Aposel 2 - Nobonob Baibel

Kayak Ouɗi neum

¹ Aria, haen Juda dilag deɗ okkai onig Pentikos, deɗ amu uɗie, laa Jesusnu oolagppa genab dooppig, ag oh aben laippu appa qagmeppig.

² Qagmen daaegeg, hab attannu oqotti, oqotti amuam ulah naɗi ɠagattag uɗiaya, oqotti otte bia amu, oqotti amu paha laippun uɗiom. Uɗie, lag ag daappigppa amu, oqotti amuam lag amu ohppa ambeum.

³ Anam be amu, ag aab dittiak bia anitteg, aab amu oppateb, aab dittia tak kuɗum daanna, anen anen ag gona, danab ah daappig ele anen anenppa daappig.

⁴ Anam he amu, danab oolagppa genab dooppig ele, danab amu ag oh Kayak Ouɗi ag oolagppa ambe, ag ahan, nai digdigppa nai madippig. Amu Kayak Ouɗi Nug he, ag oɗelagppa anam nai madippig.

⁵ Haen amuppa wan ohppanu Juda danab ag Kayaknu ebehilkad oh bodoetta le meum ele, ag gona, wanppan wan ohppa daappig amu, ag appanu uɗin Jerusalem daappig.

⁶ Ag haen amu oqotti amu doona, danab ah kuɗum ag uɗin qagmena, danab piɗe piɗenu ag oh totol danab, ag nailkadppa nai mehuqegeg dooppig amunu, ag dabmak kuɗum aoppig.

⁷ Ag nailkadppa nai mehuqeg doonna, ag ottaina, ag dabmak kuɗum aona appig. “Umu aɗi? Attem hena hetteb? Danab nai maditteb ele umu, ag amu Galili danab.

⁸ Anam amunu attemun ig oh danab wan laalappanu amu, ig nainkadppa nai doottem? Ig aninkad mamenkad mattiegeg doottem, ig amubia doottem.

⁹ Ig amu Partia, Midia, Elam, amu Mesopotemia ele daattem. Ig Juda, Kapadosia, Pontus, amu Asia ele daattem.

¹⁰ Amu ig Prigia, Pampilia, Isip, amu Libianu wan atuppa, Sairininu wan atuppa ele daattem. Aria, Rom danab ele ig oh uɗimut daattem.

¹¹ Ig laa am Juda, amu laa ag Juda dilag mettid dim lamidtteb. Amu ig Krit, amu Arebia appanu ele uɗimut. Uɗit, ig oh ig nainkad aben abenppa Kayak uɗat enanag haattomnu mehuqegeg doottem,” aon appig.

¹² Ag anam ana, ag oh eheɗ ottaina dabmak kuɗum aona, ag akka akka, “Keeke umu amu attemunnab?” aon appig.

¹³ Ag anam appig, amge laala ag awa awa qettak nai mattin, inam appig. “Umu amu, ag wain huana laeg, kaaka aqe hetteb,” aon appig.

Pita nai mehuqom

¹⁴ Ag anam aon aeg amu, Pita aha hibaitte, totol danab 11 amu ele ahaeg, nug huana ewa, danab ah ag tutukku doona maidkkulagnu inam aum. “Juda danab ag, amu danab ag gemu Jerusalem ippa ina daatteb ele, ag oh da nai madippippi, ag daulag human dabmebeppeg, da keeke imunu diig mehuqppi doyeg!

¹⁵ Ag, ‘Danab imu wain laegeg, kaaka aqatte,’ atteb, amge danab imu ag anam ii hetteb. Iitta! Geha iikku am buttua 9 kilokib, ⌊amu ag dootteb, ig buttuanab wain ii lattem⌋.

¹⁶ Kobol imuam kaaka aqaknu iitta. Kobol imu amu anukka propet Joel nug Kayak oɗe awa, nai mattiom amu, nug mattiomnu iikku bette.

¹⁷ Kayak Nug inam Joel amegppa a doya yom. ‘Dimppa, haen malakkunu heebeb, haen gamag amuppa da dahil Ouɗi danab ah diig oh dilagppanu ⌊danab ah laala⌋ madakkul. Da madappi, ag bekkalkad, aɗelkad ele ag propet nai madippeppeg, ahilkad danab kaino ag tul niiakppa keeke anidppeg, ahilkad danab bau ag tuleglegppa keeke anidkkulag.

