Aposel 22 - Nobonob Baibel

¹ “O da lailad, mamelad aɗi, da ahilag nai amu nob mebippi, ag daulag human dooglagnu oɗ madattem,” awa aum.

² Aria, ag Pol nug Hibru naippa nai mattie doona, ag oh toettan autna aon daappig.

³ Ag anam daaegeg, Pol nug nai tuɗitta aum. “Da am Juda danab. Da anil amu nug da aab okkai Tarsus, Silisia prowinsppa daatte, nug appa da menuiɗom, amge da aab okkai imuppa ena mein, Gamalielnu sulppa sul hei, nug ig alankad dilag ɗo amu oh nug da tutukku ippuniɗom. Ippuniɗe amu, da Kayak dim lamidkkulnu wagainab memi, gemu ag ɗo amu dim lamidna, wagai mena hetteb amubia.

⁴ Amu Kristen danab ah ag Jesusnu oolagppa genab doona, nuhig ib imu dim lamidppig ele amu, da ag eheɗ hattami. Da laala aqai mauhppig; laala amu, ag danabte o ahte, da ag aɗalatten diie ukken, maniguittakppa maadmi.

⁵ Da anam hemi amu, mana mettak ikki danab nug, amu Juda dilag hettoɗiak okkai onig Sanhidren, amunu danab ele oh ag dootteb, ag amunu mattiglagnu elele. Da hei, ag ig lainkad Damaskus dilagnu uɗug yaaladna da meɗaeg, da Damaskus gokkulnu gomi. Da Kristen danab ah appanu amu hippalatten diien, Jerusalem uɗippi, ag hettoɗiakppa guittak aoglagnu gomi,” awa aum.

⁶ Pol nug nai amu ana, nug nai tuɗitta aum. “Da ukken Damaskus guguitten ukkayi, aam ameg tutukku bia, haen amuppa laippun hab aabppanu amahlak okkainab na, da taliliɗa amahaliɗom.

⁷ Amahlele, da nein qein wanppa niieye, nai baag laa na, inam da amelppa a doomi. ‘Saul, Saul, na aɗinu da eheɗ heiɗttem?’ awa aum.

⁸ A amu da ami. ‘Naɗi, na am aun?’ Ai am Nug aum. ‘Da am Jesus, Nasaret ted. Na da eheɗ heiɗttem,’ awa aum.

⁹ Danab laala ag da ele gomut amu, ag amahlak anidppig, amge Naɗi Nug nai da amelppa mattiom ele, ag amunu oolag ii maittom.

¹⁰ Nug nai amu mattia male amu da ami. ‘Naɗi, da aɗitai hekkul,’ awe ami. Ai amu Nug aum. ‘Na ahan, Damaskus gona daappe, appa amu danab laa nug Kayak na aɗi aɗi hekkutnu tituanittom daattem amu, nug ab na dookkut,’ awa aum.

¹¹ Nug anam a, amahlak okkainab amuppa da neegkkulnu elele iitta amunu, laala ag da ele gomut amu ag da eppel aɗan omaiɗeg, Damaskus nomut.

¹² Aria, appa danab laa dayom, nug onig Ananias. Nug am ɗo dim lamittak danab. Juda oh Damaskus daatteb ele, ag nuhignu ena elele dootteb.

¹³ Da daaiyi, danab amu nug da gumiɗa uɗia, gukkuiɗa hibaitta dayaya, nug da amelppa aum. ‘Lai Saul, na amen eɗua obateb, na neekke!’ awa aum. Nug anam a, haen amuppanab da neegppi ukkeb nug anidkkulnu elele daami.

¹⁴ Nug anam a da ena neekki, nug da amelppa aum. ‘Ig mamelkad aɗi dilag Kayak, Nug na nuhig dabmaknab awak dookkutnu, na nuhig Genab Tutukku Hak Danab anidkkutnu, nuhig nai ele na dautppa dookkutnu tituanittom.

¹⁵ Na laa heehe anttomnu mattiak danab nuhig daanna, Nug a doome, amu na keeke oh anidna doome ele na geha nai amu danab amelagppa mehuqppe dooglag.

¹⁶ Aria, na aib hamu daame! Na ahan, layattak aon, na Jesus onigppa unuqidppeppe, Nug hipunin nahip uhuqa medakku.’ Ananias nug anam da amelppa aum.

