Aposel 20 - Nobonob Baibel

Pol nug Makedonia tikkua ukka, Grik teum

¹ Oqottilag ahom amu iitta me, Pol nug Kristen onilagppa e gumidna uɗieg, nug nai laala ɠagattag aqakkunu amelagppa awowa, uuatta gokkunu dayaya, “Ena dayeg!” awowa, nug aha Makedonia ukkom.

² Nug ukka, Makedonia tikkua ugakka, Kristen laih appanu amelagppa nug nai kuɗum ag ɠagattag aqeb daaglagnu mattiom. Dimppa amu nug ukka, Grik wanppa teum.

³ Grik wanppa ta, appa nug kalam ewam dayowa, amu dimppa nug aha, uub awa Siria gokkunu haaha, Juda ag nug qeppeg mauhkkunu nai qagappig doyom amunu, nug eɗua Makedonia gokkunu dabmeum.

⁴ Dabmeum amunu, Beria danab Sopater, nug am Pirus bekka, amu Tesalonaika danab aɗit Aristarkus, Sekundus ele, amu Derbe danab Gaius amu Timoti amu Asia danab aɗit, Tikikus, Tropimus ele, ag oh Pol ele goppig.

⁵ Danab amu Pol ele gona, Troas tena, ig amenig meppig.

⁶ Amu ig Juda hobul laa, amuam Bret Yis Iitta Lanaknu Hobul, hobul amunu mettid amu ukka male, amu dimppa ig ahat, Pilipai appa uubppa teta, ig ukkautut, deɗ tanig ele uue, ig Troas teut, laa anuqna goppig amu, ig ag ele qagmemut. Ig deɗ eblaih aɗit ele appa daamut.

⁷ Amu mettidnu deɗ anuqak, deɗ amuppa ig, appan Kristen danab ele oh ee laippu aognignu qagmemut. Am Pol nug wagɗeb deɗ amuppa gokkunu dayom amunu, nug nai elab danab amu amelagppa mattieye ukka, tu meum.

⁸ Amu lam kuɗum lag oo attan, ig qagmeta daamut ele, amuppa eoppig.

⁹ Amu nid bau laa, nug onig Yutikus, nug lagnu ulah ibuppa dayom. Amu Pol nug nai elab mattieye, Yutikus nug ameg na auta awe, nug niia gad ma, lag oo attan ewamppanu na qa ukka, wanppa qa mauhe, ag nona aon doeg,

¹⁰ Pol nug noa, nid bau amu guguitta ona, gomela nid oɗakkia, nug aum. “Ag aib baɗappig, nid imu bau daatte,” awa aum.

¹¹ Aria, Pol nug eɗua attan ta, bret awa pane lawona, dimppa amu nug ag ele nai mattiegeg wagɗom. Wagɗe amu Pol nug ukkom.

¹² Nug ukke, ag nid bau amu nug bau ena dayeye, ag aon lakka ukkaeg, ag oolag eɗua enanag dayom.

¹³ Pol nug baegppa Asos gokkunu dabma heum amunu, nug babaittom bia ig oolta uub attan teta gota, Asos teta, Pol appa anidta aopput, oh uubppa gokkunignu ig uub aot, Asos gokkunignu gomut.

¹⁴ Pol nug Asos ukka, ig appa anikke, ig nug aot uubppa teta amu ig Mitilini gomut.

¹⁵ Ig Mitilini teut, wagɗe deɗ amuppa ig uubppa gota, Kios gukkuidtata ukkaut, wagɗe deɗ amuppa amu ig gota, Samos temut. Aria wagɗe, deɗ amuppa amu ig gota, Miletus temut.

¹⁶ Pol nug Pentikosnu deɗ ii nak haenppa Jerusalem tekkunu dabmak awom amunu, Asia prowinsppa haen amu eɗidmanu ig Epesus qe-eɗidkkunignu aum.

Pol “Ena dayeg” Epesus tamaniaknu ikki danab mattom

¹⁷ Amge ig Miletus tewota amu, Pol nug Epesus Kristen tamaniak ikki danab ag nug gumidna uɗiglagnu onilagppa eum.

¹⁸ Onilagppa e, ag uɗin nug gumidna beeg, nug amelagppa aum. “Ag da Asia prowinsppa ippa ag oolagppa digmein uɗat hei ukke ukke, da ag uuadmi batak, haen gamag amu ag da kobol aɗi hemi amu, ag aakku dootteb.

¹⁹ Ag dootteb, haen kuɗum Juda ag da tappiɗppeg nokkulnu heppig, amuppa amu da uug kuɗum aomi, amge da onil qei, honap noono, da Naɗinu uɗat hemi. Da haen kuɗum amel leb neum.

²⁰ Amu da nai oh ig ehanadkkunu mehuqkkulnu dayom amu da madikkulnu ii bodoettami. Iitta. Da qagmak abenalkadppa, ag laulkadppa ele da amu ippunadmi. Amu ag amu ele dootteb.

