Amos 8 - Nobonob Baibel

Kaleg ad meu inak ele

¹ Amu Naɗi Yawe, Nug ⌊tulegleg laappa⌋ kaleg laa, amuppa ad meu lep meum inak daye ippuniɗom.

² Nug ippuniɗa, da oɗ meɗom. “Amos, na aɗi anidttem?” awa oɗ meɗom. Oɗ meɗe, da ami. “Da kaleg laa, ad meu lep mak inak ele daatte anidttem,” awe ami. Da anam ai, Yawe Nug da amelppa aum. “Israel danab ah ag hipunin heegeg, ad meu lep meum, haen amuppa danab aotte, amubia ag bu awaknu haenppa aakku daatteb. Da uuadppi baula hamu ii oimna. Da bu madakkul.

³ Gemu ag dahil mettid lag appa ahi edatteb, amge haen amuppa ag appa mahiglag. Mauhak gaɗalkad huanak daaglag. Laa ag nai mattiak iitta ele, oqotti laa ele iitta ele gaɗalkad amu akkan, aab dimittim gokkulag.” Naɗi Yawe Nug anam awa atte.

⁴ Israel danab ah, ag laa keekenu tutu mak daatteb ele, ag ag eheɗ hattaeg nauhtteb amu, ag imu doyeg! Ao, ag Israel danab ah, ag daɗek danab ah dilagppa eheɗ hattaeg, ag wanppa ii daatteb amu, ag doyeg!

⁵ Ag akka ag inam atteb. “Kalam baunu qagmak gamag ahak ele imu paha iitta meeb, ig gota, ig ee daden maknu abenppa laa daden mekkulagnu ee mekkunignu oonig hette,” aon atteb. Ao, ag, “Ig Sabat imu iitta meeb, ig gota wit dadennu mekkunignu oonig daatte,” aon atteb. Ag maket henana, ag doonna skel eheɗppa uɗat heeg, keeke danab aotteb ele am happiak, elele ii aon, men doɗo amunu awaknu ele, eleleppa ii aotteb. Iitta. Ag men doɗo attan tak mattan aotteb.

⁶ Ag daɗek danab ah ahilkad maɗi nid daaglagnu silwappa daden maadtteb. Ge, ag laa keekenu tutu mak daatteb ele, ag nob honapnab, baeg gaɗa, amuppaib ag ahilkad maɗi nid daaglagnu daden metteb. Ag ele ee aeg mumuɗak abenppa wit, kinipap ele tatakppa awak, ag amu meegeg, laa ag daden metteb.

⁷ Ag anam hetteb, amge Yawe, Israel dilag Kayak, Nug Nug onigppa nai imu ɠagattag qetta, inam atte. “Da ahilag kobol nau ohnu amu, da daul iinab atima,” awa atte.

⁸ Hipunin ag heppig ele amu, ahilag wan oh amunu iite uɗalkku; danab ah oh appa daatteb amu, ag iite mahiglag. Le Nil, amuam Isipnu le okkai, am titiɗa ba, ebehi ele ugakka, eɗua hiɗatte; amubia Israel wan oh am uɗalak nau awowa, na qekku.

⁹ Amu Naɗi Yawe Nug inam atte. “Haen amuppa da heppi, aam anig amu, aam nokku; aam anig gatatu na, wan tonakku.

¹⁰ Ag gemu hobul dayaknu gamag ahak dootteb, amge haen amuppa da heppi, ahilag hobul dayak haen anen anen am gamag ahak haen ii daamna. Iitta! Mahiak haen daaglag. Ao, gemu ag ahi edatteb, amge haen amuppa da heppi, ag ahi ii ettamna. Iitta. Ag gayakib gaaglag. Haen amuppa da heppi, ag oh oolagppa uug nau doon, lamen heɗiag ele takkan, ag ikkilkad uɗug hoiglag. Yo, da heppi, haen amuppa ag nid danab laippuib mauhe, anig mameg mahittep bia mahiglag. Ge, haen amu gogppa tak, amuam deɗ nau ninig ele daatte bia daakku,” awa atte.

¹¹ Naɗi Yawe Nug inam atte. “Haen laa uɗitte amu, da heppi, keeke enug haen bia Israel wan oh tonakku, amge eenu enug haen, o lenu qaɗaiettak haen iitta. Iitta! Enug haen amuam da Yawe, dahil nainu enug haen. Danab ah ag dahil nai dooglagnu oolag hekku, amge amunu enug haen daakku.

¹² Haen amuppa amu, danab ag da, Yawe, ag dahil nai dooglagnu, ag Mediterenia yu, Mauhak Le ele gamagppa laih wana, eɗun laih dona, ag yawalti uɗitteppanu gona, eɗun kaɗag uɗitteppanu gona oin mattinna, aben amu ohppa dahil nai ii anidmana. Iitta.

¹³ Deɗ amuppa nid ahin iɗu tuqak ele, nid gaiɗ beɗulag ɠagattag ele, ag le ⌊amunu⌋ baalag diieb, ii anidna, mauhak bia nena qekkulag.

¹⁴ Danab ah ag kayak hambuppuak Samaria daatteb onilag diin, ahilag nai ɠagattag qedatteb, o ag, ‘Dan danab, ahilag kayak genab bau daatte, genab amubia,’ o ag, ‘Berseba appa kayak laa genab bau daatte, genab amubia,’ atteb amu, danab ah amu ag nena qena, baula eɗun ii ahamna.” Yawe Nug anam awa atte.