Aposel 24 - Nobonob Baibel

Pol, Peliks noobppa dayom

¹ Pol maniguittak anam dayeye, deɗ tanig ele uue, mana mettak ikki danab Ananias, Juda dilag ikki danab laala, amu danab laa onig Tertulus, nug ahilag hettoɗiakppa ehanittak danab, ag Pol beɗuppa nai yaan, gawana Peliks amegppa mattiglagnu oh Sisaria noppig.

² Noeg amu Peliks nug Pol onigppa e, omalna doeg amu Tertulus aha, nug Pol aɗi eheɗ heum madikkunu Peliks amegppa inam aum. “Danab naɗi Peliks, nahip gumakppa ig Juda, ig haen elab iikku ban iitta, maɗoɗppa daattem. Ele amu, nahip dabmak enappa keeke ena iɗu iɗu bette.

³ Amuppa ig aabaab ohppa ig oonigppa enanag doota, ig na, danab naɗi Peliks, ig nahipnu hanhan ‘Ena heme’ aot attem,” awa aum.

⁴ Tertulus nug anam awowa, nug tuɗitta aum. “Anam aakku, amge da nai elab mattien, nahip haen kakidpanu, da na ihinig nai tutu imu appi, na dahilnu oo bodoettak doon nai dookkutnu unuqidttem.

⁵ Danab imu ig nug anidmut. Nug eheɗ kuɗum he bette. Nug wan atu ohppa Juda dilagppa nug he, Juda ag ahan nug qak bia hetteb. Aria huu ena iitta laa, ag amunu Nasaret huu aon atteb amu, danab imu nug ahilag anuqak danab laa daatte.

⁶ Nug anam haaha, Kayaknu mettid lag ihinig amu ele dubuttid medakkunu heum amunu, ig nug aɗamut. ((Am ig ihinig ɗoppa nug epeɗignignu hemut,

⁷ amge ban daup ikki anuqak Lisias, nug aha wagai ma, nug danab imu ig eppenigppanu awom.

⁸ Nug danab imu ig aɗamut ele amu awa, danab ag danab imu nug beɗuppa nai yaappig ele amu, nug ag amelagppa, ‘Ag Peliks gumidna gona hettoɗieg!’ awa aum.)) Amunu na nakka danab imu hettoɗidna, ig nug beɗuppa nai yaattem ele, na amunu diig am genab dookkutnu elele.” Tertulus nug Peliks amegppa anam mattiom.

⁹ Am Juda appa daappig ag ele Tertulus nai mattiom amu ehanidna ag appig. “Nai amu oh amu genabib,” aon appig.

¹⁰ Aria, Tertulus nug nai mattia male, Peliks nug doya, nug Pol nug nai madikkunu eppegppa he, Pol nug nai amu nob ma inam mattiom. “Danab naɗi, da doottem, na wan imuppan epeɗiak danab matu digmena dayeye uɗie, gemu ele anam daattem amunu, da oolppa ena doyeye, na noomppa nai amu nob mekkul.

¹¹ Na haen elab ii ukkom, deɗ 12ib ukke, da Kayak noobppa dup noin binag mekkulnu Jerusalem temi amu, na oɗmak henana, na amuam nai genab dookkutnu elele.

¹² Da Kayaknu mettid lakka nomi amu, da lag ooppa appa danab laa ele auɗ ona auɗ ii doum amunu, Juda ag da anam heiyi ii aniɗppig. Da Juda dilag nai doyak lag ohppa, amu aab okkaippa ele da danab ah eheɗ hekkulagnu ii qagmaadmi amunu, Juda ag da anam heiyi ii aniɗppig! Iittanab!

¹³ Amu gemu ag nai da beɗulppa yaan maditteb amu, ag heppeg, na nai diig aakku am genab anidkkutnu laa iitta.

¹⁴ Amge da nai laippu imu ag amunu genab appig amu da appi dookkut. Da huu laa, Juda ag huu amunu, ‘Ena iitta,’ aon atteb, huu amu ib ippunigtte amu, da ib amu dim lamidttem. Da ib amu dim lamitte, ig mamelkad aɗi dilag Kayak amu da Nug noobppa dup noin binag meinne, ɗo nai niitte, amu propet dilag yaak amu oh ele oolppa genab doottem.

