Aposel 17 - Nobonob Baibel

Pol, Silas ele Tesalonaika uɗat hepiɗ

¹ Pol, Silas ele aa Pilipainu ahaya goya, Ampipolis teya eɗidya goya, Apolonia teya, amu ele eɗidya goya, Tesalonaika tepiɗ. Aab amuppa amu, Juda dilag nai doyak lag laa dayom

² amunu, Pol nug hettom amubia ha, nug Juda dilag nai doyak lag ooppa noa, Sabat ewam amu oh nug anam haaha, nug Kayak nai ippuanattette, nai amunu ag ele madippig.

³ Nug Kayak nai amu diig mehuqaqa amelagppa aum. “Kristus Nug nuhig uɗat ha malakkunu amu, Nug guittak nauppa mauha, eɗua hippaidkkunu dayom,” awa aum. Nug nai mehuqe doyegeg, nug aum. “Jesus, da nuhignu ag amelagppa attem ele amu, Nug amu Kristus,” awa aum.

⁴ Pol nug Jesus Kristusnu nai mehuqe doona, Juda danab ah laala ag Jesusnu oolagppa genab doon, Pol, Silas ele dim lamatppig. Grik danab kuɗum, ag Kayaknu ebehilkad oh bodoetta le meum ele amu, ag ele Jesusnu oolagppa genab doon, Pol Silas ele dim lamatppig, amu ah okkai kuɗum ele ag ele anam heppig.

⁵ Ag anam heppig, amge Juda laala ag Pol, Silas ele dilahnu, ihinigppa anam daalon dabmak aɗan daappig amunu, ag ahan, danab bahilkad iitta, ag keeke he nauhak danab, ag ee oɗiak abenppa hamu daappig ele amu, ag danab amunu laala diin qagmaadna heeg, ag ahan heeg, aab okkai amuppan danab ag ele ag muttub qeppig. Ag muttub qeegeg, Juda laala kobol imu digmeppig ele ag Jeson laugppa qaiettan gona, Pol, Silas ele diiatna, dimittim uɗin, danab kuɗum muttub qeppig ele eppelagppa mekkulagnu dabmeppig.

⁶ Ag anam heppig, amge appa ii anatna, ag Jeson, amu Kristen laala ele eeɗadna gona, aab okkai amuppanu ikki danab gumadna gona, ag inam aon eppig. “Danab nau aa kobol nau wan ohppa heeh bette ele amu, gemu aa uɗiya, ippa hettep.

⁷ Aa uɗieh, Jeson nug aa ele laippu dayaknu ooppa eleleib doya, nug laugppa diiata ukkom. Ele amu, danab amu oh ag, ‘King laa daatte, nug onig Jesus,’ aon atteb, amu amuppa ag Sisarnu ɗo tappaeg nette.” Ag anam eppig.

⁸ Haen aab okkai amuppan danab kuɗum, ikki danab ele ag nai amu doona, ag ottaina, eheɗ doonna,

⁹ amu ikki danab ag heeg, Jeson nug laa oolagppa genab dooppig ele ag dimppa genab hettoɗiakppa eɗun bekkulagnu amu, ag daden meeg, heeg goppig.

Pol, Silas ele Beria goya, nai mehuqpiɗ

¹⁰ Ag anam heeg, Kristen ag tuqan amuppaib Pol, Silas ele maateg, aa aab amu uuya, Beria gopiɗ. Aa Beria teya amu, aa Juda dilag nai doyak lag ooppa nopiɗ.

¹¹ Am Juda danab Beria daappig amu, ena haknu, ag diilag am Juda danab Tesalonaika daappig eɗittak. Aɗinu? Ag nai Pol mattiom ele dooglagnu oolag ahe, ag doon autna aoppig. Ag doon aon, Pol nai attom am genabte, o iitta genab iittate amu, ag amu dooglagnu deɗ ohppa Kayak nai ebqeppig.

¹² Amu Pol nai mehuqeqe, Juda danab ah aab amuppan kuɗum laala ag Jesusnu oolagppa genab dooppig. Am Grik ah okkai ele nakok kuɗum, Grik danab kuɗum ele, ag Jesusnu oolagppa genab dooppig.

¹³ Ag Jesusnu oolagppa genab dooppig, dimppa Juda laala Tesalonaikanu, ag Pol nug Beria appa Kayaknu nai mehuqtte doona, ag ahan Beria gona, ahilag hak nau amu aon, danab ah appanu oolagppa noeg, ag ahilag nai amu doon ottaina, ahan heegeg,

¹⁴ amu Kristen ag paha ahan, Pol aon meeg noa, yu ihippa gokkunu ugekke, Silas, Timoti ele, aa amu Beria daapiɗ.

¹⁵ Danab Pol omaleg goppig ele, ag omalna gona Atens tena, uuidna eɗun gokkulagnu heegeg, Pol nug Silas, Timoti ele dilah nai, ag aon gona appeg dooglahnu inam aum. “Aa paha uɗiya, da aniɗeɗ!” awa aum.

Pol nug Atens appa nai mehuqom

¹⁶ Amu Pol nug Atens appa Silas, Timoti ele amelah maama, nug aab okkai amuppa kayak hambuppuak dottolkad amu kuɗumnab aben ohppa anatta, nug keeke amunu oo huanak guittom.

¹⁷ Pol nug ooppa anam doyaya, nug Juda dilag nai doyak lakka ukke, Juda danab amu iitta aɗi danab ag Kayaknu ebehilkad oh bodoetta le meum ele amu, ag ele nai madippig. Amu nug deɗ oh ee oɗiak abenppa ukke, danab ah uɗinna daatteb amu, ag ele nai madippig.

