Aposel 14 - Nobonob Baibel

Barnabas, Pol ele Aikoniam appa uɗat hepiɗ

¹ Pol, Barnabas ele aa Antiok uuya, ahai Aikoniam goya, uɗat hanhan hepiɗ ele amu, appa ele aa anam hepiɗ. Aa Juda dilag nai doyak lag ooppa noya nai mehuqpiɗ. Aa nai diig elele mehuqeheh, danab ah kuɗumnab, Juda Grik ele, ag oolagppa genab dooppig.

² Amge Juda laala, ag oolagppa genab doyaknu uuppig ele ag ahan, iitta aɗi oolag yaaeg, ag Kristen dilag oolag aeg beum.

³ Amunu Pol, Barnabas ele aa haen elab Aikoniam appa baɗak iitta ele Naɗinu nai mehuqeh, Naɗi Nug ɠagattag mate, aa Kayak dabmettaknu kobol danab haknu elele iitta kuɗum digdig ele hepiɗ. Anam heeheh, amuppa Naɗi Nug nuhig ehanittak okkai hamu mettaknu nai, amuam genab, danab ah ippuanattom.

⁴ Ippuanattom amge danab ah aab okkai amuppan ag oppatna, ameg aɗit daan, ameg laa ag Juda dilag nai amu doon, ag ele oolag laippu daappig amge laa ag Pol, Barnabas ele nai mehuqpiɗ amunu oolagppa genab doon, ag aa ele oolag laippu daappig.

⁵ Anam daaegeg, dimppa iitta aɗi laala, Juda laala ele, amu ahilkad ikki danab ele ahan, Pol, Barnabas ele eheɗ haatna, menppa makkuɗatppeg mauhkkulahnu dabmeppig,

⁶ amge aa amu dooya, aa ahai oolya Likonia aab okkai aɗit, Listra Derbe ele, amu aab aɗit amu dilah wan taliliatak ele, aa appa goya oiya,

⁷ aria appa aa Nai Ena tuɗidya, danab ah amelagppa mehuqpiɗ.

Barnabas, Pol ele Listra, Derbe ele uɗat hepiɗ

⁸ Am Listra appa danab laa dayeye anidpiɗ. Nug baekuɗ kaliak amunu ii oiyom, dayakib dayom. Nug anig ooppan baekuɗ amu anam ele doa, laa ii oiyom.

⁹ Nug Pol nai mattie doyeye, Pol nug tutukku danab amu neekkitta, nug nuhig ooppa genab doyakppa eɗua ena daakkunu elele anttom

¹⁰ amunu, Pol nug baag okkaippa amegppa inam aum. “Na ahan hibaitte!” awa aum. Awa a amu danab amu laippun qa ottaiya aha, hibaitta oiyom.

¹¹ Pol nug anam heum amu appan danab anidppig ele, ag Likonia nailagppa inam qalan appig. “Kayak aɗit aakku danab bia wanppa neya uɗiya, ihinigppa bepiɗ,” aon appig.

¹² Ag anam ana, Barnabasnu amu ag Grik dilag kayak onig Sus dayom anana, ag Polnu amu, ag Grik dilag kayak onig Hermes dayom appig. Aɗinu? Pol nug nai kuɗum mattiom, Hermes bia; Barnabas nug nai kuɗum ii mattiom.

¹³ Amu kayak hambuppuak Susnu mettid lag am aab okkai daugppa heeg dayom. Amu lag amunu mana mettak danab nug makau dawai diiatta amu bala muɗippa giattak ele diiatta, aab okkai amunu aɗ odppa uɗie, nug danab ah ele ag doɗ main Pol, Barnabas ele mataglagnu heppig.

¹⁴ Amge totol danab aɗit, Barnabas, Pol ele, aa ag anam hekkulagnu heegeg, aa nai amu dooya, ahilah lamen pattiɗya, qaiqaɗ danab ah kuɗum oolagppa goya, eya apiɗ.