¹⁷ Aria, dimppa da eɗuen Jerusalem uɗien, da Kayaknu mettid lag ooppa unuqittitti, da tulegleg laa anidmi.

¹⁸ Tuleglegppa da Naɗi anitti, Nug da amelppa aum. ‘Na paha ahan, Jerusalem uun ukke! Aɗinu? Na dahilnu nai ippa mehuqkkut amu, ag nai amu ii aomna,’ awa aum.

¹⁹ A am da ami. ‘Naɗi ag da dooiɗtteb. Anukka da Juda dilag nai doyak lag ohppa oiyeye, danab ah ag nahipnu oolagppa genab dooppig ele amu, da diie maniguittakppa maatten, da ag bu aqami.

²⁰ Amu anukka haen ag Stiven qeeg mauhom, nug am laa heehe anttomnu mattiak danab nahip amu, haen amuppa amu da daaiyi, ag nug qeeg mauhom amu, da amunu ool ena dayom. Amu ele da danab Stiven qeppig, amu dilag lamen amu da gumami.’ Da anam ami.

²¹ Da anam ami amge Naɗi Nug da amelppa aum. ‘Na ukke! Da na meidppi, na atu uma, iitta aɗi, amu gumadna gokkut,’ awa aum.” Pol nug anam aum.

Romnu daup dilag okkai nug Pol gumom

²² Pol nug nai amu mattie, Juda danab ag Pol nai mattiom amu doyeg ukke ukke, nug iitta aɗi gumatta gokkunu aum, haen amuppa ag ahan, huana qattiɗna, baalag okkaippa eppig. “Qeppeg mauhaɗ! Danab anam amu nug wanppa bau daakkunu elele iitta,” aon eppig.

²³ Ag anam anana, ahan muttub qenana, lamen ulahnu beɗulagppanu amu uɗadna akkaeg ukke, gappud akkan, akkaeg attan teum.

²⁴ Ag anam heegeg amu, ban daup dilag ikki anuqak nug he, daup ag Pol omalna, daup laulag ooppa noeg, ban daup dilag ikki anuqak nug aɗinu Juda ag Polnu anam henan eppig ele amu, nug amunu diig dookkunu, nug nuhikkud daup ag Pol bu qaun eleppa eheɗ mataɗidnana hettoɗiglagnu aum.

²⁵ Nug anam a, ag Pol bu qaun eleppa eheɗ mataɗkkulagnu muɗippa hippalegeg amu, ban daup 100 dilag ikki laa nug Pol guguitta hibaitta dayeye, Pol nug amegppa inam aum. “Rom dilag ɗo am attem ippunigtte? Ag Rom danab nug tatam bu qaun eleppa eheɗ mataɗppeg, dimppa nug hettoɗiakppa, nug eheɗ heumtai o iittatai anidkkulagnu attete?” awa oɗ mettom.

²⁶ Ban daup 100 dilag ikki amu nug nai amu doya, nug ukka ban daup ikki anuqak amegppa aum. “Na attem hettem? Danab imu nug Rom danab,” awa aum.

²⁷ Daup ikki anuqak nug amu doya, nug Pol gumitta ukka, nug oɗ mettom. “Na da amelppa appe doyei! Na amu Rom danabte?” awa aum. A amu Pol nug aum. “Ao, da Rom danab,” awa aum.

²⁸ Nug anam a, aria ban daup ikki anuqak nug aum. “Da amu men doɗo naɗi ewoya, Rom danab daattem,” awa aum. Awa a amu Pol nug aum. “Da am anam iitta, da anai Rom danab tutukku menuiɗom,” awa aum.

²⁹ Amu danab ag nug bu qaun eleppa eheɗ mataɗna oɗ mettaglagnu heppig ele, ag Pol anam a doon, ag pahanab eɗun uuidna goppig. Aria daup ikki anuqak nug Pol am Rom danab doyowa, nug he senppa hippalppig amunu nug oo baɗom.

Pol nug Juda dilag hettoɗiak okkaippa dayom

³⁰ Ag anam heeg, wagɗe deɗ amuppa daup ikki anuqak nug Juda ag Pol beɗuppa nai yaan heppig, amu diig dookkunu nug Pol senppa qagappig amu uhuqowa, nug nai me ukke, mana mettak danab okkai amu Juda dilag hettoɗiak okkai onig Sanhidren, amunu danab oh ele qagmeeg, nug Pol omala doa, ag noolagppa he hibaittom.