¹⁸ Ao, haen amuppa amu, da dahil Ouɗi Nug dahilad maɗi nid, dahilad maɗi ah ele madappi, ag propet nai mattiglag.

¹⁹ Amu da heppi, habppa uɗat ɠagattagnab beppeg, wanppa dahilnu dabmettaknu kobol danab haknu elele iitta ele bekkulag. Kobol amuam inam; tiig, aab ewak, amu aab kah huanaknab tak ele daaglag.

²⁰ Aam nug gatatu maneb, kalam nug kokoɗnab tiig bia daakku. Keeke amu oh bekkulag, amge da Naɗi, dahilnu deɗ naɗi, enanagnab ele amu, haen deɗ amu ii nak, nekkunu daakku, haen amuppa keeke amu oh bekkulag,’ awa aum. ⌊Naɗi Nug anam awa a, Joel nug yom. Amu Joel nug ele Naɗinu nai laa imu yom.⌋

²¹ ‘Anam amge aun laa nug Naɗi onigppa eeb amu, Naɗi Nug ehanitteb, nug padal ii mema.’ Joel anam yom.

²² Amu Israel danab ag nai imu doyeg! Da ag amelagppa Jesus, Nasaret ted, nuhignu appi dooglag. Ag akka aakku dootteb, Kayak Nug ehanitte, Nug ag oolagppa kobol danab haknu elele iitta, uɗat ɠagattagnab, Kayak dabmettaknu kobol danab haknu elele iitta digdig heum. Kayak he, Jesus anam heum, amuam Kayak Nug Jesus me neum ippunadtte.

²³ Kayak Nug anukka nuhig doyakppa anam hekkunu nai mattiom, amu Nug Jesus awa, ag eppelagppa me, ag danab nau, ahilag ehanittakppa, ag ad emaitakppa atulna, qeeg mauhom.

²⁴ Amge Kayak Nug mauhak oolagppanu uhuqa he, eɗua hibaittom. Mauhak Nug aɗakkunu elele iitta.

²⁵ Amuam Dawit nuhignu yom amubia. Dawit nug inam yom. ‘Naɗi Nug hanhan ouiwa daatte anidttem. Nug da ele ouqeɗa, ɠagattag meɗatte amunu, keeke laa nug da ii uɗaliɗma.

²⁶ Diig amunu da ool gamag ahehe, da oo gamag ahak ahi edattem. Ao, da dimppa eɗuen hippaidkkulnu dabmak aɗe oikkul.

²⁷ Aɗinu? Na geha da ii uuiɗmana amunu, da mauhak daatteb abenppa ii daapa. Ao, geha na nahip Laa Oppiaawak Ele, na Nug ii uuidmana amunu, Nug beɗu ii nauhma.

²⁸ Na bau dayaknu ib da ippuniɗme. Na da ele daattep amunu, da maɗoɗppan gamag ahak okkainab doottem,’ awa yom.” Pita nug anam awa aum.

²⁹ Nug anam ana, nug nai tuɗitta aum. “O lailad, Dawit nug nai amu mattiom amu, nug nuhignu ⌊aakkuib⌋ dabmaama ii mattiom. Ig amu genabnab daatte attem doognig am, Dawit nug mauhe boumeg; nuhig boumak aben ig oonigppa gemu iikku daatte.

³⁰ Dawit nug propet dayom amu, Kayak Nug nukka nuhig nai ɠagattag qetta, Dawit amegppa a, Dawit nug nai ɠagattag qettak amu Kayak oɗeppanu uɗie doyom. Kayaknu nai ɠagattag qettak amuam inam. ‘Dimppa na buɗunppan da king laa otippi ba, nug nahip sia kingppa daakku,’ awa aum. Nug anam a, Dawit doyom, amge

³¹ amu ii nak haenppa nug dimppa Kayak Nug heeb, Kristus Nug mauhakppanu eɗua hippaidkku, mauhak abenppa ii daama, Nug beɗu ele ii nauhmanu aum.

³² Aria anam amunu, ag doyeg! Kayak Nug he, Jesus eɗua hibaittom. Ig oh Jesus eɗua hibaittom amu anidmut amunu, ig iikku madittem.

