Aposel 13 - Nobonob Baibel

Barnabas, Saul ele misin uɗatnu maateg gopiɗ

¹ Aria, Antiok Kristen tamaniakppa propet, amu ippunittak danab laala ele appa daappig. Ag onilag am Barnabas, Simeon, nug onig laa Naisa, Lusius, nug am Sairini ted, Manain, nug Herot Antipas ele buɗub laippu, amu Saul aakku.

² Ag am Naɗi noobppa dup nona binag menana, ee ohnu kud mena daaegeg, Kayak Ouɗi Nug ag amelagppa aum. “Da Barnabas, Saul ele aa uɗat laa hekkulahnu tituanatmi amunu, ag otiatna meɗeg!” awa aum.

³ Aria, ag tuɗidna ee ohnu kud mena daan unuqittona, ag eppelag qaɗelahppa mena heeg, aa ahai gopiɗ.

Barnabas, Saul ele Saiprus gopiɗ

⁴ Kayak Ouɗi Nug he, aa ahai goya, Selusia noya, Selusia appa aa uub laa anidya teya, Saiprus nudppa gopiɗ.

⁵ Saiprus goya, aa Salamis teya, appa Juda dilag nai doyak lag laalappa teya, aa Kayak nai mehuqeheh, Jon Mak nug ele oh daanna, ahilah ehanatak dayom.

⁶ Aa nud Saiprus appa oii oii, nud amuppa aben laih goya, Papos teya, Papos appa aa Juda danab laa anidpiɗ. Nug am onig awak danab, propet hambuppuak ele, Nug onig Barjesus.

⁷ Danab nug nud amunu gawana dayom am onig Sergius Paulus, amu Barjesus nug am nuhig ehanittak danab laa. Aria, Sergius Paulus nug nuhig dabmak ena ele amu, nug Kayaknu nai dookkunu oo dayom amunu, nug Barnabas, Saul ele aa uɗiglahnu onilahppa eum.

⁸ Aa goya, Kayaknu nai mehuqeh amu onig awak danab Barjesus, Grik naippa nug onig am Elimas, nug ahilah ib oonekkunu ha, aa nai madipiɗ ele, amu tappeb nokkunu heum. Nug gawananu dabmak heeb eɗueb, ooppa genab ii doomanu heum.

⁹ Nug anam heum amu Kayak Ouɗi Nug Saul, nug onig laa Pol, Nug nuhigppa ambe, Saul nug Elimas ɠagattag neekkittatta, amegppa aum.

¹⁰ “Na Satan bekka. Na kobol ena oh dilag kekeɗ. Hambuppuak kobol oh amu kobol naunab oh ele na beɗunppa ambaknab. Na hanhan Naɗinu ib tutukku oh heppe, kaliak daaglagnu hettem amu, na kobol amu genab iinab uumna?

¹¹ Aria, da appi doye! Gemu Naɗi eppeg amu na oitteb, amen gaɗueb, aamnu amahlak ii anidnana, nakok haen elab anam daakkut,” awa aum. Pol nug anam aawo, pahanab keeke bud bia Elimas ameg haute, ameg gatatu mane, oiyaknu elele iitta amunu, danab laa ehanitta, ib ippunidkkunu unuqattom.

¹² Am gawana nug keeke amu antta, nug ooppa genab doyom. Aɗinu? Aa Naɗinu nai ippunidpiɗ amu, nug amunu dabmak kuɗum awom.

Barnabas, Pol ele Pisidianu Antiok gopiɗ

¹³ Am Pol nug danab nug ele oh oippig ele ag Papos appanu uub aon gona, Pampilianu aab laa Perga appa goppig. Teeg amu Jon Mak nug uuata, eɗua Jerusalem ukkom.

¹⁴ Ukke amu aa Perganu ahaya goya, aab onig Antiok, Pisidia wanppanu, amuppa teya, Sabat deɗppa aa Juda dilag nai doyak lag ooppa noya daapiɗ.

¹⁵ Juda dilag nai doyak lagnu ikki danab ag ɗo nai yaak amu propet dilag yaak ele ebqewona, dimppa ag Pol, Barnabas ele dilah nai meeg ukke oɗ matan appig. “O lainti, nai laa danab ah ɠagattag aqaglahnu dayeb amu, aria mehuqpeɗ dooglag,” aon appig.

¹⁶ Aon aeg, aria Pol nug aha, eppeg huma, nug aum. “Ag Israel danab, amu ag iitta aɗi danab ag Kayaknu ebehilkad oh bodoetta le mette amu, ag ele oh doyeg!

¹⁷ Ig Israel buɗub daattem amu, ihinig Kayak, Nug ig mamenkad aɗi tituanatta he, ag appateg, dimppa Nug nuhig ɠagattagppa Isipnu eɗua diia uɗiom.

