Aposel 28 - Nobonob Baibel

Pol Malta dayom

¹ Ig oh enaib gota, yu ihippa teut amu ag nud amu onig Malta aeg doomut.

² Danab ah nud amuppanu ag oo bodoettak kobolppa ehanigna autna autna aon, ag ig ele laippu dayaknu oolagppa eleleib dooppig. Am gu ne, atu oug meum amunu ag aab ilon, ig oh omaikkeg, uɗigkkunignu guguittak gomut.

³ Am Pol nug aab hiɗig laala akka, aab ewewe me, am mat nau laa aab hiɗigppa dayeye ewe ba Pol emala, aegppa aiha ilul ewa dayom.

⁴ Mat Pol eppegppa anam ha dayeye, nud amuppanu danab ah ag mat amu Pol eppeg emala, ilul ewa daye anidna, ag akka akka ahilag dabmakppanu madippig. “Danab umu nug amu danab laa qe mauhom bia doottem. Amuppa nug nob awa mauhkkunu dayom, amge nug yuppa ii mauhom. Yuppa ii mauhom, amge geha nug Kayaknu nob mettak qe-eɗidkkunu elele iitta,” aon appig.

⁵ Ag anam aon appig amge Pol nug mat amu maute, aab aɗuppa no, Pol nug uug laa ii doya dayeye,

⁶ nud amuppan danab ag nug dabmettan neekkidna, mat emalom abenppa titiɗeb anidkkulagnu o iitta mauha na qeeb anidkkulagnu dabmenan, ag haen elabnab daappig. Daappig amge Pol nug beɗuppa uug laa ii be anidppig amunu ag dabmak eɗun, inam appig. “Nug am kayak laa,” aon appig.

⁷ Aria, aben amu guguittak amu, nud amunu gumak danab okkainu wan laa dayom. Danab amu nug onig Pablius. Danab amu nug ig ele laippu dayaknu ooppa eleleib doya, ig omaikke nug laugppa gota, deɗ ewam appa daautut, nug dabmekka auta awom.

⁸ Ig appa daautut, Pablius mameg nug beɗu gakkaɗak oɗe amu hioɗak oɗe naunab ele niieye, Pol nug gumitta wana, Kayak unuqittowa, eppeg qaɗeppa me, ena dayom.

⁹ Pol nug anam he amu, nud amuppanu oɗe danab laa oh ele ag uɗin, ehanittak aon, ena daappig.

¹⁰ Aria, amu beum dimppa amu, nud amuppan danab ah ag kobol enanagppa dabmekkaegeg, dimppa ig gokkunignu heutut, ag keeke kuɗum, ig keeke amunu iitta ele amu, ig aot gokkunignu megappig.

Pol Rom teum

¹¹ Am ig nud amuppa amu kalam ewam daamut, dimppa ig Aleksandrianu uub laa, ulah naɗi amu iitta mekkunu ameg ma dayom ele amu, ig amuppa teut, aikka ukkom. Uub amu noobppa kayak hambuppuak gani ele dottolah daapiɗ. Aa onilah Kosta, Paluks ele.

¹² Ig gota, Sirakyus teta, appa ig deɗ ewam daamut.

¹³ Am ig Sirakyusnu ahat gota gota, Regium teut, wagɗe deɗ amuppa ulah yau uɗiom. Deɗ amu uue, wagɗe deɗ amuppa ig Puteoli temut.

¹⁴ Aab amuppa am ig Kristen laala anattut, ig deɗ eblaih aɗit ag ele dayota, ig ahat Rom tekkunignu ⌊baenigppa⌋ gomut.

¹⁵ Ig Rom gokkunignu teutut, Romnu Kristen ag ig ukkautut doona, laala ag ig uɗanig tekkulagnu ahan, ee daden maknu aben onig Apius appa gona, laala ag aben laa onig Hik Awak Lag Okkai Ewam appa ele gona, aben aɗit amuppa ag ig anigppig. Pol nug anatta, nug Kayak amegppa “Ena heme,” ana, ooppa ɠagattag awom.

¹⁶ Ɠagattag awe, ig Rom ooppa nout am gabman nug a, Pol nug nukka lag laappa dayeye, ban daup danab laippu gumeme daapiɗ.

Pol nug Rom aab okkaippa Nai Ena mehuqom

¹⁷ Pol nug appa dayeye, deɗ ewam uue nug Juda dilag ikki danab onilagppa ee uɗin qagmeeg, nug amelagppa inam aum. “O lailad, da ihinig huu amu tappadppi nokkulagnu o iitta ig alankad dilag kobol amu nau ainne maute ukkaknu laa ii hemi. Da anam laa ii heme, amge Juda ag da Jerusalem appa hippaliɗna Rom danab eppelagppa meiɗppig.

