Aposel 4 - Nobonob Baibel

Israel okkai ag Pita, Jon ele aɗalatppig

^1-2 Pita, Jon ele aa danab ah ⌊Jesusnu⌋ ippunadyaya, nuhig ɠagattagppa danab mauhppig ele ag eɗun hippaidkkulagnu ele mehuqeheh, mana mettak danab, Kayaknu mettid lag gumaknu ban daup ikki, amu ɗo gumak danab-Sadyusi aɗi ele ag aa nai madipiɗ, ag amunu ahilahnu oolagppa aeg bak nau doyegeg, danab aɗit amu aa nai amu mattieheh, ikki danab amu ag ahilahppa uɗippig.

³ Uɗin, tueb meum amunu ag aɗualatna, maniguittak ooppa tuqan amu daaglahnu maatppig.

⁴ Ag anam heppig, amge danab ah kuɗum, aa nai madipiɗ ele amu, ag nai amu doona, ag oolagppa genab dooppig. Amu haen amuppa, oh ag oolagppa genab dooppig ele amu, ag oolagppanu danabib ebqak am 5,000 anam.

⁵ Aria, Pita, Jon ele aa maniguittak ooppa daaeh ukke, wagɗe deɗ amuppa Juda dilag danab okkai, Juda dilag ikki danab, amu ɗo mehuqak danab ele ag uɗin, Jerusalem qagmeppig.

⁶ Laa amu ag qagmeppig ele amu, ag oolagppa am mana mettak ikki danab Anas, aria Kaiapas, Jon, Aleksander, amu danab laala ele, ag oh buɗub laippunu amu, ag oh ele daanna,

⁷ ag totol danab aɗit amu diiatna, ag hettoɗiakppa maatna oɗ matappig. “Aa ɠagattag aɗippa, o aa aun onigppa uɗat amu hepiɗ?” aon oɗ matappig.

⁸ Danab amu ag anam aon oɗ mataeg, Kayak Ouɗi Nug Pita ooppa ambe, nug aha ag amelagppa aum. “O ag Israel danab okkai, amu ag ikki danab ele,

⁹ gemu ag danab laa baeg kaliak ele ehanitte, nug ena dayom, ag amunu iikku oɗ metattebte? Ag kobol amu aɗi ɠagattagppa beum dooglagnu oɗmak hettebte?

¹⁰ Anam dayeb amu, aria gemu ag oh tutukku dooppeg, am Israel buɗub oh ag ele, ag inamib dooglag. Jesus Kristus, Nasaret ted, ag gemu daatteb imu, ag Nug ad emaitakppa atulppig, amge Kayak Nug he, Nug eɗua hibaittom, amu Nug he, danab imu eɗua ena daya oiyeye ag anidtteb.

¹¹ Kristus Nug am ‘men laa, ag lag hak danab ag uuppig, amge Nug men anuqak beum daatte.’

¹² Wan imuppan danab aun nug ig eɗua awikkeb, ig hipunin waappa ii daamta? Laa iitta! Jesus Nug nukkaib elele. Wan imu ohppa ig laa onigppa ehanitta padal ii mak aognignu iitta, Jesus nukka,” awa aum.

¹³ Haen Juda dilag danab okkai amu ag Pita, Jon ele aa ii baɗapiɗ anidna, amu aa sul okkai ii hepiɗ ele doona, ag ottaina dabmak kuɗum aona, ag Pita, Jon ele aa Jesus ele oippig amu dabmeppig.

¹⁴ Anam amge danab beɗu ena dayom amu nug Pita, Jon ele ag oh hippaidna daaegeg anadppig amunu, ag aa nai apiɗ amu eɗun nob mekkulagnu ib laa ii anidppig.

¹⁵ Ag anam daanna amu ag Pita, Jon ele, aa Juda dilag hettoɗiak okkai onig Sanhidren, oo ag daappigppa aa uuya aben makkulak laappa goya daaglahnu aeg ukkaeh, ag attem hekkulagnu amu mattina appig.

¹⁶ “Ig danab aɗit umu am attemtai haatkkunig? Aɗinu? Aa kobol danab hekkunu elele iitta okkai amu hepiɗ. Aa heeh, danab ah oh Jerusalem daatteb ag doon malappig amunu, ig aa ii hepiɗ aot akkunignu am elele iitta.

¹⁷ Amge danab laih laihnu ag doomnanu, ig danab aɗit imu aa baula Jesus onigppa nai ii mattimyanu apput doyeɗ!” aon appig.

¹⁸ Ag anam awona, ag eɗun aeg, totol danab aɗit aa eɗuya waeh, ag aa amelahppa haknunab nai aa Jesus onigppa nai baula eɗui danab ah amelagppa iinab mehuqmaya, baula ele Nug onigppa iinab ippunadmaya appig.

¹⁹ Ag amelahppa anam appig, amge Pita, Jon ele aa apiɗ. “I Kayak nai imu uuɗa, ahilag nai dim lamidkkunih dayeb amu, Kayak Nug keeke amunu ena awa akkute? Ag tutukku anidna dabmak aweg!” aoya apiɗ.

