Aposel 19 - Nobonob Baibel

Pol Epesus ukka uɗat heum

¹ Apolos nug Korint appa dayeye, haen amuppa Pol nug ukka, prowins yu ihippa ii daappig eleppa oiya oiya, nug Epesus ta, appa nug Kristen laala daaegeg anatta,

² Nug oɗ mattom. “Ag oolagppa genab doyona, ag Kayak Ouɗi aoppigte?” awa aum. Awa a ag appig. “Iitta! Ig Kayak Ouɗi daatte, nai amu laa nug ii a doomut,” aon appig.

³ Aon aeg aria, Pol nug oɗ matta aum. “Aakku amunu ag aɗi layattak aoppig?” oɗ mattom. Oɗ matte amu ag appig, “Ig am Jon nai mattiom, nai amu dim lamidta layattak aomut,” aon appig.

⁴ Anam aeg amu Pol nug aum. “Anukka Jon nug danab ah layattatta, nug inam amelagppa aum. ‘Kayak Nug ahilag hipunin uhuqa madakkunu amu ag oolag eɗueb, ag layattak aweg!’ awa aum. Nug ele, ‘Danab nug da dimulppa uɗitte, ag nuhignu oolagppa genab doyeg!’ awa aum. Danab amu nug Jesus,” awa aum.

⁵ Pol anam a, ag nai amu doona amu, ag Naɗi Jesus onigppa layattak aoppig.

⁶ Pol nug eppeg qaɗelagppa me, Kayak Ouɗi ne aona, ag aabaab nailagppa nai mattinna, ag propet nai mehuqppig.

⁷ Danab layattak aoppig amu, ahilag ebqak am 12 anam.

⁸ Aria, Pol nug Juda dilag nai doyak lag ooppa noa, nug baɗak iitta ele Kayaknu ɗo maɗoɗnu nai kalam ewam, danab nug nuhig nainu ooppa genab dookkunu elelenab mehuqom.

⁹ Nug kalam ewam anam mehuqeqe, laala ag nai amu ii aɗaglagnu ɠagattag daanna, ag oolagppa genab ii dooppig. Ag danab ah kuɗum amelagppa Naɗinu ibnu nai nau madippig. Anam heppig amunu, Pol nug ag uuatta, Kristen diia ukka, deɗ oh Tiranusnu sul lag ooppa noa, nai mehuqttom.

¹⁰ Maɗ aɗit Pol nug anam heum amunu, danab ah Asia prowinsppa daappig, Juda amu Grik ele, ag oh Naɗinu nai dooppig.

¹¹ Kayak Nug Pol eppegppa kobol danab hekkunu elele iitta okkainab heum.

¹² Danab ag takkaknu lamen laala, amu lamen qatti laala ele akkan uɗin, Pol beɗu amuppa lauɗittona, dimppa ag amu aon oɗe danab gumadna gona, beɗulagppa maatteg, danab oɗe ele ena daappig. Ouɗi nau ele amu uuadna goppig.

¹³ Am Juda laala ag oinna, ouɗi nau lamadppig ele amu, ag Naɗi Jesus onigppa appeg heeb, ouɗi nau danab ah uuadna gokkulagnu ele dabmena heppig. Ag inam appig. “Ig Jesus, Pol nug nuhignu mehuqtte ele amu, ig Nug onigppa ‘Ag danab imu uuidna ukkeg!’ ag amelagppa haknunab attem,” aon appig.

¹⁴ Aria, Juda dilag mana mettak danab okkai laa onig Skewa, nug am nid danab eblaih aɗit ele amu, nug bekkod ag kobol amu hedappig.

¹⁵ Ag anam hena, deɗ laa ag ouɗi nau laa amegppa anam appig, amge ouɗi nau amu eɗua amelagppa inam aum. “Jesus amu da doottem, Polnu nai maditteb ele da doottem, amge ag am aun?” awa aum.

