Aposel 21 - Nobonob Baibel

Pol nug Jerusalem gokkunu uubppa oiyom

¹ Aria, ig Epesus ikki danab amelagppa, “Ena dayeg!” awota, ig uub attan teut, uub ahe, ig ahat tutukku Kos gomut. Wagɗe deɗ amuppa amu ig gota, Rodes teta, appanu ig Patara temut.

² Patara appa uub laa wan onig Ponisia gokkunu heehe anidta, ig oolta uub amuppa teut, awikka ukkom.

³ Aria, gotata ig nud Saiprus anidta, nanehppa eɗidta gota, Siria nota amu Tair eeɗmut. Uubppan keeke appa hipaglagnu dayom.

⁴ Anam dayeye amu ig gota, Kristen danab anadta, appa ig deɗ eblaih aɗit ele daamut. Amu Kayak Ouɗi Nug Kristen amu dilag dabmak maɗette, ag Pol amegppa, nug Jerusalem ii gomanu appig.

⁵ Aeg, ig aab okkai amuppanu ahat gokkunignu haen miag do, Kristen danab ag, amu ag waalkad, bekkalkad, aɗelkad ele ag qagmena, omaikkeg aab okkai dimittim dota, yu ihippa gatenig qaun ota unuqidmut.

⁶ Unuqittota, ag ig gokkunignu, “Enad ukkeg” aeg, ig ag amelagppa, “Ena dayeg!” ata, ig uub attan teut, ag eɗun lakka goppig.

Propet Agabas Polnu nai aum

⁷ Ig uub attan teta, Tair uuta, ig gota Tolemes teta, ig Kristen humattut amu, ig deɗ laippu ag ele daamut.

⁸ Deɗ laippu amu uue, wagɗe deɗ amuppa ig Tolemes uuta gota, Sisaria teta amu ig gota, Pilip, nug Nai Ena mehuqak danab amu, ig nug laugppa nug ele daamut. Nug am digmakppa danab eblaih aɗit ele laa ag totol danab ehanadppig ele, nug am amunu oolagppan laa.

⁹ Nug am aɗekkud waɗele, ag danab ii diippig. Aɗekkud ag propet nai mehuqttappig.

¹⁰ Amu ig deɗ laala Sisaria daaut, propet laa, nug onig Agabus, nug Juda uua Sisaria neum.

¹¹ Nug ig gumikka uɗia, nug Polnu matagiɗ awa, nug nukka nug baeg eppeg Pol baeg eppeg iitta, nug baeg eppeg ele amuppa qakkowa, nug aum. “Kayak Ouɗi Nug inam awa atte. ‘Juda danab okkai Jerusalemnu, ag geha matagiɗ imu mameg amu inam hippalna, aon gona, iitta aɗi mattaglag,’ ” awa aum.

¹² Nug anam ha, nai amu a doota amu ig danab aab amuppanu ele ig Pol nug Jerusalem ii temanu unuqmut.

¹³ Ig anam amut, amge Pol nug aum. “Ag aɗinu anam gaan, aakku da oolppa guittak okkai meɗatteb? Da Naɗi Jesus onig attan ta daakkunu Jerusalem appa maniguittakppa daakkulnu am elele doottem, amge amu aakkuib iitta. Da Jerusalem appa, Naɗi Jesus Nug onig attan ta daakkunu mauhkkulnu ele elele doottem,” awa aum.

¹⁴ Nug anam awa a, ig nuhig dabmak eɗugnignu elele iitta anidmut amunu, ig nai amu baula ii mattita inam amut. “Naɗi nuhig dabmaknab awak aakkuib baɗ!” aot amut.

Pol nug Jerusalem teum

^15-16 Amu dimppa amu, Sisarianu Kristen laala ag ig ele oh gota, Jerusalem teta, ag omaikkeg, ig Nason laugppa gomut. Nug am Saiprus danab, Kristen anukkanu. Ig nug laugppa daagnignu oo dayom.

