Aposel 3 - Nobonob Baibel

Danab baekuɗ kaliak ele eɗua ena dayom

¹ Haen amu deɗ laa Pita, Jon ele aa tueb, aam ameg ewamppa, unuqittak haenppa Kayaknu mettid lakka unuqidkkulahnu gopiɗ.

² Ukkaeh, danab laa ag danab laa, nug baekuɗ kubuku bata noak kaliak daapiɗ, ag nug maon uɗippig. Nug anig ooppanu anam doum. Ag deɗ oh nug aon gona, Kayaknu mettid lagnu aɗ odppa, od amunu ag, Anttaknu Enanag atteb, amu gukkuidna meeg dayeye, danab ah ag Kayaknu mettid lag ooppa noegeg, men doɗo mettaglagnu unuqadkkunu dayom.

³ Danab amu nug Pita, Jon ele aa Kayaknu mettid lag ooppa noeheh anata, nug keeke mettaglahnu unuqatom.

⁴ Unuqate, Pita, Jon ele aa nug tutukku neekkidyaya, Pita nug aum. “Na i anite!” awa aum.

⁵ Anam a, danab amu eɗua, oo ekuɗe ahilahppa ukke amu, nug ooppa, “Aa keeke meɗaglahnu hettep,” awa aum.

⁶ Nug ooppa anam aum, amge Pita nug aum. “Da men doɗo iitta, amge da dahil keeke daatte amu, da na medakkul. Jesus Kristus, Nasaret ted, Nug onigppa da na amenppa attem. Na ahan tappan oiye!” awa aum.

⁷ Pita nug anam awowa, eppeg bahia, eppeg naɗiap-ppa aɗa hume, pahanab baekuɗ kubuku bata noak oh ɠagattag ebapiɗ.

⁸ Nug baekuɗ ɠagattag eppaeh, nug paha aha hibaitta tappa oiyeye, nug Pita, Jon ele oh Kayaknu mettid lag ooppa nonana, nug oola ta oola naana oiyaya, Kayak binag meum.

⁹ Haen danab amu aha, Kayak binag maama oiyeye, danab ah oh ag nug anidna,

¹⁰ ag nug dooppig. Nug am danab laa iitta. Iitta. Nug am danab laa ag nug hanhan Kayaknu mettid lagnu aɗ odppa, od amunu ag, Anttaknu Enanag atteb, amuppa meeg dayaya, danab ah lag ooppa noegeg, nug men doɗo mettaglagnu unuqattatta daattom ele, nugib aakku gemu ena dayom. Ag amu anidna, ag ottaina dabmak huana aoppig.

Pita Kayaknu mettid lag ooppa nai mehuqom

¹¹ Amu unuqak danab amu nug, Pita, Jon ele aɗualatete, danab ah oh ag ottaina dabmak kuɗum aona, ag ahan qaiqaɗ dona, Kayaknu mettid lagnu aɗ ooppa aben laa, Solomonnu Aben atteb, amuppa qagmeppig.

¹² Ag anam heeg, Pita nug anatta, nug amelagppa inam aum. “Israel danab, ag aɗinu keeke imunu dabmak kuɗum aotteb? Amu diig aɗinu ag i iya, ihinih ɠagattagppa, o iitta i iya ihinih ena hakppa i heuɗ, danab imu nug aha tappa oitte dabmak aona, ag amelag behabe, i neekkit-tteb? Anam iittanab, iitta.

¹³ Abrahamnu, Aisaknu, Jakop elenu Kayak, Nug am ig mamenkad aɗi dilag Kayak, Nug aakku nuhig uɗat imuppa nuhig maɗi nid Jesus binag amahlak oppiaawak ele mettom. Amge ag amu, ag Nug aon, kekeɗ eppelagppa meppig. Pailat nug uhuqkkunu aum, amge iitta, ag am danab amu, Nug Jesus amu, ag Nug Pailat noobppa dimedappig.

¹⁴ Ag danab amu, Nug am genab tutukku hak danab, Nug oppiaawak ele, ag Nug dimettan, ag Pailat amegppa, nug danab laa, danab aqe mauhppig ele, ag nug danab amu uhuqa awa, ag matta, heeb gokkunu eppig.

¹⁵ Ag danab ena, Nug bauklel diig, ag Nug qeeg mauhom. Ag qeeg mauhom, amge Kayak Nug he, Nug eɗua hibaitte, i amunu aɗi heehe anttomnu mattiak danab daaɗa, amunu mehuqttep.

¹⁶ Amu i Jesusnu oonihppa genab doomuɗ, amuppa Jesus Nug he, danab imu, ag nug anidna dootteb ele, nug enanagib daatte. Yo, i Jesusnu oonihppa genab doottep, ib amuppa Nug he, danab imu nug ag anidtteb bia eɗua ena daatte,” awa aum.

¹⁷ Pita anam ana, nug nai tuɗitta aum. “O lailad, da genab doottem, ag Jesus nuhigppa eheɗ heppig amu, ag tutukku ii doonna, ag kobol amu heppig, ahilkad ikki danab ele anamib aakku.

¹⁸ Kayak Nug anukka nuhikkud propet oh oɗelagppa, nuhig Kristus, Nug guittak nau amu aokkunu ana mehuqa aum. Nai amu niie uɗie, ag amu heppig amu, amuppa Kayak he, nuhig nai aakku meu oum.

^19-20 Amunu Kayak Nug ahilag hipunin uhuqa matteb, ag oppiaawak daaglagnu, geha Naɗi Nug haen ena madakkunu, Nug heeb, Kristus, Kayak Nug ahilag ehanittak daakkunu tituanom ele amu, Nug uɗikkunu, ag oolag eɗun Kayak dim lamitteg! Kayak Nug anukka laa tituanom ele amu, Nug am Jesus.

²¹ Amu gemu Nug hab aabppa daatte. Nug appa dayebeb ukkeb, Kayak keeke oh eɗua bau hekkunu anukka nai nuhig ana qakke, nuhikkud propet ag oɗelagppa mehuqppig amu, Nug haen amu uɗikkunu ameg mekkuoitte.

²² Nuhignu Moses nug inam aum. ‘Naɗi, ahilag Kayak, Nug ag ehanadkkunu geha ahilagppanu propet danab laa da bia nug epeɗikku amunu, ag propet amu nug aɗi nai ag amelagppa mattieb amu, ag nug oɗe doyeg!

²³ Am danab aun laa nug nai amu doyaknu uukku amu, nug Israel oolagppanu geɗittaknab daakku,’ awa aum.

²⁴ Amu propet oh Samuelnuppa digmak daaeg uɗiom, haen gemu ihinigppa doum daatte, ag oh nai mehuqnana, imunu appig amu iikku ig anidttem.

²⁵ Kayak Nug propet oɗelagppa aɗi bekkunu aum, nug Abraham ele nug tituanya nai qagapiɗ ele amu, ag gemu daatteb, ag propet nai, nai qakkak amu ele, ag meulah aoglagnu daatteb. Nug Abraham ele nug tituanya nai qagapiɗnu nai am inam. ‘Da heppi, na buɗunppa wan ohppan danab ag itittak ena aoglag,’ awa aum.

²⁶ Anam amunu Israel danab, Kayak Nug heeb, ag oh anen anen ag hak nau ahilag uun, Nug dim lamidkkulagnu itittak amu madakkunu, Kayak Nug nuhig maɗi nid otia, ahilagppa tatam me uɗiom,” awa aum.