Aposel 23 - Nobonob Baibel

¹ Pol nug noolagppa hibaitta dayaya, hettoɗiak okkai danab daappig amu oh neekkattatta, nug aum. “O lailad, da Kayak noobppa oolppan oiyak ippunittaknu ulum ippuniɗom bia oiiyi uɗie, gemu ele oittem,” awa aum.

² Pol nug anam awa a amu mana mettak ikki danab Ananias, nug aha, danab Pol guguittak daappig amu ag nug otti mataɗkkulagnu amelagppa aum.

³ Nug Pol mataɗkkulagnu a amu, Pol nug amegppa aum. “Na am gilil dubuttid tak, amuppa gau hakkab hamu attanttan laaidppig, na amubia daattem! Geha Kayak Nug na oidkku! Na ɗo aɗi atte amuppa epeɗilkkutnu uɗime, amge na danab imu amelagppa, ‘Ag nug oig!’ ame, amuppa na ɗo tappae neum,” awa aum.

⁴ Pol nug anam awa a amu, danab ag guguittak hippaidna daappig ele ag appig. “Na Kayaknu mana mettak ikki danab, nuhignu awa awa qettak nai naunab akkutnu iite baɗattem?” aon appig.

⁵ Aeg Pol aum. “O lailad, nug mana mettak ikki danab daatte amu da ii doomi. ⌊Da ena ii hemi.⌋ Aɗinu? Kayaknu Nai am inam daatte, ‘Na nahip huuppan ikki danabnu amu, na nai nau aib ame,’ awa atte,” awa aum.

⁶ Aria, Pol nug anam a daaegeg, nug doyom, hettoɗiak okkai danab laala ag am ɗo gumak danab-Sadyusi, amu laala ag ɗo gumak danab-Parasia amunu, nug hettoɗiak okkaippa ewa aum. “O lailad, da am ɗo gumak danab-Parasia laa. Da mamel ele am ɗo gumak danab-Parasia. Danab mauhppig, dimppa ag eɗun hippaidkkulagnu amu, da dabmak amu aɗe ameg mein daattem amunu, diig amunu, gemu da iikku hettoɗiakppa daattem,” awa aum.

⁷ Pol nug nai amu a amu, ɗo gumak danab-Parasia amu ɗo gumak danab-Sadyusi ele gamagppa oo aeg bak be, aeg ona aeg do, aakku qagmak amu loppaɗeg, huu aɗit daapiɗ.

⁸ Ɗo gumak danab-Sadyusi ag, “Danab mauhtteb, ag eɗun ii hippaidmana, amu engel, amu ouɗi ele ii daatteb,” aon adappig. Amge ɗo gumak danab-Parasia ag amu, ag amu ohnu oolagppa genab dooppig.

⁹ Amunu qagmeppig ele amu muttub okkai qena, amu ɗo mehuqak danab laala, ag ɗo gumak danab-Parasia huuppanu, ag ahan ɠagattag mena appig. “Ig danab amu anidttem amu, nuhigppa eheɗ hak laa daye ii anidttem. Amu ouɗi laatai, iitta engel laatai ele nai madipiɗ,” aon appig.

¹⁰ Naippan nug qak amuam okkainab be, huana heeg, ban daup dilag ikki anuqak nug antta, “Ag Pol aɗan eeɗna, gamagppa paguppeg mauhkkutai,” anana, oo baɗe, nug daup amelagppa, “Ag nona, wagai mena, Pol gamagppanu aon, omalna gona, ag laulag ooppa noig!” awa aum.

¹¹ Ag anam heeg, deɗ amu tuqan amuppa Naɗi Nug Pol guguitta hibaitta dayaya nug aum. “Na hippaidna ɠagattag daye! Na aib baɗame! Na dahil nai Jerusalem mehuqme, amubia na dahil nai Rom appa mehuqkkut.” Naɗi Nug anam awa aum.

Juda laala ag Pol qeppeg mauhkkunu appig

¹² Naɗi Nug Pol amegppa anam a, wagɗe deɗ amuppa Juda laala ag qagmena, ag keeke hekkulagnu nai ahilag ɠagattag qettan, ag inam appig. “Ig Pol qepput mauhkku. Ig ee le ele paha ii lamata. Iitta, Ig hamu daata, ig Pol qepput mauheb, ig eɗut ee le ele lakkunig,” aon appig.

¹³ Amu danab Pol qeppeg mauhkkunu nai ɠagattag qedappig ele amu, ahilag ebqak amu 40 eɗittak.

¹⁴ Ag anam hewona, ag ahan, mana mettak danab okkai amu Juda dilag ikki danab ele gumadna gona appig. “Ig keeke laa hekkunignu nai ɠagattag qettat, inam amut. ‘Ig ee nakok laa paha ii lamata. Iitta. Ig hamu daapput ukkeb, Pol qepput mauheb, ig eɗut ee lakkunig.’ Ig anam amut,” aon appig.

¹⁵ Ag anam ana amu, ag nai tuɗidna appig. “Ig anam amut amunu, ag amu Juda dilag hettoɗiak okkai onig Sanhidren, amunu danab ele ag gemu nai meppeg, ban daup ikki anuqak toppa ukkeb, nug Pol omala ag gumatta nekkunu oɗ mettaglag. Ag hambuppun inam aon amegppa aig! ‘Ig Pol nai maditte, nug tuɗitta mattiebeb, ig diignab doognignu oonig daatte!’ Ag anam appeg, nug omala neebeb ig bappaidta meidta daagnig amunu, Pol nug ag gumatta ii beebeb, ig geha nug qepput mauhkku,” aon appig.