¹⁸ Meiɗeg, Rom ag dahil hettoɗiak dooppig, amu ag da eheɗ hei, iuppeg mauhkkulnu laa ii anidna, ag da uhuqilkkulagnu heppig.

¹⁹ Amge Juda okkai ag nai amu uun dimeɗaeg, da dahil ib laa ii dayom amunu, da Sisar nug dahil hettoɗiak dookkunu ami. Amge dahil huuppanu da laa hettoɗiakppa ii maadmi, am gemu ele laa ii maadpa.

²⁰ Diig amunu da ag gemu daatteb, da ag ele mattit, appi anidna dooglagnu am da ag anadkkulnu ele ool daye onilagppa emi. Da Israel dilag dabmak aɗa ameg ma dayak, ⌊amuam Kristus uɗikkunu dabmak⌋ da amunu gemu sen imuppa da eppel qakkak daattem,” awa aum.

²¹ Pol nug anam awa a amu, ag nug amegppa appig. “Juda danab laala ag nahipnu doognignu ad uɗug laa yaan meeg uɗie, ig ii aomut. Juda danab laa uɗia, nug kaya amunu amenigppa mattiaya, nug na dimunnu laa ii aum.

²² Amge ig na nakka nahip dabmak aɗa ameg ma dayak amunu attem daatte oɗenppa madippe doognignu oonig daatte. Ig doottem, aabaab ohppa danab ah ag Kristen dilag huunu nai eheɗ maditteb.” Ag anam aon Pol amegppa appig.

²³ Ag Pol ele nai anam mattiona amu, ag deɗ meeg, deɗ amuppa danab ah kuɗum ag Pol gumidna, nug dayom, lag amuppa uɗieg, buttuanu ukke tueb batak nug Kayaknu ɗo maɗoɗnu nai mehuqa, nai Mosesnu ɗoppa niitte, amu propet dilag yaaknu ele, nug nai amuppa ag Jesusnu oolagppa genab dooglagnu, ahilag dabmak maɗetta ippuanatta mattiom.

²⁴ Nug nai mehuqe, danab laala ag doona, oolagppa genab dooppig, amge laala ag oolagppa genab ii dooppig.

²⁵ Ag anam henana ag gokkulagnu gonana, ag am akka akka ahilag dabmak ib piɗe piɗe dayeye, ag ahan goppig. Ag anam henana goppig, amge Pol nug tatam nai laa ahilagnu inam mehuqom. “Kayak Ouɗi Nug ig alankad amelagppa nai genabnab laa propet Aisaia oɗeppa aum. Nai amuam inam.

²⁶ ‘Na danab ah umu gumadna gona, inam appe doyeg! “Ag nai daulagppa doon doon daaglag, amge nai meu am tutukku ii doomna. Ao, ag neegna neegna daaglag, amge ag diig tutukku ii anidmana.”

²⁷ Aɗinu? Danab ah imu ag am oolag ɠagattag eppom. Ag daulagppa nai meu dooglagnu nakokib elele, amu ele ag heeg, ag amelag amuhak daatte. Amu iitta daalo, ag amelagppa keeke anidna, daulagppa nai doona, ag nai diig oolagppa tutukku doona, ag eɗun dahilppa dokkulagtai. Ag anam hekkulag dayeb amu, da heppi, ag ena daaglag.’ Aisaia nug anam yom.

²⁸ Amunu ag doyeg! Kayak Nug ig eɗua awigkkunu uɗat ena imu ihinignu heum amu, Kayak Nug he, iitta aɗi danab dilagppa ukkom, amu iitta aɗi amu, ag am dooglag,” awa aum.

²⁹ ((Am Pol anam a, Juda ag gonana, ag akka akka naippa a ona a doak naɗi heppig.))

³⁰ Maɗ aɗit Pol nug nukka lag daden meum amuppa dayaya, danab ah oh ag nug gumidna uɗippig uɗiegeg, nug ag ele laippu dayaknu ooppa eleleib doya, diieye daappig.

³¹ Nug baɗak iitta ele Kayaknu ɗo maɗoɗnu nai, Naɗi Jesus Kristus, nug nuhignu nai ele danab ah ippuanattatta mehuqom. Nug anam heehe, danab laa nuhignu aib ii aum.