¹⁷ Ig Jerusalem teut amu, Kristen ag ig awigna oolag megappig.

¹⁸ Oolag mekke, wagɗe deɗ amuppa Pol nug ig ele oh Jems anidkkunignu ukkaut, Kristen tamaniak ikki danab oh ag Jems ele daaegeg,

¹⁹ Pol nug ag humattowa, nug keeke oh Kayak Nug iitta aɗi oolagppa nuhigppa uɗat heum, nug amunu oh amelagppa mattiom.

²⁰ Pol nug kaya amu mattie doona, ag Kayak binag mewona, ag Pol amegppa appig. “O lainig, na doottem, Juda tausen kuɗumnab ag Jesusnu oolagppa genab doon, Kristen beppig, amge Kristen amu oh ag ɗo ihinig ele dim lamidkkulagnu wagai huana metteb.

²¹ Ag anam wagai meegeg amu, danab laala ag ahan, danab amu amelagppa nahipnu inam appig. ‘Pol nug oiyaya, Juda oh laih laih, iitta aɗi oolagppa daatteb ele, nug ag Mosesnu ɗo dimettanna, ag ahilkad nid gaɗalag ii otaɗnana, ɗo anukkanu ele amu ii dim lamidmananu atte,’ aon appig.

²² Aria, na ippa uɗime daattem amu Juda, Kristen beppig daatteb, ag amu dooglag amunu, ig attem hekkunig?

²³ Na inam hekkutnu oonig daatte. Ihinig danab waɗele ag keeke genabnab hekkulagnu nai ana qagappig amunu,

²⁴ na danab amu diin, Kayaknu mettid lakka gona, na Juda dilag ɗo laa, ɗo amuam danab nug oppiak daakkunu ippunigtte amu, na anam bia daakkutnu na kobol amu oh heppe, ag ele hekkulag. Danab waɗele ag ikkilag uɗug hoiak aoglagnu elele daaglagnu, na ag oppiak daaglagnu uɗatnu nob ⌊ɗo ippunigtte bia⌋, na nob amu mana mettak danab matte! Na anam heppe amu, danab oh ag dooglag, laa ag nahipnu appig, nai amuam genab iitta. Ag dooglag, na ele ɗo dim lamidttem.

²⁵ Amu iitta aɗi ag Jesusnu oolagppa genab doon, Kristen beppig daatteb ele, ag kobol aɗi ii hemananu amu ig anukka nai amu uɗugppa yaata, meut ukke, ag amunu dabmekkulagnu dooppig. Uɗug amuppa ig iitta aɗi ag doɗ, danab ag doɗ amu main kayak hambuppuak dottolkad madappig ele, ag doɗ amu teppu, doɗ tiig ele, amu danab ag doɗ muɗippa o eppelagppa baag aɗaeg mauhom, amu ele ii lamananu, ag gappai kobol ele ii hemananu yaamut.” Ag Pol amegppa anam appig.

Juda ag Kayaknu mettid lag ooppa Pol aɗappig

²⁶ Anam amu, wagɗe deɗ amuppa Pol nug danab waɗele amu diie, ag gona, nug kobol oh nug ag ele oppiak daaglagnu heum. Nug amu hewowa, nug Kayaknu mettid lag ooppa noa, mana mettak danab amelagppa deɗ attenppa ag aakku aɗi aɗi kobol hena, oppiak bena malaglagnu deɗ, ag anen anen deɗ amuppa ahilag mana mettaknu doɗ aon dokkulagnu ele aum.

²⁷ Nug anam he, dimppa deɗ eblaih aɗit amu malakkunu heehe, Juda Asianu ag Pol Kayaknu mettid lag ooppa anidna, ag ahan heeg, danab ah kuɗum daappig ag ottaina ahaeg, Asia danab ag Pol aɗan huana inam eppig.

