Aposel 16 - Nobonob Baibel

Timoti, amu Pol, Silas ele oh goppig

¹ Pol, Silas ele aa Derbe teya amu aa goya, Listra tepiɗ. Aab amuppa Kristen danab laippu laa dayom, nug onig Timoti. Nug Juda ah laa, Jesusnu ooppa genab doyom ele, nug nug bekka, mameg amu Grik danab.

² Listranu Kristen am Aikoniamnu Kristen ele ag hak nuhig anidna, “Timoti nug danab ena,” aon appig.

³ Amu Pol nug Timoti antta, oh gokkulagnu oo dayom, amge Juda ag appa daappig ele amu ag dooppig, Timoti mameg nug am Grik danab amu Grik danab ag gaɗa otaɗak ii hetteb amunu, Juda ag oolag nauhmanu Pol nug aha, Timoti gaɗa otaɗom.

⁴ Pol nug anam he, ag gona, aabaabppa oinna, totol danab, Kristen tamaniak ikki danab ele ag tatam Jerusalem qagmena nai appig amu, ag Kristen amelagppa ag nai amu ippuanadppig.

⁵ Ag anam heppig amunu, Kristen tamaniak ag nai doyegeg, Jesusnu ooppa genab doyak ahilag am okkai meeme, deɗ oh Kristen dilag ebqak amu tuɗitteg okkai meum.

Pol nug tuleglegppa Makedonia danab anttom

⁶ Aria Pol, Silas amu Timoti ele ag oiyegeg, Kayak Ouɗi Nug ag Nai Ena Asia appa mehuqmananu ib oo neum amunu, Pol nug aɗit laa ele ag ahan wan atu aɗit onilah Prigia, Galesia ele tikkuna gonana amu,

⁷ ag gona, Misia tomppa appanu ag ahan Bitinia gokkulagnu heeg, Jesus Ouɗi Nug appa ele gomananu ib oo neum.

⁸ Nug anam he amu ag Misia eɗidna nona, Troas goppig.

⁹ Aria, Troas appa tena, tuqanppa Pol nug tuleglegppa Makedonia danab laa hibaitta dayaya, Pol onigppa ewa, “Na ahan, yu mataɗna uɗin, ig ehanikke!” ii daye daye ana onigppa eewo anttom.

¹⁰ Pol nug keeke amu anam antte, aria wagɗe ig ahat paha Makedonia gokkunignu ib mattimut. Ig amut. “Ig doottem, Kayak Nug ig oninigppa eum, ig gota Nai Ena ag amelagppa mehuqpput dooglagnu aum,” aot amut.

Lidia oo eɗue, Kristen beum

¹¹ Ig anam atata, Troas appa uub laa aot teut, uub amu tutukku awikke, Samotres gota wagɗe deɗ amuppa ig appanu Neapolis gomut.

¹² Neapolis appanu amu, ig ahat ⌊baenigppa⌋ gota, Pilipai temut. Aab okkai amunu amu, Romnu gabman nukka tutukku dabmettom; Makedonia wanppa anuqak dayom. Ig deɗ laala aab okkai amuppa daamut.

¹³ Appa daatta amu Sabat deɗppa ig, “Unuqittak aben le ihippa daattetai,” atata, ig aab okkainu aɗ odppa dimittim gota, ig le ihippa gomut. Ig le amuppa gota amu ah laala ag qagmena daaegeg anadta, ig heɗep neta daatta, ag amelagppa nai mattimut.

¹⁴ Amu ah laa onig Lidia, nug amu Kayak noobppa dup noa binag meum ele, nug nai amu doyom. Nug am aab okkai Taiatairanu ah, amu nug lamen perpel awa me, laa daden meegeg,, amuppa nug men doɗo aottom. Naɗi Nug he, Lidianu dabmak am matulak daye, Pol nai mehuqeqe doya, dookkunu nug daug hume, oo eɗuom.

¹⁵ Nug nai doya oo eɗue layattak awe, nug baekkudppa ele ag layattak aoppig. Lidia layattak awowa, nug ig amenigppa aum. “Ag da Naɗinu oolppa genab doottem elele anidtteb dayeb amu, aria ag uɗin, da laulppa dayeg!” awa aum. Nug anam ana wagai ma he, ig nug oɗe dim lamidta, gota nug laugppa daamut.

Pol, Silas ele maniguittakppa daapiɗ

¹⁶ Deɗ laa ig unuqittak abenppa ukkautut, begbeg maɗi nid ahin laa, nug ooppa ouɗi nau ele, nug ibppa uɗanig teum. Ouɗi nau amu nug he, nid ahin amu nug butti aɗi keeke aɗi bekkunu amu miag atiom amunu, nid ahin amu, nuhig gumak danab ag men doɗo kuɗumnab aodppig.

¹⁷ Nug Pol ig ele dim lamikkakka amu, nug inam ewa aum. “Danab imu amu, ag am Kayak Attannab Laa Oh Eɗattaknu maɗi nid! Kayak Nug attem ha, ig eɗua awikkaknu ib babaittom ippunigtteb,” awa aum.

¹⁸ Nug kobol amu deɗ kuɗum he ukke ukke, Pol nug ooppa guittak doya, nug eɗua ouɗi nau amegppa aum. “Jesus Kristus onigppa na nug uuidkkutnu haknunab attem!” awa aum. Anam a amu ouɗi nau geha aakku nid ahin amu uuitta ukkom.