¹⁸ Nug eɗua diia uɗieye amu, atu taɗakppa nug ahilag hak nau amu maɗ 40 Nug mawom.

^19-20 Nug diia uɗia, Kanan wanppa Nug huu eblaih aɗit ele ⌊Israel eppelagppa⌋ haatte nauheg, Nug wan ahilag awa, Israel matte, ag wan amu maɗ 450 anam daaegeg, ahilkad gumak danab, ag am epeɗiak danab, ag benan gumaegeg, ukke ukke, propet Samuel haenppa batak.

²¹ Samuel dayeye, nuhig haenppa Israel ag king aoglagnu aeg, Kayak nug Kis bekka Saul awa me, ahilag king maɗ 40 dayom. Nug am Israel dilag huu okkai Benyaminnu danab.

²² Saul nug king dayom, amge Kayak Nug nug geɗittowa, Dawit Israel dilag king daakkunu tituanowa me, nug Dawitnu inam aum. ‘Da Jesi bekka Dawit anidmi; da aɗi dabmak aottem amu, nug ele amuib aokkunu hette, amu nug am geha dahil nai oh dim lamidkku,’ awa aum.

²³ Amu Kayak Nug anukka nai qakka ana, Nug heeb, Dawit buɗubppan danab laa nug uɗia, Israel dilag eɗua awittak danab daakkunu aum. Eɗua awittak danab amuam Jesus aakkuib. Kayak he uɗiom.

²⁴ Amu Jesus ii nak haenppa Layattak Jon nug Israel, ag oolag eɗueb layattak aoglagnu nai mehuqom.

²⁵ Layattak Jon nug nai mattia, uɗat malakkunu miag dayaya, nug Juda danab amelagppa aum. ‘Ag dahilnu, “Nug am Kristus,” dabmettebte? Anam iitta. Da am Nug iitta. Amge laa Nug da dimulppa uɗitte amu, Nug am danab okkainab, da am okkai iitta; dahil hak am nuhig bia iitta, dahil am elele iittanab iitta,’ awa aum.

²⁶ O lailad, ag laala Abraham buɗubppan danab, amu ag laala iitta aɗi danab ag Kayaknu ebehilag oh bodoetta le mette amu, ag oh doyeg! Kayak Nug danab eɗua diiadkkunu aum amu, Nug ig oh, ihinignu aum.

²⁷ Aria, danab Jerusalem daatteb amu ahilkad ikki danab ele, ag Jesus anidna, ag Nug am laa propet ag uɗikkunu appig amu, ag amu oolag ii maittom. Anam amge haen ag Nug qeeg mauhom, haen amuppa ag propet dilag yaak, Sabat deɗ ohppa ebqetteb ele amu, ag hena, ag nai amu elele medappig.

²⁸ Ag eheɗ hak laappa Nug qeppeg mauhkkunu laa ii anidppig, amge ag Pailat nug hamu qeeb mauhkkunu eppig.

²⁹ Haen ag keeke oh propet ag nuhigppa hekkulagnu yaappig hena malaeg, ag ad emaitakppanu aona, moɗ laappa boumppig.

³⁰ Ag anam heppig amge Kayak he, Nug eɗua hibaittom.

³¹ Nug eɗua hibaittowa, Nug deɗ kuɗum ukkom, haen imuag amuppa danab ag Galilinu ahaeg, nug ele Jerusalem goppig ele amu, Nug ahilagppa tula be anidppig. Danab amu ag am gemu Juda oolagppa Jesusnu aɗi heehe anttomnu mattiak danab daatteb,” awa aum.

³² Aria, Pol nug anam aum amu, nug nai tuɗitta aum. “Ig Nai Ena mehuqttem am inam. Kayak Nug ig mamenkad aɗi amelagppa nai laa qakka aum,

³³ amu haen Nug he, Jesus eɗua hibaittom, amuppa Nug ig, danab amu bekkalkad, Nug ihinignu aakku he, nai amu meu oum. Amuam nai Sam aɗitppa daatte bia. Nai amuam inam. ‘Na am da Bekkal; gemu amu, da na Mamen bemi daattem.’

³⁴ Aria, Kayak Nug he, Jesus Nug eɗua hibaittom, Nug baula ii mauhma, amuam nai Kayak Nug anukka anam hekkunu Aisaia amegppa inam a, nug Israel dilagnu yom. ‘Da Dawit amegppa itittak ena laala medakkulnu nai ain qakkami, nai amuam dahilnu, bekkununab daatte, amu da hein madakkul.’

³⁵ Nai amunu mehuqak diig am Sam laappa inam daatte. ‘Na geha na nahip Laa Oppiaawak Ele, na Nug ii uuidmana amunu, Nug beɗu ii nauhma.’