¹⁵ “Ag ippan danab, ag aɗinu anam hetteb? I ele am danab, ag biaib. I Nai Ena ag amelagppa mehuqta, amu i ele ag keeke nau hamu meu iitta amu uuadna, ag Kayak bau daatte amu Nug dim lamidkkulagnu amelagppa mehuqttep. Nug am hab, wan, yu ele, amu keeke oh amuppa daatteb ele, amu oh Nug hattom.

¹⁶ Anukka, Kayak Nug danab ah buɗub ohnu ag ib digdig gokkulagnu aib ii aum

¹⁷ amge Nug daatte, Nug amunu haen amuppa ele ag ippuanattatta, Nug hab aabppa dayaya he, gu ahilagppa neum, ahilag ee ena beum, ag ee elele aoppig, amu ag gamag ahak okkai dooppig,” aoya apiɗ.

¹⁸ Pol, Barnabas ele aa nai amu amelagppa madipiɗ amunu, danab ah amu ag main ii matappig, amge Pol, Barnabas ele wagainab ii melop am main matalob.

¹⁹ Aria, aa Listra daaeheh, Juda laala Antioknu Aikoniamnu ele uɗiadppig. Ag appa uɗin, danab ah amu eeɗadna, Pol qeppeg mauhkkunu oolagppa noeg, ag menppa Pol makkuɗeg, mauhak bia niieye, ag eeɗna, aab okkai giginppa gona meppig. Ag, “Nug mauhom,” anana, anam heppig.

²⁰ Ag anam heppig, amge laala Jesusnu oolagppa genab dooppig ele, ag uɗin, Pol niieye talilidna daaegeg, nug eɗua aha aab amuppa noum. Aria, wagɗe deɗ amuppa nug Barnabas ele aa Derbe gokkunu gopiɗ.

Barnabas, Pol ele aa Derbe tewoya, eɗuya goya goya, Antiok, Siria wanppanu, tepiɗ

²¹ Pol, Barnabas ele aa Derbe teya, appa Nai Ena mehuqeh, danab ah kuɗum ag oolagppa genab doyeg, dimppa aa eɗui Listra, Aikoniam, amu ⌊Pisidianu⌋ Antiok ele gopiɗ.

²² Aa goyaya, aa Kristen ɠagattag aqai, ag ɠagattag daanna oiyegeg, ahilag ooppa genab doyak na qemanu ayaya, inam ele apiɗ. “Ig Kayaknu ɗo maɗoɗ ooppa nokkunignu, ig tatam uug kuɗum aot oignigoitte,” aoya apiɗ.

²³ Anam heyaya amu, aa Kristen tamaniak amu ohppa ikki danab laala otiadya maadpiɗ. Aa ee ohnu kud meya daayya unuqidyaya, aa Kristen tamaniak amu oh diiya, Naɗi, ag nuhignu oolagppa genab dooppig ele amu, Nug eppegppa maadpiɗ.

²⁴ Amu dimppa aa goya, Pisidia wan tikkui goya goya, Pampilia wanppa tepiɗ.

²⁵ Aa teya amu Perga aabppa Nai Ena mehuqoya, dimppa amu aa noya, Atalia gopiɗ.

²⁶ Aa Atelia noya, uub laa anidya teeh, uub amu aa diiata Sirianu Antiok ukkom. Aab amuppa anukka Kristen tamaniak danab ag Kayaknu ehanittak okkai hamu megatte ahilahppa dayebeb, aa nuhig uɗat hekkulahnu Kayak eppegppa maatppig. Aa uɗat amu heyaya, gemu aa eɗui appa uɗipiɗ.

²⁷ Aa uɗiya Antiok beya, aa Kristen tamaniak qagmadya, aa amelagppa Kayak ahilahppa aɗi heum amunu oh mattiya, aa inam ele apiɗ. “Kayak Nug he, iitta aɗi ag ele oolagppa genab dooppig,” aoya apiɗ.

²⁸ Aa Kristen tamaniak amelagppa goya uɗat hepiɗ amunu awoya, aa haen elab ag ele appa daappig.