¹⁹ Aakku nid ahin amunu gumak danab ag ahilag men doɗo awaknu diig amu iitta meum anidna, ag Pol, Silas ele aɗualatna eeɗatna, danab gumaknu ehah ele noolagppa ee oɗiak abenppa goppig.

²⁰ Ag Rom dilag epeɗiak danab noolagppa diiatna wana appig. “Danab aɗit imu, aa am Juda danab, amu aa heeh, uug nau aab okkai ihinigppa bette.

²¹ Heyaya, aa kobol nau, ig Rom danab amunu gun doottem, ig amu aognignu elele iitta amu, ig amu dim lamidkkunignu attep,” aon appig.

²² Ag anam aegeg, aab okkai amunu danab kuɗum laala ele anam aegeg, epeɗiak danab ag Pol, Silas ele beɗulahppanu lamen uɗatna, eheɗ makkuɗatkkulagnu appig.

²³ Rom dilag epeɗiak danab ag anam aeg, ban daup ag eheɗ makkuɗatna, maniguittakppa maatna, Rom dilag epeɗiak danab ag maniguittak gumak danab nug gumata auta aokkunu amegppa appig.

²⁴ Maniguittak gumak danab nug nai ɠagattag amu doyowa, nug maate, maniguittak ooppanab, aɗ nakok laappa noeh, adppa baelti qakkom.

²⁵ Qagate, aa anam daayya, tuqan tugmag Pol, Silas ele Kayak unuqidya daayya, ahi ele ettayya daapiɗ. Anam heeheh, maniguittak danab laa ag doyatppig.

²⁶ Ag anam daaegeg amu mim okkai laa laippun na he, maniguittak lag amu ohnab uɗalele, od paha matulatte, senppa hippaladppig ele oh uhuqattom.

²⁷ Anam he, gumak danab nug aha, maniguittak lag od matulak anattowa, nug maniguittak danab oh oolna goppig anana, nug qep elab eeɗa, nug nugakka duug wa mauhkkunu heum,

²⁸ amge Pol nug huana ewa aum. “Na nakka aib duut ome! Ig oh iikku daattem,” awa aum.

²⁹ A amu maniguittak gumak danab nug doya, amahlaknu ewa, maniguittak lag ooppa noa, nug ottaia baɗaɗa, nug Pol, Silas ele baelahppa na qeum.

³⁰ Na qa, eɗua aha, nug diiata dimittim wana, oɗ matom. “O danab naɗi aɗit, Kayak Nug da eɗua awiɗkkunu amu, da attem hekkuloitte?” awa aum.

³¹ Anam a amu aa apiɗ. “Na Naɗi Jesusnu ootppa genab dookkutoitte. Haen na anam hekkut amu, Kayak Nug na eɗua awidkku; na amu na baenadppa ele oh eɗua diiadkku,” aoya apiɗ.

³² Anam awoya aa Naɗinu nai, nug amu nug baekkudppa ele, ag oh amelagppa madipiɗ.

³³ Amunu tuqan geha aakku nug aa diiata, ihilah babaitte, amu nug baekkudppa ele oh ag layattak aoppig.

³⁴ Aona amu nug diiata, laugppa ukka, ee matom. Nug, nug baekkudppa ele oh ag maɗoɗppan gamag ahak aoppig. Aɗinu? Ag Kayaknu oolagppa genab dooppig.

³⁵ Daaeheh wagɗe buttua amu epeɗiak danab ag heeg, daup danab laala uɗin maniguittak lag gumak danab amegppa appig. “Na danab aɗit amu uuatppe ukkeɗ!” aon appig.

³⁶ Amu gumak danab nug doya, Pol amegppa aum. “Epeɗiak danab ag nai meeg uɗiom am da na, Silas ele uhuqatppi, aa dimittim doya gokkulahnu appig amunu, aa oolah ena dayebeb ukkeɗ!” awa aum.

³⁷ Ag appig amu nug Pol amegppa a doya, nug aum. “I amu Rom danab, amge ag i hettoɗiakppa meitna, i eheɗ hemuɗtai o iittatai amu ag ii dooppig. Iitta. Ag i danab ah noolagppa hamu aɗaitna, makkuɗitnana, maniguittakppa hamu meitppig. Ag anam hewona amu, aɗinu ag gemu lokkumakppa henana, i dimittim gokkunihnu hetteb? Ag anam ii hemana. Iittanab! Ag akka uɗin, i omaitppeg dimittim gokkunihoitte,” awa aum.

³⁸ Pol anam awa a, aria daup ag nai amu aon eɗun gona, epeɗiak danab amelagppa aeg, epeɗiak danab ag Pol, Silas ele aa am Rom danab doona, ag baɗappig. Ag inam dabmeppig. “Ig Romnu ɗo tippalmut amunu Pol, Silas ele apeɗ, Rom okkai ag ig eheɗ laa heigkkulagtai,” aon appig.

³⁹ Ag anam doona, ag gona, oo mak nai amelahppa ana, omalateg dimittim doeh amu, ag aa aab okkai amuppa ii daamya, aa ahai laih gokkulahnu oɗ matappig.

⁴⁰ Ag anam aeg amu aa maniguittak lakkanu doya, aa Lidia laugppa goya, aa Kristen anadya, ɠagattag aqaknu nai laala amelagppa ayaya amu gopiɗ.