Amos 6 - Nobonob Baibel

Israel ag bu aoglag

¹ Ag ikki danab aab okkai Sion appa daan, “Ig enaib daat oignig,” doon oiyegeg, amu ag ikki danab Samaria appa daanna, “Ihinigppa uug laa ii bema,” dabmenan oitteb; ag am huu laa Yawe tituanatte, ag Israel danab ah oh dilag danab okkai daaeg, Israel danab ah ag ahilagppa ehanittak aoglagnu uɗitteb ele amu, ag oh, ahilagnu am gadonnab gadon.

² Ag gona, Kalne antteg! Aria, gona Hamat, onig, ɠagattag ele, amu anidna, gona Gat, Pilistia wanppa appa ele antteg! Ag Juda, Israel ele ag ɗo maɗoɗ ewam amu daappig bia laippu bia daatteb, ag ag ii eɗadtteb ⌊amunu, ɗo maɗoɗ ewam kekeɗ eppelkadppa uug naunab aoppig bia, ag Juda, Israel ele, ag ele uug naunab anidkkulag⌋.

³ Ag Israel, Juda ele dilag ikki danab, ag, “Uug anttaknu haen ihinigppa miag ii beum daatte,” aon atteb; ag amu anana, ag kobol ag hetteb amu, ag kobol amuppa uug naunab anttaknu deɗ aakku aoeg, miag doum daatte.

⁴ Ag qaɗaqaɗ, amuppa kobol kobol hoiyak daatteppa elepan aeg babaittak qataqak ele, ag amuppa niitteb; ag sia okkai enanagppa ele hamu daatteb. Ag sipsip nag enanag teppulag latteb; ag ele makau nag, amge ittag huanak ele teppulag latteb.

⁵ Ag harp qenana, ahi hamu hamu ettanna; Dawit nug musik haknu keeke digdig hattombia, ag hetteb.

⁶ Ag wain huana latteb; ag goɗen muttuɗig enanagnab, daden nob okkai ele laatteb. Ag amu oh hetteb, amge ag Israel padal mekku, ag amunu dabmena, oolag ii dootte; ag amunu dabmak nakok laa ii aotteb.

⁷ Anam amunu, kekeɗ ag ag tatam diin, aab laappa, appa ag diia ukka laih me dayak danab ah daaglagnu gona maadkkulag. Ag anam heppeg, ag baula hamu dayak, ee hobul okkai ele ii hemana.

Yawe Nug Israel dilag dada haknu ooppa uuaknab dootte

⁸ Naɗi Yawe Nug nukka Nug onig awa, nuhig nai ɠagattag qetta, Nug, Nug Yawe Kayak Nukka Ɠagattag Oh Ele, Nug inam atte. “Jakop buɗub, ag dada danab dilag kobol dim lamidtteb amu, da amunu oolppa uuaknab doottem. Ao, ag aab aɗ ɠagattagnab ele bappaladppig amu, da keeke amunu ele oolppa uuaknab doottem. Da anam doottem amunu, da kekeɗ paɗadppi, ag aab okkai ahilag imu eɗidppeg, aab amu, danab ah, keeke oh aab amuppa daatte ele am kekeɗ eppelagppa daaglag,” awa atte.

⁹ Amu kekeɗ ag aqadppeg ukkeb, lag laippuppa danab eblaih laih ele ag bau daaglag dayeb amu, ag ele mauhkkulag.

¹⁰ Amu tiilag laippu aɗit laa aa uɗiya, gaɗalag aoya gokkulahnu uɗiya heyaya, laa nug laa, “Gaɗa laa anidmete?” oɗ metteb, laa nug amegppa, “Iitta,” akku. Nug anam ab amu, laa oɗ meum ele nug akku. “I Yawe onig diiɗa iinab akkunihoitte amunu, na nai laa aib mattime!” awa akku.

¹¹ Amuam genab bekku. Aɗinu? Yawe Nug amu haknu ɗo meum, Nug ɗo meum amunu, kekeɗ ag lag okkai loppaɗadppeg, nauhna autna aon, maha naunauib daaglag. Ao, ag lag naunau ele heppeg, nauhna autna aon, huppu huppu naunaunabib daaglag.

¹² Hos ag qauko igippa menppa qaiettan ii oitteb. Ao, appa danab ag dad hekkulagnu makau okkai ebehi eleppa wan ii buutteb amunu, aɗinu ag Israel danab ⌊laa,⌋ nai doya mala hettoɗia epeɗia elele mettak kobol aon kabolin heeg, uud tiig mua nau ele bette. Ao, ag Israel danab ⌊laa⌋, aɗinu ag heeg, genab tutukku hak kobol am uud ad tiig mua ele, danab lawowa, ena iinab dootte, am amubia daatte?

¹³ Ag amu hetteb ele amu, ag aab Lo Deba eɗidna aoppignu gamalag ahatte. Ao, ag dada hena, ag aab Kamaim eɗidna aoppignu, ag, “Ig ikka, ihinig ɠagattagppa eɗadta aomut,” aon atteb.

¹⁴ Ag eheɗ amu hetteb amunu, Yawe Kayak Nukka Ɠagattag Oh Ele Nug atte. “Da heppi, kekeɗ ag uɗin, ag eɗadna, Lebo Hamat appanu ukka ukka, oolnu noak Araba, appa batak ag eheɗ hattaglag.”