²¹ Da anam heinne amu, da Juda danab amu Grik danab ele ag oolag eɗueb Kayak dim lamidna, Naɗi Jesusnu ooppa genab dooglagoitte, da nai amu mehuqmi.

²² Aria, doyeg! Gemu da dahil dabmak ɠagattag da duttuniɗa he, da iikku Jerusalem gottem. Appa aɗi keeke geha dahilppa bekku amu da ii doottem.

²³ Amge imuib amu da doottem, da aabaab ohppa oittem amu, Kayak Ouɗi Nug nau aomanu dabmettak nai, da amelppa inam maditte. ‘Geha ag na maniguittakppa meidppeg, na uug kuɗum aokkut,’ awa atte.

²⁴ Amge da amunu ii dabmettem. Da beɗul bau daakkunu amu, da dabmak amu ɠagattag ii aɗattem. Iitta! Da ib Naɗi Jesus ippuniɗa, uɗat ele meɗom amu, da amuib tuɗitten oiyeye gog tekkulnu dabmettem; amuam Kayak Nug nuhig ehanittak okkai hamu megakka, eɗua awikkunu Nai Ena, nai amu mehuqppi danab ah dooglag.

²⁵ Ag doyeg! Anukka da ag oolagppa oiyeye, da Kayaknu ɗo maɗoɗnu nai amelagppa mehuqmi, am gemu da doottem, ag oh da iɗul baula ii anidmana.

²⁶ Amunu gemu da ag amelagppa iikku madittem. Ag oolagppanu laippu laa nug padal mekku dayeb amu, amuam dahil aab iitta.

²⁷ Aɗinu? Da Kayaknu dabmak oh ag amelagppa mehuqkkulnu dayom amu da ii bodoettami. Iitta. Da mattimi.

²⁸ Amunu ag akka ahilagnu dabmenan daanna, amu Kayaknu danab ah, Kayak Ouɗi Nug ag gumak ikki danab ahilag daaglagnu otiattom ele amu, ag amu dilag ele oh dabmenan dayeg! Ag Kristen tamaniak, Kayak Nug nukka Nug tiigppa nuhig tamaniak amu daden meum ele amu, ag nuhig tamaniak amu tutukku gumatteg!

²⁹ Amu da doottem, da ag uuatten goppi, dimppa hambuppuak ippunittak danab, ag wulp bia, geha ag tamaniak oolagppa bena heppeg nauhkkulagnu hekkulag.

³⁰ Am ag akka ahilkad danab laala ag ahan, ag doyak diig genabib baolinna, ag Kristen eeɗadppeg, ahan dim lamadkkulagnu hekkulag.

³¹ Amunu ag ⌊nena qemananu⌋ dabmenan dayeg! Ag da maɗ ewam, tuqan, amun ele ag laib laib ag amelagppa hanhan nau aomanu maɗettaknu nai amel leb nak ele matti dooppig amu, ag amu dabmakppa aɗan dayeg!

³² Am gemu da ag Naɗi eppegppa maatte, nuhig ehanittak okkai hamu megatte, nai amu waappa daaglagnu ele aakku maadttem. Nuhig ehanittak hamu mekkak, amuam heeb, ag ɠagattag, amu keeke, aug bia, Kayak Nug oppiaawak danab madakkunu aum ele, ag amu oh aoglagnu elele.

³³ Amu da danab laanu silwa, gol, lamen keeke, da amunu amel qe aolomnab dabmak eheɗ ii aomi.

³⁴ Ag aakku dootteb, da eppelppa uɗat hein, men doɗo awen, da keeke aɗinu tutu memi amu daden meinne, danab da ele uɗat hemut amu, da ag ele ehanadmi.

³⁵ Da Naɗi Jesusnu nai laa dabmeinne, da ehanittak kobol amuppa amu, da ag danab ah, keeke iitta, hamu daatteb, ig ag ehanadkkunignu daattem amu, da kobol amuppa ag ehanadkkulagnu ib ippunadmi. Jesusnu nai amuam inam. ‘Danab nug danab laa keeke metta, itittak ena aotte, itittak amuam danab nug keeke awa, itittak ena aotte, itittak amu eɗidtte.’ ”

³⁶ Pol nai amu mattia male, nug Epesus Kristen tamaniak ikki danab ele gatelag qaun ona, Pol nug unuqittom.

³⁷ Unuqitte amu, ikki danab ag oh huana gaanna, ag Pol oɗokkidna ootuqidppig.

³⁸ Ag keeke laalanu oo doyak dooppig, amge Pol nug, “Ag da iɗul baula ii anidmana,” aum, nai amunu ag oo doyak naɗi dooppig. Oo doyak doonna, ag Pol omalna gona, uubppa uuidppig.