¹⁶ Ouɗi nau amu anam awa oɗ matte amu, danab ouɗi nau nug beɗuppa dayom ele amu, nug aha oola qaɗelagppa ta, eɗatta, eheɗ makkuɗatta, beɗulag he nauha auta awe, ahilag lamen ele pattiɗe ne, ag lag amuppanu beɗulag miag dayeye, tiilag neene, ahan oolna goppig.

¹⁷ Anam beum, dimppa Juda danab amu Grik danab ele Epesus daappig amu, ag oh nai amu doon, ag oh baɗan, ag Naɗi Jesus binag okkai meppig.

¹⁸ Anam heeg amu danab ah kuɗum ag oolagppa genab dooppig ele ag aɗi keeke nau anukka heppig amu oh ag miagib mattina anam madippig.

¹⁹ Amu ag oolagppanu danab kuɗum ag anukka onig awak buk ele aon aɗan, uɗat amu heppig ele amu, ag buk amu akkan qagmena, danab ah oh noolagppa manatteg ewom. Ag buk amu oh, ahilag nobnu men doɗo ebqeppig amu, am koin onig drakma 50,000 dayom.

²⁰ Anam heppig amunu, Naɗinu nai tuala uma ugakka, danab ah oolagppa uɗat ɠagattag heum.

²¹ Keeke amu oh ba ukka malom, dimppa Kayak Ouɗi Nug Pol dabmak mette, Pol nug aha, Makedonia Akaia ele ukkowa, dimppa nug Jerusalem gokkunu dabmeum. Dabma amu nug aum. “Da Jerusalem appa ukkoya, dimppa amu da ukken aab okkai onig Rom ele gokkuloitte,” awa aum.

²² Nug anam awowa, nug danab aɗit nug ehanidpiɗ ele maate, Makedonia gopiɗ. Aa am Timoti, Erastus ele. Pol nukka Asia prowinsppa, appa nakok dayom.

Epesus danab ahan muttub qeppig

²³ Pol nug appa dayeye, haen amuppa danab laala ag Naɗinu ib amu kekeɗ mettan, ahan muttub naɗi qenana heppig.

²⁴ Kobol amu inam beum. Danab laa onig Demitrius nug am danab keeke silwappa uɗat haknu doyak okkai ele. Aria, danab laala ag ele uɗat amubia amu ag nug waappa daanna uɗat amu henana, ag kayak hambuppuak onig Artemis, nuhig mettid lag dottog naunau henana, men doɗo okkai aodppig.

²⁵ Nug danab amu qagmattowa amu danab laala ag silwappa, keeke diig laala haknu doyak ele amu, ag ele he uɗieg, nug amelagppa aum. “O danab, ag dootteb, uɗat imuppa men doɗo ihinig ena bette.

²⁶ Amu danab laa onig Pol nug uɗia, danab ah ameg naɗi eeɗatta hambuppue, ahilag dabmak am kaboliak daatte. Ag amu ele anidna dootteb. Antteg, nug Epesus ippaib anam ii heum. Iitta! Nug Asia prowins imu ohppa bia oiyaya, nug anam heum. Nug inam atte. ‘Nigul, danab ag eppelagppa hetteb amu, amuam genab kayak iitta!’ Nug hanhan anam atte.

²⁷ Pol nai atte, amuam ihinig men doɗo aognignu uɗat imu onig aakku heeb nauhkkutai. Amuib iitta, nug nai atte amuam geha danab ah ag genab dooppeg amu, kayak ah Artemis, nuhig mettid lag amunu geha danab ah ag, ‘Umu am keeke genab iitta, keeke hambuppuak,’ aon akkulagtai. Gemu Asia prowins ooppanu oh amu danab ah wan ohppanu ele ag kayak ah onig Artemis noobppa dup nona binag metteb, amge Polnu nai heeb, Artemis onig naɗi aakku iitta mekkutai,” awa aum.

²⁸ Demitrius nug anam awa a, ag nai amu doona, ag oppoɗilag huana be, ag huanak qalan ena appig. “Kayak ah Artemis, nug amu ig Epesus ihinig kayak, nug am onig, ɠagattag ele,” aon eppig.