³⁶ Amunu ig doottem nai amuam Dawitnu iitta. Aɗinu? Dawit nug danab ah nug ele daappig, ag oolagppa Kayak oɗe dim lamittatta oiyaya, nug mauhe, mamekkud aɗi boumadppigppa boumeg, beɗu wan meum.

³⁷ Amge danab imu, Kayak Nug he eɗua hibaittom amu, Nug beɗu ii beɗom.

³⁸ Amunu, O lailad, ag doyeg! Ig Jesusnu uɗat okkai, amuppa ig hipuninnu uhuqa mettaknu nai ag amelagppa mehuqttem.

³⁹ Ɗo Moses eppegppa uɗiom amu, amuam heeb, danab nug genab tutukku hak danab daakkunu elele iitta. Amge danab imu, Jesus, aun aɗi ag nuhignu oolagppa genab dootteb, ag nuhigppa genab tutukku hak danab bena daatteb.

⁴⁰ Ib laa iitta amunu ag kobol laa, propet ag amunu anukka appig ele, ag amu hemananu dabmeig! Propet ag inam appig.

⁴¹ ‘O ag awa awa qettak danab, ag anidna, dabmak kuɗum aonna, mauheg! Aɗinu? Nahip haenppa da keeke laa, danab laa nug na amenppa anam bia ab doolom amu, na ootppa genab ii doolom, amge da hekkul.’ ” Pol nug anam aum.

⁴² Aria Pol, Barnabas ele aa dimittim ukkaeheh, danab ah ag inam appig. “Dimppa, Sabat laappa, aa eɗuya nai amu tuɗidya mehuqpeɗ dootu!” aon appig.

⁴³ Ag anam ana qatina, Juda kuɗum amu iitta aɗi danab ele, ag Juda dilag mettid dim lamidna Kayak noobppa dup nona binag meppig ele, ag ahan, Pol, Barnabas ele dim lamatppig. Amu aa danab amu ag Kayaknu ehanittak okkai hamu megatte ele, ag amunu oolagppa genab doon oiglagnu apiɗ.

⁴⁴ Anam aoya aeh, mettid laippu ukke, Sabat deɗ amuppa amu aab okkai amuppan danab ah oh bia ag Naɗinu nai dooglagnu uɗin qagmeppig.

⁴⁵ Amge haen Juda laala ag danab ah kuɗumnab qagmeeg anadna, ag, ihinigppa anam daalon dabmak aɗan daan, ag ahan, Pol nai mattiom amu, laa ag amu doomnanu, nai amu tabappeg nokkunu henana, ag Polnu nainu nai iɗu iɗu mattin, dappidna, aon aon qedappig.

⁴⁶ Ag anam heppig amge Pol, Barnabas ele aa amunu ii baɗapiɗ. Iitta! Aa nai baɗak iitta ele mattiya amelagppa apiɗ. “Imu genab, i Kayak nai tatam ag amelagppa apuɗ dooglagnunab dayom, amge ag nai bauklel hanhannu imu doon dim lamidkkulagnu uunna, ag akka ag bauklel hanhannu amu aoglagnu elele ii dootteb heeg miag atiak bette amunu, ag imu doyeg! Gemu i ag uuadɗa, iitta aɗi gumadɗa gokkunih.

⁴⁷ Aɗinu? Naɗi Nug i anam hekkunihnu ɗo inam metom. ‘Da na iitta aɗi, ag gatatuppa daatteb, ag ib anidkkulagnu amahlak madakkutnu otidmi. Ao, na iitta aɗi ehanadppe, ag oolag eɗueb Kayak danab ah wan atu ohppanu amu eɗua diiadkku.’ Naɗi Nug anam aum,” awa aum.

⁴⁸ Pol nug anam aum, aria haen iitta aɗi ag nai amu doona, ag oolag gamag ahehe, ag Naɗinu nai amu humidnana, danab ah ag Kayaknu bauklel hanhannu aoglagnu daappig ele amu, ag oolagppa genab dooppig.

⁴⁹ Aria, Naɗinu nai amu wan atu laih appa ohppa tuala ukke dooppig.

⁵⁰ Appanu ag Naɗinu nai dooppig, amge Juda ag ahan, aab okkai amuppan ikki danab amu ah laala onilag ele, ag Kayaknu ebehilkad oh bodoetta le meum amu, ag oolag yaaeg, ag ahan, Pol, Barnabas ele eheɗ haatna, aa wan atu amuppanu lamatppig.

⁵¹ Ag anam heeg amu, aa baeltippanu wan gappud amu appan danab laala ag kobol eheɗ heppig amunu epponak keeke daakkunu, aa aab okkai amu uuya gokkulahnu heyaya, aa gappud amu heeh ne, aa Aikoniam gopiɗ.

⁵² Amu laa ag Jesusnu oolagppa genab dooppig amu, ag maɗoɗppan gamag ahak okkai dooppig. Kayak Ouɗi Nug ag oolagppa ele ambak dayom.