Aposel 26 - Nobonob Baibel

¹ Pestus nug anam a, Agripa nug eɗua Pol amegppa aum. “Aria na aɗi heme, na hettoɗiakppa daattem amu, na amunu madikkutnu elele,” awa aum. Nug anam a amu Pol nug eppeg huma, nug aɗi aɗi heum, nai amu inam digma mattiom.

² “O King Agripa, da na noomppa dayeye, Juda danab ag da aɗi aɗi heminu yaaiɗtteb, amu da keeke aɗi aɗi hemi ele, da amu ohnu na, laa noobppa iitta, na noomppa dayeye madikkulnu daatte amu, da kobol amunu ena, eleleib doottem.

³ Aɗinu? Na Juda dilag kobol amu ahilag dabmak piɗe piɗe ele oh elelenab doottem amunu da uug ii doottem. Na amu oh doottem amunu, da na nai dahil imu ootppa maɗoɗ ele dookkutnu unuqttem,” awa aum.

⁴ Pol nug nai amu ana, nug nai tuɗitta inam aum. “Da nid nakokppan uɗia gemu batak attem attem oimi amu, Juda okkai ag dootteb. Yo, da appal diig domippa amu Jerusalem appa ele, da attem attem oimi amu, ag dootteb.

⁵ Ag haen elabnab da aakku dooiɗtteb amunu, ag oolag dayeb, ag da ihinig mettid haknu huu laa, huu amuam gun kuɗumnab, laa oh eɗattak, amuam ɗo gumak danab-Parasia, da huu amunu laa daami akkulagnu elele daatteb.

⁶ Amu Kayak Nug anukka ig mamenkad aɗi amelagppa nai laa qakka aum, amu da ana qakkak nai amunu dabmak aɗa ameg ma dayak doottem amunu, Juda ag da hettoɗiakppa meiɗna beɗulppa nai yaatteb.

⁷ Israel dilag huu okkai 12nu danab ah, da ele ag oolagppanu laa aakku, ag oolag unuqagppanu Kayak noobppa dup nona binag amun tuqan ele menana, ag Kayaknu nai qakkak amu gogppa tekkunu dabmak aɗan ameg mena daatteb. O king, dabmak aɗa ameg ma dayak amunu, Juda ag da eheɗ heminu atteb.

⁸ Amge Kayak Nug heeb, danab ag eɗun hippaidkkulagnu elele iittate? Aɗinu ag daatteb oolagppanu laa ag amunu uug dootteb?

⁹ Aria, Nasaret ted Jesusnu amu, da anukka da heppi, Nug onig honapnab nekkununab dabmak ɠagattag aomi.

¹⁰ Da anam aakku Jerusalem appa hemi. Mana mettak danab okkai ag aeg amu, da Kayaknu danab ah oppiaawak ele kuɗum aɗalatten maniguittakppa maadmi. Maatti, laa mauhkkulagnu appig amu, da ele anam ami.

¹¹ Haen kuɗum da Juda dilag nai doyak lakka ukkatten, da laa Jesusnu oolagppa genab dooppig ele bu mattami. Amuib iitta, da ag Jesusnu dabittak nai mattiglagnu ele wagai memi. Da ahilagnu oppoɗi bak huanaknab doomi amunu, da atu laihppan aab okkai laalappa ele eheɗ hadakkulnu appa dim lamadmi.

¹² Da anam heiyi, deɗ laa mana mettak danab okkai ag da Damaskus gokkulnu pas laa yaan meɗappig. Pas amuppa ag da kobol hettami ele appa hekkulnu ag ahilag ehah oh da meɗan, amu haknu ɠagattag ele meɗaeg, da aakku gomi.

¹³ O king, da aam ameg tutukku bia, haen amuppa oiiyi, amahlak laa hab aabppanu na, da amu laala da ele gomut amu ig talilikka amahalikke anidmi. Amahlak amuam aamnu amahlak eɗittak.

¹⁴ Amahlak amu talilikke, ig oh wanppa neta qeut, baag laa Hibru naippa da amelppa inam a doomi. ‘Saul, Saul na aɗinu da eheɗ heiɗttem? Na da oɗel ii dim lamidttem amu, amuam genab, kobol ena iitta!’

¹⁵ Nug anam a amu da ami. ‘Naɗi, na am aun?’ Ai am Nug aum. ‘Da am Jesus; na da eheɗ heiɗttem.

¹⁶ Amge na ahan, hippaidna daye! Da na dahil maɗi nid daakkutnu, na dahilnu aɗi anidme, amu dimppa da na aɗi ippunidkkul, na amunu aɗi heehe anttomnu mattiak danab daanna, laala amelagppa madikkutnu aakku tituanidttem amunu da gumitten uɗimi.

