Moses, Kayak ele dilahnu dabittak nai mattie doomut,” aon appig.

¹² Ag anam hambuppueg, danab ah, Juda dilag ikki danab amu ɗo mehuqak danab ele ag ottaina, Stivennu eheɗ dooppig. Eheɗ doyeg, ag ahan, nug aɗan, aon Juda dilag hettoɗiak okkai onig Sanhidren, appa gona,

¹³ ag qagmak amuppa heeg, aɗi heehe anttomnu mattiak danab hambuppuak laala ag ahan, Stivennu nai hambuppuak inam aon appig. “Danab imu nug hanhan Kayaknu lag imu, ɗo nai elenu nai eheɗ maditte.

¹⁴ Amu nug mattiaya, inam aawo ig doomut. ‘Jesus, Nasaret ted, geha nug Kayaknu mettid lag imu heeb nauheb, anukka Moses nug kobol ig mekkom amu ele Nug eɗukku,’ awa aum,” aon appig.

¹⁵ Ag anam hambuppueg, danab hettoɗiak okkai onig Sanhidren, appa daappig, ag oh Stiven amelkad behabe neekkidna, ag nug iɗu engel bia anidppig.