³³ Nug hab aabppa teum, Kayak eppeg naɗiap-ppa daatte. Mameg Kayak Nug nuhig Ouɗi, anukka medakkunu nai qakka aum bia amu, Nug mettom. Mette, Jesus Nug ig ele iikku gemu Kayak Ouɗi mekkom amunu, ag keeke imu gemu anidna dootteb.

^34-35 Amuam genab daattenu diig am, Dawit ⌊beɗu⌋ hab aabppa ii teum. Iitta. Nug mauhe, ag nug boumppig, amge Dawit nug anukka aum. ‘Yawe Nug dahil Naɗi amegppa inam aum. “Na da eppel naɗiap-ppa daappe ukkeb, da nahip kekeɗ na waatppa maadkkul,” ’ awa aum, ⌊amunu Dawit nug Jesus ippunigkkunu anam aum⌋.

³⁶ Anam amunu Israel danab ah, ag oh tutukkunab doyeg! Kayak Nug he, Jesus Nug Naɗi, am Kristus ele daatte. Ag Nug ad emaitakppa atulppig.” Pita ag amelagppa anam mattie dooppig.

³⁷ Ag nai mattie doona, nai amu ag oolagnab yom amunu, ag ahan, Pita, amu totol danab 11 ele ag amelagppa inam appig. “O ig lainkad, geha ig attemtai hekkunig?” aon appig.

³⁸ Aon aeg am, Pita nug amelagppa aum. “Kayak Nug ahilag hipunin uhuqatta madakkunu amu, ag oh akka anen anen ag oolag eɗueb, Jesus Kristus onigppa layattak aweg! Ag anam heppeg, Kayak Nug nuhig Ouɗi ag ɗo hamu mettak bia madakku.

³⁹ Am Kayak Nug anukka nuhig Ouɗi ag, ag bekkalkad, amu wan laa adeppan danab ah, ag ele madakkunu nai qakka aum. Yo, Naɗi, ihinig Kayak, Nug aun aɗi ag onilagppa ette amu, Nug nuhig Ouɗi ag madakkunu nai qakka aum,” awa aum.

⁴⁰ Am Pita nug nau aomnanu dabmettak nai kuɗum laa ele nai mattiaya unuqattatta amelagppa inam aum. “Ag lailkad ag kobol nau hetteb, amubia ag aib heppig. Iitta! Ag oolag eɗueb, Kayaknu ehanittak aweg!” awa aum.

Kristen bau amu, ahilag hak ena

⁴¹ Am danab ag Pita nai mattiom, ag amu genab doonna, ahilag ebqak am 3,000 keeke, amu ag layattak aoppig. Aona, ag Jesusnu oolagppa genab dooppig ele, ag amu oolagppa ukkaeg, oh laippu daanna,

⁴² ag totol danab 12 nai mehuqegeg doonna, nug ena doyaya dayak ele daanna, ee laippu lanan, Kayak unuqidppig.

⁴³ Ag anam henana, danab ah oh ag Kayaknu ebehilag oh bodoetta le meum. Amu Kayak Nug totol danab 12 eppelagppa nuhignu dabmettaknu kobol danab haknu elele iitta kuɗum, digdig ele heum.

⁴⁴ Anam heehe, danab oh ag Kristusnu oolagppa genab dooppig ele, ag oolag laippu mena, laippu qagmak daanna, danab laala ag keeke ele amu, ag akka ahilagnuib ii aɗappig. Iitta. Ag Jesusnu oolagppa genab dooppig, laippu qagmak daatteb, ag oh ahilag dayom.

⁴⁵ Am danab laala ag wan ele amu, laala ag keeke ele amu ag heeg, danab laa daden meeg, ag men doɗo amu aona, danab laala elele iitta daaegeg madappig.

⁴⁶ Ag anam henan, ag oh oolag laippu daanna, deɗ oh Kayaknu mettid lakka gonana, Kayaknu nai dooppig. Amge ag laulkad anen anen oh oina, ag oo gamag ahak doonna, ag Kayak amegppa, “Ena hen mekkame,” anana, ee lappig.

⁴⁷ Ag anam hena, haen oh Kayak binag meegeg, danab ah laa oh ahilagnu oolag enaib dayom. Haen amu deɗ ohppa Naɗi Nug danab ah laala eɗua diieye, ag Kristen tamaniak ooppa daappig ele amu, ag ele tuɗidppig.