Aposel 27 - Nobonob Baibel

Pol Rom gokkunu uubppa teum

¹ Ag nai mattin, ig Itali wannu aab okkai Rom gokkunignu dabmak awona, ag Pol nug, amu maniguittak danab laala ele, ag ban daup 100 dilag ikki onig Julius, nug gumadkkunu nug eppegppa meppig. Nug am ban daup dilag huu laa onig Sisarnu huu, nug am amunu laa.

² Ig gokkunignu ahat oolta, uub laa aab Adramitiumnu laappa temut. Uub amuam Asia dilag aab okkainu aben ilon daattebppa oiyaya eeɗkkunu gokkunu daye, ig teta gomut. Aristarkus, nug am Makedonianu aab Tesalonaika ted, nug ig ele oh gomut.

³ Aria deɗ amu uue, wagɗe deɗ amuppa ig gota Saidon eeɗmut. Julius nug Pol nuhigppa kobol enaib ha uuitte, Pol nug laikkud gumatta oiyebeb, ee keeke mettaglagnu aum.

⁴ Aria appanu ig ahat, Saidon uuta ukkautut, ulah nug eheɗ duttunikka heum amunu, ig nud Saiprus heqo laih ulah ii ukkomppa gomut.

⁵ Gota gota ig Silisia, Pampilia ele dilah yu gamagppanab okkulta gota, ig Maira, Lisia prowinsppanu, appa temut.

⁶ Aab amuppa teta amu ban daup 100 dilag ikki nug Aleksandrianu uub laa Itali wanppa gokkunu dayeye antta, nug he, ig uub amuppa temut.

⁷ Aria ig ahat, uub amu huana ii ugekke, deɗ laala qinonob gota gota, Nidus gukkuidta gomut. Aria ulah nug he, ig ib gokkunignu dabmemut am elele iitta amunu, ig nud Krit heqo laih ulah huana ii ukkomppa gota, Salmone gukkuidta temut.

⁸ Ulah nug heehe, ig qinonob, kagi ele Krit lang aiɗta gota gota, aben laappa temut. Aben amu onig am, “Ilon Ena”; am aab Lasea guguittak.

⁹ Ig anam qinobnob gota, deɗ kuɗum kakidmut, Juda dilag kud ma ee oh ii lanaknu deɗ amu ukka iitta meum amunu, yuppa oiyaknu nauhak miag dayeye haen aakku doum. Yu nauha auta awom amunu, Pol nug aha amelagppa aum.

¹⁰ “O danab, ig ahat gokkunig dayeb amu geha ig qagaiettak okkai anidkkunig doottem. Keeke kuɗum padal mekkulag. Uub ooppanu keeke amu uub eleib ii padal memaya! Iitta. Ig beɗunig ele padal mekku,” awa aum.

¹¹ Pol nug amelagppa aum, amge ban daup 100 dilag ikki nug uub gumak ikki amu ulum aɗak danab ele, nug amu dilah nai ooppa genab doya, Pol nai aum amu ooppa genab ii doyom.

¹² Ilon amuppa amu ulah naɗi haenppa uub eeɗa daakkunu amu aben ena iitta amunu, uubppan danab kuɗum ag aben amu eɗidna gokkulagnu appig. Ag gona, Piniks tena, aben amuppa oug haenppa daaglagnu oolag dayom. Piniks amu Kritnu ilon laa, amuppa amu ulah heeb, lokkuma dayaknu aben ena.

Ulah naɗi he, yu eheɗ naunab ahom

¹³ Am dimppa ulah yau uɗiom, nug am ɠagattagnab ii heum amunu, ag appig. “Ig onig dayom bia, ulah imu uɗitte amunu, ig ilon imu uut laih gokkunig,” aon mattina, ag anka eeɗeg te, ig Kritnu langib aiɗta gomut.

¹⁴ Amge ig nakokib wautut amu ulah yawalti ɠagattag Kritnu neum. Ulah amu onig am “Ulah Yawalti, Kaɗag Ele Gamagppa Bia Uɗiak”.

¹⁵ Ulah amu na, uub duttune, uub tutukku gokkunu elele iitta dayom, amunu ig hamu daautut, ulah eheɗ duttunikkom.

¹⁶ Ig anam gota, nud laa Kauda atteb, amu heqo laih ulah huana ii ukkomppa gota, ig oolaknu uub nakok amu qakkagnignu uɗat naɗinab heta heta, ig qakkamut.

¹⁷ Anam amu, aria uubppan uɗat danab ag muɗi laala akkan, uub okkai amu ɠagattag daakkunu gamagppa itappig, amge ag baɗappig. Aɗinu? Ag, “Ig eheɗ gota, Aprika gukkuidtata, maalppa temata,” dabmenan dooppig amunu ag ahan, uubnu lamen ɠagattag ulah duttuntte ele uhuqeg ne, ig hamu maya memut.

¹⁸ Amu ulah ig eheɗ naunab iqaib dayom amunu, wagɗe deɗ amuppa, ag ahan, digmena uubppanu keeke akkaeg yuppa noum.

¹⁹ Ag anam heeg ukke, deɗ ewamppa amu ag akka eppelagppa uubnu ulah duttunaknu keeke laala aotna, buɗieg yuppa noum.

²⁰ Deɗ kuɗum ig aam, hoɗoppai ele ii anadmut, ulah okkainab hanhan ig duttunigttom. Anam heehe, ig ihinig dabmakppa, “Geha ig gota aben laappa teta ena daagnig,” laa ii dabmemut. Iitta. “Ig aakku padal mekkunig,” aot amut.