¹⁸ Amu nug anam heehe, aria doyak danab ameg aɗit daappig, ag nug ele aeg ona aeg doum. Doyak danab ameg laa amu ag doyak onig Epikuriannu doyak, ag amunu nai aɗappig, laa amu ag doyak onig Stoiknu doyak, ag amunu nai aɗappig. Doyak danab amu ag oolagppa laala Polnu inam appig. “Danab umu nug aɗi nai mauhnoak maditte?” Aegeg, Pol nug Jesusnu Nai Ena, Nug mauhakppanu eɗua hibaittomnu ele mattiom amunu, laa ag appig. “Nug aab laappan dilag kayak, ig ii doottem ele, amunutai nai mehuqtte,” aon appig.

¹⁹ Ag anam mattina, Pol aon, ag hettoɗiak okkai aben, ag amunu Areopagus atteb amu, ag appa gona, “Ig na nai bau danab ah ippunadttem amu doognignu oonig daatte,” aon appig.

²⁰ Ag anam anana, ag tuɗidna appig. “Nai na mattie doomut am nai baunab amunu, ig nai amu diig doognignu oonig daatte,” aon appig.

²¹ Amu Atens danab oh, wan laihnu danab Atens daappig ele oh, ag uɗat laanu amu dab-ii-meppig. Iitta. Ag nai baunu mattin, diig anidna, nai bau amu dooglagnu amuib henan daappig.

²² Aria ag Pol aon ukkaeg, hettoɗiak okkai aben onig Areopagus, amuppa tena, nug amegppa anam aeg amu, nug aha, amelagppa mattia aum. “Atens danab, da ag anadmi, ag kayak digdig noolkadppa dup nona binalag maknu amu, ag bahilag ii yaatte.

²³ Aɗinu? Da uɗien, da aab okkai matte oiyeye, da kayak dottolkad, ahilkad qaɗab keeke, ag Atens danab, ag keeke amu ohppa dup noa binag mak kobol hetteb amu, da keeke amu oh anadmi. Amu da ele qaɗab laa, amuppa ag, ‘Imuam kayak laanu, ig nug ii doottem ele,’ ag anam yaappig dayeye anidmi. Aria, Kayak amu, ag ii dootteb, ag Nug noobppa dup noa binag mak ii dooidna hetteb ele amu, gemu da nuhig nai mehuqppi ag dooglag,” awa aum.

²⁴ Pol nug anam ana, nug tuɗitta aum. “Amu Kayak Nug wan imu ha, keeke oh wanppa daatteb, laa ig anadttem, laa ig ii anadttem ele amu, Nug heum. Kayak amu Nug habnu, wannu ele Naɗi daatte amunu, Nug mettid lag, danab eppelagppa hetteb, amu ooppa, Nug ii daatte.

²⁵ Amu Kayak Nug keeke laanu tutu mettete amunu, ig danab ig Nug ehanidkkunig? Iitta. Nug nukka eleleib daatte. Nug nukkaib he, danab oh ag bau daatteb; ge Nug he, ag hik aotteb.

²⁶ Amu danab ah buɗub oh amu, Nug ag alalag laippu heum, amu nuhigppanuib ag bena appatppig. Appateg, Nug he, ag gona wan ohppa daaegeg, Nug nukka haen ahilag matta, appalkad anen anen ele mattom.

²⁷ Kayak Nug amu heumnu diig am, danab ag hak nuhig amu anidna, ag Nug mattina dim lamidkkulagnu heum. Amu ag Nug mattina dim lamidkkulag, diig amunu ag Kayak, nuhigppa gokkulagnu ib mattinna, ib anidna gona, Nug anidkkulag, amge Nug ig laib laib ohppanu uma ii daatte.

²⁸ Nuhigppa ig bau dayak aot, Nug ig ɠagattag megekke, ig oit daattem. Ahilkad doyak danab laala ag ele amunu inam appig. ‘Ig ele Nug bekkod daattem,’ aon appig.

²⁹ Aria, ig Kayak bekkod daattem amunu, ig ihinig dabmakppa, ‘Danab ag gol, silwa, men ele aona, ahilag dabmakppa ag eppelagppa dottog hetteb, amu Kayak Nug keeke amubia daatte,’ aib doomut.

³⁰ Anukka danab ag elele ii doonna, ag keeke eppelagppa hena, binag meppig amunu, ahilagnu Kayak Nug dabmak okkai ii awom. Amge gemu amu, keeke amunu Kayak Nug danab oh wan ohppa daatteb amelagppa haknunab nai inam atte. ‘Ag oolag eɗueg!’ awa atte.

³¹ Aɗinu? Nug wanppan danab ah oh epeɗiadkkunu deɗ aakku otiom daatte. Geha, epeɗiak amuppa amu, Nug nai doya mala hettoɗia epeɗia elele mettak kobol tutukku dim lamittatta, Nug danab ah oh epeɗiadkku. Amu Nug danab laa epeɗiak amu gumakkunu otiom. Danab amu Nug mauhe, Kayak Nug he, Nug eɗua hibaittom amunu, danab oh ag keeke amu genab bekku amu, ag oolagppa genab dooglagnu elele,” awa aum.

³² Aria, laa ag nai Pol mattiom dooppig ele amu, haen ag danab mauha eɗua hibaittomnu nai amu ag doon, laala ag ahan awa awa qettak nai mattiegeg, laala ag appig. “Dimppa geha ig nahip nai keeke amunu mattime amu baula appe doognig,” aon appig.

³³ Ag nai anam anam mattieg amu Pol nug aha, ag uuatta ukkom.

³⁴ Pol nug uuatta ukkom, amge laa ag oolagppa genab doona, Pol dim lamidppig. Laa amu Dionisius, nug am Areopagusnu epeɗiak danab. Laa amu ah onig Damaris amu laala ele.