²⁹ Ag anam aon eeg amu ewak baag naɗinab aab okkai amuppa ahehe, danab ah oh ag muttub qenana, ag ahan oh qaiqaɗ qagmak abenppa gonana, ag Gaius, Aristarkus ele aɗualatna eeɗatna ag ele oh goppig. Aa amu Makedonia danab aɗit, aa Pol ele oh oippig.

³⁰ Aria ag gona amuppa daaegeg, Pol nug noa danab ah kuɗum amu noolagppa nai amelagppa madikkunu heum, amge ⌊nug guittak aomanu⌋ Kristen ag nug hagakka aoppig.

³¹ Amu Asia prowinsnu ehanittak anuqak danab laala, ag Pol ele layam batappig amu, ag ele nai meeg ukke, ag Pol nug qagmak abenppa ii gomanu unuqppig.

³² Danab ah ameg naɗi amu ag ahilag dabmak kaboliak dayom, ag kuɗumnab, oh bia, ag aɗinu qagmakppa uɗippig amu ag ootot aqom amunu, laa nai laa anana eegeg, laa ag nai laa anana eppig.

³³ Ag anam heegeg, Juda daappig ele ag ⌊aab amuppan danab ag ahilagppa nai yaamnanu baɗan, ag⌋ ahan, Aleksander duttuneg noolagppa no, danab laa appa daappig ele ag nug nai madikkunu heeg, Aleksander nug eppeg huma, danab ah amelagppa nai ab dooglagnu digma akkunu heum.

³⁴ Amge muttub qenan daappig ele, haen ag nug anidna dooppig, nug am Juda amunu, ag oh oɗelag ooho, ag huanak eppig. “Kayak ah Artemis, nug amu ig Epesus ihinig kayak, nug am onig, ɠagattag ele!” Ag anamib aam ameg aɗit anam anana eppig.

³⁵ Anam heeg, dimppa Epesus aab okkainu ɗo mettak danab amu nug he, danab ah ag toetteg, nug amelagppa aum. “Epesus danab! Wan ohppan danab oolagppanu amu aun laa nug Epesus, aab okkai imuppan danab, ig Artemis, nug onig, ɠagattag ele, ig nuhig nigul hab attannu iguppa na qeum amu, ig nuhig mettid lag ele gumat-ttem ii dootte?

³⁶ Amu danab laa nai amu tappeb nokkunu elele iitta amunu, ag uun toetteg! Ag aib ahan pahanab keeke laa heppig.

³⁷ Ag danab aɗit imu diiatna uɗippig, amge aa Artemisnu mettid lakkanu keeke yab laa ii aopiɗ. Aa ihinig kayak ah ele, aa nuhignu dabittak nai laa ii madipiɗ.

³⁸ Amu Demitrius nug nuhikkud uɗat laippu ele, ag oh am danab keeke silwappa haknu doyak okkai ele amu, danab laa nug ahilagppa eheɗ laa heum dayeb amu, ag danab amu hettoɗiakppa mekkulagnu ib daatte. Gabman okkai daatteb. Demitrius aɗi ag geha hettoɗiakppa nai danab eheɗ heum beɗuppa yaaglagnu elele.

³⁹ Amu ag oolagppa nai laala dayeb amu, aria ag haen tutukkuppa ag qagmena, nai amu bappaidkkulag.

⁴⁰ Ag gemu heppig imunu eheɗ laa ana bekkutai. Aɗinu? Gemu ag aakku muttub qenan heppig, amu gabman okkai amunu nai hekkulag bia, amunu diig am aɗitai keeke laa eheɗ dayom amunu heppig laa iitta. Aria, am laa ag ig qagmak nau imunu oɗ megappeg amu, geha ig nai laa akkunignu elele iitta,” awa aum.

⁴¹ Aria, aabnu ɗo mettak danab nug amelagppa anam awowa he, danab ah amu qatiadppig.