²⁸ “Israel danab, ag ig ehanikkeg! Danab imu nug wan atu ohppan danab ihinig huunu, ihinig ɗonu, amu Kayaknu lag imunu ele am ena iitta ippunadtte. Amuib iitta. Nug Grik danab laala ele diie uɗin, Kayaknu mettid lag nuhig tomppan keeke oh ele imu ooppa nona, ag aben imu oppiaawak ele dubuttid medatteb!” Ag anam anana eppig.

²⁹ Deɗ laa ag Epesus danab Tropimus, nug Pol ele aab okkai amu ooppa daaeheh anatppig amunu, ag genab ii dooppig, amge ag Pol nug Tropimus omala Kayaknu mettid lag nuhig tomppan keeke oh ele ooppa noum anana heppig.

³⁰ Ag anam heeg, Jerusalem oh ottaina, ahan uɗin qagmeeg, ag ahan Pol aɗan eeɗna aon Kayaknu mettid lag dimittim gonana, ag aɗnu od oh manadppig.

Romnu daup dilag okkai laa Pol ehanittom

³¹ Ag Pol qeppeg mauhkkunu heegeg amu Romnu ban daup Jerusalem daappig, amu dilag ikki anuqak nug, “Jerusalem danab oh ahan ottaitteb,” doyom.

³² Nug doya, paha aha, ban daup 100 dilag ikki laala amu daup laala ele diie, ag qaiqaɗ Pol Juda ele gumadna noeg, haen Juda ag ban daup dilag ikki anuqak, daup ele noppig anadna, ag Pol baula ii makkuɗppig, uuppig.

³³ Uueg, ban daup dilag ikki anuqak nug gumatta wana, Pol aɗa, daup amelagppa, “Ag nug sen aɗitppa qakkeg!” ana, nug Juda danab oɗ mattom. “Imu danab aun, nug aɗi heum?” awa oɗ mattom.

³⁴ Oɗ matte, danab ah kuɗum daappig ag ahan, laa nai laa anana eegeg, laa ag nai laa anana eegeg, muttub huanak heegeg, ban daup dilag ikki anuqak nug nai amu diig dookkunu elele iitta amunu nug daup nuhikkud amelagppa, “Ag Pol omalna gona, lag ag daattebppa noig!” awa aum.

³⁵ Ag Pol omalna ukkaeg, Pol nug ukka lag amunu adqaɗppa tekkunu dayeye, danab ah ag Pol qekkulagnu wagainab meppig amunu daup ag Pol aon maon goppig.

³⁶ Ag Pol maon ukkaegeg, danab ah kuɗum daappig ag dim lamadnana huanak ena appig. “Qeppeg mauhaɗ! Qeppeg mauhaɗ!” aon eppig.

Pol Juda amelagppa nai mattiom

³⁷ Daup ag Pol omalna, lag daup daappigppa nokkulagnu heegeg amu Pol nug ban daup dilag ikki anuqak, nug amegppa nai laa madikkunu oɗ mette, ban daup dilag ikki anuqak nug Pol Grik naippa nai mattiom doya, ottaia, Pol oɗ mettom. “Na Grik nai doottemte?

³⁸ Amu na am Isip danab nug nakok matu gabman ele ban hekkulagnu haaha, nug aha, danab 4,000 gabman ele ban hekkulagnu diie, qep elab aɗaegeg omalatte, ag atu taɗakppa goppig amu, na am nug iittatai? Na am aun?” awa oɗ mettom.

³⁹ Oɗ mette am Pol nug aum. “Da amu Juda danab; da aab okkai onig Tarsus, Silisia wanppa daatte, amuppan danab. Aab okkai dahil amu onig okkai ele. Amu na appe, da danab ah amelagppa nai madikkulnu ool daatte,” awa aum.

⁴⁰ Awa a amu ban daup dilag ikki anuqak nug ena awa a, aria Pol nug aha, adqaɗppa hibaitta, danab ah kuɗum amu nug nai laa madikkunu eppegppa ippunatta he, ag oh toettan, oɗelag qamuteg, amu Pol nug Hibru naippa ag amelagppa nai mattia, inam aum.