Amos 7 - Nobonob Baibel

Tap-lokusnu nai, plam lainnu nai ele

¹ Naɗi Yawe Nug tuleglegppa imu ippuniɗom. Tulegleg amuppa Nug heeb, tap-lokus ag huanaknab appatna uɗin, wan tonaglag ippuniɗom. Danab ag dad okkaippanu keeke kingnu daatte, ag amu aon mettona, ag dim eppaknu keeke ele eppan malaeg, digma bekkunu heehe, haen amuppa tap-lokus amu uɗippig tuleglegppa anidmi.

² Aakku uɗippig antten, da tuɗitten tuleglegppa, tap-lokus ag uɗin, wanppan keeke oh am beegeg laeg iitta meum anidmi. Wanppa keeke bau laa ii dayom. Da tulegleg anam antten, da emi. “O Naɗi Yawe, na Jakop buɗub dilag hipunin uhuqna madakkutnu oɗ medattem. Jakop buɗub ag kuɗumnab iitta amunu, tap-lokus ag amu heppeg, Jakop buɗub oh mauhkkulag,” awe emi.

³ Da anam awe ei, Yawe Nug oo bodoetta le me, “Amuam ii bema,” awa aum.

⁴ Naɗi Yawe amu ana, nug tuleglegppa keeke laa ippuniɗom. Tuleglegppa Nug danab ah bu matta he, wanppa aab ewak dayaya he, wanppan keeke oh nauhe, yu ele qaɗaiettom.

⁵ Naɗi Yawe Nug anam ippuniɗe, da emi. “O Naɗi Yawe, da na amu hemananu oo doyak ele unuqidttem. Jakop buɗub am kuɗum iitta amunu, na heppe, aab ewak wanppa anam eweb amu, Jakop buɗub oh mauhkkulag,” awe emi.

⁶ Da anam awe ei, Naɗi Yawe Nug oo bodoetta le me, “Amu ele ii bema,” awa aum.

⁷ Naɗi Yawe Nug anam ana, Nug ⌊tulegleg imu ele⌋ ippuniɗom. Nug gilil tutukku eppa tak daugppa daya, nug tuls laa, amuam plam lain, tuls amu Nug eppegppa aɗom.

⁸ Da tuleglegppa amu anitti, Yawe Nug da oɗ meɗom. “Amos, na aɗi anidttem?” awa oɗ meɗom. Nug anam oɗ meɗe, da ami. “Da plam lain anidttem,” awe ami. Da anam ai, Naɗi Nug da amelppa aum. “Antte! Danab nug gilil keeke, tutukku tak daakkunu, ikki laih imu o laih umu ukkak ii daamanu, nug plam lain aɗa anidtte, amubia da Israel danab ah ag tutukku, o iitta epeɗiadkkul. Da tuɗitten, bu madakkulnu ii uupa. Da bu madakkul.

⁹ Da heppi, Aisak buɗub ag kayak hambuppuak dilag mettid lag nakok bappaidppig ele amu, kekeɗ ag amu oh heppeg nauhkkulag. Ao, lag Israel danab ah ag appa kayak hambuppuak noolagppa dup nona binalag metteb ele amu, kekeɗ ag lag amu oh loppaɗppeg nauhkkulag. Amu da qep elabppa heppi, Israel dilag king Jeroboam buɗub laa sia king amuppa daakkunu ii daama,” awa aum.

Propet Amos, mana mettak danab Amasaia ele aa nug mehqepiɗ

¹⁰ Amos nug nai amu mattie, Amasaia, Betelnu mana mettak danab, nug nai imu Israel dilag king Jeroboam toppa me ukkom. “Amos nug Israel danab ah oolagppa noa he, ag na kekeɗ mettaglagnu daatteb. Nug nai huan huan maditte, amu na nug uuidppe daakku, nuhig nai heeb, wan imu nauhkku.

¹¹ ⌊Amuam genab.⌋ Aɗinu? Amos nug inam atte. ‘Jeroboam nug geha qep elabppa mauheb, kekeɗ ag Israel danab ah diin, ag diia ukka laih me dayak danab ah wan laappa, ahilag wan iittappa daaglagnu gokkulag.’ Nug anam atte,” awa aum.

¹² Amasaia nug nai amu me ukke, nug Amos amegppa inam aum. “Propet, na ahe! Na eɗun gona, Juda wanppa appa propet nai madippe, ag na amunu nob daden metteg!

¹³ Baula na propet nai Betel ippa aib mattime! Aɗinu? Mettid lag imuppa amu king nug dup noa binag mak hette. Lag imuam Israel dilag mettid lag,” awa aum.

¹⁴ Amasaia nug anam mattia male, aria Amos nug nai nob ma aum. “Da daden aokkulnu propet uɗat ii hettem, amu da ele propet dilag huu laa oolagppa ii daattem. Aɗinu? Da ehanittak aokkulnu, da sipsip gumak danab daye, da ad fig ele atognoatte dabmatten daami.

¹⁵ Amge Yawe Nug sipsip gumak uɗat dahilppanu awiɗa, Nug inam amelppa aum. ‘Na gona, Israel, dahilad danab ah, na ag amelagppa propet nai mattie!’ awa aum. Nug anam aum amunu, da uɗimi.

¹⁶ Yawe Nug da meiɗe uɗimi amunu, Amasaia, na Yawenu nai doye! Na dahilnu attem, ‘Na uug naunab Israel dilagppa beeb anidkkulagnu propet nai baula aib mattime! Ao, na baula Aisak buɗub dilagppa uug naunab aqakkunu, na nai amu baula aib mattime!’ aon attem.

¹⁷ Na da baula amunu ii madipanu attem amunu, Yawe Nug inam atte. ‘Uug naunab nahip-ppa bekku. Beeb, ah nahip nug aab okkai imuppa ib baag ah daakku. Nid danab nahipad, nid ahin nahipad ele amu, kekeɗ ag qep elabppa aqappeg mauhkkulag. Wan nahip amu, laa ag oppatppeg neeb, panin aoglag. Na amu, na wan laappa, wan imuppa iitta, laappa mauhkkut. Wan amuppa ag Kayak ii dimlamidtteb; ag kayak laa dim lamidtteb. Nahip-ppa anam beeb amu, kekeɗ ag heppeg, Israel ag genabnab genab ahilag wan imuppanu ahan gona, diia ukka laih me dayak danab ah wan laappa daaglag.’ Yawe Nug anam awa atte,” awa aum.