²⁰ Aa anam awoya am baula tuɗidya apiɗ. “I amu oɗenih qamutkkunihnu ele iitta. Aɗinu? I keeke oh amenihppa anidɗa, nuhig nai doomuɗ ele amu, ib laa iitta, mehuqkkunihnab,” aoya apiɗ.

²¹ Aa anam aeh, aria danab okkai ag aa amelahppa nai ɠagattag appig amu, ag nai anam bia laala ele tuɗidna awona, ag danab ah oh ag Kayak keeke he anidna, amunu oolag gamag ahe, ag Nug binag meppig anidna, ag danab ah amu diig amunu baɗappig amunu, ag Pita, Jon ele guittak mataglagnu ib ii anidna, heeg gopiɗ.

²² Danab nug kobol danab haknu elele iitta, amuppa eɗua ena dayom ele amu, nug nuhig maɗ 40 anam amunu, diig amunu danab ah ag Kayak binag meppig.

Kristen ɠagattag aoglagnu unuqidppig

²³ Aria, danab okkai ag heeg, Pita, Jon ele aa goya, aa lailti gumadya goya, mana mettak danab okkai amu ikki danab ele ag hettoɗiakppa nai appig amu oh aeh dooppig.

²⁴ Amu haen ag oh amu doona amu, ag baalag laippu mena, Kayak unuqidna inam appig. “Naɗi Yawe, na hab, wan, yu ele, amu keeke oh amuppa daatteb ele, keeke amu oh na hattame.

²⁵ Amu anukka na he, nahip Ouɗi Nug nai nahip imu ig alanig Dawit, nug am maɗi nid nahip amu, nug amegppa a doya, nug aum. ‘Aɗinu wanppan wan anen anennu danab ah ag oppoɗi bak doon ahatteb? Ao, aɗinu wanppan huu ag maittak meu ena ii oma ele dim lamidna, ahilag haen aakku kakidtteb?

²⁶ Wanppan king, amu wanppan okkai ele ag qagmena, maittak nau aon, ban hekkulagnu bappaidtteb. Ao, ag oh ag Yawe, amu laa Yawe king daakkunu goɗen gokkaɗakppa tituanom ele ban hekkulagnu dabmetteb.’

²⁷ Dawit nug aum bia amu ag genab anam heppig. Herot Antipas, Pontius Pailat ele am iitta aɗi danab amu ag Israel ele, ag oh aab okkai imuppa qagmena, ag Jesus geɗidppig, Nug am maɗi nid nahip, oppiaawak ele. Na Nug anukka goɗen gokkaɗakppa tituanme.

²⁸ Ag anam hekkulagnu qagmena anam heppig amu, Kayak na nahip ɠagattagppa, nahip doyak dabmak ena eleppa keeke oh anam bekkunu anukka ib amunu ame amu, ag amuib heppig.

²⁹ Naɗi, danab amu, ahilag nai mattiak ena iitta amu antte! Anidna amu na ig, nahipad maɗi nid amu, ig baɗak ele iittappa nahip nai mehuqkkunignu, na ig ehanigkkutnu oɗ medattem.

³⁰ Laa ele amu na Jesus, nahip maɗi nid oppiaawak ele amu, na Nug onigppa eppen bahin, oɗe danab aɗualadppe, ag eɗun ena daaglagnu unuqidttem. Kayak dabmettaknu kobol danab haknu elele iitta amu, na amu ele Jesus onigppa hekkutnu oɗ medattem,” aon unuqidppig.

³¹ Ag unuqidna bagqeeg, lag ag daappig ele amu uɗalele, Kayak Ouɗi ag oolagppa ambe, ag ii baɗana, Kayak nai mehuqppig.

Kristen ag nug ehanittak heppig

³² Danab ah ag oolagppa genab dooppig ele ag anam aakku henana, ag oh dabmak laippuppa oolag laippu dayeye, amu danab laa nug keeke ele nug nuhignuib ii aɗom. Iitta. Keekeppa amu ag nug ehanitteg,

³³ totol danab 12 ag Naɗi Jesus eɗua hibaittomnu nai ɠagattag ele mehuqegeg, Kayaknu ehanittak okkai hamu megatte ele, amu ag oh ahilagppa okkai dayom.

³⁴ Anam dayeye, ag oolagppa danab laa nug keekenu, eenu ele tutu mak hamu ii dayom. Iitta. Danab laala ag wan, o lag ele, ag maatteg, danab laa daden maatteg, ag men doɗo amu aon uɗin,

³⁵ totol danab 12 mattaegeg, ag otin, danab laala elele iitta daaegeg madappig.

³⁶ Ag anam heegeg, danab laa appa dayom, nug onig Josep, nug am Lewi buɗubppan mana mettak danab iitta laa, nug Saiprus ted. Nug onig Josep, amge totol danab ag nug onig Barnabas ataɗppig. Onig amu diig eɗuak amu inam; heeb oolag ɠagattag qak danab.

³⁷ Aria danab amu nug wan laih nuhig he, danab laa awe, nug men doɗo amu awa uɗia, totol danab mattom.