²¹ Anam dayeye, aria deɗ kuɗum ag ee ii lappig; baalag qetom. Amu dimppa anam daaegeg, Pol nug aha, hippaitta aum. “Danab ag da tatam nai ami dim lamidna Krit ii uulob, ig appa daalom am ena. Anamlob amu ig qagaiettak imu ii anidlom. Amu keeke oh padal ii melo,

²² amge da geha iikku ag amelagppa attem. Ag oolagppa ɠagattag qak doyeg! Ig oonigppanu danab laippu laa ii mauhma. Uub nukka nauhkku,” awa aum.

²³ Pol nug anam awowa amu nug tuɗitta aum. “Gemu tuqan imuppa, Kayak, da nuhig dayeye, da Nug noobppa dup noin binag mettem ele amu, nuhig engel nug da gukkuiɗa hibaitta dayaya,

²⁴ nug aum. ‘Pol na aib baɗame! Na am gona, Sisarnu hettoɗiakppa nug noobppa hippaidkkut. Am doye! Danab oh na ele uubppa daatteb amu, Kayak Nug unuqittak nahip doyom amunu, geha ag ele ii mauhmana,’ awa aum. Nug anam awa, da amelppa aum

²⁵ amunu, ag oolagppa ɠagattag qak doon, aib baɗappig. Aɗinu? Da Kayak, Nug da amelppa nai aum amu, keeke amu anamib bekkunu oolppa genab doottem.

²⁶ Anam aakku, amge ig gota nud laa gukkuidpput, uub aolkku,” awa aum.

Ulah he uub loppaɗom

²⁷ Aria, deɗ amun tuqan ele ebqak 14 amuppa ulah tuɗitta eheɗ duttunikke, ig Adria yuppa gotata, tuqan aam ameg tutukku aokkunu heehe, uubppan uɗat danab ag, “Uub uɗia, wan laa aakku guguittom,” dooppig

²⁸ amunu, ag melemel mekkulagnu ag melemelnu muɗi yuppa buɗieg no melemel anidppig, amu le noa ukkak 40 mita. Aria ig nakok wata gota, ag eɗun melemel meppig am le noa ukkak 30 mita anidna,

²⁹ aakku ag baɗan appig. “Ig gota gota, aben men eleppa aolkkunigtai,” appig. Ag anam dabmena amu ag anka waɗele uub bitobppan akkan ewatteg noeg, ag ahan paha wagɗeb aam nekkunu tappaɗna unuqidppig.

³⁰ Anam hena, uubppan uɗat nid ag ahan, uub uun gokkulagnu ib mattin, ag oolaknu uub nakok amu uhuqeg noono, ag hambuppuna, “Uub okkai noobppa anka epput nokkulagnu hettem,” anana heppig,

³¹ amge Pol nug ban daup 100 dilag ikki am daup ele amelagppa aum. “Danab umu ag uubppa ii daaglag amu, ag laa uubppa daatteb ele ag padal mekkulag,” awa aum.

³² Nug anam aum amunu, daup ag oolaknu uub amunu muɗi otaɗeg, uub nakok maya ma ukkom.

³³ Aria wagɗe, aam bekkunu heehe, Pol nug aha, danab oh ag nakok beɗulag ɠagattag qekkunu, nug ag amelagppa aum. “Ag ahan, ee nakok aon laig! Haen elabnab ag oolagppa maɗoɗ iitta daanna, oolag uug ele daappig. Ee laa ii lappig. Deɗ 14 iikku hamu daappig

³⁴ amunu, da ag amelagppa dabmak maɗettaknu nai iikku attem. Ag ee laala aon lana, ɠagattag aweg! Doyeg! Ag oolagppa laippu laa nug ii mauhma,” awa aum.

³⁵ Nug anam awa amelagppa awowa, nug bret awe, ag anttegeg, nug ag noolagppa Kayak unuqitta, nug bret pana awa, digma laum.

³⁶ Pol nug anam he amu danab oh ag anidna, ag oolagppa ɠagattag doon, ag ele ee aon lappig.

³⁷ Ig danab uubppa daamut ele oh amu 276.

³⁸ Ag ee laeg elele daye amu, aria uub amu uug iitta daakkunu uubppan uɗat danab ag ee aeg akkaeg yuppa noum.

³⁹ Ag anam heeg, wakkaɗe aam be, ag atu anidppig, amge ag wan amuam wan atten, ag ii dooppig. Ag ii dooppig, amge ag ilon laa wana ukkak ihi ena ele anidna, “Appa gota ihippa tekkunignu eleletai,” appig.

⁴⁰ Ag anam ana, ag ankanu muɗi otaɗeg anka aakku yuppa daappig. Ag amu heegeg, ag muɗi uub ulum mettaknu ad aɗit ɠagattag daakkunu itappig am ele uhuqna, ulah lamen heeg te, uub ihi amuppa tekkunu ukkom.

⁴¹ Ukkom, amge yu gamagppa ihi duttune bak, nud amu guguittak daatte ele amu, uub nug ukka, amuppa ta, aola ɠagattag eppom. Uub noob amu aola, ɠagattag eppa dayeye, aakku duban uub bitobppa o, uub aakku aoɗom.

⁴² Uub aoɗe, daup ag ahan maniguittak danab ilog mena oolna gomananu aqaglagnu heppig.

⁴³ Ag anam heppig, amge ban daup 100 dilag ikki nug Pol ehanidkkunu oo ha, ag anam ii hemananu ana, nug danab oh laa ilog mak doodppig ele ag tatam uubppanu oolna, yuppa ilog men gona, yu ihippa gokkulagnu aum.

⁴⁴ Aria, nug ele danab laala ag ilog mak ii doodppig ele ag uub aoɗom, ag amunu ad maha laippu laippu diin, maya mena gona eeɗkkulagnu aum. Amu ib amuppa danab oh ag enaib gona, yu ihippa teppig.