^17-18 Amu Israel danab, amu iitta aɗi danab ele ag heppeg nauhkkutnu hekkulag, amge da na ehanidppi, ena daakkut. Amu Israel danab, iitta aɗi ele ag hipunin uhuqa mettak aon, ag danab dahilnu oolagppa genab dootteb, ag ooppa genab doyak ahilag amuppa oppiaawak daatteb ele amu, ag ag oolagppa ele daaglagnu da na gona heppe, ag amelag oppatkkulagnu, na heppe, ag Satannu gatatuppa ii daamna, ag dahil amahlakppa oiglagnu, na heppe, ag Satannu ɠagattag waappa ii daamna, ag Kayaknu ɠagattag waappa daaglagnu da na meitti gottem.’ Nug da amelppa anam aum.

¹⁹ Aria King Agripa, Kayak da aɗi hekkulnu tuleglegppa ippuniɗom amu, da Nug oɗe tappai ii neum.

²⁰ Iitta. Da tatam Damaskus danab amelagppa nai mattie, dimppa Jerusalem danab, Juda danab, amu iitta aɗi ele amelagppa ami. Da ag amelagppa nai inam mattimi. ‘Ag oolag eɗueb, ag eɗun Kayak waappa daanna, danab laala ag genab oolag eɗuom anidkkulagnu, ag kobol tutukkuib dim lamitteg!’ awe ami.

²¹ Da anam hemi amunu, Juda danab ag iuppeg mauhkkulnu Kayaknu mettid lakka appa aɗailppig.

²² Amge Kayak Nug da ehaniɗe uɗie, gemu ele ehaniɗtte amunu, da gemu iikku hibaitten dayeye, danab okkai aɗi amu danab okkai iitta ele amelagppa nai imu madittem. Da nai laa ii madittem. Iitta. Propet aɗi, Moses ele ag aɗi bekkunu appig amu, da amu aakkuib madittem.

²³ Nai amuam inam. ‘Kayak Nug anukka Kristus Nug guittak doyowa, Nug anuqa eɗua hippaidkku, ib amuppa nug Juda danab, amu iitta aɗi danab ele ehanittak aoglagnu ib ippunadkkunu dabmeum,’ ” awa aum.

²⁴ Pol nug anam aawo amu Pestus nug Polnu nai otaɗa eum. “Pol na am kaaka nittom. Na sul huanak heme amunu, doyak okkai nahip amu he, kaaka nidatte!” awa eum.

²⁵ Pestus nug anam e amu Pol nug aum. “O Naɗi Pestus, da kaaka ii niɗatte! Da madittem imuam genab, nai kaaka iitta.

²⁶ Da king nug keeke imu oh dootte oolppa genab doottem amunu, da nug amegppa ii baɗeɗe, da nai imu madittem. Keeke imuam lokkumakppa ii beum amunu da doottem, nug keeke imu oh doyom,” awa aum.

²⁷ Pol nug nai amu Pestus amegppa awowa, nug eɗua Agripa amegppa aum. “King Agripa, na propet nai ootppa genab doottemte?” awa aum. Pol nug anam ana, nug nai tuɗitta, nug nukka oɗmak nuhig nob ma aum. “Yo, da doottem. Na ootppa genab doottem,” awa aum.

²⁸ Pol nug anam a amu Agripa nug Pol amegppa aum. “Nahip nai mattiak haen tutu imuppa da Kristen bekkulnu miag doottemte?” awa aum.

²⁹ Nug anam a amu Pol nug aum. “Da haen elab madikkul o da haen tutu madikkul, amuam keeke okkai iitta. Keeke okkai amu na da daattem bia daakkut, amu da amunu Kayak unuqidttem. Na nakka iitta. Gemu danab laa imu oh ag dahil nai dootteb, ag ele anam daaglagnu unuqidttem. Sen imu aakkuib am ag aoglagnu da ool ii daatte,” awa aum.

³⁰ Pol nug nai amu mattia male, King Agripa, gawana Pestus, Bernaisi, amu danab daappig ele, ag ahan,

³¹ dimittim gona, akka akka inam madippig. “Danab umu nug keeke laa, nug maniguittakppa daakkunu o qepput mauhkkunu laa ii hette.”

³² Am King Agripa nug Pestus amegppa aum. “Danab umu nug Sisar nuhig hettoɗiak dookkunu ii elo amu, na paɗappe golo,” awa aum.