¹⁵ Da amu oolppa genab doottem, amu da keeke laa elenu dabmak aɗa ameg ma dayak doottem, danab imu hetteb, amubia. Amuam Kayak Nug geha heeb, genab tutukku hak danab, amu danab nau ele oh ag eɗun hippaidkkulag.

¹⁶ Amunu da hanhan deɗ oh da oolppa keeke eheɗ laa Kayak noobppa, danab ah amelagppa ele ii daamanu, da wagai mettem.

¹⁷ Amu da anam hein, maɗ laala da ukken, aab laalappa dayeye oiyeye, amu dimppa amu da eɗuen, da men doɗo Judanu daɗek madakkulnu amu doɗ manen Kayak medakkulnu Jerusalem temi.

¹⁸ Am da uɗat anam heinne, da Juda dilag kobolppa oppiak dayaknu kobol hein, Kayaknu mettid lag ooppa daaiyi amu ag da aniɗppig. Danab ah kuɗum da ele laa ii daamut, appa ele da hei, danab laala oqottilag laa ele ii heppig. Iitta.

¹⁹ Amge Asianu Juda laala uɗippig amu, ag da aɗailppig amunu, danab amu ag dahilnu nai ele dayeb, ag uɗin na noomppa da beɗulppa nai yaalob am ena.

²⁰ Anam iitta dayeb amu haen da Juda dilag hettoɗiak okkai onig Sanhidren, amunu qagmakppa daaiyi, aɗi eheɗ laa dahilppa daatte anidppig amu danab uɗin, gemu daatteb, ag tutukku appeg doye!

²¹ Ag keeke laa ii anidppig bia, amge ag laippuib anidppigtai. Amuam da ag oolagppa hibaittette, da nai laippu imu ein ami. ‘Dimppa Kayak Nug heeb, danab mauhppig amu ag eɗun hippaidkkulagnu oolppa genab doottem amunu, da ag noolagppa hettoɗiakppa daattem.’ Da anam emi,” awa aum.

Pol maniguittakppa maɗ aɗit dayom

²² Peliks nug Pol nai amu mattie doya, nug am Kristen dilag ooppa genab doyak amu Kristen kobol ele tutukku doyom ele amunu, nug Juda amelagppa, “Ag daappeg, dimppa daup dilag ikki anuqak Lisias nug neeb amu, da nai imu bappaidkkul,” awa aum.

²³ Nug anam awowa, nug ban daup 100 dilag ikki nug Pol aon maniguittakppa mekkunu aum, amge maniguittak ɠagattagnab iitta, amu ban daup 100 dilag ikki nug ele Pol laikkud uuatteb, ag nug ehanidna, keeke aon gona mettaglagnu amu aib ii aum.

²⁴ Am deɗ laala uue, Peliks nug wau Drusila ele, Drusila nug Juda buɗub, aa uɗiya, Peliks nug Pol nai laala mattieb dookkunu onigppa e, Pol nug Jesus Kristusnu ooppa genab doyaknu ib mattieye, Peliks nug daug huma doyom.

²⁵ Pol nug genab tutukku hak kobolppa oiyak amunu mehuqa, danab nug nukka nuhignu atognoa tutukku oikkunu, geha Kayak Nug danab oh epeɗiadkkunu nai ele mehuqeqe amu, Peliks nug nai amu doya, oo baɗe, nug Pol amegppa aum. “Gemu elele! Ahan ukke! Dimppa da haen ena laa dayeb amu, da geha baula dookkulnu na oninppa ekkul,” awa aum.

²⁶ Nug oo baɗom, amge nug ele inam dabmeum. “Pol nug men doɗo laala meɗeb uhuqkkul.” Anam dabmaama, nug haen kuɗum Pol onigppa e uɗie, nug ele nai madipiɗ.

²⁷ Amu Peliks nug anam haaha dayeye, dimppa maɗ aɗit ukke amu, Porsius Pestus nug Peliks abenab aokkunu uɗiom, amge Peliks nug Juda ag oolag ena daakkunu Pol maniguittakppanu ii uhuqom.