¹⁶ Ag anam hekkulagnu appig, amge haen Pol bekka nakok, nug anig Pol ele aa eappinag amu, nug ag ib aɗan daappeg, Pol noobob, qeppeg mauhkkunu mattiegeg doya amu, nug ukka, daup laulag ooppa noa, nug Pol amegppa amunu aum.

¹⁷ Pol nug nai amu doya amu, nug ban daup 100 dilag ikki laa onigppa e do, nug aum. “Na nid bau imu omalna, ban daup ikki anuqak toppa goppe, nug nai laa ab dookkunu atte,” awa aum.

¹⁸ Aria ban daup 100 dilag ikki nug nai amu doya, nug nid amu omala, ban daup ikki anuqak gumitta ukka, nug aum. “Maniguittak danab Pol, nug da onilppa e ukkai, nug nid bau imu omale nagattoppa uɗikkulnu oɗ meɗe, da omale bemi. Nug nai laa ele na amenppa akkunu oo daatte,” awa aum.

¹⁹ Aria, nug omala ukke, ban daup ikki anuqak nug nid amu eppeg aɗa, omale giginppa goya, aya daayya, nug nid amu amegppa aum. “Na aɗi nai da amelppa akkut amu na a!” awa aum.

²⁰ Awa a amu nid bau amu nug amegppa aum. “Juda dilag hettoɗiak okkai onig Sanhidrennu danab ag Pol nai maditte, nug tuɗitta mattiebeb, ag diignab dooglagnu nai na dookkutnu meeb uɗieb, na butti Pol omalna, Juda dilag hettoɗiak okkai onig Sanhidrennu qagmakppa nokkutnu oɗ mettaglagnu nai qakkan malappig.

²¹ Amge ag hambubutteb amunu, na ahilag nai amu aib dim lamidme. Aɗinu? Ag Juda danab 40 eɗittak amu ag Pol qeppeg mauhkkunu inam nai ɠagattag qettan appig. ‘Ig ee le ele paha ii lamata. Iitta. Ig hamu daapput ukkeb, ig Pol qepput mauheb dimppa ig eɗut ee lakkunig.’ Ag anam appig. Ag anam hekkulagnu mattin bappaidppig amu geha iikku ag na ahilag nai amu doon, aɗi appe dooglagnu ameg mak daatteb,” awa aum.

²² Daup dilag ikki anuqak nug nid bau nai amu mattie doyowa amu, nug amegppa aum. “Na da amelppa nai imu ame amu, na danab laa amegppa nai amunu iinab mattimna!” Nug nai amu awowa, he ukkom.

Daup dilag ikki anuqak nug he Pol Sisaria ukkom

²³ Aria, ban daup ikki anuqak nug nai amu doya, nug ban daup 100 dilag ikki aɗit onilahppa e doeh, amelahppa aum. “Aa ban daup 200 diiya, danab 70 hosppa gokkulagnu ele diiya, ban daup 200 laa ag ban aɗatteb ele diipeɗ bappaidna, ag tuqan nain kilok amu Pol omalna Sisaria gokkulag.

²⁴ Ag Pol nuhikkud kekeɗ eppelagppanu guittak aomanu, ag hos laala bappaidna medappeg, ag nug omalna gawana Peliks toppa gokkulag,” awa aum.

²⁵ Nug anam ana malowa, aria ban daup ikki anuqak nug ad uɗug laa inam yom.

²⁶ “Da Klodias Lisias, da ad uɗug imu danab naɗi, gawana Peliksnu iikku yaattem. Da na humidttem.

²⁷ Juda ag danab imu aɗan, qeppeg mauhkkunu heppig, amge da nug am Rom danab doomi amunu, ag anam heegeg, da daup ele ig gota anadta, Pol ag eppelagppan aomut.

²⁸ Ag anam heppig amunu, da ag aɗi diignu heppig amu da dookkulnu danab imu omale, hettoɗiak okkai ahilag onig Sanhidren, amunu qagmakppa nomi.

²⁹ Noin, da oɗ mattai, ag da amelppa ahilag ɗo naippanu nai laala nug beɗuppa yaana madippig, amge ag nug keeke eheɗ heum, ig amunu nug qepput mauhkkunu o maniguittakppa mekkunignu laa mattieg ii doomi.

³⁰ Ag anam heeg, da nug aoi dayeye amu, aria laa nug Juda ag akka danab imu qeppeg mauhkkunu lokkumakppa nai qagappignu doya, da amelppa aum amunu, da danab imu iikku paha awe mei, nahip-ppa ukkom. Amu da danab ag nuhignu nai ele amu ag gona, na amenppanab nug aɗi eheɗ heum madippeg dookkut.” Nug anam yom.

³¹ Amu ban daup ag ahilag ban daup ikki anuqak oɗe dim lamidna, ag tuqan Pol aon Antipatris goppig.

³² Gona tena daaegeg, wagɗe deɗ amuppa daup laa oh ag eɗun laulagppa ukkaegeg amu, ban daup hosppa goppig ag Pol omalna Sisaria noppig.

³³ Ban daup hosppa goppig ele ag Sisaria nona, ag yaak uɗug amu gawana mettona, Pol ele omalna waeg, gawana eppegppa meppig.

³⁴ Pol nug dayeye, Peliks nug ad uɗug amu ebqewowa, nug Pol oɗ mettom. “Na apan diig am prowins attenppa daatte?” oɗ mettom. Oɗ mette amu Pol nug aum. “Da am Silisia danab,” awa aum.

³⁵ Amu Peliks nug aum. “Laa ag na beɗunppa nai yaappig ele amu, ag uɗippeg aria, geha da nai nahip dookkul,” awa aum. Awowa nug Pol Herotnu lag enanagnab, appanu maniguittakppa inak dayebeb, daup ag guman daaglagnu haknunab nai aum.