Aposel 11 - Nobonob Baibel

Pita keeke beumnu mattiom

¹ Aria totol danab laa, amu ag lailkad Juda wanppa daappig ele ag oh iitta aɗi ag ele Kayak nai aakku aoppig amu, ag dooppig.

² Doyeg, haen Pita nug eɗua Jerusalem ukke amu, laa ag gaɗa otaɗaknu wagai metteb ele, danab amu ag Pita ele nai aeg ona aeg doum.

³ Ag anam henana, ag Pita amegppa appig. “Na gona, danab gaɗalag ii otaɗak amu laulagppa tena, ag ele daanna, ee laappig,” aon appig.

⁴ Ag anam appig, amge Pita nug keeke oh be, nug heum ele amunu mehuqaqa, amelagppa inam aum.

⁵ “Da Jopa aabppa unuqittette dayeye, da tuleglegppa keeke laa anidmi. Hab attannu keeke laa lamen okkai bia muɗi waɗele daug waɗeleppa qakkak dayeye, paɗaeg gumiɗa ne anidmi.

⁶ Keeke amu ne, da lamen amu ooppa neekke, da doɗ manan, dakkuɗ ele iɗu iɗu, mat keeke iɗu iɗu, ai hagagaɗna oitteb iɗu iɗu ele anam anadmi.

⁷ Anam anitti amu, baag laa da amelppa aum. ‘Pita na ahan, doɗ imu aqana la!’ awa aum.

⁸ Nug anam aum amge da ami. ‘Naɗi, da deɗ laa Juda dilag ɗoppa doɗ ii lanaknu epeɗiak daatte da oɗelppa amunu teppu nakok laa ii memi, gemu ele da ii lattem,’ awe ami.

⁹ Ami amge baag hab attannu baula nai mattia, da amelppa aum. ‘Kayak Nug he, ee laa lanaknu epeɗiak daatte amu, na ee amunu, “Ii lanaknu epeɗiak daatte,” aib ame,’ awa aum.

¹⁰ Lamen okkai amu nug ne, haen ewam bate, aria ⌊Kayak he⌋ keeke amu eɗua, hab aabppa teum.

¹¹ Da keeke amu anam anitti, eɗua teete amu, danab ewam ag uɗin lag da daami ele amuppa doppig. Danab laa Sisaria daatte amu, nug he da omaiɗkkulagnu uɗippig.

¹² Ag uɗieg amu Kayak Ouɗi Nug da amelppa aum. ‘Na ahappe ag ele ukkeg! Dabmak kuɗum aib aome!’ awa aum. Aakku da ukkaiyi, lailad danab eblaih laippu ele imu, ag da ele oh gota, ig Jopa danab amu laugppa temut.

¹³ Lakka teut, danab amu nug engel, nug laug ooppa noa hibaitta dayaya, nai amegppa aum amu nug amunu ig amenigppa mattiom. Kornilius nug engel inam aumnu ig amenigppa aum. ‘Na danab heppe, Jopa gona, ag Saimon, nug onig laa Pita, nug appeg uɗia,

¹⁴ nug geha na amenppa nai laala mehuqeb dooppe, Kayak Nug na, amu na baenadppa oh ag ele oh eɗua diiadkku.’

¹⁵ Nug anam mattie, aria da ahen, nai digmein mattiyi, Kayak Ouɗi ahilagppa neum; Nug tatam digmakppa ihinigppa ne, ig aomut amubia aakku.

¹⁶ Am da amu anttena, Naɗi nai aum amu, nai amu aakku daulppa doum. Nai amuam inam. ‘Layattak Jon nug leppa danab ah layattom, amge geha ag amu, ag leppa layattak aoppig bia Kayak Ouɗippa layattak aoglag,’ awa aum.

¹⁷ Amu anukka tatam ig Naɗi Jesus Kristusnu oonigppa genab doomut amu, Kayak Nug nuhig Ouɗi ig mekkom, anamib gemu ag ele Kayak Nug ag mattom. Kayak hette amunu, da nuhig ib oo ii nepa.” Pita anam awa aum.

¹⁸ Pita nug anam awa a, ag nai amu doyona, ag nai ahilag madippig amu uuna, ag Kayak binag mena appig. “Kayak heehe, iitta aɗi danab ele ag oolag eɗutte, bau dayak aotteb,” aon appig.

Kristen tamaniak Antiok aabppanu

¹⁹ Amu ag Stiven qeeg mauhe, amu dimppa ag tamaniak heppeg nauhkkunu heppig, diig amunu danab ag oolagppa genab dooppig ele, ag matatun goppig amu, ag Ponisia, Saiprus amu Antiok ele batak gona daappig. Daanna, ag danab oh amelagppa Nai Ena ii mehuqppig. Iitta. Ag Juda danabib amelagppa Nai Ena mehuqppig.

²⁰ Aria, ag anam heppig, amge ag oolagppanu danab laippu laippu, ag am Saiprus amu Sairini danab ele, ag gona, Grik danab Antiok daappig ele amelagppa Naɗi Jesusnu Nai Ena mehuqppig.

²¹ Ag anam heegeg, Naɗinu ɠagattag ag ehanattette, danab ah kuɗum ag oolagppa genab doon, oolag eɗue, ag Naɗi oolag medappig.

²² Ag Naɗinu oolagppa genab doyeg, Kristen tamaniak Jerusalemnu ag nai amu doona heeg, Barnabas Antiok ukkom.

²³ Haen nug Antiok ukka teum amu, nug danab ah ag Kayaknu ehanittak okkai hamu mettak, ag ehanittak amu aoeg, ag oolagppa uɗat heehe, ag Kayak dim lamidppig antta amu, nug oo gamag ahe, dabmak aoglagnu, ag hanhan ag oolag Naɗiib mettan oiglagnu ɠagattag aqom.

²⁴ Barnabas nug danab ena, Kayak Ouɗi nug ooppa ambak daye, nuhig ooppa genab doyak am ele ɠagattag amunu nug danab ah ehanattette, danab ah kuɗumnab ag Naɗinu oolagppa genab dooppig.

²⁵ Aria, Barnabas nug Saul anidkkunu Tarsus ukka

²⁶ antta, nug omale Antiok ukkaeh, maɗ laippu Kristen tamaniak appanu ele daanna, aa danab ah kuɗumnab Kayak nai ippunadpiɗ. Antiok appa danab ag tatam digmena, danab ag Jesusnu oolagppa genab dooppig, ag ahilagnu, Kristen appig.

²⁷ Aria, haen amuppa propet laala ag Jerusalemnu ahan Antiok noppig.

²⁸ Ag noeg, Kayak Ouɗi Nug propet laa onig Agabus ippunitte aha, geha enug haen naɗi Rom wan ohppa bekku, nug amunu nai mattiom. Amu dimppa Klodias nug king dayeye, haen amuppa enug haen amu beum.

²⁹ Amu be, Kristen ag nai laippu anana, ag men doɗo ag lailkad Juda ehanadkkulagnu meppeg gokkunu dabmeppig. Kristen oh ag beɗulagppa men doɗo gane daatte amu doona, ag laih uɗat amunu otippig.

³⁰ Ag otin, ag men doɗo amu qagmena, Barnabas, Saul ele mataeg, aa men doɗo amu aoi goya, Jerusalemnu tamaniak ikki danab eppelagppa mepiɗ.